TOKU papa, e tangata akaaka e te angaanga pakari. No tona inangaro maata i te tu tika, kua reka aia i te akarongo ki te karere Pipiria. Ko te mataiti 1953 te reira, e mei reira mai kua apii aia i tana i kite mai ki tana tamariki. I te akamataanga, kare a mama e inangaro ana i te akaruke i tana akonoanga Katorika. Aere ua rai, kua ariki mai aia i te au apiianga Pipiria.

Kare a mama i kite roa ana i te tatau, e e angaanga roa ana a papa i tana ngai angaanga i te au ra. No reira e mea ngata i toku nga metua i te apii ia matou. Tetai taime roiroi tikai a papa, e e ngata iaia i te ara ua i te tuatau o te apii. Inara kua paunaia tana tautaanga. Ko au te mataiapo e kua tauturu au i te apii i toku teina e toku nga tungane. E pukapuka ua ana matou no runga i to Noa inangaro i tona pamiri e tona akarongo ki te Atua. Kua reka tikai au i te reira tua! Kare i roa ana i to matou apiianga i te Pipiria ei pamiri, kua aere matou ki te au uipaanga i ko i te Are Uipaanga Patireia i Roseto degli Abruzzi, e oire i Aderia i te pae taatai, i Itaria.

I te mataiti 1955, e 11 rai oku mataiti, kua aere maua ko mama ki Roma ki ta maua uruoaanga mua. Mei reira mai, e mea akaperepere maata naku te au uruoaanga.

Papetitoia au i te mataiti 1956 e kua akamata i te painia i muri mai. E 17 oku mataiti i riro mai au ei painia takake i Latina, e oire i te tua tonga o Roma, mei te 300 kiro mita te mamao mei toku kainga. E oire ou te reira, e kare te tangata e manamanata ana no runga i ta tetai ke ka manako mai. No reira, mama ua i te tangata i te ariki i te au puka Pipiria ta maua ko toku patana painia i oronga atu. Mataora au i te noo ki reira, inara no toku tu mapu kua maaraara ua rai au i toku pamiri. Kua riro te reira ei tauturu iaku kia akamaara e te inangaro ra a Iehova iaku kia noo ki reira, e kua akarongo au kiaia.

Muri mai, kua tukuia au ki Milan ei tauturu i te au taeake kia akapapa no te Akaputuputuanga Pa Enua i te mataiti 1963, “Tuatua Meitaki Mutu Kore.” Te tuatau o te uruoaanga, kua angaanga kapiti au ki tetai au taeake e  tetai taeake mapu no Florence mai, ko Paolo Piccioli tona ingoa. I te ra rua o te uruoaanga, kua oronga aia i tetai akoanga meitaki e akapeea te aronga kare i akaipoipo me tavini maata atu ia Iehova. Maara iaku te manako anga e, ‘Kare roa tera taeake e akaipoipo.’ Inara i muri ake i te uruoaanga, kua akamata maua i te tata reta ki tetai e tetai. Kua kite mai maua e, aiteite ua to maua akakoroanga, te inangaro ia Iehova e te akarongo tikai kiaia. I te mataiti 1965, kua akaipoipo maua ko Paolo.

E tai ngauru mataiti toku painia tamou anga i Florence. Mataora tikai i te kite i te au putuputuanga e tupu ra e te au mapu e tere ra ki mua i roto i te tuatua mou. Rekareka maua ko Paolo i te kapiti atu ki teia au mapu i te uriurianga i te Pipiria e te tamataoraanga. E kanga tueporo tarape ua ana a Paolo kia ratou. E tika, e inangaro ana au i te akapou i toku taime ki taku tane, inara kua kite au e te anoano ra te au pamiri e te au mapu i roto i te putuputuanga i tona taime.

