Tupondola okulilongesila komulume ou ondingavivi uli polutalatu ukahi nokupopia na Jesus. Ondingavivi oyo yelivela mokonda yovivi alingaile. Waita ku Jesus okuti: “Nthyinangele tyina wamanyingila mouhamba wove.” Pahe, ngetyi uluete polutalatu, Jesus ukahi nokupopia nomulume oo ondingavivi. Utyii oityi Jesus ekahi nokumupopila?— a Jesus ukahi nokumulaa okuti: “Tyotyili, hono ame ndyikupopila okuti, mokakala naame Momphangu Yombembwa.”

Mokusoka kuove Omphangu Yombembwa maikakala ñgeni?— Opo unoñgonoke ekumbululo liaviuka, tupopie konthele Yomphangu Yombembwa Huku alingilile omulume wotete nomukai wotete, Andau na Eva. Omphangu oyo Yombembwa ankho ikala pi? Ankho o keulu ine opopano pohi?—

Mokumbulula nawa inkha uti opopano pohi. Moluotyo tyina tusoka okuti omulume ondingavivi makakala “Momphangu Yombembwa,” tuna okusoka okuti makakala pano pohi tyina ohi aiho yamapilululwa aikala omphangu yombembwa. Omphangu oyo Yombembwa maikakala ñgeni?— Tutale.

Etyi Jeova Huku atunga ovanthu votete, Andau na Eva, Ombimbiliya ipopia okuti wevepaka momphangu yombembwa pano pohi. Ankho itiwa “otyikunino tyo Endene.” Utyivila okusoka oñgeni “otyikunino tyo Endene” ankho otyiwa unene?— Tyotyili ankho omphangu ongwa nokukahi nawa  pala okukalamo, tyipona onomphangu ambuho mbukahiko hono!

Oityi usoka? Okuti Jesus makakala pano pohi kumwe nondingavivi ankho yelivelele ononkhali mbayo?— Au, Jesus makakala Ohamba keulu iya atumina Omphangu Yombembwa pano pohi. Ngotyo, Jesus makakala nomulume ondingavivi mokonda mekemututilisa, nokumutekula nawa Momphangu Yombembwa pano pohi. Mahi, omokonda yatyi Jesus makayekela omulume ankho ondingavivi akakale Momphangu Yombembwa?— Tupopie konthele yotyo.

Tyotyili omulume oo walingile ovipuka ovinyingi ovivi. Mahi, novanthu ovakuavo vakalele pano pohi valingile ovipuka ovivi. Mahi, ovanyingi puvo, valingile ovipuka ovivi mokonda ankho kavalongesilwe konthele ya Jeova netyi ankho ahanda valinge.

Moluotyo, ovanthu ovo, okukutikinyamo ondingavivi yapopile na Jesus momuti, mavakatutiliswa opo vakale Momphangu Yombembwa pano pohi. Mavakalongeswa olipi ehando lia Huku, konyima avalekesa inkha vehole umwe Jeova.

Utyii oñgeni maveketyilekesa?— Omokulinga etyi Huku ahanda. Matukahambukwa unene tyina tuamakakala Momphangu Yombembwa nokukala apeho novanthu vehole Jeova, navakuavo!