Biyano na mituna ya Biblia
Mpo na nini ezali mpasi kimya ezala na mokili?
Biblia epesi bantina mibale. Ya liboso, atako bato basalá makambo mingi ya kokamwa, bakelamá te na likoki ya komitambwisa bango moko. Ya mibale, mayele oyo bato bazali kosalela mpo na kotya kimya elongi te mpo “mokili mobimba ezali kolala na nguya ya moto mabe,” Satana Zabolo. Yango wana, milende oyo bato basali elongi te kotya kimya na mokili.—Tángá Yirimia 10:23; 1 Yoane 5:19.
Ezaleli ya moimi mpe mposa ya lokumu oyo bato bazalaka na yango esali mpe ete kimya ezala te na mokili. Kaka guvɛrnema oyo ekoyangela mokili mobimba mpe oyo ekoki koteya bato bálinga oyo ezali malamu mpe bátyelanaka likebi nde ekotya kimya na mokili.—Tángá Yisaya 32:17; 48:18, 22.
Nani akotya kimya na mokili?
Nzambe Mozwi-ya-Nguya-Nyonso alakaki ete akotya guvɛrnema moko eyangela bato nyonso. Guvɛrnema yango ekozwa esika ya baguvɛrnema ya bato. (Danyele 2:44) Yesu, Mwana ya Nzambe, akoyangela lokola Nkumu ya Kimya. Akosilisa makambo nyonso ya mabe na mabele mpe akoteya bato nzela ya kimya.—Tángá Yisaya 9:6, 7; 11:4, 9.
Lelo oyo, na litambwisi ya Yesu, bamilio ya bato na mokili mobimba bazali kosalela Biblia, Liloba ya Nzambe mpo na koteya bato ndenge ya kozala na kimya na basusu. Mosika te, kimya na mokili ekozala lisusu ndɔtɔ te.—Tángá Yisaya 2:3, 4; 54:13.