DAYTA ti maysa kadagiti malaglagipko ken tatangko idi ubingak pay. Natakneng ken nagaget ni Tatang. Kayatna nga agari ti kinahustisia, isu a dagus a naallukoy iti mensahe ti Biblia idi nangngegna dayta idi 1953. Sipud idin, inaramidna ti amin a kabaelanna a mangiranud kadakami nga annakna iti bambanag a maad-adalna. Idi damo, agkedked ni Nanang a mangiwaksi kadagiti tradision ti Katoliko. Ngem idi agangay, kombinsido metten kadagiti pannursuro ti Biblia.

Marigatan nga agbasa ni Nanang, ken gistay taltalon laeng ti ayan ni Tatang. Isu a marigatanda a mangisuro kadakami. No dadduma, pirmi ti bannog ni Tatang ket agtutuglepen no agadalkami. Ngem saan a nasayang ti panagreggetna. Kas inauna, timmulongak a mangisuro kadagiti addingko, maysa a babai ken dua a lallaki. Karaman kadagiti isurok ket ti masansan nga ibaga ni Tatang—ti panagayat ni Noe iti pamiliana, ken ti kinatulnogna iti Dios. Magusgustuak daytoy a salaysay ti Biblia! Idi agangay, makigimgimongkamin amin iti Kingdom Hall iti Roseto degli Abruzzi, maysa a siudad iti igid ti Baybay Adriatico iti Italia.

Sangapulo ket maysa laeng ti tawenko idi 1955 idi limmasatkami ken Nanang iti kabambantayan tapno mapankami iti Roma para iti kaunaan a kombension a naatendaranmi. Sipud idin, nakapatpategen kaniak dagitoy a dadakkel a panagtataripnong.

Iti simmaruno a tawen, nabautisaranak ket di nagbayag nagpayunirak. Idi agtawenak iti 17, nagbalinak nga special pioneer iti Latina, iti abagatan ti Roma nga agarup 300 kilometro (190 milia) manipud pagtaenganmi. Saan pay idi a nabayag dayta a siudad, isu nga awan bibiang dagiti tattao iti kunaen ti sabsabali no adda umawat iti mensahe ti Biblia. Maragragsakankami iti partnerko a payunir nga agiwaras iti adu a literatura a naibatay iti Biblia, ngem gapu ta agtutuboak pay, mailiwak iti pamiliak! Nupay kasta, kayatko ti agtulnog iti bilin a naited kaniak.

Idi agangay, naidestinoak iti Milan tapno tumulong iti pannakaisagana ti Internasional nga Asamblea idi 1963 a napauluan “Agnanayon a Naimbag a Damag.” Bayat ti kombension,  nagboluntarioak a kadua ti adu a kakabsat, a pakairamanan ni Paolo Piccioli, maysa nga agtutubo a kabsat a taga-Florence. Iti maikadua nga aldaw ti kombension, nangipaay ni Paolo iti makapabileg a palawag maipapan iti kinaawan asawa. Napampanunotko, ‘Sigurado a saan nga agasawa dayta a kabsat.’ Nupay kasta, nangrugi ti panagsinnuratmi ket nakitami nga adu ti pagpadaanmi—dagiti kalatmi, ti panagayatmi ken Jehova, ken ti nasged a tarigagaymi nga agtulnog kenkuana. Nagkasarkami ken Paolo idi 1965.

Sangapulo a tawen a nagserbiak a regular pioneer iti Florence. Maragsakanak a makakita iti irarang-ay dagiti kongregasion, nangruna dagiti agtutubo. Maay-ayatankami a makisarsarita kadakuada maipapan iti naespirituan ken makikadua met iti panaglinglingayda, a masansan a kaay-ayam ida ni Paolo iti soccer. Siempre, naragsakak no kaduak ni lakayko, ngem makitak a kasapulan dagidiay nga agtutubo ken dagiti pamilia iti kongregasion ti tulong ken panawenna.

