Ko te tangata rave kino te ka mou mai tetai apiianga ia tatou, koia tera tangata e tuatua ra a Iesu i roto i te tutu. Kua tataraara tera tangata no tana au apa i rave. Pati aia kia Iesu: “E akamaara mai koe iaku, kia tae koe ki toou basileia.” Mei taau e kite ra i roto i te tutu, te tuatua ra a Iesu ki teia tangata rave kino. Kua kite koe e eaa ta Iesu e tuatua ra kiaia?— * Te taputou ra a Iesu e: “Koia mou taku e karanga atu kia koe nei, ei Paradaiso taua katoa i teianei rai rā.”

I toou manako e mei teaa rai te tu o taua Parataito ra?— Kia papu meitaki e kua tano ta tatou pauanga ka rauka mai, ka tuatua ana tatou no runga i te Parataito ta te Atua i maani no te tangata e te vaine mua, koia a Adamu raua ko Eva. Teiea ra taua Parataito ra? Tei te rangi ainei, me tei te enua nei?—

Me karanga koe e tei te enua nei, kua tano rai taau. No reira me akamanko tatou i taua tangata rave kino ra i roto i te “Paradaiso,” kia akamanako tatou iaia e noo ra i konei, i runga nei i te enua, me riro mai te reira ei parataito. Mei teaa ra te tu o taua Parataito ra?—Ka akara ana ra tatou.

Muri ake te anga mai anga te Atua ko Iehova i nga tangata mua, ia Adamu raua ko Eva, te karanga ra te Pipiria e kua tuku aia ia raua ki roto i te parataito i konei, i runga nei i te enua. Kapikiia te reira e ko ‘te kainga i Edene.’ Ka rauka ainei ia koe kia akamanako e mei teaa ra te manea o ‘te kainga i Edene?’—Papu e e ngai taurekareka atu i te noo e te manea roa atu, i ta tetai ua atu tangata i kite ana i teia tuatau!

Eaa ra toou manako? A tera taime, tei konei ainei a Iesu i runga nei i te enua e taua tangata rave kino ra tei tataraara no tana i rave?—Kare, a tera taime tei runga a Iesu i te rangi e tutara ra ei Ariki ki rungao i te enua Parataito. No reira ka aravei raua i roto i te tu e ka akatuakaou mai a Iesu i taua tangata ra ki te Parataito i te enua nei, e ka akapapu e kia akonoia aia. Eaa ra a Iesu ka akatika ai i tetai tangata rave kino kia noo i roto i te Parataito?—Ka uriuri tatou no runga i teia.

 E tika rai e kua rave ana teia tangata i tetai au angaanga kino. Inara kua akapera ana rai te pirioni ua atu o te tangata tei noo ana i te enua nei. Maataanga ia ratou, kua rave ana i te au angaanga kino no te mea kare rava ratou i apiiia ana no runga ia Iehova e tana e inangaro maira kia rave ratou.

No reira, ko te au tangata mei tera rai, pera te tangata rave kino ta Iesu i tuatua atu i runga i te tatauro, ka akatuakaouia mai ratou ki roto i te Parataito i konei, i runga nei i te enua. Ka apiiia ratou kia kite i te anoano o te Atua. E ka rauka ia ratou i te akapapu i to ratou inangaro no Iehova.

Kua kite ainei koe e ka akapeea ratou i te akapapu anga i te reira?—Na te rave anga i ta te Atua e inangaro ra ia ratou kia rave. E mea mataora tikai kia noo i roto i te Parataito e kia noo katoa e te aronga e inangaro ra ia Iehova e i tetai e tetai!