TATAJAJJ altʼat chuymani ukat wali irnaqtʼir jaqënwa. Kunatï cheqäki ukwa munirïna, ukatwa 1953 maran Biblian yatichäwinakap istʼkäna ukhajj jankʼaki iyaw säna. Ukhat uksarojj kuntï yateqkäna uk wawanakapar yatichañatakejj chʼamachasipunïnwa. Qalltanjja, católica religionan costumbrenakap jaytañajj mamajatakejj chʼamänwa, ukampis jukʼat jukʼatwa Biblian cheqa yatichäwinakapar iyawsjjäna.

Awk taykajatakejja, nanakar Bibliat yatichañajj chʼamakïnwa, kunattejj mamajajj janiw sum liytʼasirïkänti, tatajasti uru jornalaw yapun irnaqerïna. Awisajja, wali qaritätap laykojj yatichkasaw ikjawayjjeri. Ukampis chʼamachasitapajj janiw inamayäkänti. Ukat jilïr wawjamajj nayaw kullakajaru ukat pä jilajar yatichasin yanaptʼayäta. Ukat jupanakamp parlkasajja, kuntï tatajajj amtayapjjapunirïtu ukanakatwa parlapjjayäta: Noé chachajj familiapar wal munasitapjja Diosar istʼasaw uñachtʼayäna sasaw tatajajj sirïna. ¡Noen sarnaqäwipajj nayatakejja wali sumapunïnwa! Ukat familjamajj jankʼakirakiw Tantachasiñ Utar sarañ qalltawayapjjta, Roseto degli Abruzzi (Italia) markaru, uka markajj Adriático lamar qota jakʼankiwa.

Mamajampiw 1955 maran nayrïr jachʼa tantachäwir sarta, ukhajj 11 maranikïskayätwa. Ukar sarañatakejja, qollunakwa pasapjjta ukat Inti jalant toqeruw Roma markakam puripjjta. Ukanwa jachʼa tantachäwejj apasïna. Ukhat aksarojj ukham tantachäwinak wali askit uñjta.

Nayajj 1956 maran bautisasta ukat jankʼakirakiw precursorjam irnaqtʼañ qalltta. Ukat 17 maranïyäta ukhaw precursor especialjam Latina markar khithapjjetu. Uka markajj Roma marka aynach toqenkiwa, utajat niya 300 kilometronak sarañankiwa. Uka markajj machaqakïnwa ukat mayninakajj kamsapjjakitanisa sasin janiw khitis llakiskänti. Precursora masijampejj Bibliat apstʼat walja qellqatanakwa jaqenakar jaytapjjerïta, ukajj wali kusiskañäkchïnsa, awk taykajampiñ wal munirïta, kunattejj tawaqetakïskayätwa. Ukhamäkchïnsa, kuntï akar khitanisajj sapkitäna ukarjam lurañwa munayäta.

Ukatjja, “Wiñay Suma Yatiyäwinaka” sat Walja Markanakat Jachʼa Tantachäwejj 1963 maran apaskäna ukan  wakichasiñapatak yanaptʼañajatakiw Milan markar khithapjjetu. Ukanjja, walja jilat kullakanakampiw irnaqtʼayäta. Florencia markat jutiri Paolo Piccioli jilatajj jupanak taypinkarakïnwa. Uka tantachäwit payïr urunjja, jupajj taqe chuymaw soltero sarnaqañ toqet arstʼäna. “Uka jilatajj janipuniw casaraskaniti” sasaw lupʼiyäta. Ukampis qhepatjja, carta toqew qellqasipjjayäta ukat pachpa amtanipjjataja, Jehová Diosar wal munasipjjataja ukat Jupar istʼañ munapjjataj amuyasipjjta. Ukat 1965 maranwa jaqechasipjjta.

Tunka maranakaw Florencia markan precursor regularjam irnaqtʼawayta. Kunjamsa tamajj jiltawayi uk uñjañajj wali kusiskañapunïnwa, yamas wayn tawaqonakan nayrar sartapjjatap uñjañaw jukʼampi kusiskañänjja. Jupanakampïsajj Biblia toqet parltʼasasa jan ukajj kusistʼañanakansa wali sumpunwa jikjjatasipjjayäta. Paolojj jupanakamp pelot anatir sarapunirïnwa, ukat nayajj chachajampïñsa munkchiyätjja, tamankir wayn tawaqonakasa ukat familianakasa jupanakampïñatak tiempo apstʼasiñap wakisitap amuyarakiyätwa.

