EGU tamana be manau bona gaukara goada tauna. Ia be kara maoromaoro ia ura henia bada, unai dainai lagani 1953 ai Baibel ena sivarai namona ia kamonai neganai, maoromaoro ia abia dae. Unai nega amo, ia gaukara goada ia dibaia gaudia be ai natudia dekenai ia hadibaia totona. Matamanai, egu sinana be ia ura lasi ena Katolik dubu ia rakatania. To, gabeai ia danu be Baibel ena hadibaia herevadia ia abia dae.

Egu tama sina idia hekwarahi ai idia stadi henia totona. Badina emai sinana be duahiduahi ia diba namonamo lasi, bona emai tamana be hora momo uma gabu dekenai ia gaukara. Nega haida egu tamana be stadi lalonai ia mahuta. To, ena hekwarahi ese anina namona ia havaraia. Lau be natuna roboana dainai, egu tadidia lau hadibaia. Hegeregere, egu Tamana ese nega momo ia gwauraia sivaraina lau herevalaia—Noa ese ena famili ia lalokau henia bona Dirava ia badinaia karana. Lau ese unai sivarai lau ura henia bada! Daudau lasi murinai, Italy dekenai, Adriatic Davara ena kone kahanai ia noho siti ladana, Roseto degli Abruzzi ena Kingdom Hall dekenai hebou totona ai lao.

Lagani 1955 ai, egu mauri lagani be 11 neganai, lau bona egu sinana be ororo haida ai hanaia bona Rome dekenai ai lao, emai hebouhebou ginigunana ai abia totona. Unai nega amo lau laloparara, Keristani taudia edia mauri lalonai unai hebouhebou badadia be mai anina bada.

Lagani 1956 ai bapatiso lau abia, bona lau painia matamaia. Egu mauri lagani be 17 neganai, lau be Latina, Rome ena saut kahanai spesel painia gaukara lau karaia. Egu hanua amo ena daudau be kilomita 300 bamona. Unai be siti matamatana dainai, taunimanima be ai ida idia herevahereva neganai, edia neiba dekenai idia laloa momo lasi. Unai dainai, lau bona egu painia turana be mai moale ida Baibel bukadia momo ai hariharilaia. To lau matamata dainai, egu famili lau laloa momo. To, lau ura Iehova ese lau dekenai ia henia gaukarana lau hagugurua.

Gabeai, lagani 1963 ai lau idia siaia Milan ai idia karaia intanesinol hebouhebou ladana “Noho Hanaihanai Sivarai  Namona” hegaegaelaia gaukarana lau durua totona. Unai hebouhebou ai, lau be ma haida ida volantia gaukara ai karaia—idia ta be Florence amo ia mai matamata tadikaka ta ladana Paolo Piccioli. Hebouhebou ena dina iharuana ai, ia ese singul taudia durua totona tok namona ta ia henia. Lau laloatao unai neganai lau laloa, ‘Inai tadikaka be do ia headava diba lasi.’ To gabeai, lau bona Paolo be revareva amo ai tore heheni, bona ai itaia emai tahua gaudia be tamona, ai ura Iehova do ai lalokau henia bona ia do ai badinaia. Lagani 1965 ai ai headava.

Florence ai, lau be lagani 10 lalonai regula painia gaukara lau karaia. Lau moale badina lau itaia kongrigeisen be ia bada ia lao, bona matamata taudia be hereva momokani lalonai idia goada. Lau bona Paolo ai moale unai matamata taudia ida Baibel ai herevalaia, bona moale karadia ai karaia hebou. Nega momo Paolo be idia ida soka ia gadara. Momokani, lau ura egu adavana ida gau haida ai karaia hebou, to lau laloparara kongrigeisen ai matamata taudia bona famili ta ta ese iena heduru idia abia danu be namo.

