Wi kan leri wan sani fu na ogriman di Yesus e taki nanga en na tapu a prenki. Na ogriman dati e firi sari fu den ogri di a du. A aksi Yesus: „Memre mi te yu kon na ini yu Kownukondre.” Soleki fa yu e si na tapu a prenki, dan Yesus e taki nanga na ogriman disi. Yu sabi san Yesus e taigi en?— * Yesus e pramisi en: „Fu tru, mi e taigi yu tide: Yu o de nanga mi na ini Paradijs.”

Fa yu denki taki a paradijs o de?— Fu de seiker taki wi o kisi a yoisti piki, dan wi o taki fu a Paradijs di Gado ben meki gi a fosi man nanga uma, Adam nanga Eva. Pe a Paradijs dati ben de? A ben de na hemel, noso a ben de na grontapu?—

Yu abi leti efu yu taki dati a ben de na grontapu. Sobun, te Bijbel e taki dati na ogriman o de „na ini Paradijs”, dan dati wani taki dati a o libi leti dyaso na grontapu di o tron wan paradijs. Fa a Paradijs dati o de?— Meki wi go luku.

Bijbel e taki dati baka di Yehovah Gado meki den fosi tu libisma, Adam nanga Eva, dan a poti den na ini wan paradijs leti dyaso na grontapu. Bijbel e kari a paradijs dati „wan dyari na ini Eden”. O moi yu denki taki a „dyari na ini Eden” ben de?— A ben de a moro moi tanpresi di wan sma si oiti!

San yu e denki? Yesus o de na grontapu makandra nanga na ogriman di ben sari fu den sondu fu en?— Nôno, Yesus o de Kownu na ini hemel èn komoto fu drape a o tiri grontapu di o tron wan paradijs. Sobun, wi kan taki dati Yesus o de nanga na ogriman, fu di a o gi en wan opobaka èn a o sorgu taki sani waka bun nanga ini a Paradijs  grontapu. Ma fu san ede Yesus o meki wan man di ben de wan ogriman libi na ini Paradijs?— Meki wi go luku.

A tru taki na ogriman disi ben du bigi ogri. Ma na so a de tu nanga milyunmilyun sma di ben libi na grontapu. Ma furu fu den sma disi ben du ogri sani fu di noiti den ben kon sabi Yehovah nanga den sani di a ben wani taki den du.

Sobun, den sortu sma dati èn sosrefi na ogriman di Yesus ben taki nanga en, o kisi wan opobaka fu libi na ini Paradijs leti dyaso na grontapu. Den o kon leri sabi san na a wani fu Gado. Dan den kan sori taki den lobi Yehovah.

Yu sabi fa den kan sori dati?— Den musu du san Gado wani. Na a ten dati a o switi trutru fu libi na ini Paradijs èn fu de ala ten nanga sma di lobi Yehovah èn di lobi makandra!