CHE túva haʼe vaʼekue peteĩ kuimbaʼe hekomirĩva ha iguápova. Haʼe ningo ohayhueterei pe tekojoja, ha ohendu ypy guive la Biblia omboʼéva, áño 1953-pe, ogusta voi chupe. Upe tiémpo guive ojapo opa ikatúva oremboʼe hag̃ua umi mbaʼe oaprendéva ohóvo. Che sy katu katólika vaʼekue, upévare ñepyrũrã hasy chupe opoi hag̃ua umi kostúmbregui, péro mbeguekatúpe pe añetegua oĩva Ñandejára Ñeʼẽme opoko avei ipyʼapýre.

Papa ombaʼapo kokuépe pe ára pukukue ha mama katu saʼi olee, upévare heta vése ijetuʼu chupekuéra oremboʼe hag̃ua la Biblia. Sapyʼánte ore túva ikaneʼõiterei ha opyta oke rostudia jave. Péro tuicha orepytyvõ oñehaʼãmbaitégui hikuái orerekomboʼe hag̃ua. Che hína pe ijypykuéva, ha upéicha rupi aipytyvõ jepi chupekuéra romboʼe hag̃ua che ermánape ha umi mokõi che ermanoʼípe. Heta vése roñemongeta peteĩ mbaʼe papa oremomanduʼa memévare: Noé ohayhu vaʼekue ifamília, ha ohechauka upéva iñeʼẽrendúvo Jehovápe. ¡Chegustaiterei ningo Noé rembiasakue! Tiémpo riremínte enterovéva rohóma rreunionhápe peteĩ Salón oĩvape táva Roseto degli Abrúzzipe (Italia), opytáva mar Adriático rembeʼýpe.

Arekórõ guare 11 áño, 1955-pe, mama ha che roho primera ves peteĩ aty guasuhápe. Upearã rohasa umi montáña ha roviaha poniénte gotyo rog̃uahẽ meve Rómape, pe táva oikohápe pe asambléa. Upe guive ahechakuaa umi aty guasu iñimportanteha opavave kristiánope g̃uarã.

Ajevautisa 1956-pe ha upe riremínte añepyrũ che prekursorádo. Akumplírõ guare 17 áño oiko chehegui prekursóra espesiál táva Latínape, opytáva sur gotyo Rómagui ha 300 kilómetro ógagui. Upérõ pe puévlo ipyahu ha umi héntepe ndoipyʼapyguasúi mbaʼépa heʼíta ivesinokuéra ojepredika haguére chupekuéra. Che ha che kompañéra roheja heta puvlikasión umi ogajárape ha rovyʼa ropredikávo upérupi, péro che chemitã gueteri ha ahechagaʼueterei che hentekuérape. Upéicharõ jepe, ajedesidi ajapo umi mbaʼe Jehová omeʼẽ vaʼekue chéve ajapo hag̃ua.

 Tiémpo rire, chemondo hikuái táva Milánpe aipytyvõ hag̃ua pe lugár ojejapotahápe pe Asamblea Internacional “Buenas Nuevas Eternas”, áño 1963-pe. Upépe ambaʼapo de voluntária heta ermáno ndive. Umíva apytépe oĩ Paolo Piccioli, peteĩ ermáno oúva Florénciagui. Pe segundo día de asambléa, haʼe ojapo peteĩ diskúrso neporãva oñeʼẽva umi omendaʼỹvare. Chemanduʼa apensa hague: “Oiméne ko ermáno nomendamoʼãi arakaʼeve”. Péro pe aty guasu rire roñepyrũ romondo ojupe kárta ha rohechakuaa oĩha heta mbaʼe mokõivévape oregustáva, por ehémplo umi mbaʼe rohupytyséva, avei mokõivéva rohayhu Jehovápe ha oreñeʼẽrenduse chupe. Romenda áño 1965-pe.

Ajapo che prekursorádo rregulár 10 áñore Florénciape. Rovyʼa rohechávo mbaʼéichapa okakuaa umi kongregasión, koʼýte umi mitãrusu ha mitãkuña oñakãrapuʼãvo ohóvo. Hendivekuéra rohasa vaʼekue heta tiémpo, roñemongeta la Bíbliare ha rojediverti. Paolo ohugaseterei voi partído umi mitãrusúndi. Heta vése ahasaseve tiémpo che ména ndive, péro aikuaa umi imitãva ha umi família kongregasiongua oikotevẽha avei hese.

