SATAN so sakey ed saray nanonotan kod si tatay ko ya mauyamo tan makulikuli. Agto labay ya walay naaagrabiado, kanian nainteresan a tampol ed mensahe na Biblia nen 1953. Manlapud saman, ginawa toy anggaay nayarian ton ibangat ed sikamin sanaagi iray nanaaralan to. Diad gapo, talawan si nanay ko ya tundaan iray tradisyon na Katoliko. Balet ag-abayag, ginapoan to met lan inyaplika iray bangat na Biblia.

Nairapan iray atateng min mangibangat ed sikami ta ngalngali agmakabasa tan agmakasulat si Nanay, tan si Tatay et lanang ya walad uma. No maminsan naknaksawan si Tatay kanian mantemeg legan min manaaral. Balet, ag-aperdi impansagpot to. Siak so panguloan, kanian tinmulong ak ya angibangat ed saray agagik. Kaibad saray imbangat ko imay naynay ya ibabaga nen Tatay ya panangaro nen Noe ed pamilya to ya impanengneng to diad intulok tod Dios. Talagan paboritok iman ya istoryad Biblia! Ag-abayag, mimiaral kami lan amin ed Kingdom Hall diad Roseto degli Abruzzi, sakey a syudad ed Adriatic coast na Italy.

Nen 1955, 11 años ko ni labat ed saman sanen bineltang mi nen nanay ko so kapalandeyan paonlad sagur pian onatendid kombension diad Rome. Saman so sankaunaan ya kombension a naatendian mi. Manlapud saman, ipapasen ko iray angkakabaleg a pantitipon bilang sakey ed saray sankaliketan a parte na bilay tayon Kristiano.

Diad sinmublay a taon, nampabautismo ak tan linmoob ak ya tampol ed sigpot panaon a panaglingkor. Nen 17 años ko, nagmaliw ak ya espisyal payunir ed Latina, abalaten na Rome tan manga 300 kilometro so kaarawi tod abung mi. Balo ni labat iman ya syudad kanian agpanpapagaan na totoo no antoy ibaga na kakaabay da no awaten day mensahe na Biblia. Manliket kamin dua may kaibak ya payunir ta amayamay so nipalima min literatura, balet lapud ugaw ak ni, makakailiw ak ya lanang! Ingen ta labay kon tuloken so panlabayan nen Jehova.

Insan niasain ak ed Milan pian ontulong ed preparasyon na “Everlasting Good News” International Assembly nen 1963. Legan na kombension, sakey ak ed saray dakel  a namboluntaryo, kaiba mi Paolo Piccioli, kalangweran a brother a taga Florence. Diad komaduan agew na kombension, balibali impanpaliwawa to nipaakar ed pagmaliw ya andiay asawa. Say kuan ko, ‘Seguradon agla miasawa iyan brother.’ Balet, ag-abayag et nansulatan kami tan naamtaan min dakel so pamparaan mi—saray kalat mi, panangaro mid si Jehova, tan say determinasyon min ontulok ed sikato. Nankasal kami nen Paolo nen 1965.

Samploy taon ak ya regular payunir ed Florence. Makapalikliket ya naimatonan so iyaaligwas na saray kongregasyon, lalo lad saray kalangweran. Labalabay mi ran nakaiba nen Paolo diad espiritual iran istoryaan tan diad panagrelaks. Kaiba day Paolo ya manggalaw na soccer. Siempre, labay kon nakaiban lanang si Paolo, balet nanenengneng kon saray kalangweran tan pamilya ed kongregasyon et kaukolan day suporta tan panaon to, tan baleg so nitutulong tod sikara.

Naliliketan ak nin siansia no nanonotan ko iramay amayamay ya inyaralan mi Biblia. Sakey ed sikara si Adriana, ya innabang toy nanaaralan tod duaran pamilya. Implano dan miarap irad pari pian pantongtongan iray doktrina na simbaan a singa say Trinidad tan ag-ipatey na kamarerwa. Taloran obispo so sinmabi. Mairap ya talosan tan agmantutunosan so eksplinasyon da, kanian main-inomay itan ya naimano na saray iyaaralan mi na Biblia sanen inkompara dad saray dugan bangat na Biblia. On, baleg so epekto na satan ya inkagawa. Asabi panaon, manga 15 so nagmaliw a Tasi ed saraman a pamilya.

Siempre, medyo duma lay paraan na panagpulong tayo natan. Nensaman, nagmaliw ya “eksperto” si Paolo ed pipiarap ed saray pari—tan aminpigapiga to ran akaarap. Nanonotan ko ni may aminsan ya impiarap ton saray manbabantay et aliwan Tasi. Adiskobre ya implano na saray onsusumpa ya mantepet so pigaran wadman na saray makapawetwet ya tepet. Balet, anguman so batik na tongtongan. Walay nantepet no kasin duga ya mibabali ed politika so simbaan, a singa abayag da lan gagawaen. Diad saman et naaburido iray pari. Biglan narep so silew tan pinultot da lay tongtongan. Kalabas na pigaran taon, naamtaan min implano dan talaga manaya ya erepey silew no say tongtongan et aliwa lan pabor ed saray pari.

Nen samploy taon kami lan sanasawa nen Paolo, niasain kamin manlingkor ed sirkito. Balibali  trabaho nen Paolo kanian nairapan kamin nandesisyon. Balet kayari mi itan ya impikasi, inawat mi balon asainmin mi. Na-enjoy mi so impilimog ed saray pamilyan amarawes ed sikami. No labi, kaslakan lan saniiba kamin manaral, insan ibaan nen Paolo iray ugugaw ya manggaway asainmin da, lalo lad math. Sakey ni, makulin manbasa si Paolo tan labalabay ton iyistorya iray balibali tan makapaseseg ya nababasa to. No Lunes, mabetbet kamin manpupulong ed saray baley ya anggapo ni Tasi, tan iimbitaan mi ray totoo ya onatendid paliwawa no labi.

