MUSI murwa wanga Gary a tshi kha ḓi bva u bebwa nga 1958, ndo ṱhogomela uri hu na zwithu zwo khakheaho khae. Naho zwo ralo, zwo dzhiela madokotela miṅwedzi ya fumi vha sa athu u ḓivha uri o farwa nga mini nahone zwa dovha zwa dzhia miṅwe miṅwaha miṱanu musi muṅwe muḓivhi wa ngei London a tshi khwaṱhisedza vhulwadze hawe. Ndo pfa ndo kulea nungo musi ndi tshi beba ṅwana wa musidzana ane a pfi Louise nga murahu ha miṅwaha ya sumbe musi Gary o no bebwa, e na vhu vhulwadze vhuhulwane vhu fhiraho ha Gary.

Madokotela vho mmbudza u ri: “Vhenevho vhana vhaṋu vhavhili vha na vhulwadze ha LMBB, * nahone ni fanela u zwi ṱanganedza.” Nga tshenetsho tshifhinga, ho vha hu si na nḓivho yo engedzeaho nga ha vhulwadze honoho. Zwiṅwe zwithu zwi katelwaho nga vhulwadze honoho ndi u kundelwa u vhona, u khwaṱhesa, u vha na minwe yo engedzeaho zwanḓani kana milenzheni, u sa aluwa lwa nzulele, u sa kona zwavhuḓi u shumisa miraḓo ya muvhili, vhulwadze ha swigiri, u zwimba marambo na thaidzo dza tswio. Nga zwenezwo, u alusa vhana vhanga zwo vha zwi songo leluwa na luthihi. Ṱhoḓisiso ya zwenezwino i sumbedza uri kha vhathu vha 125 000 vha ngei Britain, muthihi wavho u na vhulwadze honoho, vhaṅwe vha nga kha ḓi vha vhe na vhulwadze honoho, fhedzi vhu si vhuhulwane.

Nga murahu ha musi ndo no vhingwa, ndo amba na muṅwe wa Ṱhanzi dza Yehova nahone nga u ṱavhanya nda zwi ṱhogomela uri vha funza ngoho nga ha Bivhili. Fhedzi munna wanga o vha e si na dzangalelo na luthihi. Nga nṱhani ha mushumo une a u ita, tshifhinga tshoṱhe ro vha ri tshi dzulela u pfuluwa, nga zwenezwo zwo vha zwi tshi nkonḓela u ya miṱanganoni. Naho zwo ralo, ndo bvela phanḓa ndi tshi vhala Bivhili na u rabela Yehova. Zwo vha zwi tshi khuthadza vhukuma u vhala uri “Yehova ndi dzhavhelo ḽa vhaheḓana, dzhavhelo musi vhó khakhelwa. U fulufhelwa nga vha ḓivhaho dzina ḽau, ngauri a U laṱedzi vha U ṱuvhaho”!—Ps. 9:9, 10.

Gary o vha a sa koni u vhona zwavhuḓi, musi e na miṅwaha ya rathi o iswa tshikoloni tsha vhaholefhali, he a vha a tshi dzula hone ngei tshipembe ha England. O vha a tshi dzulela u nthwela luṱingo malugana na zwithu zwine zwa mu vhilaedzisa, nahone ndo vha ndi tshi kona u mu thusa u pfesesa maitele a Bivhili a mutheo musi ndi tshi khou amba nae nga luṱingo. Nga murahu ha miṅwaha musi Louise o no bebwa, ndo mbo ḓi thoma u lwala, ndo farwa nga vhulwadze ha multiple sclerosis na fibromyalgia. Gary o vhuya hayani a tshi bva tshikoloni e na miṅwaha ya 16. Naho zwo ralo, u sa vhona hawe zwavhuḓi ho ḓa ha hulela, nahone nga 1975 zwo mbo ḓi khwaṱhisedzwa nga lwa mulayo uri o pofula. Nga 1977 munna wanga o ṱuwa hayani.

Nga u ṱavhanya musi Gary a tshi vhuya hayani, ro ṱanganela tshivhidzoni tshi re na lufuno, nahone nda lovhedzwa nga 1974. Ndo takala vhukuma musi muhulwane a tshi thusa Gary u lwisana na tshanduko dze a vha a tshi khou dzi tshenzhela miṅwahani yawe ya vhufumi. Dziṅwe Ṱhanzi dzo nthusa kha mishumo ya hayani, nahone mafheleloni muvhuso wo ṅwalisa ṱhanzi ṱhanu uri dzi vhe vhaunḓi vhashu. Zwo vha zwi phaṱhutshedzo khulwane lungafhani!

