O LOʻU tamā o se tagata lotomaulalo ma galue malosi. O lona naunau e fai le mea tonu, sa ia taliaina ai le upu moni. Mai i le 1953 ma faasolo mai ai, sa ia taumafai malosi e aʻoaʻo i matou i mea ua ia aʻoaʻoina. Sa leʻi manaʻo loʻu tinā e tuua ona talitonuga faa-Katoliko. Mulimuli ane, na amata ona ia taliaina aʻoaʻoga a le Tusi Paia.

Sa lē lelei le faitau a loʻu tinā, ae e galue loʻu tamā i le fanua i aso taʻitasi mo le tele o itula. O lea, sa faigatā ai ona matou suʻesuʻeina faatasi le Tusi Paia. O nisi taimi e tautulemoe loʻu tamā i taimi o suʻesuʻega ona o le vaivai. Ae na tauia ana taumafaiga. O aʻu o le ulumatua, o lea sa ou fesoasoani ai e aʻoaʻoina loʻu uso ma oʻu tuagane. Sa masani ona matou talanoa i le alofa o Noa i lona aiga, e ala i lona usitaʻi i le Atua. E ese loʻu fiafia i lenā tala! Ina ua matou suʻesuʻeina faatasi o se aiga le Tusi Paia, na matou auai uma ai i le sauniga i Roseto degli Abruzzi, o se aai i le talafatai o le Adriatic i Italia.

I le 1955 ina ua 11 oʻu tausaga, na ma uia ai ma loʻu tinā mauga ina ia auai i le ma tauaofiaga muamua i Roma. Talu mai lenā taimi, sa ou fiafia e auai i tauaofiaga.

Na ou papatiso i le 1956, ma e leʻi umi ae amata loa laʻu paeonia. Ina ua 17 oʻu tausaga, na ou paeonia faapito ai i Latina, o se aai fou i le itu i saute o Roma e tusa ma le 190 maila (300 km) le mamao mai i lo matou aiga. Sa faigofie ona talia e tagata lomiga faale-Tusi Paia mai iā i maʻua ma laʻu paga. E lē popole tagata i lea aai i manatu o tuaoi pe a latou talia le galuega talaʻi. E ui i loʻu naunau e talaʻi i lenā aai, ae sa ou misia lava loʻu aiga. O loʻu manatuaina e finagalo Ieova ou te iai i inā, sa fesoasoani iā te aʻu ma na ou naunau e usitaʻi iā te ia.

I le 1963, na auina atu ai aʻu i Milan e fesoasoani i tapenapenaga mo le tauaofiaga faavaomalo na faamatuaina, “Tala Lelei e Faavavau.” Sa matou galulue tauofo ma isi, e aofia ai se uso talavou mai i Florence, e igoa  iā Paolo Piccioli. O le aso lona lua o le tauaofiaga, na ia faia ai se lauga aasa e uiga i le tele o mea e mafai ona faia e ē nofofua, i le auaunaga iā Ieova. Na ou taumānatu, ʻAiloga e faaipoipo lea uso.’ Ae ina ua māeʻa le tauaofiaga, na amata ona ma fetusiaʻi. Na ma iloa e tutusa o ma sini, e ma te alolofa iā Ieova ma mananaʻo e usiusitaʻi iā te ia. Na ma faaipoipo i le 1965.

Sa ou paeonia sauatoa i Florence mo le 10 tausaga. O se fiafiaga le vaaia o le tuputupu aʻe o le faapotopotoga, aemaise le agaʻigaʻi i luma faaleagaga o talavou. E ma te fiafia ma Paolo e faaalu se taimi e talatalanoa faale-Tusi Paia ai ma talavou, ma fai ni faafiafiaga. E masani ona latou taaalo ma Paolo i le soka. E ui ou te manaʻo e mafuta ma laʻu tane, ae ou te malamalama foʻi e manaʻomia e aiga ma talavou le uaʻi atu o Paolo iā i latou.

E matuā faafiafiaina aʻu pe a manatu i le tele o a ma suʻesuʻega faale-Tusi Paia. O se tasi o i latou o Adriana, sa ia talanoa atu i isi aiga e uiga i mea na ia aʻoaʻoina. Sa fuafuaina e nei aiga se feiloaʻiga ma se patele, e talanoa ai i aʻoaʻoga faalotu e pei o le Tolutasi ma le ola pea o le agaga e lē mafai ona oti. E toʻatolu taʻitaʻi lotu na auai ai. O le fenuminumiaʻi o le auala na faamatalaina ai a latou aʻoaʻoga, na faigofie ai i a ma tagata suʻesuʻe ona iloa le feteenaʻi o na aʻoaʻoga ma le Tusi Paia. O le iʻuga, e toʻa 15 tagata o na aiga na avea ma Molimau a Ieova.

I aso nei, ua sui le auala e faia ai le galuega talaʻi. I aso ua tuanaʻi, e masani ona feiloaʻi Paolo ma taʻitaʻi lotu e talanoa i aʻoaʻoga faale-Tusi Paia, ma na avea ai o ia ma sē e tomai i le faamalamalamaina o aʻoaʻoga faale-Tusi Paia. I se tasi taimi, na tulaʻi ai o ia i luma o tagata e lē o ni Molimau a Ieova. Na faatonuina e taʻitaʻi lotu na tagata e tuʻifesili Paolo ina ia māsiasi ai. Peitaʻi, na lē taulau na faufauga. Na fesili se tasi tagata pe e tatau i lotu ona aafia i faiga faapolotiki. E leʻi iloa e taʻitaʻi lotu le tali o lenā fesili. Na pē faafuaseʻi le eletise ma tolopōina ai le feiloaʻiga. I nai tausaga mulimuli ane, na matou iloa ai na faatonuina e taʻitaʻi lotu se tasi e tapē le eletise, ina ia lē mafai ona faaauauina le talanoaga.