Mataora nei rai au i te akamanako i te aronga ta maua i apii ana i te Pipiria. Ko Adriana tetai ta maua i apii tei tuatua ki tetai nga pamiri ke no runga i tana apii. Kua akanoo teia nga pamiri kia raveia tetai uipaanga ki te orometua i te uriuri i tetai au apiianga a te akonoanga, mei te apii Toru Tai e te apiianga e te ora ua ra te tangata tei mate. E toru orometua tei tae mai ki te uipaanga. Ngata tikai i te marama i ta ratou e apii maira, e kua kite te aronga apii Pipiria e kare teia au apiianga e rotai ana ki te Pipiria. Tei tupu mai, e 15 mema o taua nga pamiri ra tei riro mai ei Au Kite.

Tika rai, tukeke te mataara e rave ana tatou i te angaanga tutuanga i teia tuatau. I taua tuatau ra, e aravei ua ana a Paolo i te au orometua i te uriuri i te au apiianga Pipiria, e e karape tikai aia i te akakite i to tatou irinakianga. Tetai ra, kua tu aia ki mua i tetai pupu tangata kare i te Au Kite. Taka ua e na te au orometua i akakite ki te tangata kia ui i te au uianga te ka taakama ia Paolo. Inara kare te parani a te au orometua i tupu ana. Kua ui mai tetai tangata me e tikaanga to te akonoanga kia piri atu ki roto i te angaanga poritiki. Kare te au orometua i kite e ka akapeea me pau atu. Kite ua ake matou, mate te mori e kua akamutu te uipaanga. Tetai au mataiti i muri mai, kua kiteaia mai e na te au orometua i parani kia tamate tetai tangata i te mori me kare te uriurianga e tau ki ta ratou e inangaro ra.

E tai ngauru mataiti to maua akaipoipoanga, patiia mai maua ko Paolo no te angaanga kotinga.  E ngai angaanga moni meitaki ta Paolo, no reira kare te reira i te ikianga mama ua. Muri ake to maua pure kapiti anga e te akamanako anga i te reira, kua ariki maua i teia patianga. E rekareka ana maua i te kapiti atu ki te au pamiri tei akono mai ia maua. I te aiai, ka apii matou ei pupu, e oti kua tauturu a Paolo i te au tamariki kia rave i ta ratou apii no te apii mai. Kua rekareka tikai aia i te tauturu ia ratou i te rave i ta ratou apii numero. Pera katoa, e reka tikai ana a Paolo i te tatau e kua mataora ua aia i te akakite i tana au mea i tatau ana. I te Monite, e tutu aere ana maua i roto i te au oire kare e Au Kite i reira, e kua pati i te au tangata kia aere mai ki tetai akoanga i taua aiai ra.

E rua mataiti i muri mai, patiia mai maua kia tavini i roto i te Betela i Roma. Kua angaanga a Paolo i roto i te Tipatimani o te Ture e ko au i roto i te Tipatimani Makatini. Kare teia i te tauianga mama ua, inara kua akarongo ua maua. Mataora tikai i te kite e e maata te angaanga e raveia ra i ko i te opati manga e te maata ua atura te au taeake i Itaria. I taua tuatau rai, kua akamana te kavamani o Itaria i te Au Kite o Iehova ei akonoanga. Kua mataora tikai maua i te rave i ta maua apainga ou.

Ia maua e angaanga ra i Betela i te au mataiti 1980, kua raveia tetai akavaanga rongonui i Itaria. Kua mate tetai tamaine a tetai nga tokorua Kite, e kua akaapaia raua no te kore i akatika i te pamu toto. E akaapaanga pikikaa teia. Te tikaanga, kua tu aia i tetai maki i roto i te toto e tupu ra ki te au tangata i Itaria e i tetai au enua i te pae mai. Kua tauturu te au taeake e te au tuaine i Betela i te au roia o te nga metua. Kua neneiia tetai aenga pepa e tetai itiu takake o te Awake! e kua orongaia ki te tangata kia tauturu ia ratou kia kite i te tikaanga no runga i taua akaapaanga ra e kia marama ratou i ta te Pipiria e akakite maira no runga i te toto. I taua tuatau ra, e angaanga ana a Paolo e 16 ora i te ra. E kua tauta pakari au i te turuturu iaia.

