EYI ani diworokere otate morwa awo mugara gokurugana unene ntani nonkedi. Awo kwa here unene uhungami, yiyo nye za va guminine komutjima mbudi zomoBibeli apa va zi zuvhire mo-1953. Kutundilira opo, awo kwa rugene paapa va hulira mokututantera ko eyi ngava lirongo. Onane kapi va here kusiga epuliro lyawo lyaKatolika. Nye konyima zosiruwo, tava ya tameke kutambura marongo gomoBibeli.

Ayo kwa digoperere vakurona vetu mokulironga nose. Onane kapi va divire kuresa nokutjanga, ano otate ngava rugana unene siruwo sosire momapya. Poyiruwo yimwe otate ngava kumauka posiruwo selirongo morwa eroroko. Nampili ngoso, elituromo lyawo lya retere yitundwamo yoyiwa. Ame nyame mbeli yipo na vaterere kuronga vamumbya vange vatatu. Eyi kwa kwaterere mo kuvaronga eyi ngava tumbura nkenye apa otate, eharo eli ga kere nalyo Nowa kepata lyendi nomu nga li likida kupitira moulimburukwi wendi kwaKarunga. Omu tupu na here sihorokwa oso somoBibeli! Makura natuvenye yipo twa tamekere kuza komapongo koSinyanga soUhompa moRoseto degli Abruzzi, sitata sa kara kefuta lyaAdriatic moItalia.

Apa na kere nonomvhura 11 mo-1955, name nonane yipo twa tavakanene nondundu dokoUtokero tu ka kare posigongi setu sokuhova moRoma. Kutundilira opo, ame na nongwenene asi mapongo aga gomanene kuna kara maruha gomawa po meparu lyoMukriste.

Mvhura zokukwama ko, tani gwana ekuho ano konyima zosiruwo tani tameke nosirugana sosiruwo nasinye. Apa na kere nonomvhura 17, yipo na ya kere muzuvhisi gosiruwo nasinye moLatina korwaMbindakano zaRoma ure wonokilometa 300 kutunda kembo lyetu. Morwa aso kwa kere sitata sosipe, vantu kapi ngava pakere mbili eyi nava gazara wopeke nsene o gwana mbudi zomoBibeli. Name namukwetu ogu ngani zuvhisa nage ngatu hafere kuhanesa yimbapiratjangwa yoBibeli yoyinzi, nye ame ngani rongora unene kembo morwa simpe ni munona na kere. Nye simpe na here kukwaterera kosirugana esi va pere nge.

 Konyima tava ya tumu nge koMilan mokukavatera erongikido lyosigongi soyirongo sosiparatjangwa “Mbudi zongwa zanarunye.” Posigongi ame kwa rugene ngomulizambeli kumwe navamwe kukwatera mo Paolo Piccioli, munazinyetugara gomudinkantu gomositata saFlorence. Mezuva lyauvali lyosigongi age kwa geve siuyungwa sokutumangeda sokuhamena udike. Ayo kwa ninkisire nge ni gazare asi, ‘Munazinyetugara ogu kapi nga kwara’. Nampili ngoso, ose twa tamekere kulitjangera nombudi ntani tatu ya yi dimburura asi natuvenye twa kara noyitambo yokulifana neharo lyokuhara Jehova neli lyokumulimburukwa. Mo-1965, name naPaolo yipo twa likwere.

Ame kwa rugene uzuvhisi wokukarerera ure wonomvhura murongo moFlorence. Ayo kwa hafesere nge pokumona omu nombungakriste dina kukura, unene po omu vadinkantu va tulire po ezokomeho. Name naPaolo ngatu hafere kukara kumwe novadinkantu nokuzogera nawo yininke yopampepo ano posiruwo soyilihafeso, Paolo nga dana nawo mbara. Ame kwa here kukara siruwo sosire namugara gwange, nye na yi dimbwilire asi vadinkantu owo nomapata gomombungakriste kwa gwanenene mo mauwa monkareso zayange zongwa nomosiruwo sendi.

