O kifumbe ki tua-nda di longa mu milongi íii, o muthu u ua mu mona Jezú kuzuela né mu foto. O kifumbe ua mu diela o ituxi iê. Muéne ua mu bhinga kua Jezú: ‘Jezú ngi lembalale, hádia ki u bokona mu Utuminu uê.’ Kindala, kala ki ua mu mona mu foto, Jezú ua mu zuela ni kifumbe kiki. Uejiia ihi ia mu zuela Jezú kua muéne?— * Jezú ua mu mu kanena: ‘Kidi ngi ku uambela lelu: Ua ka kala n’eme mu Palaízu.’

Mudiê, kiebhi kia-nda kala o Palaízu?—Phala kuijiia se tua tendela muene kiambote, tua-nda zuela ia lungu ni Palaízu ia bhange Nzambi phala o dikaza dia dianga, Adá ni Eva. Kuebhi kua kexile o Palaízu? O kuila ia kexile ku diulu, anga ia kexile mu ixi?—

Ua tambuijila kiambote se ua zuela kuila ia kexile mu ixi. Mukonda dia kiki, kioso ki tu xinganeka ku kifumbe ku kala “mu Palaízu,” tua tokala ku xinganeka muéne ku kala mu ixi kioso o ixi kia-nda kala palaízu. Kiebhi kia-nda kala o palaízu?—Tu tale.

Kioso Jihova kia zubha o ku bhanga o dikaza dia dianga, Adá ni Eva, o Bibidia i zuela kuila Nzambi ua a tula muene mumu mu ixi. A i xanene “jaludim ia Edene.” U tena ku xinganeka o ku iuka kua “jaludim ia Edene?”—Kiexile kididi kia iukile kiavulu phala ku kala-mu, o ididi i tuene mu kala lelu ndenge!

Ihi i u banza? O kuila Jezú ua-nda kala bhabha mu ixi ni kifumbe ua diele o ituxi iê?—Kana, Jezú ua-nda kala ku diulu kala Sobha mu ku tumina o Palaízu mu ixi. Kienhiki, Jezú ua-nda kala ni kifumbe, mu kuila ua-nda mu fukununa ni ku  mu langa mu Palaízu mu ixi. Maji mukonda diahi Jezú ua-nda kuehela muthu uexile kifumbe ku kala mu Palaízu?—Tua-nda zuela ia lungu ni maka enhá.

Tuejiia kuila o kifumbe kiki, ua bhange ima iavulu ia iibha. Maji kuene mazunda ia athu akexile mu ixi a bhangele uá ima ia iibha. Maji akexile mu bhanga ima ia iibha mukonda ka a longele luua ia lungu ni Jihova ni ihi ia mesenene Nzambi kuila ene a i bhanga.

Kienhiki, o athu enhá ni kifumbe kia zuela ni Jezú, a-nda ku a fukununa phala ku kala ku muenhu mu Palaízu mu ixi. A-nda ku a longa iebhi o vondadi ia Nzambi. Kienhiki, ene a-nda londekesa kuila a zolo Jihova.

Uejiia kiebhi ene kia-nda tena kulondekesa kuila a zolo Jihova?— Mu ku bhanga ia mesena Nzambi. Kia-nda kala kima kiambote ku kala mu Palaízu ni ku dilunga ni athu a zola Jihova, a di zola uá mudiâ!