E 20 mataiti to maua akaipoipoanga i tupu ei tetai apinga poitirere. E 41 oku mataiti e e 49 o Paolo te akakite anga au kiaia e kua nui au. Kua tata a Paolo i roto i tana puka tata no tera ra e: “Pure: Me e tika te reira, tauturu mai ia maua kia tavini tamou ua rai, kia kore maua e paruparu i te pae vaerua, e kia akanoo maua i te akaraanga meitaki ei nga metua. Te mea maata, tauturu mai iaku kia taangaanga i taku i ako ana ki te katoatoa i te 30 mataiti i topa.” Me akamanako au i te reira i teianei, kare ekoko e kua pau mai a Iehova i ta maua pure.

Kua taui takiri to maua oraanga te anau mai anga a Ilaria. Tetai au taime, e taitaia ana maua ko Paolo, mei tei akatakaia i roto ia Maseli 24:10 e:  “Kia potopoto to aʼo i te rā i eke ei ra, kua iti roa toou maroiroi.” Inara kua turuturu ua rai maua i tetai e tetai.

I teia ra, e karanga ana a Ilaria e, mataora tikai aia e kua angaanga maroiroi tona nga metua i roto i te angaanga tamou iaia e mamaata maira. Kua kite aia e te akaperepere ra maua iaia. Naku e akono ana iaia i te ao, e me tae mai a Paolo ki te kainga i te po, ka kangakanga raua e ka tauturu aia ia Ilaria i tana apii no te apii mai. Kua rave aia i teia noatu ka ara ua aia i te ora rua me kore te ora toru i te mamaiata i te akaoti i tana angaanga. E karanga ua ana a Ilaria e, “Ko papa toku oa meitaki rava atu.”

E tika, ei tauturu ia Ilaria kia rave i te mea tika, tetai taime kua anoanoia maua kia ako pakari iaia. Ei akaraanga, maara iaku tetai ra e kanga ra raua ko tona oa e kua rave aia i tetai angaanga tarevake. Akamarama atu maua mei roto mai i te Pipiria i te tumu kare aia e tau kia akapera. Kua akakite maua kiaia e e aere aia e tataraara ki tona oa i tera taime.

E karanga ana a Ilaria e no te akaraanga meitaki o tona nga metua no te angaanga orometua i tauturu iaia kia inangaro katoa i te rave i te reira. Teianei kua akaipoipo aia, marama meitaki aia i te puapinga kia akarongo e kia aru i te aratakianga a Iehova.

I te mataiti 2008, kua kite mai a Paolo e kua tuia aia e te maki cancer. I te akamataanga, kua manako aia e ka meitaki tona maki, no reira kua akamaroiroi mai aia iaku. Kua kimi matou i te au taote kite karape kia rapakau ia Paolo. Kua pure akatenga matou kia Iehova, te pati anga i tana tauturu kia maroiroi e kia akakoromaki matou. Ngata tikai iaku i te akara i teia tangata maroiroi e te ketaketa e akaparuparu atura. Kua mamae tikai toku ngakau te mate anga a Paolo i te mataiti 2010. Inara, pumaana tikai au i te akamanako anga i te au mea pouroa ta maua i rave ana i te 45 mataiti o to maua oraanga akaipoipo. Kua tavini maroiroi maua ia Iehova, e kua kite au e kare rava e ngaropoina ia Iehova ta maua angaanga i rave. Te tapapa atu nei au i te tuatau e tupu ei ta Ioane 5:28, 29 no te akatuakaouia mai anga a Paolo.

I roto i toku ngakau, ko au taua tamaine meangiti tei rekareka i te tua o Noa. Inangaro rai au i te akarongo kia Iehova, noatu eaa tana ka pati mai. Kua kite au e noatu eaa te manamanata, te au akaatinga, te au mea i ngere ia tatou, e au mea rikiriki ua te reira me akaaiteia ki te au akameitakianga ta te Atua ka oronga mai no tatou. I roto i toku oraanga, kua kite tikai au e kua paunaia te taime no te akarongo anga kia Iehova.