KO E matua taane haaku ko e tagata mahani fakatokolalo mo e gahua malolō. Ha ha ia ia e fakaalofa hokulo ke he fakafili tonu, ti fiafia lahi a ia ke he fekau he Tohi Tapu he mogoia ni ne logona ai e ia. He tau 1953 a ia, ti tali mai he mogoia ne eketaha a ia ke fakaako a mautolu ko e tau fanau ke he tau mena ne iloa e ia. He mogo fakamua, nakai manako e matua fifine haaku ke toka e tau aga faka-Katolika haana. Ka e fai magaaho ti kamata foki a ia ke talia e tau fakaakoaga Tohi Tapu.

Ne ai iloa lahi e matua fifine haaku ke totou, ti gahua lahi mo e leva e matua taane haaku he fonua he tau aho takitaha. Ti uka lahi ma e tau mamatua haaku ke fakaako mo mautolu. Falu mogo ne mategūgū lahi e matua taane haaku ti tauveli mohe he magaaho fakaako. Ka kua fua mitaki e gahua lahi haana. Ko au e tama uluaki, ti lagomatai e au ke fakaako e tehina mo e tokoua e lafu tugaane haaku. Ne fa tutala a mautolu ke he fakaalofa lahi ha Noa ke he magafaoa haana, mo e omaoma haana ke he Atua. Ne fiafia lahi au ke he tala ia! Nakai leva e kamata fakaako Tohi Tapu a mautolu ko e magafaoa, ne ō oti a mautolu ke he tau feleveiaaga he Fale he Kautu i Roseto degli Abruzzi, ko e taone he kaukau tahi he Adriatic i Italia.

He 1955, ko e 11 laia e tau haaku, ne fina atu au mo e matua fifine haaku ke he fonoaga fakamua ha maua, he o atu he tau faahi mouga ki Roma. Ti tali mai he mogoia, ko e tau fonoaga e mena ne fiafia pauaki au ki ai.

Ne papatiso au he 1956 mo e nakai leva ti kamata ke paionia. Magaaho ne 17 e tau haaku, ne eke au mo paionia pauaki i Latina, ko e taone he faahi toga ha Roma, kavi ke he 300 e kilomita mai kaina. Ko e taone foou a ia, ti ai tupetupe lahi e tau tagata ke he manatu he tau katofia. Ti mukamuka ma e tau tagata ke talia e tau tohi faka-Tohi Tapu mai ia au mo e hoa paionia haaku. Pete ni e fiafia lahi au ke nofo i ai, ne fuata agaia au ti misi lahi e kaina. Ka e lagomatai ai ki a au ke manamanatu ko Iehova ne manako ke nofo au i ai, ti manako au ke omaoma ki a ia.

Fai magaaho he mole, kua fakafano au ki Milan ke lagomatai ke fakatokatoka ma e 1963 Toloaga he Lalolagi Katoa  “Tala Mitaki Tukulagi.” He fonoaga, ne gahua foaki noa au mo e tokologa he tau matakainaga, fakalataha foki mo e fuata taane mai Florence ko Paolo Piccioli. He aho ke uaaki he fonoaga, ne taute e ia e lauga mitaki lahi hagaao ke he tau tagata nonofo tokotaha kua maeke ke lahi atu e mena ka taute he fekafekauaga ha Iehova. Ne manamanatu au he mogoia, ‘To nakai fai hoana mooli e matakainaga ia.’ Ka e he oti e fonoaga, ti kamata a maua ke fetohitohiaki. Ne mailoga e maua kua tatai e tau foliaga ha maua mo e lahi e fakaalofa ki a Iehova, ti manako ke omaoma ki a ia. Ne mau au mo Paolo he 1965.

Ne paionia mau au i Florence ke hogofulu e tau. Ko e fiafia ha ia ke kitia e tupu he tau fakapotopotoaga, mua atu he kitia e holo ki mua fakaagaaga ha lautolu ne ikiiki. Ne fiafia lahi au mo Paolo ke fai magaaho mo lautolu nei ne fuata mui ke tutala ke he Tohi Tapu mo e ke he tau mena fakafiafia tino. Ne fa pelē soka a Paolo mo lautolu. Ti fiafia au ke fai magaaho mo e taane haaku, ka e maama foki e au e manako he tau magafaoa mo e tau fuata mui he fakapotopotoaga ke taute mena mo ia mo e mamata ki a lautolu.

