ECI OMÕLANGE Gary a citiwa kunyamo wo 1958, nda limbuka okuti wa kuata ocitangi cimue. Olondotolo via konomuisa ocitangi caye vokuenda kuolosãi ekũi, kuenje eci pa pita anyamo atãlo, oco olondotolo vio ko Londre vieya oku limbuka noke ocitangi caco. Pole, esumuo liange lia livokiya noke lianyamo ecea eci omõlange Louise a citiwa luvei ukuavo okuti, wa Gary u sule.

Ndotolo wa ndi sapuila hati: “Omõlove wa citiwa luvei umue okuti, ka u kuete ovihemba vioku u sakula.” a Kotembo yaco, lomue wa kũlĩhĩle uvei waco. Momo mua kongelele ehonguo liovaso li koka upeke, oku lẽla calua, ocitangi cokuti oñaña ka yi kuli lonjanga, ondiambete, uvei wakepa, kuenda wapuvi. Nda liyaka locitangi coku tata omãla vange vavali. Akonomuiso a sulako a lekisa okuti, ko Grã-Bretanya, kuli omanu valua va kuate uvei waco.

Noke yoku tokekisa olohuela viange, nda sapela la umue Ombangi ya Yehova kuenje, nda limbuka okuti nda sanga ocili. Pole, ulume wange ka tavele oku lilongisa Embimbiliya. Omo liupange waye, tua enda oku ilukila kovitumãlo vialua, kuenje sia tẽlele oku endaenda kolohongele. Pole, nda amamako oku tanga Embimbiliya loku likutilila ku Yehova. Nda lembelekiwa calua poku tanga olondaka vi popia hati: ‘Yehova eye ocitililo comanu va fukĩlisiwa, kuenda ocitililo kotembo yohali. Momo ka yanduluka vana vo sanda.!’—Osa. 9:9, 10.

Omo okuti omõlange Gary ka letele ciwa, eci a tẽlisa anyamo epandu, wa tumiwa ko Inglaterra kosikola yimue ku tangela vana va kuete ocitangi vovaso. Olonjanja vialua wa enda oku ndi vilikiya votelefone loku ndi sapuila ovitangi viaye pole, ndo kuatisa oku sanga elomboloko lieci Embimbiliya li popia. Noke lianyamo amue eci manjaye Louise a citiwa, nda kuatiwa luvei wociteyateya, kuenda ukuavo u kavisa etimba liosi. Gary wa tiuka konjo eci a tẽlisa 16 kanyamo. Pole, uvei waye wo vovaso weya oku livokiya kuenje, kunyamo wo 1975 olondotolo via ndi sapuila hati, wa linga omeke. Kunyamo wo 1977 ulume wange wa tu siapo.

Eci omõlange Gary a tiuka kosikola a kala oku tangela, tua fetika oku linga ovopange ekongelo, kuenje, nda papatisiwa kunyamo wo 1974. Ndeca olopandu kukulu umue wekongelo wa kuatisa Gary oku liyaka locitangi cupeke eci a kala umalẽhe. Vamanji vakuavo va ndi kuatisa kupange wo vonjo, noke kua nõliwa vatãlo va enda oku tu lingila ovopange akuavo okuti va fetiwa lombiali. Oku kala la vamanji ci nena esumũlũho!

Gary wamamako oku kuata ukũlĩhĩso Wembimbiliya, kuenje wa papatisiwa kunyamo wo 1982. Omo okuti wa yonguile oku kala ukundi wa sokamo, nda nõlapo oku endaenda kumue laye kupange woku kunda vokuenda kuanyamo alua. Omõlange weya oku sanjuka calua eci eteke limue manji o nyula a kongelo o pulisa hati: “A manji a Gary, momo lie ku kalela ukundi wotembo yosi?” Epulilo eli lio vetiya calua, kuenje kunyamo wo  1990 wa linga ukundi wotembo yosi.

Manji Gary wa sakuiwa olonjanja vivali. Yatete, kunyamo wo 1999, kuenda yavali kunyamo wo 2008. Pole, manjaye Louise uvei waye weya oku livokiya. Momo wa citiwa okuti omeke, kuenje nda limbuka okuti wa piñalavo uvei wetu tulonjali. Vekonomuiso olondotolo via linga, via limbuka okuti, wa kuata uvei vovimatamata vialua vietimba. Omo liaco, wa pelaliwa olonjanja vialua oku kongelamo olonjanja vitãlo kolongẽla. Manji Louise wa kuatavo uvei wondiambete nda kota liaye Gary.

Omo Louise wa kũlĩhĩle okuti oku pelaliwa ku nena ovitangi, wa vangula la ndotolo oco ka ka kapiwe osonde. Eye wa kuata esanju momo olondotolo via tava kocisimĩlo caye.

Tua enda oku linga ovina vialua konjo yetu oco tu fendele Yehova. Omo okuti ka kua kalele olomakina vi kuatisa oku yevelela oku tangiwa Kuembimbiliya kuenda alivulu akuavo. Nda enda oku pita otembo yalua loku tangela ovipama vimue manji Gary kuenda Louise. Cilo, tu kuete alonga angalavaliwa, a kapiwa vonumbi yetu yo www.pr418.com okuti, a tu kuatisa oku longisa Embimbiliya, kuenda oku eca atambululo kolohongele.

Ndaño okuti manji Gary omeke, pole wa siata oku eca atambululo a patekela. Kuenje, nda o kuete onepa Kosikola Yupange Wakristão, o yi linga ciwa. Eye wa linga oñuatisi yekongelo kunyamo wo 1995, kuenda o kuete ocikele coku yolela vamanji Vonjango Yusoma loku kuatisa kocisanji covileñi.

Vamanji va siata oku enda laye kupange woku kunda, loku u kuatisa oku sindika omangu yaye yalola. Umue pokati kavamanji, u kuatisa oku longisa Embimbiliya komunu wa lekisa onjongole. Eye wa kuatisavo manji umue okuti tunde eci a liwekapo oku kunda pa pita 25 kanyamo. Cilo, wa fetika vali oku endaenda kolohongele.

Eci manji Louise a kuata anyamo ecea, ame kumue la inakulu yaye tuo longisa umesele woku tuta uwalo, loku tata omanu. Omo okuti wa sanjukilile oku linga upange waco, wa enda oku panga uwalo woloñaña kuenda wakulu vamue vekongelo. Eye wa endavo oku panga ovipete loku sonehamo olondaka vimue viwa. Kuenje, vana va tambula ovipete viaco va enda oku kuata esanju. Eci manji Louise a kala umãlehe, wa lilongisavo uloño woku soneha komakina. Lekuatiso liokomputador, cilo wa siata oku tumisa ovikanda kakamba vaye. Eye wa papatisiwa eci a kuata 17 kanyamo. Eci kua lingiwa upange ulikasi woku kunda, ame kumue laye, tua kala a kundi va sokamo. Ndeci kota liaye Gary a linga, eye wa lekisa ekolelo poku patekela ohuminyo ya Suku yokuti, ‘ovaso olomeke a ka patuluka, kuenda lomue omunu o ka popia hati: Ndi vela.’—Isa. 33:24; 35:5.

Tu kuete esanju omo lioku kolela Kondaka ya Yehova! Tua sanjukilavo ekuatiso tua siata oku tambula vekongelo, momo tu tẽla lika oku linga upange wetu lekuatiso lia vamanji. Tu kuetevo esanju omo Yehova a siata oku tu kuatisa oku limbuka okuti omuenyo wetu u kuete esilivilo.