HEMIA wan long ol gudfala memori we mi tingbaot yet long saed blong papa blong mi. Hem i wan man we tingting blong hem i stap daon, hem i wok had mo hem i laekem stret fasin. Long 1953, taem hem i harem gud nius blong Baebol, kwiktaem nomo hem i laekem. Stat long taem ya, hem i traehad blong tijim ol samting we hem i stap lanem, long mifala ol pikinini. Mama blong mi i Katolik. Fastaem, hem i no wantem lego ol kastom blong skul blong hem. Be biaen, hem tu i stat blong folem ol tijing blong Baebol.

I no isi long papa mo mama, blong tufala i mekem stadi blong mifala. Mama i no skul gud, mo papa i wok had long garen mo i stap kamhom let. From we papa i taed tumas, samtaem hem i stap slip long taem blong stadi. Be gudfala samting i kamaot from traehad we hem i mekem. Mi mi fasbon, taswe mi givhan long papa blong tijim sista blong mi wetem tufala brata blong mi. Mi tijim olgeta tu long samting we papa i stap tokbaot oltaem. Hemia se Noa i lavem famle blong hem taswe hem i obei long God. !Mi mi laekem tumas stori blong Noa! I no longtaem afta, mifala evriwan i stap go long miting long Haos Kingdom long Roseto degli Abruzzi, hemia wan taon long Adriatik, long Itali.

Long 1955, mi wetem mama mitufala i krosem ol hil blong go long wes, blong joen long faswan asembli long Rom. Long taem ya, mi mi gat 11 yia nomo. Stat long taem ya, mi luk ol asembli olsem wan impoten samting long laef blong wan Kristin.

Long yia we i kam biaen, mi baptaes mo stret afta, mi mekem wok blong fultaem paenia. Taem mi gat 17 yia, mi kam spesel paenia long Latina, long saot blong Rom. Taon ya i niu, mo ol man oli rere nomo blong lesin long gud nius. Oli no wari sipos ol narafala oli jikim olgeta. Taon ya i stap samwe 300 kilometa longwe long haos blong mifala. Mi mo sista we i paenia wetem mi, mitufala i glad tumas blong seremaot plante buk we oli tokbaot Baebol. Be mi mi stap tingbaot famle blong mi tumas. Nating se i olsem, mi wantem obei long ol advaes we mi kasem.

Biaen, long 1963, oli sanem mi mi go long Milan, blong givhan blong mekem ol samting oli rere from bigfala asembli ya we nem blong hem, “Gud Nius Blong Olwe.” Long taem blong asembli, mi wok wetem plante volontia. Wan long olgeta hemia Paolo Piccioli, we hem i wan brata blong taon ya Florence. Long nambatu dei blong asembli, Paolo i givim wan tok long saed blong fasin ya blong no mared. Tok ya i rili pulum tingting blong ol man we oli stap lesin. Mi tingbaot se taem mi harem tok ya, mi stap tingting se, “brata ya  bambae i no mared samtaem.” Be biaen, mitufala i stat blong raetem leta long mitufala, mo mitufala i luk se mitufala i gat sem tingting long plante samting. Mitufala i gat semfala mak long saed blong spirit, mitufala i lavem Jehova, mo mitufala i gat strong tingting blong obei long hem. Paolo mo mi, mitufala i mared long 1965.

Mi mekem wok blong fultaem paenia long taon ya Florence, blong ten yia. Mi sapraes tumas blong luk olsem wanem kongregesen i gru, speseli ol yangfala we oli stap gohed gud. Paolo mo mi, mitufala i laekem blong spenem taem wetem ol yangfala ya, blong storian long ol samting we i mekem bilif blong olgeta i strong. Mo mitufala i laekem blong spenem taem wetem olgeta blong pleplei. Paolo i laekem blong plei futbol. I tru se mi mi laekem blong spenem taem wetem man blong mi. Be mi luksave se ol yangfala ya mo ol famle long kongregesen, oli harem gud taem Paolo i soemaot se i tingbaot olgeta mo i spenem taem wetem olgeta.

