ISA ina sa mga nadumduman ko sa akon amay, nga isa ka simple kag mapisan nga tawo. Makatarunganon gid sia, amo nga naganyat sia gilayon sa mensahe sang Biblia nga iya nabatian sang 1953. Sugod sadto, ginhimo niya ang iya bug-os nga masarangan nga itudlo sa amon ang iya natun-an. Sang primero, daw indi pa gid mabiyaan ni Nanay ang iya mga tradisyon subong Katoliko. Pero sang ulihi, ginbaton man niya ang mga panudlo sang Biblia.

Nabudlayan gid ang amon mga ginikanan sa pagtudlo sa amon. Si Nanay halos indi kabalo magbasa kag magsulat kag si Tatay pirme nagapangabudlay sa uma. Kon kaisa kapoy gid sia amo nga nagakadukaan sia sa tion sang amon pagtuon. Pero maayo gid ang resulta sang iya mga panikasog. Ako ang subang, gani nagabulig ako sa pagtudlo sa akon mga manghod—isa ka babayi kag duha ka lalaki. Lakip sa akon ginatudlo amo ang ginasiling pirme ni Tatay—ang gugma ni Noe sa iya pamilya, nga iya ginpakita paagi sa pagtuman sa Dios. Nanamian gid ako sini nga istorya sa Biblia! Wala madugay, nagtambong kami tanan sa mga miting sa Kingdom Hall sa Roseto degli Abruzzi, isa ka siudad sa baybayon sang Adriatic sa Italya.

Onse anyos lamang ako sang 1955 sang ginlatas namon ni Nanay ang mga kabukiran pakadto sa katundan para magtambong sa amon una nga kombension sa Roma. Sugod sadto, ginakabig ko ining dalagku nga mga pagtilipon subong isa sa pinakamaayo nga mga bahin sa kabuhi sang isa ka Cristiano.

Pagkadason nga tuig, nabawtismuhan ako kag dayon nagsulod sa bug-os tion nga pag-alagad. Sang 17 anyos ako, nangin espesyal payunir ako sa Latina, nga nahamtang sa bagatnan sang Roma kag mga 300 kilometros gikan sa amon balay. Halos bag-o pa lang ini nga siudad, gani wala sing labot ang mga tawo kon batunon sang iban ang mensahe sang Biblia. Nalipay kami sang kaupod ko nga payunir sa pagpanagtag sing mga literatura sa Biblia. Pero bangod bata pa ako, nahidlaw gid ako sa amon! Apang gusto ko tumanon ang instruksion sa akon.

Sang ulihi, gin-asayn ako sa Milan agod magbulig sa mga paghanda para sa “Walay Katapusan nga Maayong Balita” nga Internasyonal nga Asembleya sang 1963. Sa tion sang kombension, madamo kami nga nagboluntaryo, lakip  ang pamatan-on nga si Paolo Piccioli nga taga-Florence. Sa ikaduha nga adlaw sang kombension, naghatag sia sing mapagsik nga pamulongpulong parte sa pagkadiminyo. Nakasiling pa ako sadto, ‘Ina nga utod indi gid mangasawa.’ Pero nagsulatay kami, kag narealisar namon nga pareho ang amon mga tulumuron, pareho kami nga nagahigugma kay Jehova kag nagahandum nga tumanon sia. Nagpakasal kami sang 1965.

Nangin regular payunir ako sa Florence sing napulo ka tuig. Makalilipay makita ang pag-uswag sang kongregasyon, ilabi na sa bahin sang mga pamatan-on. Nalipay gid kami ni Paolo sa pagpakig-istorya sa ila parte sa espirituwal nga mga butang kag sa paglingawlingaw upod sa ila. Masami nga nagahampang sing soccer si Paolo upod sa ila. Siempre, gusto ko gid makaupod ang akon bana, pero nakita ko nga ang mga pamatan-on kag ang mga pamilya sa kongregasyon nagakinahanglan sang iya atension kag tion kag nagabenepisyo sa sini.

