ŨCIO nĩ ũmwe wa maũndũ marĩa ndirikanaga megiĩ baba, mũthuri warĩ mwĩnyihia na warĩ kĩo. Nĩ eendete maũndũ ma kĩhooto mũno, na kwoguo rĩrĩa aahunjĩirio mwaka wa 1953, nĩ aiyũkirie ndũmĩrĩri ya Bibilia wega. Nĩ eerutanagĩria mũno gũtũthomithia maũndũ marĩa eerutaga. Kĩambĩrĩria-inĩ mami ndendaga gũtigana na wĩtĩkio wake wa ndini ya Gatoreki. No thutha wa kahinda o nake akĩambĩrĩria kũrũmĩrĩra morutani ma Bibilia.

Ndwarĩ ũndũ mũhũthũ harĩ aciari aitũ gũtũruta, tondũ mami ndoĩ gũthoma wega nake baba aarutaga wĩra mũritũ mathaa maingĩ mĩgũnda-inĩ. Rĩmwe baba aakoragwo arĩ mũnogu mũno nginya agacũnga rĩrĩa tũrathoma. O na kũrĩ ũguo, kĩyo kĩu gĩake nĩ gĩatũteithirie. Tondũ niĩ nĩ niĩ ndarĩ mũkũrũ nĩ ndateithagĩrĩria gũthomithia mwarĩ wa maitũ na ariũ a maitũ erĩ. Kaingĩ nĩ twathomaga ũrĩa Nuhu endete famĩlĩ yake na ũrĩa aathĩkagĩra Ngai. Nĩ ndendete rũgano rũu mũno! Thutha wa kwĩruta Bibilia kwa ihinda tũrĩ famĩlĩ, tũkĩambĩrĩria gũthiĩ mĩcemanio thĩinĩ wa Nyũmba ya Ũthamaki taũni-nĩ ya Roseto degli Abruzzi bũrũri-inĩ wa Italy.

Mwaka wa 1955 ndĩ wa mĩaka 11 tu, tũrĩ na mami nĩ twatuĩkanĩirie irĩma-inĩ tũrorete Roma kũrĩa twathire kĩrũrũngano gitũ kĩa mbere. Kuuma hĩndĩ ĩyo nĩ ngenagĩra mũno irũrũngano ta icio nene.

Mwaka ũrĩa warũmĩrĩire nĩ ndabatithirio na thutha wa kahinda kanini ngĩambĩrĩria ũtungata wa hĩndĩ ciothe. Ndĩ wa mĩaka 17, nĩ ndatuĩkire painia wa mwanya taũni-inĩ ya Latina ĩrĩa ĩrĩ mũhuro wa Roma, kĩndũ kilomita 300 kuuma gwitũ mũciĩ. Tondũ yarĩ taũni njerũ, andũ matietigagĩra ũrĩa mekuonwo nĩ arĩa angĩ mathikĩrĩria ũhoro ũrĩa twamahunjagĩria. Tũrĩ na painia ũrĩa twatũmĩtwo nake nĩ twakenagĩra mũno kũheana mabuku maingĩ ma Bibilia, no tondũ ndaarĩ o mũndũ mwĩthĩ nĩ ndeeriragĩria mũno kũinũka. O na kũrĩ ũguo, nĩ ndeendega gwathĩkĩra Jehova tondũ nĩ ndaamenyaga atĩ wendi wake warĩ ndungatĩre kũu.

Thutha ũcio nĩ ndatũmirũo Milan thiĩ ngateithĩrĩrie kũhaarĩria kĩrũrũngano gĩa kĩĩmabũrũri kĩa mwaka wa 1963 kĩrĩa kĩarĩ na kĩongo “Ũhoro Ũrĩa Mwega wa Tene na Tene.” Hĩndĩ ya kĩrũrũngano kĩu nĩ ndarutithanirie wĩra na andũ aingĩ, na  ũmwe wao aarĩ mwanake wetagwo Paolo Piccioli kuuma gĩcigo-inĩ kĩa Florence. Mũthenya wa kerĩ wa kĩrũrũngano, mũrũ wa Ithe witũ ũcio nĩ aarutire mĩario mĩega mũno yonanagia ũrĩa andũ arĩa matarĩ thĩinĩ wa kĩhiko mangĩtungatĩra Jehova makĩria. Nĩ ndirikanaga ngĩciria ũũ: ‘Hatarĩ nganja, mũrũ wa Ithe witũ ũrĩa gũtirĩ hingo akaahikania.’ O na kũrĩ ũguo, nĩ twambĩrĩirie gũtũmanĩra marũa, na tũkĩona atĩ mĩoroto itũ nĩ yahanaine na atĩ ithuerĩ nĩ twendete Jehova mũno na nĩ twendaga kũmwathĩkĩra. Tũkĩhikania mwaka wa 1965.

