Dispela man nogut yumi inap kisim skul long en em man Jisas i toktok long en long dispela piksa. Dispela man nogut i bel hevi long ol rong bilong em. Em i askim Jisas olsem: “Tingim mi taim yu kamap King.” Olsem yu lukim long dispela piksa, Jisas i toktok long dispela man nogut. Yu save Jisas i tok wanem long em?— a Jisas i promisim em olsem: “Mi tok tru long yu tude, Yu bai stap wantaim mi long Paradais.”

Yu ting dispela Paradais bai i luk olsem wanem?— Bilong yumi ken kisim rait bekim, yumi ken stori long Paradais em God i bin wokim bilong namba 1 man na meri em Adam na Iv. Dispela Paradais i bin stap we? Em i stap long heven o long graun?—

Yu rait sapos yu tok em i stap long graun. Olsem na sapos yumi tingim dispela man nogut bai stap “long Paradais,” orait yumi ken tingim olsem em bai stap hia long graun taim graun i kamap Paradais. Dispela Paradais bai i luk olsem wanem?— Yumi ken stori long dispela.

Bihain long God Jehova i wokim namba 1 man na meri, em Adam na Iv, Baibel i tok em i putim tupela long wanpela paradais hia long graun. Ol i kolim dispela Paradais olsem “wanpela gaden i stap long Iden.” Yu ting dispela gaden long Iden i luk nais olsem wanem?— Tru tumas, em wanpela naispela gaden tru bilong stap long en na i no gat wanpela kain gaden olsem long nau!

Yu ting Jisas bai i stap long graun wantaim dispela man nogut husat i bel hevi long rong bilong  em?— Nogat, Jisas bai i mekim wok King long heven na bosim Paradais long graun. Olsem na i olsem Jisas bai i stap wantaim dispela man nogut taim em i kirapim em bek na em i stap laip long Paradais long graun. Tasol bilong wanem Jisas bai i larim wanpela man nogut i stap long Paradais?— Yumi ken stori long dispela.

Em i tru olsem dispela man nogut i bin mekim planti pasin nogut. Tasol planti bilion manmeri i stap long graun ol tu i bin mekim olsem. Planti bilong ol i bin mekim pasin nogut, long wanem, ol i no bin kisim save long Jehova na long ol samting em i laik ol i mas mekim.

Jisas bai kirapim bek ol dispela manmeri, na tu, dispela man nogut na ol bai kisim laip long Paradais hia long graun. Ol bai kisim skul long laik bilong God. Na long dispela rot ol inap soim olsem ol i laikim Jehova.

Olsem wanem ol inap soim olsem ol i laikim Jehova?— Long rot bilong mekim ol samting em God i laik ol i mas mekim. Em bai gutpela tru long stap long Paradais na stap wantaim ol manmeri husat i laikim Jehova na laikim narapela narapela!