Mũndũ ũcio warĩ mũũru tũngĩĩruta kuumana nake nĩ ũyũ ũraranĩria na Jesu haha mbica-inĩ. Mũndũ ũcio nĩ aherete mũno nĩ maũndũ marĩa aaneka. Arera Jesu ũũ: ‘Ĩtĩkĩra gũkandirikana rĩrĩa ũgoka na ũthamaki waku.’ Ta ũrĩa ũrona mbica-inĩ, Jesu nĩ kwarĩria araarĩria mũndũ ũcio. Hihi nĩ ũĩ ũrĩa Jesu aramwĩra?— * Jesu aramwĩrĩra ũũ: “Na ma ngũkwĩra atĩrĩ ũmũthĩ, nĩ ũgakorũo na niĩ Paradiso.”

Wee ũkuona ta Paradiso ĩyo ĩgaakorũo ĩhaana atĩa?— Nĩgetha tuone macokio mega, reke twarĩrĩrie Paradiso ĩrĩa Ngai aathondekeire mũthuri na mũtumia wa mbere Adamu na Hawa. Paradiso ĩyo hihi yarĩ kũ? Yarĩ igũrũ-ĩ, kana yarĩ gũkũ thĩ?—

Ndũnahĩtia angĩkorũo woiga yarĩ gũkũ thĩ. Kwoguo tũngĩĩciria ũhoro wa mũndũ ũcio warĩ mũũru ‘arĩ Paradiso,’ twagĩrĩirũo kũmuona agĩtũũra gũkũ thĩ ĩtuĩkĩte paradiso. Paradiso ĩyo ĩgaakorũo ĩhaana atĩa?— Reke tuone.

Bibilia yugaga atĩ rĩrĩa Jehova Ngai ombire aciari aitũ a mbere Adamu na Hawa, aamaigire thĩinĩ wa paradiso gũkũ thĩ. Yetagwo ‘mũgũnda wa Edeni.’ Hihi no ũgerie gwĩcirĩria ũthaka wa ‘mũgũnda ũcio wa Edeni’ wahaanaga atĩa?— Nĩ ma atĩ, kwarĩ kũndũ kwega na gũthaka mũno gwa gũikara gũkĩra kũndũ kũngĩ o guothe!

Ũkuona atĩa? Hihi Jesu agaikarania gũkũ thĩ na mũndũ ũcio warĩ mũũru waaherire mehia make?— Aca, Jesu agaathaga thĩ ĩrĩa ĩgaatuĩka Paradiso arĩ Mũthamaki kũrĩa igũrũ. Kwoguo Jesu agaakorũo hamwe na mũndũ ũcio warĩ mũũru na njĩra ya atĩ nĩ akamũriũkia thĩinĩ wa Paradiso gũkũ thĩ na atigĩrĩre atĩ nĩ arahingĩrio mabataro make. No nĩ kĩĩ gĩgaatũma  Jesu areke mũndũ warĩ mũũru atũũre thĩinĩ wa Paradiso?— Reke twarĩrĩrie ũhoro ũcio.

Nĩ ma atĩ mũndũ ũcio nĩ eekire maũndũ maingĩ moru. O na andũ bilioni nyingĩ arĩa manatũũra gũkũ thĩ nĩ meekaga maũndũ moru. No aingĩ ao meekaga maũndũ moru tondũ gũtirĩ mũndũ waamarutire ũhoro wĩgiĩ Jehova na ũrĩa eendaga meke.

Kwoguo andũ ta acio, hamwe na mũndũ ũcio warĩ mũũru waaragia na Jesu macuurĩtio mũtĩ-igũrũ, nĩ makaariũkio na matũũre thĩinĩ wa Paradiso gũkũ thĩ. Nĩ makaarutwo mamenye wendi wa Ngai. Hĩndĩ ĩyo nĩrĩo makonania kana nĩ mendete Jehova.

Hihi nĩ ũĩ makonania ũguo atĩa?— Na njĩra ya gwĩka ũrĩa Ngai akaamera meke. Na githĩ ndũgaakorũo ũrĩ ũndũ mwega gũikara thĩinĩ wa Paradiso hamwe na andũ mendete Jehova na makendana o ene?