Ndaatungatĩire gĩcigo-inĩ kĩa Florence ndĩ painia wa hĩndĩ ciothe ihinda rĩa mĩaka 10. Warĩ ũndũ wa gĩkeno kuona wongerereku thĩinĩ wa ciũngano na mũno makĩria kuona andũ ethĩ magĩthiĩ na mbere kĩĩroho. Tũrĩ na Paolo nĩ twakenaga tũkĩhũthĩra mahinda hamwe nao kwarĩrĩria maũndũ ma kĩĩroho na maũndũ-inĩ ma gwĩkenia. Kaingĩ Paolo nĩ aathakaga mũbira wa magũrũ nao. Ma nĩ atĩ, nĩ ndakenaga rĩrĩa tũrahũthĩra mahinda na mũthuri wakwa, no nĩ ndamenyaga atĩ andũ ethĩ na famĩlĩ thĩinĩ wa kĩũngano nĩ maabataraga mahinda na ũteithio wake.

O na ũmũthĩ nĩ ngenaga rĩrĩa ndaririkana arutwo aingĩ a Bibilia arĩa twerutire nao. Ũmwe nĩ Adriana ũrĩa waririe na famĩlĩ ingĩ igĩrĩ maũndũ marĩa eerutaga. Famĩlĩ icio nĩ ciabangire tũcemanie na mũtongoria wa ndini nĩguo twarĩrĩrie morutani ma kanitha ta Ũtatũ na atĩ muoyo ndũkuaga. Atongoria atatũ a ndini nĩ mookire. Maataarĩirie morutani macio mao na njĩra hĩngĩcanu mũno, ũũ atĩ arutwo aitũ a Bibilia nĩ maahotire kuona atĩ morutani ma atongoria acio maarĩ mũgarũ na ũrutani wa Bibilia. Thutha wa ndeereti ĩyo, andũ 15 a famĩlĩ icio nĩ maatuĩkire Aira a Jehova.

Ũrĩa kũrĩ nĩ atĩ, rĩu tũtihũthagĩra njĩra ta icio tũkĩhunjia. Kaingĩ mahinda-inĩ macio, Paolo nĩ aacemanagia na atongoria a ndini nĩguo marĩrĩrie morutani ma Bibilia na nĩ ũndũ ũcio nĩ aagĩte na ũhoti mwega wa gũtetera wĩtĩkio witũ hĩndĩ ya ndeereti icio. Nĩ ndirikanaga hĩndĩ ĩmwe aaririe na gĩkundi kĩa andũ mataarĩ Aira a Jehova. Ũrĩa maaragia nĩ woonanirie atĩ amwe ao merĩtwo nĩ atongoria a ndini morie Paolo ciũria cia kũmũconora. O na kũrĩ ũguo, maũndũ matiathire ũrĩa atongoria acio a ndini maatanyĩte. Mũndũ ũmwe nĩ oririe kana kanitha nĩ wagĩrĩire kwĩingĩria maũndũ-inĩ ma ũteti ta ũrĩa ũkoretwo ũgĩka mĩaka mĩingĩ. Rĩrĩa kĩũria kĩu kĩoririo, atongoria acio a ndini makĩmenya marĩ handũ haceke. O rĩmwe thitima ikĩhora na mũcemanio ũgĩkinya o hau. Thutha wa mĩaka ĩigana ũna twacokire kũmenya atĩ warĩ mũbango thitima  ihorio ndeereti ĩyo ĩngĩagire gũthiĩ ũrĩa atongoria acio a ndini maatanyĩte.