Gary o bvela phanḓa zwavhuḓi ngohoni nahone a lovhedzwa nga 1982. O vha a tshi ṱoḓa u vha muvulanḓila wa u thusa. Nga zwenezwo, ndo ita phetho ya u shuma nae nahone nda bvela phanḓa ndi tshi ita nga u ralo  lwa miṅwaha yo vhalaho. Murwa wanga o takala vhukuma, musi tshiṅwe tshifhinga mulavhelesi wa ḽiisela a tshi mu vhudzisa u ri: “Gary, ndi ngani ni sa vhi muvulanḓila wa tshifhinga tshoṱhe?” Yeneyo yo vha i ṱhuṱhuwedzo ye Gary a vha a tshi i ṱoḓa, nahone nga 1990 o mbo ḓivha muvulanḓila wa tshifhinga tshoṱhe.Gary o vha o no itwa miaro mivhili ya u dzheniswa shambo kha khundu, wa u thoma yo vha nga 1999 nahone wa vhuvhili nga 2008, fhedzi mutakalo wa Louise wo vha u si tsha vha wavhuḓi. O bebiwa a sa vhoni na luthihi, nahone musi ndi tshi vhona munwe wo engedzeaho mulenzheni wawe, ndo zwi ṱhogomela uri na ene u na vhulwadze ha LMBB. Ndingo dzo dzumbulula uri miraḓo ya muvhili wawe ya nga ngomu yo vha i na zwo khakheaho. Musi miṅwaha i tshi khou ḓi ṱanḓulukana, o itwa miaro mihulwane, u katela na miaro miṱanu kha tswio dzawe. U fana na Gary, o vha e na vhulwadze ha swigiri.

Samusi a tshi ḓivha vhuleme hune ha vha hone musi hu tshi itwa muaro, Louise o amba na madokotela, vhadzidzivhadzi na vhahulwane vha vhuongeloni hu tshee nga phanḓa u itela u vha ṱalutshedza nga ha phetho yawe ya u sa shelwa malofha musi a tshi alafhiwa. Nga zwenezwo, u ḓiphina nga vhushaka havhuḓi na vhoṱhe vhe vha ṱhogomela vhuleme ha mutakalo wawe.

Ri ita zwithu zwinzhi hayani hashu musi ri tshi gwadamela Yehova. Musi hu sa athu u vha na zwishumiswa zwa thekinolodzhi, ndo vha ndi tshi fhedza awara nnzhi ndi tshi vhalela Gary na Louise. Zwino dzi-CD, dzi-DVD na khandiso dzo rekhodiwaho dzi wanalaho kha www.pr418.com dzi ita uri ri ḓifhelwe nga pfunzo ya Bivhili ya vhege iṅwe na iṅwe nga zwifhinga zwo fhamba-fhambanaho, nahone dzi ri ṋea tshibuli tsha u kona u ṋea phindulo dzi fhaṱaho miṱanganoni ya Vhukriste.

Nga tshiṅwe tshifhinga Gary o vha a tshi rwela ngomani phindulo dzawe, nahone arali e na nyambo Tshikoloni tsha Vhuḓinḓa ha lwa Ṱaḓulu, u a kona u i ṋekedza nga maipfi awe. O vhewa sa mushumeli nga 1995 nahone u dzula o farakanea Holoni ya Muvhuso, u ṱanganedza miraḓo ya tshivhidzo na u thusa kha khudzaipfi.

Dziṅwe Ṱhanzi ngae dzi ya nae vhuḓinḓani, zwifhinga zwinzhi vho vha vha tshi mu tshimbidza nga tshidulo tsha vhaholefhali nga nṱhani ha vhulwadze ha marambo. Iṅwe Ṱhanzi yo mu thusa u fara pfunzo ya Bivhili na muthu a re na dzangalelo. Gary o ṱuṱuwedza muṅwe Mukriste we a vha o fhola lwa miṅwaha ya 25. Vhenevho vhahashu vha vho ṱanganela kha miṱangano ya Vhukriste.

Musi Louise e na miṅwaha ya ṱahe, makhulu wawe vho mu gudisa u luka, nahone nṋe na muṅwe wa vhaunḓi ra mu gudisa u runga. Ngauri o vha a tshi vho ḓifhelwa nga u luka, o thoma u lukela vhana na vhalala vha tshivhidzoni nguvho dza mivhala. U dovha a ita dzigaraṱa a tshi shumisa zwifanyiso zwe a tou nambatedza. Garaṱa dzenedzo dzi takalelwa nga vhe vha dzi wana. Miṅwahani yawe ya vhufumi, Louise o guda u thaipha. Zwino, a tshi thuswa nga khomphyutha ya u amba, u dzulela u kwamana na khonani dzawe nga e-mail. Louise o lovhedzwa musi e na miṅwaha ya 17. Nga tshifhinga tsha mafulo a u huwelela o khetheaho, ri ḓiphina nga u vha vhavulanḓila vha u thusa. U fana na Gary, Louise u rwela ngomani maṅwalo u itela u sumbedza lutendo lwawe nga ha mafulufhedziso a shango ḽine ‘ha ḓo bonyolowa maṱo a mabofu’ nahone ‘kha vho dzulaho khaḽo ha si vhe na ane a ḓo ri: Ndi a lwala.’—Yes. 33:24; 35:5.

Ri takalela lungafhani ngoho ya ndeme yo hevhedzwaho Ipfini ḽa Yehova! Ri livhuha thikhedzo ine ra i wana tshivhidzoni tshi re na lufuno, ngauri arali ho vha hu si tshivhidzo, zwithu zwine ra zwi ita zwo vha zwi nga si konadzee. Nahone nga nṱhani ha thuso ine ra i wana kha Yehova, vhutshilo hashu vhu na ndivho ya vhukuma.