Maragragsakanak pay laeng a manglagip iti adu a tinulonganmi nga agadal iti Biblia. Maysa kadakuada ni Adriana, a nangiranud iti maad-adalna iti dua a pamilia. Inyurnos dagitoy a pamilia ti pannakidiskusion iti maysa a padi maipapan kadagiti doktrina ti simbaan, a kas iti Trinidad ken immortal a kararua. Ngem tallo a panguluen ti relihion ti immay. Makariro ken di agsusurot dagiti eksplanasionda, a dagus a nadlaw dagiti yad-adalanmi idi indiligda dagita iti nabatad a pannursuro ti Biblia. Nagdakkel ti epekto daydi a diskusion. Idi agangay, agarup 15 a miembro dagitoy a pamilia ti nagbalin a Saksi.

Siempre, naiduma itan ti pamay-antayo a mangasaba. Ngem masansan idi a makisango ni Paolo kadagiti papadi ket sanay a mangidepensa kadagiti patpatientayo. Malagipko ti maysa kadagita a diskusion iti sanguanan dagiti saan a Saksi. Nalawag nga inyurnos dagiti papadi a ti sumagmamano nga agdengdengngeg ket mangibangon kadagiti saludsod a mangpabain ken Paolo. Ngem nagballatek kadagiti papadi dagiti saludsodda. Adda nagsaludsod no rumbeng a makinamin ti relihion iti politika, kas maar-aramiden iti ginasgasut a tawen. Nalawag a saan idin a maikalintegan dagiti papadi ti bagbagida. Pagammuan ta nagiddep dagiti silaw, ket naisardeng ti diskusion. Tawtawen kalpasanna, naammuanmi a naiplano gayam a maiddep dagiti silaw no bilang saan a magustuan dagiti papadi ti pagbanagan ti diskusion.

Sangapulo a tawen kalpasan a nagkasarkami ken Paolo, naimbitarankami nga agserbi iti sirkito. Adda  idi nasayaat a trabaho ni Paolo, isu a saan a kaskarina ti agdesision. Ngem kalpasan nga inkararag ken inusigmi dayta, inkeddengmi nga awaten dayta a baro a pribilehio. Natagiragsakmi ti makilangen kadagiti pamilia a nagdagusanmi. Masansan nga inggrupokami nga agadal iti rabii, ket kalpasanna tulongan ni Paolo dagiti ubbing iti asaynmentda, nangruna no maipapan iti matematika. Gapu ta managbasa ni Paolo, adu met ti mairanudna a makapainteres ken makapabileg a bambanag. No aldaw ti Lunes, masansan a mangasabakami kadagiti ili nga awanan pay iti Saksi, ket imbitaranmi dagiti tattao para iti maysa a palawag iti dayta a rabii.

Kalpasan laeng ti dua a tawen a panagserbimi iti sirkito, naimbitarankami nga agserbi iti Bethel iti Roma. Nagtrabaho ni Paolo iti Legal Department, ket naipanak met iti Magazine Department. Saan a kaskarina dayta a panagbalbaliw, ngem determinadokami nga agtulnog. Makapagagar a makita ti in-inut nga idadakkel ti sanga nga opisina ken ti napartak a yaadu dagiti Saksi iti Italia. Bayat dayta a tiempo, binigbig ti gobierno ti Italia dagiti Saksi ni Jehova kas legal a relihion. Nakaragragsakkami iti daytoy a kita ti panagserbi.

Iti panagserbimi iti Bethel, nagbalin nga isyu iti Italia ti naibatay-Biblia a takdertayo mainaig iti dara. Iti nasapa a paset ti dekada ‘80, adda legal a kaso mainaig iti daytoy nga isyu a nagbalin a kontrobersial. Naakusaran ti maysa a pagassawaan a Saksi a basolda kano ti ipapatay ti anakda a babai, nupay gapu dayta iti nakaro a sakit iti dara a natawid ti adu a taga-Italia ken dadduma pay a pagilian iti aglawlawna. Dagiti kakabsat iti pamilia ti Bethel timmulongda kadagiti abogado dagitoy a Kristiano nga agassawa. Nakatulong ti maysa a polieto ken ti maysa nga espesial nga edision ti Agriingkayo! tapno maammuan ti publiko dagiti detalye maipapan iti dayta nga isyu ken matarusanda ti kuna ti Sao ti Dios maipapan iti dara. Kadagidiay a bulan, nagtrabaho ni Paolo iti diretso a 16 nga oras iti kada aldaw. Inkagumaak a suportaran iti dayta a nagpateg a trabahona.