Thutha wa gũkorũo tũhikanĩtie mĩaka 10, nĩ twaheirũo wĩra wa gũceeragĩra ciũngano. Paolo aarĩ na wĩra mwega wa kĩĩmwĩrĩ, na nĩ ũndũ ũcio rĩu rĩtiarĩ itua ihũthũ. No thutha wa gwĩcũrania ũndũ ũcio na njĩra ya mahoya, nĩ twetĩkĩrire ũtungata ũcio mwerũ. Nĩ twakenaga gũkorũo hamwe na famĩlĩ iria ciatũnyitaga ũgeni tũikare kwao. Kaingĩ hwaĩ-inĩ nĩ twerutaga tũrĩ hamwe nao, Paolo agacoka agateithĩrĩria ciana kũruta wĩra ũrĩa cikũhetwo cukuru makĩria angĩkorũo nĩ mathabu. Paolo nĩ eendete mũno gũthoma na hingo ciothe nĩ akenagĩra kũheana ũhoro mwega na wa gwĩkanĩra ngoro ũrĩa athomete. Maita maingĩ mũthenya wa Njumatatũ, twathiaga kũhunjia taũni iria itaakoragwo na Aira a Jehova tũkĩmanyitaga ũgeni moke mathikĩrĩrie mĩario hwaĩ-inĩ ũcio.

Thutha wa gũceerera ciũngano mĩaka ĩĩrĩ tu, nĩ twetirũo tũgatungatĩre Betheli thĩinĩ wa Roma. Paolo aaheirũo wĩra rũhonge-inĩ rwa watho na niĩ Rũhonge-inĩ rwa Ngathĩti. Gwĩka ũgarũrũku ũcio ndwarĩ ũndũ mũhũthũ, ĩndĩ nĩ twehotorete gwathĩka. Warĩ ũndũ wa gĩkeno kuona wabici ya rũhonge ĩkĩandandũrũo o kahora, na wongerereku wa ahunjia thĩinĩ wa Italy. Ningĩ ihinda-inĩ rĩu, nĩrĩo thirikari ya Italy yetĩkĩrire atĩ Aira a Jehova nĩ ndini njĩtĩkĩrĩku kũringana na watho. Nĩ twakeneire mũno ũtungata ũcio wa Betheli.

O ihinda-inĩ rĩu tũgĩtungata Betheli, wĩtĩkio wa Aira a Jehova wĩgiĩ thakame nĩ wamenyekanire mũno thĩinĩ wa Italy. Kĩambĩrĩria-inĩ kĩa mĩaka ya 1980, nĩ kwagĩire na ciira wĩgiĩ ũndũ ũcio ũrĩa warehire gĩcanjama kĩnene. Mũthuri na mũtumia wake arĩa maarĩ Aira a Jehova nĩ maathitangirũo na maheeni atĩ nĩo maatũmire kairĩtu kao gakue, o na gũtuĩka gaakuĩte nĩ ũndũ wa mũrimũ mũũru ũkonainie na thakame ũrĩa ũkoragwo na andũ aingĩ thĩinĩ wa Italy na mabũrũri marĩa marigicĩirie. Aarĩ na ariũ a Ithe witũ kuuma Betheli nĩ maateithĩrĩirie mawakiri arĩa maatetagĩra aciari acio Akristiano. Nĩ gwacabirũo trakti na riuma rĩa mwanya rĩa Amkeni! cia gũteithia andũ mamenye ũũma wĩgiĩ ũndũ ũcio, na mataũkĩrũo nĩ ũrĩa Bibilia ĩrutanaga igũrũ rĩgiĩ thakame. Kaingĩ mĩeri-inĩ ĩyo, Paolo aarutaga wĩra hakuhĩ mathaa 16 o mũthenya. Ndeekaga ũrĩa wothe ingĩhota kũmũnyita mbaru.

Thutha wa gũkorũo tũhikanĩtie mĩaka 20 nĩ twacemanirie na ũndũ tũterĩgĩrĩire. Ndaarĩ na mĩaka 41 nake Paolo 49 rĩrĩa ndamwĩrire atĩ ndĩrona ta ndĩ na nda. Thĩinĩ wa ndayarĩ yake aandĩkire ciugo ici mũthenya ũcio: “Mahoya: Angĩkorũo nĩguo kũrĩ, tũteithie tũthiĩ na mbere na ũtungata wa hĩndĩ ciothe, tũtikagonderere kĩĩroho, na ũtũteithie  tũtuĩke aciari ega na njĩra ya kũiga kĩonereria kĩega. Makĩria ma ũguo, ndeithia hũthĩre naarĩ kaũndũ kamwe ka marĩa mothe ngoretwo ngĩrutana kĩũngano-inĩ makĩria ma mĩaka 30.” Ndeciria ũndũ ũcio nĩ nyonaga atĩ no mũhaka Jehova akorũo nĩ aacokirie mahoya macio o hamwe na makwa.