Uka maranakan qawqhanirus Bibliat yatichapjjayäta uk wali kusisitaw amtasta. Bibliat yateqerinakajat maynïrejj Adriana satänwa, jupajj kuntï yateqkän uk pä familiaruw yatiyatayna. Uka familianakajja, mä sacerdotempiw Diosajj kimsa diosanakat mayar apthapitawa ukat almajj janiw jiwkiti siski uka yatichäwinakat parlañ amtapjjatayna. Uka tantachäwirojja, wali aytat kimsa tatakuranakaw jutapjjäna. Jupanakajj janiw Bibliarjam qhanañchapkänti ukat janirakiw amuyañjamäkänsa. Ukjja, Bibliat yateqerinakajj jankʼakiw amuyapjjäna. Uka tantachäwi qhepatjja, uka familiatjja tunka phesqaniw Jehová Diosan Qhanañchiripäjjapjjäna.

Jichhürunakanjja, janiw ukham yatiyjjapjjti. Ukampis uka tiemponjja, walja kutiw Paolojj tatakuranakampi ukham tantachasirïna ukat jupanakamp Bibliat parlañatakejj suma wakichtʼatäjjänwa. Mä kutejja, walja jaqenak nayraqatanwa ukham parlasipkäna. Ukat uka tantachäwir saririnakat mä qawqhanirojj jan wali amtampi jisktʼapjjañapatakiw amtayapjjatayna, ukajj qhanaw amuyasïna. Ukampis kuntï tatakuranakajj jan suyapkäna ukaw pasäna. Tantachasirinakat maynïriw akham jisktʼäna: religionanakan politicar mitisipjjañapajj walikïskpachati sasa. Ukham jisktʼatajj tatakuranakajj jan walinwa uñjasipjjäna. Ukat mä akatjamatwa lusajj jiwtʼjjäna ukat uka tantachäwjja yaqha urutakiw jittʼayasjjäna. Ukjja tatakuranakaw wakichapjjatayna, janitï tantachäwejj kunjamtï munktan ukarjamäkani ukhaw luz jiwtʼayañäni sasaw amtapjjatayna, uk mä qawqha maranak qhepatwa yatipjjta.

Paolomp 10 maranak jaqechatapkayäta ukhaw tamanak tumptʼirjam irnaqtʼapjjasmati sasin jisktʼapjjetu. Ukar iyaw sañajj chʼamakïnwa, kunatejj chachajajj mä suma trabajonïnwa. Ukampis Diosar mayisisa ukat sum lupʼikiptʼasajj iyaw sapjjtwa. Qorpachapkitäna uka familianakampejj wali sum pasapjjerïta. Jupanakampiw arumanakajj Bibliat yatjjatapjjerïta, ukatjja Paolow wawanakarojj tareanakap lurapjjañapatak yanaptʼirïna, matemática toqetwa jukʼamp yanaptʼirïna. Jupajj wal liyirïna ukat kuna aski yatichäwinaksa jan ukajj chʼamañchtʼkir arunak jikjjatirïna ukhajja, wali kusisitaw awistʼapjjerïtu. Ukat jila partejja, lunesanakaw Jehová Diosan Qhanañchirinakapajj jan utjki uka markanakar yatiyir sarapjjerïta, ukat kuna arstʼäwtï uka arumajj arstʼasiñapäkäna ukar jutapjjañapatakiw jawstʼapjjerïta.

Pä marakiw tamanak tumptʼirjam irnaqasipkayäta, ukhaw Roma markankir Betelan serviñatak invittʼapjjetu. Paolojj Departamento de Asuntos Legales ukanwa irnaqäna, nayajj Departamento de Revistas ukanaraki. Ukan yatinoqtañajj chʼamakïnwa, ukampis taqe chuymaw istʼasirïñ munapjjayäta. Kunjamsa Betel Utan jiljjattasipkakïna ukat Italia markansa Jehová Diosan Qhanañchirinakapajj jiljjattaskäna uk uñjañajj wali kusiskañänwa. Ukhamarusa, uka maranakanwa Jehová Diosan Qhanañchirinakapajj leyinakarjam uñtʼatäjjapjjäna. Betelan irnaqtʼasajj wali kusisitaw jikjjatasipjjayäta.

Uka tiemponjja, wila toqet kuntï amuyktan ukajj Italia markan uñtʼatäjjänwa. 1980 qallta maranakanjja, mä chacha warmiruw tribunalar apapjjäna, jupanakaw phuchhaparojj wila jan uchayasin jiwayapjje sasaw kʼarintapjjäna. Ukampis phuchhapajj wilan usunïtapatwa jiwäna, uka usjja Italia markansa ukat uka jakʼankir markanakansa wawanakajj awk taykapatwa katoqapjje. Walja betelitanakaw uka jilat kullakarojj abogadonakampi yanaptʼapjjäna. Ukat mä tratadona ukat ¡Despertad! mä revistanwa, kunjamsa cheqpachapuni ukajj pasäna ukat Bibliajj kamsis wila toqetjja uk jaqenakar qhanañchäna. Uka phajjsinakanjja, Paolojj 16 horanakaw jan samartʼas irnaqäna. Ukat kuntï lurirjamäkayät ukampiw yanaptʼayäta.

