Pe na e mafatia ona o le faailogalanu? Pe sa teena sau talosaga, lē faia se galuega mo oe, pe vaai maulalo foʻi nisi iā te oe, ona o lou lanu, lou atunuu, po o lou tulaga foʻi tau tamaoaiga? Afai o lea, e lē na o oe o loo aafia i lea tulaga. Ae mātau, o nei mea uma e na o le lalolagi o loo tutupu ai, auā na faapea mai ma le mautinoa le aposetolo Kerisiano o Peteru: “E lē faailogaina tagata e le Atua.”​—Faitau le Galuega 10:34, 35.

Na faia e Peteru na upu a o iai i le fale o Konelio, o se tagata o Nuu Ese. O Peteru o se Iutaia, ma na soifua i le vaitaimi na manatu ai tagata Iutaia i tagata o Nuu Ese, o ē e lē mamā ma e lē tatau ona latou faifaimea faatasi. Ae aiseā la na alu ai Peteru i le fale o Konelio? O le tali tuusaʻo, o Ieova le Atua na fuafuaina lea feiloaʻiga! I se faaaliga na vaaia e Peteru, na faatonuina ai o ia e faapea: “Aua e te toe taʻua e leaga mea ua faamamāina e le Atua.” E leʻi iloa e Peteru, na vaaia foʻi e Konelio se faaaliga i le aso ua mavae, lea na faatonu ai o ia e le agelu e aami Peteru. (Galuega 10:1-15) Ina ua iloa e Peteru o le fuafuaga lea a Ieova, e leʻi toe taofia o ia mai le talanoa atu i tagata o Nuu Ese.

Na faapea mai Peteru: “E moni ua ou iloa, e lē faailogaina tagata e le Atua.” (Galuega 10:34) O le upu Eleni ua faaliliuina ai le upu “faailogaina tagata,” e uiga atu i le “faailoga foliga.” (The Kingdom Interlinear Translation of the Greek Scriptures) E tusa ai ma lenei manatu, na faapea mai ai se tagata atamai: “E faasino atu i se faamasino e faia le faaiʻuga e tusa ma foliga o le tagata, po o ona faalogona foʻi i le tagata, ae lē faavae mai mataupu faafaamasinoga.” E lē faapito le alofa o Ieova i se tasi ona o lona lanu, atunuu, tulaga tau tamaoaiga, po o foliga vaaia.

Nai lo o lea, e silasila Ieova i o tatou loto. (1 Samuelu 16:7; Faataoto 21:2) Na faapea mai Peteru: “Ae o lē e mataʻu iā te ia i nuu uma lava, ma fai le amiotonu, e talia e ia.” (Galuega 10:35) O le mataʻu i le Atua, o lona uiga ia faaaloalo, faamamaluina, faatuatuaina, ma ʻalofia le faia o mea e tigā ai lona finagalo. O le faia o le amiotonu, e aofia ai le lotomalie e faia mea e ōgatusa ma le finagalo o le Atua. E fiafia Ieova i le tagata e faaalia le mataʻu tatau, lea e uunaʻia ai o ia e faia le mea saʻo.​—Teuteronome 10:12, 13.

Pe afai na iai se taimi na e mafatia ai ona o le faailoga tagata po o le faaituʻau, e faamāfanafanaina oe i upu a Peteru e faatatau i le Atua. E tosina mai e Ieova tagata mai i atunuu uma i le tapuaʻiga moni. (Ioane 6:44; Galuega 17:26, 27) E faafofoga mai o ia i talosaga a ona tagata tapuaʻi, e tusa po o le ā le lanu, ituaiga, po o le tulaga tau tamaoaiga. (1 Tupu 8:41-43) O le mea moni, e tutusa i tatou uma i le silafaga a Ieova. Pe e lē uunaʻia ai ea oe e aʻoaʻo atili e faatatau i lenei Atua e lē faailoga tagata?