Jamahundu ma wanyalo puonjore gimoro kuome e ng’at ma Yesu wuoyogo e pichani. Jamahunduno ok mor kata matin gi richo ma notimo. Nokwayo Yesu niya: “Para chieng’ midonjo e pinyruodhi.” Mana kaka ineno e pichani, Yesu wuoyo gi jamahunduno. Be ing’eyo gima Yesu kone?— * Yesu singorene kama: “Adier awachoni niya, . . . inibed koda e Paradis.”

Iparo ni Paradis biro chalo nade?—Mondo wayud dwoko makare, we wawuo ane kuom Paradis ma ne Nyasaye oketoe dhano mokwongo, Adam gi Hawa. Paradisno ne ni kanye? Ne en e polo, koso ne en e piny?—

Kapo ni idwoko ni ne en e piny, to idwoko kare. Omiyo, sama waparo “Paradis” ma jamahunduno biro dakie, onego wang’e ni obiro dak e pinyka ka koro piny en paradis. Paradisno biro chalo nade?— We wane ane.

Kane Jehova Nyasaye ochweyo dichwo gi dhako mokwongo, Adam gi Hawa, Muma wacho ni noketogi e paradis e pinyka. Ne iluongo paradisno ni puodho mar “Eden.” Donge nyaka bed ni puodho mar “Eden” ne en kama ber nyowuoyo?— Kuom adier, ne en kama ber matamre gi nono!

Iparo nade? Be Yesu biro dak e pinyka gi jamahundu ma ne okwayo ng’wono kuom richone?—Ooyo, kindeno Yesu biro bedo e polo kolocho kaka Ruoth e wi piny molos mobedo Paradis. Omiyo, tiend wacho ni Yesu biro bet gi jamahundu en ni obiro chiere a kuom jo motho kendo neno ni odak maber e Paradis me piny. To kare ang’o momiyo Yesu biro yie ne ng’at ma ne en jamahundu  odag e Paradis?— We wawuo ane kuom wachno.

En adier ni jamahunduni notimo gik maricho ahinya. Kata kamano, ji mang’eny ahinya mosedak e pinyka bende osetimo gik maricho. Thoth jogo notimo gik maricho nikech ne ok opuonjgi e wi Jehova kendo ne ok opuonjgi gima Jehova ne dwaro ni gitim.

Omiyo, joma kamago moriwo jamahundu ma ne Yesu owuoyogo ibiro chier mondo odag e Paradis e pinyka. Ibiro puonjgi dwaro mar Nyasaye. Kae to gibiro bedo gi thuolo mar nyiso ni gihero Jehova.

Be ing’eyo kaka ginyalo nyiso ni gihero Nyasaye?—En kuom timo gima Nyasaye dwaro ni mondo gitim. En gima ber ndi dak e Paradis kendo dak gi joma ohero Jehova kendo mohero jowetegi!