Avyʼaiterei chemanduʼávo umi estúdio vívliko roguereko vaʼekuére upe tiémpope. Por ehémplo, peteĩ che estudiánte hérava Adriana, omombeʼu mokõi famíliape umi mbaʼe oaprendéva. Koʼã família ojapo arréglo oñemongeta hag̃ua peteĩ saserdótendi pe trinida ha álmare. Oñemongeta jave hikuái, og̃uahẽ mbohapy saserdóte iñimportantevéva. Péro umi estudiánte pyaʼe ohechakuaa noñentendeiha haʼekuéra omboʼéva ha noĩporãiha la Biblia heʼíva ndive. Upéi koʼã mokõi família odesidi oservi Jehovápe ha 15 voi ojevautisa.

Añetehápe ningo upérõ pe predikasión idiferénte. Upe tiémpope, pyʼỹinte Paolo ojapo arréglo oñemongeta hag̃ua umi saserdóte ndive, ha oiko chugui peteĩ kuimbaʼe “ndekatupyrýva” odefende hag̃ua umi mbaʼe la Biblia omboʼéva. Chemanduʼa peteĩ jey ojejapo hague peichagua rreunión ha upépe oĩ heta hénte ndahaʼéiva Testígo. Sapyʼaitépe ojehechakuaa ojeprepara hague umi hénte apytépe umi ojapóva porandu ijetuʼúva oñembohovái hag̃ua. Péro upeichaháguinte oĩ oporandúva iporãpa umi rrelihión ojeheʼa polítikare, oikóma haguéicha yma guive. Ko porandu oheja vai umi saserdótepe. Upéi oguepa pe lus ha pe rreunión opa rei. Tiémpo rire roikuaa umi saserdóte voi heʼi hague oñembogue hag̃ua pe lús pe rreunión nosẽiramo haʼekuéra oipotaháicha.

Diez áño romenda rire, oñeporandu oréve ndoroserviséipa sirkuítope. Upéva ijetuʼu rodesidi hag̃ua Paolo oreko rupi peteĩ traváho ogana porãitereihápe. Péro upéi roñemboʼe ha rojepyʼamongeta hese ha roasepta pe invitasión. Rohasa heta tiémpo umi ermáno ndive hogakuérape. Pyʼỹinte rostudia hendivekuéra pyharekue ha Paolo oipytyvõ umi mitãme ojapo hag̃ua hembiapokuéra eskuelapegua, por ehémplo matemátika. Haʼe ningo oleeseterei voi ha omombeʼu jepi umi mbaʼe ikatúva ointeresa ha omokyreʼỹ ermanokuérape. Káda lunes rosẽ ropredika umi lugár ndaiporihápe Testígo ha roinvita umi tapichápe oho hag̃ua ohendu peteĩ diskúrso ojejapótava upe pyharépe.

Rohasa rire dos áño sirkuítope roñeinvita roho hag̃ua roservi Betélpe, oĩva Rómape. Upépe Paolo ombaʼapo Departamento de Asuntos Legálespe, ha che katu Departamento de Suscripciónespe. Hasy oréve rojepokuaa hag̃ua, péro rojedesidi oreñeʼẽrendu Jehovápe. Orepyʼarory rohechávo mbaʼéichapa okakuaave ohóvo pe Sukursál ha hetave umi ermáno Itáliape. Hiʼarive, upe tiémpope ojelegalisa Testigo de Jehová rembiapokuéra Itáliape. Añetehápe, rovyʼaiterei roservívo Betélpe.

Upe tiémpope avei ojekuaauka umi hénte Italiaguápe mbaʼépa opensa Testigokuéra tuguýre. Áño 1980 riremi oñemog̃uahẽ trivunálpe peteĩ situasión ijetuʼuetereíva. Ojekulpa mokõi Testígo omendávape omano haguére ifamília, jepe omano oreko rupi peteĩ mbaʼasy ogueronaséva jepi heta hénte oikóva upe lugárpe. Heta ermáno ombaʼapóva Betélpe oipytyvõ umi avogádo ombaʼapóvape ko matrimóniope g̃uarã. Upéi oñeguenohẽ peteĩ tratádo ha peteĩ rrevísta ¡Despertad! espesiál oñemyesakã hag̃ua mbaʼépa oiko raʼe ha mbaʼépa heʼi la Biblia tuguýre. Upérõ guare Paolo ombaʼapo jepi káda día 16 óra opytuʼuʼỹre, ha che ajapo ikatúva guive aipytyvõ hag̃ua chupe okumpli porã hag̃ua hembiapokuéra.

