AMUBE ACILONGWE A LEZA

Jehova “Tasalululi”

Sena kuli nomwakasalululwa kale? Sena kuli ciindi nomwatakapegwa cintu ncomwakali kuyanda, kutacitilwa cintu ncomwakeelede kucitilwa, naa kutabikkilwa maano munzila imwi akaambo kamubala wanu, musyobo, naa bukkale bwanu? Ikuti kacili boobo, tamuli nyolikke pe. Ngaaya makani mabotu: Lusalululo luli boobu taluko kujulu, nokuba kuti lulidumide anyika. Petro, mwaapostolo Munakristo wakaamba cakusinizya kuti: “Leza tasalululi.”—Amubale Milimo 10:34, 35.

Petro wakaamba majwi aaya ciindi naakali mubukkale mbwaatakazibide—ciindi naakali muŋanda yamuntu Wamasi uutegwa Korneliyo. Petro wakali mu Juda alimwi wakapona ciindi ba Juda nobakali kubona bantu Bamasi kuti tabasalali aboobo tiibakeelede kuyanzana ambabo. Pele, nkaambo nzi Petro ncaakali muŋanda ya Korneliyo? Mubufwaafwi, nkaambo Jehova Leza nguwakaubamba muswaangano ooyu! Petro wakatambula cilengaano kuzwa kuli Leza mwalo mwaakaambilwa kuti: “Koleka kwaamba zyintu Leza nzyaasalazya kuti zilisofweede.” Kakunyina ncaakazyi Petro, ibuzuba bwakaindide, awalo Korneliyo wakatambula cilengaano mwalo mungelo mwaakamulailila kuti amwiite Petro. (Milimo 10:1-15) Ciindi Petro naakazyiba kuti Jehova wakalijatikizyidwe mumakani aaya, Petro wakaalilwa kuumuna buyo.

Petro wakaamba kuti: “Lino ndazyiba ncobeni kuti Leza tasalululi.” (Milimo 10:34) Ibbala lya Chigiliki ilyakuti “kusalulula” lyaamba “kulanga busyu bwamuntu.” (The Kingdom Interlinear Translation of the Greek Scriptures) Kujatikizya bbala eeli, syaabupampu umwi wakaamba kuti: “Lyaamba mubetesi uulanga busyu bwamuntu mpoonya akukosola mulandu kweelana ambwamuyanda muntu ooyo naa mbwatamuyandi, ikutali akaambo kamulandu ngwajisi.” Leza kunyina nayanda musyobo umwi wabantu kwiinda umwi akaambo kamubala, cisi nkobazwa, mpuwo njobajisi, naa zyintu zimwi zilibonya.

Muciindi caboobo, Jehova ubona cili mumoyo wesu. (1 Samuele 16:7; Tusimpi 21:2) Mpoonya Petro wakaamba kuti: “Muzisi zyoonse kufwumbwa muntu uumuyoowa akucita ziluleme ulatambulwa kulinguwe.” (Milimo 10:35) Kuyoowa Leza caamba kumulemeka, akumusyoma alimwi akutantamuka cintu cili coonse citamukkomanisyi. Kucita ziluleme kubikkilizya kucita ziluzi mumeso aa Leza cakuliyandila. Jehova ulamukkomanina muntu uumuyoowa kwiinda mukucita zyintu ziluzi.—Deuteronomo 10:12, 13.

Ikuti naa kuli nomwakasulaikwa kale naa kusalululwa, mulijisi kaambo kabotu ncomweelede kukulwaizyigwa amajwi ngaakaamba Petro kujatikizya Leza. Jehova ulimukukwela bantu bamisyobo yoonse kuti baboole kubukombi bwakasimpe. (Johane 6:44; Milimo 17:26, 27) Ulaiswiilila alimwi akuyiingula mipailo yabakombi bakwe kunyina makani amubala wabo, cisi nkobazwa, naa bukkale bwabo. (1 Bami 8:41-43) Tulakonzya kuba alusyomo lwakuti ciindi Jehova nalanga anyika, ubona buyo musyobo omwe—musyobo wabantu. Sena inga mwayanda kwiiya zinji kujatikizya Leza ooyu uutasalululi?

Magwalo aamu Bbaibbele aasalidwe kubalwa mu june

Johane 17-21–Milimo 1-10

[Majwi aakwelelezya sikubala aali apeeji 8]

Ciindi Jehova nalanga anyika, ubona buyo musyobo omwe—musyobo wabantu