Kuo faifai angé ʻo maʻukovia koe ʻi he fakafaikehekeheʻí? Kuo faifai ange ʻo fakasītuʻaʻi haʻo kole, fakafisingaʻi mei ha ngāue, pe fakafeangai siolalo atu koeʻuhi ko e lanu ho kilí, puipuituʻa fakamatakalí, pe tuʻunga fakasōsialé? Kapau ko iá, ʻoku ʻikai ko koe pē. Neongo ia, ko eni ʻa e ongoongo leleí: Kae kehe, ko e ngaahi ʻulungaanga taʻefakaʻapaʻapa peheé, ʻoku angamaheniʻaki ia ʻi he māmaní, ʻo ʻikai ke hoko ia ʻi hēvani. “ʻOku ʻikai ke filifilimānako ʻa e ʻOtuá,” ko e lau ia ʻa e ʻapositolo Kalisitiane ko Pitá ʻi heʻene falala-pau kakato.—Lau ʻa e Ngāue 10:34, 35.

Naʻe leaʻaki ʻe Pita ʻa e ngaahi lea ko iá ʻi ha tuʻunga mātuʻaki kehe—ʻi he ʻapi ʻo ha Senitaile ko Koliniusi. Naʻe fanauʻi ʻa Pita ko ha Siu, naʻe moʻui ʻi ha taimi naʻe vakai ai ʻa e kau Siú ki he kau Senitailé ʻoku nau taʻemaʻa pea ʻikai tali ia ki ha faʻahinga feohi pē. Ko ia, ko e hā naʻe ʻi he ʻapi ai ʻo Koliniusí ʻa Pitá? Ko hono ʻai mahinó, koeʻuhí naʻe fokotuʻutuʻu ʻe Sihova ko e ʻOtuá ke na fetaulaki. Naʻe maʻu ʻe Pita ha vīsone fakaʻotua ʻa ia naʻe tala ange ai: “Tuku hoʻo lau ʻoku ʻuli ʻa e ngaahi meʻa kuo fakamaʻa ʻe he ʻOtuá.” ʻI he ʻikai ʻiloʻi ʻe Pitá, ko ha ʻaho ki muʻa ai, naʻe toe maʻu ʻe Koliniusi ha vīsone, ʻa ia naʻe fakahinohinoʻi ai ia ʻe ha ʻāngelo ke ʻalu kia Pita. (Ngāue 10:1-15) ʻI hono ʻiloʻi ʻe Pita naʻe kau ki he meʻá ni ʻa Sihová, naʻe ʻikai toe taʻofi ʻene leá.

“ʻOku toki mahino moʻoni,” ko e lea ia ʻa Pitá, “ʻoku ʻikai ke filifilimānako ʻa e ʻOtuá.” (Ngāue 10:34) Ko e foʻi lea faka-Kalisi naʻe liliu ko e “filifilimānako” ʻoku ʻuhinga fakafoʻileá ko e “sio mata.” (The Kingdom Interlinear Translation of the Greek Scriptures) Fekauʻaki mo e kupuʻi leá ni, naʻe fakamatala ʻa e mataotao ʻe taha: “ʻOku ʻuhinga ki ha fakamaau ʻokú ne sio ki he mata ʻo ha tangata pea fai ha tuʻutuʻuni, ʻo ʻikai fakatatau ki he moʻoni ʻo e keisí, kae fakatatau ki heʻene saiʻia pe fehiʻa ʻi he tangatá.” ʻOku ʻikai ke hōifua ʻa e ʻOtuá ʻi he mata ʻe taha kae fehiʻa ʻi he mata ʻe taha koeʻuhi ko e matakalí, fonuá, tuʻunga fakasōsialé, pe ko ha toe ngaahi moʻoniʻi meʻa kehe.

Ka, ʻoku sio ʻa Sihova ki hotau lotó. (1 Sāmiuela 16:7; Palōveepi 21:2) Naʻe toe hoko atu ʻa Pita: “ʻI he puleʻanga kotoa pē, ko e tangata ko ia ʻoku manavahē kiate ia mo fai ʻa e meʻa ʻoku totonú, ʻokú ne tali ia.” (Ngāue 10:35) Ke manavahē ki he ʻOtuá ʻoku ʻuhingá ke fakaʻapaʻapa, fakalāngilangiʻi, pea falala kiate ia, ʻo fakaʻehiʻehi mei ha meʻa pē ʻoku taʻefakahōifua kiate ia. Ke ngāue ʻi he māʻoniʻoní ʻoku kau ki ai ʻa hono fai loto-lelei ʻa e meʻa ʻoku totonu ʻi he vakai ʻa e ʻOtuá. ʻOku hōifua ʻa Sihova ki he tangata ʻoku fonu hono lotó ʻi he manavahē anga-ʻapasia ʻa ia ʻokú ne ueʻi ia ke fai ʻa e meʻa ʻoku totonú.—Teutalōnome 10:12, 13.

Kapau kuo faifai ange ʻo ke hokosia ha fakafaikehekeheʻi pe tomuʻa fehiʻa, ʻoku ʻi ai ha ʻuhinga lelei ke ke maʻu ha loto-toʻa mei he ngaahi lea ʻa Pita fekauʻaki mo e ʻOtuá. ʻOku tohoakiʻi ʻe Sihova ʻa e kakai ʻo e puleʻanga kotoa pē ki he lotu moʻoní. (Sione 6:44; Ngāue 17:26, 27) ʻOkú ne fanongo pea tali ʻa e ngaahi lotu ʻa ʻene kau lotú ʻo tatau ai pē pe ko e hā honau matakalí, fonuá, pe tuʻunga fakasōsialé. (1 Tuʻi 8:41-43) ʻE lava ke tau falala-pau ʻi he taimi ʻoku ʻafio hifo ai ʻa Sihova mei hēvaní, ʻokú ne sio ki he matakali pē ʻe taha—ko e matakali ʻo e tangatá. ʻOku ueʻi koe ke ako lahi ange fekauʻaki mo e ʻOtua taʻefilifilimānako ko ení?