Agassawakamin iti 20 a tawen idi adda napasamak a dimi ninamnama. Agtawenak idin iti 41 ket 49 met ni Paolo idi imbagak a kasla masikogak. Iti diary ni lakayko iti dayta nga aldaw, nakitak dagitoy a sasao: “Kararag: No bilang masikog ni baketko, tulongannakami koma nga agtalinaed iti amin-tiempo a panagserbi, saan nga agpampamayan iti naespirituan, ken agbalin a nasayaat a nagannak babaen iti ulidanmi. Kangrunaan iti amin, tulongannak a mangyaplikar iti uray 1 laeng a porsiento iti amin nga impalawagko iti plataporma iti  napalabas a 30 a tawen.” Kas ipakita ti resulta, sinungbatan ni Jehova ti kararag ni Paolo—kasta met ti kararagko.

Dakkel ti nagbaliwan ti biagmi idi nayanak ni Ilaria. Aminek nga adda dagiti gundaway a maupaykami, kas nadakamat iti Proverbio 24:10: “Impakitam kadi a naupayka iti aldaw ti rigat? Kurangto ti bilegmo.” Ngem nagtinnulongkami, a linaglagipmi a dakkel ti maitulong ti panagpinnaregtami.

Agyamyaman ni Ilaria ta agpada a Saksikami a nagannakna ken okupadokami iti amin-tiempo a panagserbi. Dina pulos narikna a nabaybay-an. No aldaw, siak ti kadkaduana. No sumangpeten ni Paolo iti rabii, adda latta tiempona a makiay-ayam ken Ilaria ken tulonganna kadagiti asaynmentna nupay adda trabaho a kasapulan nga ileppasna. Isu nga alas dos wenno alas treston a malpasna ti trabahona. Masansan a kuna ni Ilaria, “Ni Daddy ti best friend-ko.”

Tapno matulonganmi ni Ilaria nga agtalinaed iti kinapudno, masapul a naingetkami a mangdisiplina kenkuana. Malagipko ti maysa a pasamak idi adda madi nga inaramidna iti kaay-ayamna. Inlawlawagmi kenkuana ti kunaen ti Biblia no apay a di nasayaat ti inaramidna ket imbagami nga agpadispensar iti gayyemna iti mismo a sanguananmi.

Ap-apresiaren ni Ilaria ti panagayat dagiti nagannakna iti ministerio. Itan ta naasawaanen, ad-addan a matarusanna ti pateg ti panagtulnog ken panagpaiwanwan ken Jehova.

Idi 2008, naammuan ni Paolo nga adda kanserna. Idi damo, kasla malasatan ni Paolo ti sakitna, ket pinabilegnak a saanak a maawanan iti namnama. Malaksid iti panagsapulmi iti kasayaatan a medikal a balakad, di agressat a nagkarkararagkami ken Ilaria a kidkiddawenmi ken Jehova a tulongannakami iti aniaman a mapasamak. Ngem anian a nagrigat a maimatangan ti in-inut a panagkapuy ni lakayko a dati a napigsa ken naganaygay. Napalalo ti ladingitko iti ipapatayna idi 2010. Nupay kasta, naliwliwaak a mangpanunot iti naaramidanmi iti 45 a tawen a panagkaduami. Intedmi ken Jehova ti kasayaatan ket ammok a manayon ti pateg ti naaramidanmi. Segseggaak ti panagungar ni Paolo iti masanguanan, maitunos iti sasao ni Jesus iti Juan 5:28, 29.

Iti kaunggak, siak pay laeng daydi balasitang a maay-ayatan iti estoria maipapan ken Noe. Saan a nagbaliw ti determinasionko. Kayatko a pagtulnogan ni Jehova, aniaman ti kasapulan nga aramidek. Ammok a ti aniaman a lapped, sakripisio, wenno pukaw ket bassit laeng no idilig iti nagsasayaat a bendision nga ipapaay ti naayat a Diostayo. Mismo a napadasak daytoy—ket ipasiguradok kadakayo nga awan pagbabawyak.