Fiafia lahi agaia au ke liu manamanatu ke he loga he tau fakaako Tohi Tapu ha maua. Taha e tagata fakaako ko Adriana, ne tutala a ia ke he ua e magafaoa hagaao ke he tau mena ne fakaako e ia. Ne fakatoka he tau magafaoa nei e fono mo e akoako ke fakatutala ke he falu taofiaga he lotu, tuga e Atua Tolu Taha mo e solu ne nakai maeke ke mate. Tolu e takitaki lotu ne o mai ke he fono. Ko e tau fakamaamaaga ke he tau fakaakoaga ha lautolu kua to lahi e halahū, ti mukamuka lahi e tau tagata fakaako Tohi Tapu ha tautolu ke mailoga kua nakai felauaki e tau fakaakoaga nei mo e tau talahauaga he Tohi Tapu. Ko e fua mai he fonoaga ia, ne toko 15 e tagata he tau magafaoa ia ne eke mo Tau Fakamoli.

Ka e mooli, kua kehe e puhala fakamatala ha tautolu he vahā nei. He magahala ia, ne fa feleveia a Paolo mo e tau akoako ke fakatutala ke he tau fakaakoaga he Tohi Tapu, ti iloilo lahi a ia he fakakite e tau taofiaga ha tautolu he tau fakatutalaaga nei. Taha e mogo, ko ia i mua he matakau ne nakai ko e Tau Fakamoli. Ne kitia maaliali ai kua fitā e tala age he tau akoako ke he falu ia lautolu ke hūhū e tau hūhū ke fakafuafua kelea aki a Paolo. Ka e nakai hokotia ai ke he puhala ne fakatoka he tau akoako. Taha e tagata ne hūhū kua hako nakai e lotu ke putoia ke he tau mena fakapolitika. Ne nakai iloa e tau akoako ke tali. Ne amanaki ni e tau molī ti mamate, ti oti motuhia e fono. Fai tau he mole, ne iloa e maua na fakatoka tuai ni he tau akoako taha tagata ke tamate e tau molī ka nakai holo mitaki e fakatutalaaga ma lautolu.

He mole e hogofulu tau he mau a maua mo Paolo, ne uiina a maua ke taute e gahua takaiaga. Na mitaki e gahua tupe ha Paolo, ti nakai ko e fifiliaga mukamuka. Oti e liogi ha maua mo e manamanatu ki ai, ne fifili a maua ke talia e kotofaaga. Ne fiafia a maua he fakalataha mo e tau magafaoa ne nonofo a maua i ai. He mogo afiafi, ne fa fakaako auloa a mautolu, ti lagomatai e Paolo e tau fanau ke he tau gahua aoga ha lautolu. Ne fiafia lahi a ia ke lagomatai a lautolu ke he tau gahua mata numera. Ne makutu foki a Paolo ke totou ti fiafia tumau ke tutala ke he tau mena fuluola mo e atihake ne totou e ia. He Aho Gofua, ne fa o atu a maua ke fakamatala he tau taone ne nakai fai Fakamoli mo e uiina e tau tagata ke o mai ke fanogonogo ke he lauga he mogo afiafi.

Ua e tau he mole e gahua he takaiaga, ne uiina a maua ke gahua he Peteli i Roma. Ne gahua a Paolo he Faahi he Tau Fekau Matafakatufono, ka e gahua au he Faahi Mekasini. Nakai mukamuka e hikiaga nei ki a maua, ka e manako a maua ke omaoma. Ko e fiafia ha ia ke kitia kua loga lahi e gahua kua taute he la ofisa mo e kitia foki e numera he tau matakainaga i Italia ne malikiti hake lahi. He mogoia foki, ne talia he fakatufono Italia e lotu he Tau Fakamoli a Iehova. Ne fiafia lahi a maua he kotofaaga foou ha maua.

He mataulu he tau tau 1980, he mogo ne gahua a maua he Peteli, ne taha e lekua matafakatufono ne iloa lahi i Italia. Kua tukupau fakavai e taha hoa mau, ko e Tau Fakamoli, he mate e tama fifine ha laua ha kua nakai fakaatā ke fagai toto. Ko e tukumale pikopiko anei. Ka kua mate e tama fifine ha ko e gagao kelea lahi ke he toto ne tupu lahi i Italia mo e falu motu tata mai. Ne lagomatai he tau matakainaga he magafaoa Peteli e tau loea ne hukui e tau mamatua. Taha e tuleke mo e fufuta pauaki he Awake! ne lolomi mo e age ke he tau tagata ke lagomatai a lautolu ke iloa e tala mooli ke he tuaga ia mo e lagomatai a lautolu ke maama e talahauaga he Tohi Tapu ke he toto. He tau mahina ia, ne fa gahua a Paolo ke 16 e tulā he aho mo e nakai okioki. Ne eketaha au ke lalago a ia he magahala ia.