Nanakajj 20 maranak jaqechatäpkäyät ukhaw kuntï jan suyapkayäta ukajj pasapjjetu. Amuyatajj usur jaqjamakïtwa siskayäta ukhajja, nayajj 41 maranejjayatwa ukat Paolojj 49 maraniraki. Sapüru qellqasirïkäna ukarojja, akham sasaw qellqtʼasïna: “Mayisïwi: Ukatï cheqächejja, Jumar sapüru loqtasipkakiñajataki, yupaychäwin jan aynachtʼañataki ukat suma awk taykjam luratanakajampi wawar yatichañatak yanaptʼapjjeta. Taqe kunat  sipansa kuntï pasïr 30 maranakan jilat kullakanak nayraqatan siskayäta uk mä jukʼaksa phoqhañ yanaptʼita” sasa. Uka mayisïwipsa ukat nayan mayisïwijsa Jehová Diosajj istʼapjjetuwa.

Ilaria phuchhajajj nasjjäna ukhat aksarojj jakäwinakajajj janiw pachpäjjänti. Awisajj aynachtʼataw jikjjatasipjjerïta kunjamtï Proverbios 24:10 qellqatan “tʼaqhesiña horasantejj mayjtʼasïta ukapachajja, jukʼa chʼamanikiwa jikjjatasjjäta” siski ukhama. Ukampis nanakkamaw yanaptʼasipjjayäta, uk lurañajj kunja askisa uk sum yatipjjayäta.

Diosatak sapür irnaqtʼiri awk taykanïsajj wal kusista sasaw Ilariajj saraki. Jupajj munasita ukat suma uñjataw jikjjatasïna. Urunakajj nayaw uñjirïta ukat arumanakajj Paolow jupamp anatiri ukat tareanak lurañapatakis yanapiri. Ukat yanaptʼañ tukuyasajja, awisajj paya jan ukajj kimsa horaskamaw trabajop tukuyañkam irnaqeri. Ilariajj akham sirïnwa: “Awkijaw suma amigojajja” sasa.

Diosat jan jitheqtañapatakejj sapa kutiw Ilariar cheqañchapjjerïta, awisajj qhana arumpiw cheqañchapjjerïta. Mä kutejja, amigapampi anatkasaw jan wal luräna. Ukham luratapajj kunatsa jan walïkäna uk Bibliampiw qhanañchtʼapjjta ukat nanakan uñjkataw amigapat perdón mayisïna.

Awk taykapan Diosar taqe chuyma yupaychapjjatapat Ilariajj wal yuspäri. Jichhajja, jupajj jaqechatäjjewa ukat Jehová Diosar istʼañasa ukat ewjjtʼaparjam sarnaqañas kunja askisa uk sum amuyi.

Paolojja, 2008 maranwa canceranïtap yatisïna. Qalltanjja, usupat waliptjjaniw sañjamänwa, ukat jupajj nayar wal chʼamañchtʼitäna. Kawkhantï sum qollapki uka doctoranakwa thaqhapjjta. Ilaria wawajampejj walpun oración mayisipjjayäta ukat Jehová Diosaruw kuna jan waltʼäwinak paskaspa ukar saykatañatak yanaptʼa mayisipjjayäta. Ukhamäkchïnsa, 2010 maran chachajajj jiwjjäna ukhajja, wali llakitaw qheparapjjta. Jupajj wali chʼamani ukat kun lurañatakis jankʼakïnwa, ukampis jukʼat jukʼatwa qʼal aynachtʼawayi. Kuna askinaktï 45 maranakan jupamp lurawayapkta ukanak amtañajj wal chuymachtʼitu. Qawqhtï lurirjamapkayät ukarjamaw Jehová Diosatak irnaqtʼawayapjjta, Diosajj ukanak janiw armaskaniti. Kunjamtï Juan 5:28, 29 qellqatajj siski ukarjamaw Paolon jaktaniñap taqe chuyma suytʼaskta.

Chuymajanjja, Noen sarnaqäwipat wal yatjjatañ munir jiskʼa wawäkiristsa ukhamwa amuyasiskakta. Jehová Diosajj kun luram sischitaniy ukar istʼaskakiñwa amtawayta. Kuna jan waltʼäwinakasa, munat familiar chhaqhayasiñasa jan ukajj kuna chʼama luräwinakasa, kuna bendicionanaktï Jehová Diosajj churkistu ukampejj janiw kunäkisa. Diosar istʼañajj wali wakiskiripuniwa, ukajj cheqäskapunitapjja naya pachpaw uñjawayta.