Guna ai karaia Baibel stadi momo lau laloa lou neganai lau moale. Emai Baibel stiuden ta, Adriana ese ia dibaia gaudia be famili rua dekenai ia herevalaia. Unai famili ese dala idia karaia pris ta ida dubu ena hahediba herevadia hegeregere, Toi Tamona bona mase diba lasi soulina do idia herevalaia. Pris taudia toi be unai hebou dekenai idia lao. Idia gwauraia herevadia edia anina be idia hedinarai namonamo lasi dainai, emai Baibel stiuden idia laloparara unai pris taudia edia hadibaia herevadia be Baibel ena hereva hegeregerena lasi. Unai hebou ese anina namona ia havaraia, badina daudau lasi murinai, unai famili rua amo taunimanima 15 be Witnes taudia ai idia lao.

Momokani, hari iseda haroro daladia be idauidau. Guna, nega momo Paolo be pris taudia ida ia hebou bona Baibel ena hahediba herevadia idia herevalaia, bona unai haroro dalana ia manadalaia. Nega ta, ia be taunimanima haida ia hereva henia. To, gabeai ia laloparara unai taudia haida be pris taudia ese idia hamaoroa, Paolo idia hahemaraia totona henanadai aukadia do idia henia. To, pris taudia edia palani ia guguru lasi. Badina kamonai tauna ta ia henanadai, bema dubu be politik lalonai ia vareai be maoro eiava lasi. Pris taudia ese unai henanadai idia haerelaia diba lasi. Bena karaharaga lamepa ia bodo, bona hebou idia koua. Lagani haida murinai, ai davaria unai nega ai pris taudia be palani idia karaia, bema edia ura gauna ia vara lasi, ta ese lamepa do ia habodoa.

Ai headava bona lagani 10 murinai, ai idia boiria sekit gaukara ai karaia totona. Unai neganai Paolo  be moni gaukara namona ta ia karaia dainai, unai boiboi ai abia dae be ia auka sisina. To, ai gurigurilaia murinai, unai asainmen ai abia dae. Nega ai atoa ai idia abia dae famili ta ta ida ai moale hebou totona. Adorahi ai, idia ida ai stadi hebou, bena Paolo be natudia ia durudia edia matematik homwek idia karaia totona. Danu, Paolo be duahiduahi karana ia ura bada, bona ia duahia heduru bona hagoadaia herevadia be ai dekenai ia herevalaia. Monday ai, nega momo Witnes taudia be lasi taoni dekenai ai lao ai haroro totona, bona taunimanima ai boiria adorahi ena hebou do idia mai tok idia kamonai totona.

Lagani rua sekit gaukara ai karaia murinai, ai idia boiria Rome ena Betele dekenai ai gaukara totona. Paolo be Legal Department dekenai ia gaukara, bona lau be Magazine Department dekenai lau gaukara. Ena be unai asainmen matamata dekenai ai hekwarahi, to ai ura Dirava do ai badinaia noho. Ai moale badina ai itaia Italy ena brens ofesi idia habadaia, bona pablisa edia namba ia bada daekau. Danu, unai negai gavamani ese Iehova ena Witnes taudia dekenai gwaumaoro ia henia, edia tomadiho gaukaradia idia karaia totona. Emai asainmen matamatana ai moalelaia bada.

Lagani 1980 lalodiai, Betele dekenai ai gaukara noho lalonai, Italy ai doketa taudia ese tadikaka ta bona ena adavana idia samania. Idia gwau unai tadikaka bona ena adavana ese edia natuna kekeni idia hamasea, badina idia ura lasi edia natuna be rara do ia abia. Momo be unai sivarai idia kamonai bona idia badu. To, unai samania herevana be koikoi. Edia natuna ia mase ena badina be rara gorere badana ta ia davaria. Italy bona ia kahirakahira idia noho gabudia ai momo be unai gorere idia davaria danu. Betele tadikaka taihu ese unai tadikaka bona ena adavana edia loea idia durua. Idia ese pepapepa bona Awake! magasin ta idia printaia bona taunimanima dekenai idia hariharilaia. Unai amo idia durua lalohadai maorona idia abia, bona Baibel ena hereva rara dekenai idia lalopararalaia totona. Hua haida lalonai Paolo be dina ta ta ai hora 16 ia gaukara. Unai negai, lau gaukara goada ia lau durua totona.