Ayo kuhafesa nge unene apa ani gazara varongwa woBibeli ava ngatu lirongo nawo. Gumwe gwawo kuna kara Adriana, ogu ga tanterere ko mapata gavali eyi nga lirongo. Awo kwa tulire po ewapaiko lyokukaponga nomuruti va ka zogere kumwe marongo gamwe ngwendi Karunga mutatu gumwe ntani nomwenyo gwa ha fu. Pepongo olyo kwa kere po hena vabisofi vatatu. Varongwa vetu woBibeli kwa ya nongwenene asi mafatururo govaruti kwa kere udigu kugakwata egano ntani kapi ga lizire nomarongo gokuzera gomoBibeli. Epongo olyo kwa retere yitundwamo yoyiwa, konyima zosiruwo vantu 15 womomapata ogo kwa ya kere Nombangi.

Momazuva getu nonkedi dokuzuvhisa da lisiga unene. Yikando nayinye eyi nga zogere novaruti, Paolo ngayi mu tompoka. Tani diworoka epongo limwe eli ga kere nalyo novantu va hana asi Nombangi. Ayo ya lihorwere asi varwanesi kwa wapaikire vamwe womombunga va pure mapuro gowina. Nampili ngoso, nzogera kwa litjindjire. Gumwe mombunga kwa pulire nsene asi ya wapa ngereka zi lihameke moupolitika ngomu ya horoka monomvhura mafere da pita. Epuro eli kwa tulisire varuti moudigu. Hararasi, noramba tadi dimi makura epongo tali haga. Konyima zonomvhura dongandi yipo twa ya yi dimbwilire asi varuti yiwo va tulire po mawapaiko komeho zosiruwo gokudimisa rutjeno negano eli asi nsene nzogera nazi ka va sumpira.

Konyima zokukara mononkwara nomvhura murongo, name naPaolo kwa tu zigidire tu ka rugane sirugana soutareli. Paolo kwa kere noyirugana yoyiwa, yipo nye kapi lya kere etokoro lyoureru. Nye konyima zokugazadara ko nokukanderera unene, yipo twa tokwere kutambura sirugana oso sosipe. Ose kwa haferere kukara kumwe nomapata aga ga tu pere mararo. Masiku, ose ngatu lirongo ngombunga, makura Paolo nga vatere vanona noyiruganenambo yawo yokosure, unene po nsene sirongwa somuvaru. Paolo kwa kere muresi gomuwa ntani age kwa haferere kusimwitira yininke yoyiwa eyi nga resa. MoMandaha, ose ngatu ka zuvhisira monodoropa omu mwa dilire kukara Nombangi nokuzigida vantu kosiuyungwa songurova.

Konyima zonomvhura mbali domosirugana soutareli, yipo twa gwene ezigido lyokukarugana koBeteli zomoRoma. Paolo nga pakere mbili yininke yopaveta ano ame kwa tulire nge koDepartemente zoYifo. Kapi ya tu rerupilire kutura po erunduruko, nye twa tokomenene kulimburukwa. Ayo kwa hafesere nge pokumona omu mberewa zomutayi zina kukura ntani uumwe wovanavazinyetu womoItalia. Posiruwo sina, Nombangi daJehova moItalia kwa gwene epulisiro lyopaveta. Ose kwa haferere sirugana esi.

Siruwo esi twa kere moBeteli, ediro kutambura lyetu honde kwa ya divikwire moItalia. Koyiha yomvhura 1980, pwa kere mpanguro zopaveta kuhamena kudira kutambura honde. Valikwali woNombangi kwa va rundilire asi yiwo va dipagesere munawo gomukadona, nampili ngomu ya kere asi kwa fire kouvera welirungarungo honde ou ngava pingi wovanzi ava va tunga pepi nefuta lyoPokatji. Vanavazinyetu vemepata lyoBeteli kwa vaterere vahahende ava va karerere po valikwali owo. Kambapira nosifo soAwake! kwa vaterere vantu va kwate egano usili womoNonkango daKarunga kuhamena honde. Momakwedi ogo, Paolo nga rugana novili 16 mezuva ga hana kudumbuka. Ame kwa rugene paapa na hulira mokumukwatesa ko kelituromo lyendi.