Kayari duay taon ya impanlingkor mid sirkito, naimbitaan kamin manserbid Bethel diad Rome. Niasain si Paolo ed saray legal matters, tan siak balet et diad Magazine Department. Aliwan mainomay so man-adjust balet ta determinado kamin ontulok. Makapalikliket ya nanengneng so iyaawang na branch tan mapmaples ya idarakel na Tasi ed Italy. Legan na satan a panaon, naaprobaan bilang legal ya relihyon so Saray Tasi nen Jehova diad Italy. Talagan malikeliket kamid sayan klase na panaglingkor.

Legan kamin manseserbid Bethel, nagmaliw ya isyu ed Italy so nibase ed Biblia ya talindeg tayo nipaakar ed dala. Nen kagapoy 1980’s, walay kaso ed sayan isyu ya nagmaliw a kontrobersial. Naakusaan so sanasawan Tasi ya sikara kunoy akankasalanan ed impatey na anak dan bii, anggano say tuan sengegan na impatey to et sakit ed dala ya maslak ed Mediterranean region. Tinulongan na saray agagi ed Bethel iray abogado na sanasawan Tasi. Walay bokleta tan espisyal ya edisyon na Onliing! ya im-publish pian naamtaan tan natalosan na totoo no antoy ibabaga na Biblia nipaakar ed dala. Diad saraman ya bulan, andi-tundan mantratrabahoy Paolo na anggad 16 oras kada agew. Ginawak so anggaay nayarian kon suportaay pansasakripisyo to.

Duamplon taon kami lan sanasawa sanen anguman so situasyon mi. Say edad ko et 41 tan si Paolo et 49 sanen imbagak ed sikato ya malukon ak amo. Diad diary to, abasak irayan insulat tod saman ya agew: “Pikakasi: No bilang ta tua, tulongan yo kamin makapansiansiad sigpot panaon a panaglingkor, aktibod espiritual, tan tulongan yo kamin magmaliw ya maong ya ateng. Manunad amin, tulongan yo ak pan niyaplika so anggan 1 porsiento na amin ya imbagak ed saray paliwawak diad apalabas ya 30 taon.” No nengnengen ko natan so resulta, talagan inebatan nen Jehova so pikakasi to—pati say pikakasik.

 Baleg so pananguman ed bilay mi sanen nianak si Ilaria. Aminen ko ya wala ray panaon ya adismaya kami, singa samay ibabaga na Biblia: “Kasin onkakapuy so liknaan mo diad panaon na gonigon? Say pakayarim et onkulang.” (Uli. 24:10, NW) Balet, nantulongan kami tan agmi nilingwanan ya kaukolan min pasesegen so balang sakey.

Talagan napatnagan ya malikeliket si Ilaria ya saray ateng to et Tasi ya busy ed sigpot panaon a panaglingkor. Sikatoy agbalot apaulyan tan binmaleg ed normal ya pamilya. No agew, siak so kaiba to. No labi kasabi nen Paolo ed abung, walan walay sumpalen ton trabaho; balet ta iikdan toy panaon si Ilaria, pigalawan to tan ibaan tod asainmin to. Gawaen nen Paolo itan anggan nasabi toy alas dos o alas tres na palbangon pian sumpaley trabaho to. Oniay naynay ya ibabaga nen Ilaria: “Si Daddy’k so best friend ko.”

Siempre, kaukolan so mabetbet tan mapekder ya pambilin pian mansiansiad dugan dalan si Ilaria. Nanonotan kon aminsan et walay aliwan ginawa to sanen migagalaw ed kaaro to. Imbasa mid Biblia no akin ya agto nepeg a gawaen iman. Imbaki mi met ya man-sorry ed samay kaaro to legan min sankanengneng.

Naynay ya ibabaga nen Ilaria a naaapresya toy panangaro na atateng to ed ministeryo. Natan ta wala lay asawa to, mas natatalosan to no panon kaimportante so itulok ed si Jehova tan ed panangiwanwan to.

Nen 2008, naamtaan nen Paolo ya walay cancer to. Diad gapo et singa nilabas toy sakit to, tan pinaseseg to ak ya maong. Nilikud ed impananap mi sankaabigan ya panagtambal, nampikasi kamin dua nen Ilaria ed si Jehova. Andurukey so pikakasi mi parad tulong to pian nasarag mi antokaman ya nagawa. Balet, say datin mabisbiskeg tan makmaksil ya asawak et kalkalnan kinmapuy. Nanermenan kon maong so impatey nen Paolo nen 2010. Ingen ta naliligliwa ak no pawilen ko iramay agawaan mid apalabas ya 45 taon. Inter mid si Jehova so sankaabigan mi, tan segurado ak ya agton balot nalingwanan so serbisyo mi. Pitalaran koy iyoli’d bilay nen Paolo based samay sipan nen Jesus ed Juan 5:28, 29.

Diad pusok, siak nin siansia may ugaw ya labalabay toy istorya nen Noe. Ag-anguman so determinasyon ko. Labay kon tuloken si Jehova, anggan antoy pagawa to. Segurado ak ya anggan anton subok, sakripisyo, odino antokaman so naandi, agmakakiking iratan no ikomparad dakdakel ya bendisyon ya itatarya na maaron Dios tayo. Naeksperiensyak iyan mismo—tan ibagak ed sikayo, sankaabigan so itulok ed si Jehova.