Ai headava bona lagani 20 murinai, ai laloa lasi gauna ta ia vara. Egu mauri lagani be 41 bona Paolo ena mauri lagani be 49 neganai lau rogorogo. Unai dina ai, Paolo ese ena dairi bukana ai ia torea herevana be inai: “Guriguri: Bema unai be momokani, mani ai oi durua ful-taim hesiai gaukara do ai goadalaia noho, bona ai oi durua tama sina namodia ai ai lao totona. Danu, lau oi durua lagani 30 lalonai platfom amo lau gwauraia herevadia do lau badinaia.” Hari, unai gaudia lau laloa lou neganai, lau  itaia Iehova ese lau bona Paolo emai guriguri ia haerelaidia.

Ilaria ia vara murinai, emai mauri ia idau. Momokani, nega haida ai lalomanoka, Aonega Herevadia 24:10 ena hereva hegeregerena, ia gwau: “Bema hekwakwanai neganai oi manoka neganai, oiemu goada be maragimaragi momokani.” To, ai ruaosi ai durua heheni.

Ilaria ia gwau ia moale badina ia tubu daekau neganai, iena tama sina be ful-taim hesiai gaukara dekenai idia bisi. Ia mamia ai ese ia ai lalokau henia bona ai naria namonamo. Dina lalonai lau ese ia lau naria. Adorahi ai, Paolo be ruma dekenai ia giroa mai neganai, herevana ia be mai ena gaukara haida, to nega ia atoa Ilaria ida ia gadara bona ena homwek idia karaia totona. Paolo be unai bamona ia karaia dainai, nega haida ena gaukara haida ia haorea totona, ia noga ela bona 2 o 3 oklok daba. Nega momo Ilaria ia gwau: “Egu tamana be egu turana namona.”

Momokani, Ilaria ai durua Keristani dala maorona ia badinaia totona, nega haida ia ai matahakani henia. Lau laloatao nega ta ia be ena turana ta ida ia gadara, to ia ese ena turana ia kara namo henia lasi dainai, Baibel amo ai hadibaia unai bamona do ia karaia lasi. Danu, ai hamaoroa emai vairanai ena turana dekenai sori herevana do ia gwauraia.

Ilaria ia gwau, ia ese haroro gaukara ia moalelaia, badina ena tama sina ese haroro gaukara idia laloa bada. Hari, Ilaria ia headava vadaeni bona ia laloparara Iehova ia kamonai henia, bona ena hakaua herevadia ia badinaia be gau badana.

Lagani 2008 ai, Paolo be kensa gorere ia abia. Matamanai, toana be Paolo ena gorere be do ia namo, bona ia ese lau ia hagoadaia bada. Lau bona Ilaria be diba bada doketa edia heduru ai tahua sibona lasi, to Iehova ai guriguri henia ai do ia durua vaira nega ai do idia vara gaudia ai haheaukalaia totona. To, lau itaia Paolo ena goada be metairametaira ia ore ia lao. Lagani 2010 ai Paolo ia mase neganai, lau lalometau bada. To, emai headava laganidia 45 lalonai ai karaia gaudia lau laloa lou neganai, unai ese lau ia hagoadaia. Ai be mai kudouna ibounai ida Iehova ai hesiai henia, bona lau diba Iehova ese unai do ia laloaboio lasi. Lau be mai moale ida Ioane 5:28, 29 ena hereva do ia guguru negana lau naria noho, unai negai Paolo do ia toreisi lou.

Egu kudouna ai lau be Noa ena sivarai lau do ura henia noho. Lau ura Iehova do lau badinaia noho, herevana lau dekenai dahaka gaukara ia henia. Lau abia dae momokani, ena be koua gaudia ita davaria o gau haida ita dadaraia o haboioa, to iseda lalokau Diravana amo ita abia hahenamo ese unai ibounai ia hereaia. Egu mauri lalonai lau itaia, Iehova badinaia karana ese hahenamo momo ia mailaia.