Nalipay gihapon ako sa pagdumdom sa madamo nga pagtinuon sa Biblia nga amon gindumalahan. Ang isa sa amon gintun-an amo si Adriana, nga nagsugid sa duha ka pamilya parte sa iya natun-an. Nag-iskedyul sila nga maistorya namon ang isa ka pari parte sa doktrina sang simbahan subong sang Trinidad kag imortal nga kalag. Tatlo ka mataas nga opisyal sang simbahan ang nag-abot. Ang ila paathag makalilibog kag wala nagasinanto, nga natalupangdan gilayon sang amon mga estudyante sa Biblia sang ginpaanggid nila ini sa maathag nga mga panudlo sang Biblia. Daku gid ang epekto sina nga pag-istoryahanay. Sang ulihi, mga 15 ka miembro sadto nga mga pamilya ang nangin Saksi.

Ang aton pamaagi sa pagbantala karon lain na kon ikomparar sang una. Sadto, si Paolo nangin “eksperto” sa pagdebate sa mga pari, kag pila ka beses ini natabo. Nadumduman ko nga ang isa sini ginhiwat sa atubangan sang mga indi Saksi. Nangin maathag sang ulihi nga abanse nga ginsilingan sang mga pari ang mga tumalambong nga magpautwas sing balik-awot nga mga pamangkot para mahuy-an si Paolo. Pero wala natabo ang ila plano. May namangkot kon husto bala nga magpasilabot ang simbahan sa pulitika, nga madugay na nila ginahimo. Sa sini nga punto, nabutang sa alang-alang ang mga pari. Hinali lang napatay ang suga, kag nauntat ang miting. Mga tinuig sang ulihi, nahibaluan namon nga ginplano ang pagpatay sa suga kon ang paghambalanay indi magpabor sa ginapaabot sang mga pari.

Napulo ka tuig na kami nga kasal ni Paolo sang gin-asayn kami nga mangin manugtatap sang sirkito.  Maayo ang obra ni Paolo, gani indi ini mahapos nga desisyon. Pero pagkatapos sang pangamuyo, ginbaton namon ini nga pribilehiyo. Nalipay kami sa pagpakig-upod sa mga pamilya nga nagapadayon sa amon. Kon gab-i, masami kami nga nagatuon subong grupo, kag dayon ginabuligan ni Paolo ang mga kabataan sa ila asaynment, ilabi na sa math. Isa pa, si Paolo nanamian magbasa kag nalipay sa pagsugid sang makawiwili kag makapalig-on nga mga butang nga iya nabasa. Kon Lunes, masami kami nagabantala sa mga banwa nga wala sing mga Saksi, nga nagaagda sa mga tawo sa isa ka pamulongpulong pagkagab-i.

Pagligad lamang sang duha ka tuig sa sirkito, gin-agda kami nga mag-alagad sa Bethel sa Roma. Naasayn si Paolo sa pag-atipan sa legal nga mga butang, kag ako naman sa Magazine Department. Indi mahapos ini nga pagbag-o, pero determinado kami sa pagtuman. Makalilipay makita ang amat-amat nga pagsangkad sang sanga talatapan kag ang pagdamo sang mga kauturan sa Italya. Sa sina nga tion, legal na nga ginkilala sa Italya ang mga Saksi ni Jehova. Nalipay gid kami sa sini nga sahi sang pag-alagad.

Samtang nagaalagad kami sa Bethel, ang aton base sa Biblia nga panindugan parte sa dugo nangin isyu sa Italya. Sang maaga nga bahin sang katuigan 1980, may isa ka kaso parte sa sini nga isyu nga nakakuha sing atension sang madamo. Ang isa ka mag-asawa nga Saksi ginsumbong nga may salabton sa kamatayon sang ila bata nga babayi, pero ang matuod napatay ini bangod sa malubha nga balatian sa dugo nga napanubli sang madamo sa rehiyon sang Mediteraneo. Ginbuligan sang mga kauturan sa Bethel ang mga abogado sining Cristiano nga mga ginikanan. Ang isa ka balasahon kag pinasahi nga edisyon sang Magmata! nakabulig para mahibaluan sang mga tawo ang kamatuoran kag maintiendihan kon ano ang ginasiling sang Pulong sang Dios parte sa dugo. Sadto nga mga binulan, masami nga 16 ka oras kada adlaw nga nagatrabaho si Paolo. Ginhimo ko ang akon masarangan sa pagsuporta sa iya importante nga mga hilikuton.