Oltaem, taem mi tingtingbak long ol man we mitufala i stadi Baebol wetem olgeta, mi harem gud tumas. Wan woman we mi stadi Baebol wetem hem, nem blong hem Adriana. Hem i tokbaot samting we hem i lanem, long tu narafala famle blong hem. Ale, trifala i mekem plan blong gat wan miting wetem wan pris, blong oli tokbaot ol bilif olsem, triniti mo sol we i no save ded samtaem. Tri lida blong jos oli kam long miting ya. Ol toktok blong ol lida ya blong jos, i mekem tingting blong ol man i fasfas, mo taem oli talem wan samting, be biaen oli jenisim toktok blong olgeta bakegen. Adriana wetem tufala narafala famle blong hem, oli jekem toktok blong ol lida ya wetem ol klia tijing blong Baebol, mo oli luksave kwiktaem se samting we ol lida ya oli talem i no tru. Yes, miting ya i mekem wan bigfala samting i kamaot. Samwe 15 memba blong ol famle ya oli kam ol Witnes.

I tru se long taem blong yumi, fasin blong mekem wok blong prij i no olsem fastaem. Bifo, Paolo i “savegud” olsem wanem blong toktok wetem ol pris. Mo hem i storian wetem plante pris. Mi mi tingbaot wan taem we hem i stap long wan miting we ol pris oli mekem. Mo plante man we oli no Witnes oli kam long miting ya. I luk olsem se ol man blong agens, oli mekem plan finis se sam man we oli stap lesin, bambae oli askem ol had kwestin long taem blong miting. Be, storian i jenis bigwan. Wan man i askem sipos i stret we ol jos oli joen long politik, olsem we i stap hapen long ol yia we oli pas. Taem man ya i askem kwestin ya, ol pris oli no moa save wanem blong talem. Wantaem nomo, ol laet oli ded, mo miting i stop. Sam yia biaen, mifala i harem se laet we i ded long taem blong miting ya, hemia wan plan we oli mekem finis se bambae i olsem, sipos storian blong olgeta i no folem wanem we ol pris oli plan long hem.

Mi mo Paolo i mared ten yia, ale oli askem long mitufala blong mitufala i visitim ol kongregesen long wan  eria. Paolo i gat wan gudfala wok, taswe i no isi blong mekem desisen ya. Be afta we mitufala i prea mo tingting gud, mitufala i joen long niufala rod ya blong mekem wok blong God. Mitufala i go stap wetem wan famle mo mitufala i glad blong joen wetem famle ya. Long sapa, plante taem mifala evriwan i stadi, mo biaen, Paolo i givhan long ol pikinini blong mekem homwok blong olgeta, speseli sipos hem i matematik. Mo tu, Paolo i laekem tumas blong rid mo hem i glad blong storian long ol gudfala samting we hem i ridim, blong givhan long narafala. Long Mande, plante taem mifala i go prij long ol taon we i no gat Witnes long hem, mo mifala i singaot ol man blong oli kam lesin long wan tok long aftenun.

Blong tu yia, mitufala i mekem wok ya blong visitim ol kongregesen. Biaen, oli singaot mitufala blong go wok long Betel long Rom. Paolo i lukaot long ol wok we i joen wetem loa, mo mi mi wok long ples blong ol magasin. I no isi blong mitufala i lan long niufala jenis ya, be mitufala i gat strong tingting blong obei. Mitufala i glad tumas blong luk we sloslo, branj ofis long Itali i kam bigwan moa, mo namba blong ol brata mo sista tu i kam antap. Long taem ya, gavman i luksave plante impoten samting long saed blong ol Witnes blong Jehova long Itali. Mitufala i glad tumas blong mekem wok ya.

Long taem ya we mitufala i stap wok long Betel long Itali, gavman i luksave se bilif blong ol Witnes long saed blong blad, i stanap long Baebol. Long stat blong ol yia 1980, i bin gat wan kot kes long saed blong blad, we i mekem plante stori i kamaot. Kot i jajem wan man wetem woman blong hem we tufala i Witnes, se tufala nao i mekem gel blong tufala i ded. Be gel ya i ded from wan rabis sik blong blad we hem i bon wetem, we plante man raonabaot long Mediterenian Si oli kasem. Ol brata mo sista long Betel, oli halpem ol loea we oli lukluk long kes blong ol Kristin papa mo mama. Oli printim wan smol pepa mo wan spesel Wekap!, we oli blong givhan long ol man blong oli kasem save gud, samting we Baebol i talem long saed blong blad. Long taem ya, Paolo i stap wok evri dei blong 16 aoa, we i no stop nating. Mi traehad blong givhan long hem long impoten wok ya blong hem.