Gũciarũo gwa kairĩtu gaitũ Ilaria, nĩ kwarehire ũgarũrũku mũnene mũno ũtũũro-inĩ witũ. Kwaria ma, nĩ kũrĩ hĩndĩ twakuaga ngoro o ta ũrĩa Thimo 24:10 yugaga: “Ũngĩtuĩka wa kũũrũo nĩ hinya mũthenya wa mĩnyamaro-rĩ, hinya waku no mũnyinyi.” Ĩndĩ tũgĩthiĩ na mbere gwĩkĩrana ngoro.

Ilaria oigaga atĩ nĩ akenaga nĩ gũkorũo aarerirũo nĩ aciari maarĩ na kĩyo ũtungata-inĩ wa hĩndĩ ciothe. Hingo ciothe aaiguaga endetwo na akarũmbũiyo. Mũthenya twatindaga nake. Narĩo hwaĩ-inĩ Paolo ainũka, o na gũtuĩka kaingĩ akoragwo na wĩra mũingĩ abataraga kũrĩkia, nĩ aahũthagĩra mahinda nake, magathaka na akamũteithia kũruta wĩra ũrĩa ekũhetwo cukuru. Eekaga ũguo o na akorũo arĩtigwo akĩruta wĩra wake nginya thaa inyanya kana kenda cia ũtukũ. Kaingĩ Ilaria oigaga ũũ: “Baba nĩwe mũrata wakwa ũrĩa mũnene.”

Ma nĩ atĩ, nĩguo tũteithie Ilaria eke ũrĩa kwagĩrĩire, nĩ twabataraga kũmũrũnga biũ. Kwa ngerekano mũthenya ũmwe magĩthaaka na mũrata wake nĩ eekire ũndũ ũtarĩ mwega. Tũkĩhũthĩra Bibilia kũmũtaarĩria nĩkĩ ndaagĩrĩirũo nĩ gwĩka ũguo. Ningĩ nĩ twatigĩrĩire atĩ nĩ ahoya mũrata ũcio wake mũhera mbere itũ.

Ilaria oigaga atĩ wendo wa aciari ake harĩ ũtungata nĩ watũmire o nake ende ũtungata. Rĩu tondũ nĩ mũhiku, nĩ ataũkagĩrũo makĩria atĩ nĩ harĩ bata gwathĩkĩra Jehova na kũrũmĩrĩra ũtongoria wake.

Mwaka wa 2008 Paolo nĩ aamenyire atĩ arĩ na kansa. Kĩambĩrĩria-inĩ kuonekaga ta Paolo angĩahonire, na nĩ anjĩkagĩra ngoro mũno. Hamwe na gũcaria ũrigitani ũrĩa mwega mũno warĩ kuo, tũrĩ na Ilaria nĩ twahoyaga Jehova mũno atũteithie kũhiũrania na mahinda marĩa maarĩ mbere itũ. Warĩ ũndũ wa kĩeha mũno harĩ niĩ kuona mũndũ warĩ na hinya akĩhinyĩrĩrĩka. Gĩkuũ gĩake mwaka wa 2010 kĩarĩ igũtha inene mũno. O na kũrĩ ũguo, nĩ nyũmagĩrĩrio mũno ndeciria maũndũ marĩa twahingirie ihinda rĩa mĩaka 45 ĩrĩa twarĩ hamwe. Twatungatĩire Jehova na ngoro yothe, na nĩ njũĩ ndakariganĩrũo nĩ wĩra witũ. Na nĩ ndĩriragĩria mũno hĩndĩ ĩrĩa Paolo akaariũkio kũringana na ciugo cia Jesu thĩinĩ wa Johana 5:28, 29.

Thĩinĩ wa ngoro yakwa, no niĩ kairĩtu karĩa kendete rũgano rwa Nuhu. Wendi wakwa no gũthiĩ na mbere gwathĩkĩra Jehova, o ũrĩa wothe angĩnjĩra njĩke. Nĩ menyete atĩ thĩna o wothe tũngĩkorũo naguo, maũndũ marĩa tũngĩĩima, kana marĩa tũngĩũrũo nĩmo nĩ manini mũno maringithanĩtio na irathimo iria Ngai witũ atũheaga. Nĩ ndĩyoneire atĩ gwathĩkĩra Jehova nĩguo ũndũ ũrĩa mwega biũ.