Romenda rire 20 áño oiko peteĩ mbaʼe norohaʼarõietéva. Paolo orekórõ guare 49 áño ha che 41 apyta cheryeguasu. Upe árape Paolo ohai iñahéndape umi mbaʼe heʼíva iñemboʼépe: “Oiméramo añete hyeguasu che rembireko, orepytyvõmína rosegi hag̃ua roservi de tiémpo kompléto, rojerovia mbarete hag̃ua ha rohekomboʼe porã hag̃ua ore famíliape ore ehémplo rupive. Chepytyvomína akumpli hag̃ua michĩmi jepe umi mbaʼe amboʼe vaʼekue platafórma guive koʼã 30 áño ohasa vaʼekuépe”. Apensávo umi mbaʼe rohupytývare koʼág̃a peve, ahechakuaa Jehová ombohovái hague chupe iñemboʼe ha che ñemboʼe avei.

 Tuichaiterei okambia ore situasión onase rire che membykuñaʼi hérava Ilaria. Añetehápe ningo heta vése orekangy, péro upéicha jave ropensa heʼívare Proverbios 24:10: “Nekangýramo ivai jave, nanembaretemoʼãi reikotevẽ vove” (NM). Péro roñehaʼã roñopytyvõ roikuaa rupi iñimportanteha mokõivéva roñomokyreʼỹ.

Ilaria heʼi ovyʼaitereiha isy ha itúva oservi meme haguére de tiémpo kompléto. Haʼe arakaʼeve noñeñandúi haʼeño ha ndofaltáiva chupe mbaʼeve. Che añangareko hese arakue, ha pyhare ou rire Paolo ohuga hendive ha oipytyvõ chupe ojapo hag̃ua idevér eskuelapegua, marãve ndoikói heta hembiapóramo ha opyta vaʼerã ombaʼapo las 2 térã las 3 de la madrugáda peve. Ilaria heʼími vaʼekue: “Papa che amigoite hína”.

Ohasávo pe tiémpo tekotevẽ vaʼekue roñemoñeʼẽ ha rokorrehi mimi chupe ikatu hag̃uáicha oiko kristiána teéicha. Chemanduʼa peteĩ jey ojeporta vai hague ohuga jave peteĩ iñamíga ndive. Upémarõ rohechauka chupe la Bíbliape mbaʼérepa ndovaléi ojeporta upéicha. Upe rire ojerure perdón iñamígape ore rovake.

Ilaria heʼi ovyʼaitereiha ituvakuéra ohayhu haguére Ñandejára servísio. Koʼág̃a haʼe omendáma ha ontende porãvéma mbaʼérepa tekotevẽ ñaneñeʼẽrendu Jehovápe ha jajapo haʼe heʼíva.

Áño 2008-pe Paólope ojeʼe orekoha kánser. Ñepyrũrã haʼetévaicha ojaliviátava. Haʼe akóinte hory ha chemokyreʼỹ. Roheka ikatuháicha umi tratamiénto ou porãvétava chupe. Avei Ilaria ha che roñemboʼe pukúmi ha rojerure Jehovápe taorepytyvõmi rombohovái hag̃ua upe situasión ijetuʼuvétava ohóvo. Upéicharõ jepe, ojapo vaieterei orerehe Paolo omanórõ guare 2010-pe. Ahecha mbaʼéichapa peteĩ kuimbaʼe imbaretéva ha iguápova, ikangy ohóvo omano meve. Péro tuichaiterei añekonsola chemanduʼávo umi 45 áño rohasa vaʼekuére oñondive. Romeʼẽ vaʼekue Jehovápe iporãvéva ha aikuaa ore rembiapokue ndopytareimoʼãiha. Aipotaitereíma og̃uahẽ pe tiémpo ikatutahápe arresivi jey Paólope oikove jey rire, heʼiháicha Juan 5:28, 29.

Che ningo ajogua gueteri peteĩ mitãkuñaʼi ohendusévape Noé rembiasakue. Koʼág̃a peve aime cheñeʼẽrendu hag̃uáicha Jehovápe, tahaʼe haʼéva ojeruréva chéve. Aikuaa porã ndaiporiha mbaʼeve ikatúva oñembojoja Jehová omeʼẽvare, jepe jahasa heta mbaʼe ijetuʼúva, jajesakrifika térã japerde heta mbaʼe. Che ahasáma koʼã mbaʼére ha ikatu haʼe iporãiteveha akóinte ñaneñeʼẽrendu Jehovápe.