Ne 20 e tau he mau a maua, ti fai mena ne tupu fakalutukia. Ne 41 e tau haaku he moui ka e 49 ha Paolo he mogo ne tala age au ki a ia ne manatu au kua fatu au. I loto he pepa tohitohi haana, ne fakamau e Paolo he aho ia: “Liogi: Ka mooli, lagomatai a maua ke fakatumau ke he gahua mau, nakai okioki fakaagaaga, ti eke mo tau mamatua mitaki ke he ha maua a fakafifitakiaga. Mua atu he tau mena oti ia, lagomatai au ke fakagahua ke 1 e pasene he tau mena oti ne talahau e au mai i mua ke he molea e 30  e tau kua mole.” Ka manamanatu au ke he mena ia mogonei, kua maeke au ke kitia kua tali mooli e Iehova e liogi ha Paolo mo e haaku.

Ne hiki lahi e tau momoui ha maua he fanau a Ilaria. He falu mogo ne loto lolelole a maua, tuga ne fakamaama he Tau Fakatai 24:10: “Kaeke ke fakalolelole a koe ke he aho matematekelea, kua tote ni hāu a malolo.” Ka e matutaki a maua ke felagomataiaki.

He mogonei, ne fa pehē a Ilaria kua fiafia a ia ke he tau matua haana he lavelave he gahua mau he mogo ne tupu hake a ia. Ne logona tumau e ia e fakaalofa mo e leveki ki a ia. He aho, ne leveki e au a ia. He mogo afiafi ka hau a Paolo ki kaina, ne fefeua a laua mo e lagomatai a ia ke he tau gahua aoga haana. Taute pihia e ia pete he ala a ia ke hoko ke he matahola ua po ke matahola tolu he pogipogi ke fakaoti e tau gahua haana. Ne fa pehē a Ilaria, “Ko Tete e kapitiga uho haaku.”

Mooli, ke lagomatai a Ilaria ke taute e mena hako, ne lata ia maua ke akonaki a ia, ti peehi malolō he falu mogo. Ma e fakatai, ne manatu e au he taha mogo ne fefeua a ia mo e kapitiga ti ai mahani mitaki a ia. Ne fakamaama e maua mai he Tohi Tapu e kakano kua nakai lata a ia ke mahani pihia. Ti fekau foki e maua a ia ke pehē “fakamolemole” ke he kapitiga haana he mogoia ni.

Ne pehē a Ilaria ko e fiafia he tau matua haana ke he gahua he fonua ne lagomatai a ia ke fiafia foki ke he gahua he fonua. Kua lahi a ia mogonei ti fai taane, ti maama mitaki e ia e aoga ke omaoma ki a Iehova mo e muitua ke he haana tau takitakiaga.

He 2008, ne iloa e Paolo kua moua a ia he kenesā. He mogo fakamua, tuga na to malolō a ia, ti fakamafana lahi e ia au. Ne lali a maua ke kumi e tau ekekafo ne lotomatala lahi ke leveki a Paolo. Ne loloa e tau liogi ha maua mo Ilaria ki a Iehova he ole ma e lagomataiaga haana ke loto malolō mo e fakauka. Ne uka lahi ki a au ke onoono ke he tagata ne lahi e malolō mo e hakahakau hane lolelole fakahaga. Ko e mate ha Paolo he 2010 ne fakamomoko lahi mahaki ki a au. Ka e mafanatia au he manamanatu ke he tau mena oti ne taute e maua he 45 e tau ne mau ai. Ne foaki katoatoa e maua ki a Iehova, ti iloa e au to nakai nimo e ia e tau gahua ha maua. Amanaki lahi au ke he magaaho ka fakamooli e Ioane 5:28, 29 mo e fakaliu tu mai a Paolo.

He loto haaku, ko e tama fifine tote ia agaia au ne fiafia ke he tala ki a Noa. Manako agaia au ke omaoma ki a Iehova, pete ni e ha mena ne manako mai a ia ki a au. Iloa e au ko e ha lekua ne moua e tautolu, tau foakiaga ne taute e tautolu, po ke fakauka ke he tau mena ne galo ko e tau mena ikiiki ka fakatatai ke he tau monuina homo ue atu kua fakatoka mai he Matua fakaalofa ha tautolu. He moui haaku, kua kitia e au ko e omaoma ki a Iehova kua uho tumau.