Long 20 yia blong mared blong mitufala, i gat sam samting i jenis long laef blong mitufala. Mi mi gat 41 yia mo Paolo i gat 49. Long taem ya, mi talem long Paolo se mi gat bel. Long sem dei ya we mi talem samting ya long hem, hem i raetem long buk blong hem, samting we bambae hem i tokbaot long prea blong hem. Hem i raetem se: “Sipos samting ya i tru, yu givhan long mitufala blong mitufala i no stop long wok blong fultaem paenia, blong mitufala i gohed blong fren gud wetem yu. Mo givhan long mitufala blong mitufala i stap olsem wan gudfala papa mo mama. Antap long hemia, plis yu halpem mi blong mi traehad blong folem wan long olgeta samting we mi stap talem long ol tok we mi mekem, long ol 30 yia we i pas finis.” Taem mi luk samting we i hapen, mi luksave se Jehova i ansa long prea blong hem mo long prea blong mi tu.

 Taem Ilaria i bon, laef blong mitufala i jenis bigwan. Ol Proveb 24:10 i talem se: “Sipos tingting blong yu i no strong long taem blong trabol, hemia i soemaot we yu yu no strong nating.” Blong talem stret, i gat samtaem we mitufala i harem nogud. Be mitufala i givgivhan long mitufala, mo mitufala i tingbaot oltaem blong talem ol gudfala toktok blong leftemap tingting blong mitufala.

Ilaria i talem se hem i glad blong gat wan papa mo mama we tufala i Witnes mo tufala i bisi blong mekem wok blong prij fultaem. Hem i neva harem se hem i stap hem wan nomo. Mitufala i lukaotgud long hem. Long dei, mi stap wetem hem. Long aftenun, taem Paolo i finis wok, hem i spenem taem wetem Ilaria, nating se sam samtaem Paolo i gat sam wok yet we hem i mas finisim. Hem i pleplei wetem Ilaria, mo i halpem hem blong mekem ol homwok blong hem. Samtaem hem i mas wekap kasem 2 klok no 3 klok long moning, blong finisim ol wok blong hem. Ilaria i talem oltaem se: “Papa i besfren blong mi.”

Yes, mitufala i mas givhan long Ilaria oltaem blong hem i gohed long trutok, mo tu samtaem mitufala i mas tok strong long hem. Mi tingbaot wan taem we hem i stap pleplei wetem wan fren blong hem, nao hem i mekem wan fasin we i no stret. Mitufala i yusum Baebol blong eksplenem long hem se fasin we hem i mekem i no stret. Mo tu, mitufala i talem long hem blong i talem sore long fren blong hem, long fored blong mitufala.

Ilaria i talem se hem i glad tumas we papa mo mama blong hem, tufala i laekem wok blong prij. Naoia we hem i mared, hem i kasem save moa from wanem i impoten blong obei long Jehova mo folem ol loa blong hem.

Long 2008, Paolo i faenemaot se hem i gat kansa. Fastaem, i luk olsem se Paolo i save winim sik ya, mo samting ya i mekem mi mi harem gud tumas. Mifala i lukaot ol advaes long saed blong meresin. Be long semtaem, mifala i prea tugeta wetem Ilaria, mifala i askem strong long Jehova blong i givhan long mifala, long ol samting we bambae i hapen long fiuja. Nating se i olsem, mi stap lukluk man blong mi, mo mi stap tingbaot se fastaem hem i strong gud, be naoia hem i stap lusum paoa. Paolo i ded long 2010. Mo samting ya i mekem mi mi harem nogud tumas. Be taem mi stap tingtingbak long ol gudfala samting we mitufala i mekem long ol 45 yia we i pas, hemia i leftemap tingting blong mi. Mitufala i mekem bes blong mitufala long wok blong Jehova. Mi save se Jehova i tinghae bigwan long wok blong mitufala. Mi wantem tumas blong luk taem ya we Paolo bambae i laef bakegen, folem ol tok blong Jisas long Jon 5:28, 29.

Long hat blong mi, mi mi smol gel ya yet, we mi laekem tumas stori blong Noa. Tingting blong mi i no jenis. Mi wantem obei long eni samting we Jehova i askem mi blong mi mekem. Mi save se ol hadtaem, ol samting we mi mekem blong Jehova, ol samting we mi lusum, oli smol nomo taem mi skelem wetem plante gudfala samting we God ya we i lavem yumi, i promes blong givim long yumi. Mi mi pastru long ol samting ya, mo mi save talem long yu se i impoten tumas blong obei long Jehova.