Finshi Twingasambilila Kuli Ncitatubi?
FUNDENI ABANA BENU
Finshi Twingasambilila Kuli Ncitatubi?
Ncitatubi uo twalasambililapo ni uyu ulemona pano pa cikope uo Yesu alelanda nankwe. Uyu ncitatubi nalapila pa fyo acitile. Alombele Yesu ukuti: “Mukanjibukishe ilyo mukaba imfumu.” Lelo nga fintu ulemona pa cikope, Yesu e ulelanda no yu ncitatubi. Bushe nawishiba ifyo Yesu alemweba?— * Alemulaya ukuti: “Cine cine ndekweba lelo nati, uli no kuba na ine mu Paradaise.”
Bushe uletontonkanya ukuti ilya Paradaise ikaba shani?— Pa kwasuka bwino ici cipusho, natulande pali Paradaise umo Lesa abikile umwaume no mwanakashi wa ntanshi, Adamu na Efa. Bushe ilya Paradaise yabelele kwi? Bushe yali ku muulu nelyo pano calo?—
Nga watila ni pano calo ninshi nawasuka bwino. Kanshi nga tulelanda pali ncitatubi ukuba “mu Paradaise,” tufwile ukulatontonkanya ukuti akekala muli Paradaise iikaba pano pene pa calo. Bushe Paradaise ikalamoneka shani?— Natulande pa fyo ikalamoneka.
Pa numa ya kupanga umwaume no mwanakashi wa ntanshi, Adamu na Efa, Baibolo itila Yehova Lesa ababikile muli Paradaise iyali pano pene pa calo. Iyi Paradaise baleyita ati ‘ibala lya Edeni.’ Bushe ulemona ukuti ili ‘ibala lya Edeni’ lyali ilyayemba?— Ca cine, ili ibala lyali ilyayemba kabili cali cifulo icisuma ukwikalamo!
Bushe uletontonkanya ukuti Yesu akaba mu Paradaise pano calo pamo na ncitatubi?— Awe iyo, Yesu akaba Imfumu ku muulu kabili e ukalateka abantu abakaba mu Paradaise pano calo. Kanshi filya Yesu alandile ukuti akaba na ncitatubi aloseshe mu kuti akamubuusha ku bafwa kabili akalamusakamana bwino muli Paradaise iikaba pano pene pa calo. Nomba mulandu nshi Yesu akalekela umuntu uwali ncitatubi ukuba mu Paradaise?— Natumone.
Ca cine, uyu ncitatubi alicitile ifyabipa sana. Lelo kwaliba abantu na bambi abengi abafwa abalecita ifyabipa. Na lyo line icalengele ukuti abengi balecita ifyabipa, ni co tabasambilile pali Yehova pa kuti beshibe no kucita ifyo afwaya.
Kanshi aba bantu, ukubikako fye na ncitatubi uwalandile na Yesu ilyo aali pa cimuti, bakabuushiwa no kuba mu Paradaise pano pene pa calo. Bakasambilila ifyo Lesa afwaya kabili e lyo cikeshibikwa nga ca kuti balitemwa Yehova.
Bushe kuti balanga shani ukuti balitemwa Yehova?— Kuti bacita ifyo nga balecita ifyo afwaya. Ala cikawama nga nshi ukuba mu Paradaise e lyo no kulaikala na bantu abatutemwa kabili abatemwa na Yehova!
Belenga muli Baibolo yobe
[Futunoti]
^ para. 3 Nga ca kuti mulebelengela capamo na bana, apo bashilile ninshi mufwile mwalolelako pa kuti abana balandepo.