Beinte ka tuig na kami nga mag-asawa sang nag-abot ang wala namon ginapaabot. Kuarentay uno anyos ako kag si Paolo 49 sang ginsilingan ko sia nga daw nagabusong ako. Sa iya diary, nabasa ko ang iya ginsulat sina nga adlaw: “Pangamuyo: Kon matuod ini, buligi kami nga makapadayon sa bug-os tion nga pag-alagad, indi magpabaya sa espirituwal, kag mangin maayo nga halimbawa subong mga ginikanan. Labaw sa tanan, buligi ako nga maaplikar bisan ang 1 ka porsiento lang sang tanan nga akon ginsiling sa plataporma sang nagligad nga 30 ka tuig.” Napamatud-an namon nga ginsabat gid ni Jehova ang iya kag ang akon pangamuyo.

 Daku nga pagbag-o ang natabo sa amon kabuhi sang natawo si Ilaria. Ang matuod, may mga tion nga naluyahan kami sing buot, subong sang ginsiling sang Hulubaton 24:10: “Kon mapunaw ka sa adlaw sang kapiotan, ang imo kusug diotay.” Pero nagbuligay kami, nga nagadumdom sang kapuslanan sang pagpalig-unay sa isa kag isa.

Sa karon, masami nga nagasiling si Ilaria nga nalipay sia nga ang iya mga ginikanan mga Saksi, nga masako sa bug-os tion nga pag-alagad. Wala gid sia nagbatyag nga ginpabay-an; nagdaku sia sa maayo gid nga pamilya. Kon adlaw, kaupod niya ako. Kon gab-i naman pagpauli ni Paolo, bisan may talapuson pa sia nga obra, ginahatagan gid niya sing tion si Ilaria, nga nagahampang sa iya kag nagabulig sa iya asaynment. Ginahimo niya ini bisan pa magpulaw sia asta alas dos ukon alas tres sang kaagahon para tapuson ang iya obra. Si Ilaria pirme nagasiling, “Si Daddy ang akon best friend.”

Siempre, para mabuligan si Ilaria nga makapabilin sa Cristiano nga dalanon, kinahanglan nga indi kami mag-untat, kag kon kaisa dapat mangin istrikto man. Isa ka bes, gin-away niya ang iya amiga samtang nagahampang sila. Ginpaathag namon paagi sa Biblia kon ngaa indi niya ina dapat paghimuon. Gin-updan namon sia sa pagpangayo sing pasaylo sa iya amiga.

Pirme nagasiling si Ilaria nga ginaapresyar niya ang gugma sa ministeryo sang iya mga ginikanan. Karon nga may bana na sia, mas naintiendihan niya kon daw ano ka importante ang pagtuman kay Jehova kag pagsunod sa iya panuytoy.

Sang 2008, nahibaluan ni Paolo nga may kanser sia. Sang primero, daw may paglaum pa nga magaayo sia, kag ginpalig-on gid niya ako. Luwas sa pagpangayo sing pinakamaayo nga laygay parte sa pagbulong, nangamuyo kami ni Ilaria kay Jehova, nga nagapangabay nga buligan kami nga maatubang ang posible nga matabo. Pero nasaksihan ko ang amat-amat nga pagluya sang isa ka tawo nga mabaskog kag mapagsik sadto. Tuman gid kasakit sang napatay sia sang 2010. Apang nalugpayan gid ako sa amon nahimo sa sulod sang 45 ka tuig nga pag-updanay. Ginhatag namon kay Jehova ang amon pinakamaayo. Nahibaluan ko nga ang amon nahimo may dayon nga kapuslanan. Kag ginapaabot ko gid ang pagbanhaw kay Paolo, suno sa ginsiling ni Jesus sa Juan 5:28, 29.

Para sa akon, ako gihapon yadtong bata nga nanamian sang istorya parte kay Noe. Wala nagbag-o ang akon determinasyon. Gusto ko tumanon si Jehova ano man ang iya pangabayon. Napat-od ko nga ang bisan ano nga mga kabudlayan, sakripisyo, ukon kadulaan diutay lamang kon ipaanggid sa dalayawon nga mga pagpakamaayo sang aton mahigugmaon nga Dios. Personal ko ini nga naeksperiensiahan—kag ginapasalig ko kamo, indi gid ninyo ini paghinulsulan.