Apa twa ya ligwanekerere nomarunduruko gohararasi meparu, ose tuna kara mononkwara nomvhura 20. Ame kwa kere nonomvhura 41 ano Paolo nonomvhura 49 yipo na mu tanterere asi ame kuna kugazara asi nezimo nina kara. Ame kwa gwene nonkango edi mobuke zendi asi: “Ekanderero: Nsene usili, Karunga tu vatera tu kare mosirugana sosiruwo nasinye, ntani tu vatera tu kare vareti wovawa kupitira mosihonena, kapisi tu tengure monyima pampepo. Ntani vatera nge ni ture pasirugana nayinye eyi ngani uyunga kositantara monomvhura 30 da ka pita.” Ngoyitundwamo, Jehova ga limbwilire ekanderero lyendi neli lyange.

 Ehampuruko lyaIlaria kwa retere marunduruko gomanene meparu lyetu. Yosili, ose twa lizuvhire tuna dombo mutjima, ngomu va yi tumbura moYisewe 24:10 asi: “Nsene ove o munkundi momahepeko, o munkundi hena moyirugana.” Nye twa livaterere, pokudiworoka mulyo gokulikorangeda-korangeda.

Ilaria kwa kara noruhafo morwa ose vakondi vendi natuvenye Nombangi ava twa kara mosirugana sosiruwo nasinye. Age kapi ga livera rumwe, morwa kwa kulira mepata omu mwa kere vakondi navenye. Mutenya, ame ngani kara kumwe nage. Ano masiku apa Paolo nga wiza kembo, age nga kara noyirugana, nampili ngoso age nga kara kumwe nendi nokudanauka nendi nokumuvatera koyiruganenambo yendi yokosure. Age nga yi rugana nampili ngomu ngayi mu gusa siruwo sosire pamwe dogoro povili zauvali ndi zautatu zomasiku mokumana yirugana yendi. Ilaria kwa tanta asi: “Otate, kaume kange gomunene.”

Ayo kwa tu gusa siruwo sosire mokuvatera Ilaria a kare mousili. Tani diworoka sikando simwe apa ga danaukire nakaume kendi, age kwa likidire nonkedi donondona. Yipo twa mu fatwilire kutundilira moBibeli eyi na dilira kukara ngoso. Ntani twa mu ninkire a hundire egusiropo kwamukwawo komeho zetu.

Ilaria kwa tanta asi age kuhafera eharo eli ava likida vakurona vendi kosirugana sokuzuvhisa. Ngesi age ga kwara, ntani kukwata egano omu ya kara nomulyo kulimburukwa Jehova nokukwama mavyukiso gendi.

Mo-2008, Paolo kwa ya dimbwilire asi ana kara nokankera. Pomuhowo kwa monekere ngwendi Paolo kuvhura a veruke kouvera wendi, ano age nga korangeda nge unene. Ntani twa paparere uhaku wouwa po. Ose ngatu kanderere naIlaria kwaJehova tu hundire evatero lyendi tu lididimikire. Ntani na mwene omu mugara ogu ga peme omu ana kuzumbanesa nonkondo dendi. Nomfa dendi mo-2010 kwa retere ruguwo rorunene. Nampili ngoso, ame kwa gwana ehengagwido mweyi twa tompwere monomvhura 45 edi twa kere kumwe. Ose kwa pere Jehova yoyiwa po. Nina yi diva asi sirugana setu sa kara nomulyo gomunene. Ame kuna kundindira nononkondo apa ngava ka vhumbura Paolo, kuliza kumwe nononkango daJesus domwaJohanesa 5:28, 29.

Momutjima, ame simpe mukadonagona ogu ga hara esimwititi lyaNowa. Etokomeno lyange kapi lya runduruka. Nina hara kulimburukwa Jehova mwankenye eyi. Nina yi diva asi nkenye maudigu nomalizambero ndi eyi twa zumbanesa ayo yinunu mokuyihetakanesa nomatungiko aga ga tu pa Karunga gwetu geharo. Ame na limonena nayinye eyi, ntani ayo mulyo.