Ina ua mavae le 10 tausaga talu ona ma faaipoipo ma Paolo, na valaaulia i maʻua i le galuega  femalagaaʻi. Sa leʻi faigofie ona faia se faaiʻuga auā sa lelei le galuega a Paolo. Ina ua māeʻa ona ma tatalo i lenei mataupu, na ma filifili ai e talia le faaeaga. Sa ma fiafia e faifaimea faatasi ma aiga na ma nonofo ai. I le afiafi, e masani ona matou suʻesuʻe faatasi, ona fesoasoani lea o Paolo i meaaʻoga a tamaiti. Ae sa sili ona fiafia o ia e fesoasoani iā i latou i le mataupu o le matematika. Sa fiafia foʻi Paolo e faitau ma faasoa atu i isi manatu faalaeiau na ia faitau i ai. I le Aso Gafua, e masani ona matou talaʻi i aai e leai ni Molimau a Ieova, ma valaaulia tagata e faalogologo i se lauga i le afiafi.

Ina ua mavae le 2 tausaga i le galuega femalagaaʻi, ona valaaulia lea o i maʻua e auauna i le Peteli i Roma. Na galue Paolo i le matagaluega tau tulafono, ae sa ou galue i le Matagaluega mo Mekasini. E ui e lē faigofie lenā suiga, ae na ma usiusitaʻi pea. Maʻeu le vaai atu i le anoanoaʻi o galuega sa mafai ona faataunuuina i le lālā, ma le faatuputupulaʻia o le ʻautalaʻi i Italia. I lenā foʻi vaitaimi, na faamaonia aloaʻia ai e le tulafono le taliaina o Molimau a Ieova i Italia. Sa ma olioli i lenā faaeaga fou.

I le amatamataga o le vaitausaga o le 1980 a o ma auauna i le Peteli, na lauiloa ai i Italia se mataupu taufaamasinoga. Na tuuaʻia se ulugalii Molimau a Ieova i le faaooina o le oti i le la tama teine, ona o le lē taliaina o le tuigātoto. E sesē na tuuaʻiga. O le mea moni, na maliu o ia ona o se faamaʻi e aafia ai le toto, e taatele lenā faamaʻi i Italia ma isi atunuu tuaoi. Na fesoasoani uso ma tuafāfine i le Peteli i lōia na tutū mo lenei ulugalii. Na lomia se sāvali ma se lomiga faapitoa o le Ala Mai! e fesoasoani ai i tagata e iloa le upu moni e faatatau i lea tulaga, ma iloa ai le aʻoaʻoga a le Tusi Paia e faatatau i le toto. A o faagasolo masina, na faigaluega Paolo mo le 16 itula i le aso e aunoa ma se mālōlōga. Sa faia aʻu taumafaiga uma e lagolagoina ai o ia i na taimi.

E 20 tausaga talu ona ma faaipoipo, ae tulaʻi mai se tulaga e leʻi faatalitalia. O le 41 o oʻu tausaga ae 49 tausaga o Paolo, na ou faailoa ai iā te ia ua ou maʻitaga. Na tusi e Paolo i lenā aso i lana diary faamatalaga nei: ʻPe afai e moni, ou te tatalo ia fesoasoani iā i maʻua e tumau i le auaunaga faataimi atoa, ia agaʻigaʻi pea i luma faaleagaga, ma fesoasoani iā i maʻua e avea ma mātua lelei e ala i a ma faaaʻoaʻoga. Ae sili i lenā, ia fesoasoani iā te aʻu e faatatauina sina vaega o lauga na ou faia i le 30 tausaga ua mavae.’ Pe a  ou mafaufau i le taimi lenei, ou te mautinoa na tali mai Ieova i a ma tatalo ma Paolo.

Na suia atoa o ma olaga ina ua fanau Ilaria. O nisi taimi e ma te lagona ai le lotovaivai. E pei ona taʻua i le Faataoto 24:10: “Po ua e lotovaivai ea i le aso o le puapuaga? O le a itiiti lou malosi.” Peitaʻi, na faaauau pea ona fesoasoani le tasi i le isi.

E masani ona taʻua e Ilaria lona fiafia i le maelega o ona mātua i le auaunaga faataimi atoa a o ia tuputupu aʻe. Sa ia lagona le alofa i le auala na tausia ai o ia. Sa ou mafuta ma ia i le aso atoa. Ae pe a mānava mai Paolo i le afiafi, e la te taaalo faatasi ma fesoasoani i ana meaaʻoga. Sa ia faia faapea e ui e faatoʻā moe i le vaveao pe a uma ana galuega. E masani ona faapea mai Ilaria o lana uō mamae lona tamā.

Ina ia fesoasoani iā Ilaria e faia le mea saʻo, sa manaʻomia ona aʻoaʻia o ia. O se faataʻitaʻiga, na iai se taimi na lē lelei ai lana amio a o taaalo ma sana uō. Na ma faamatala iā te ia mai i le Tusi Paia, e lē tatau ona ia amioaʻi faapea. Na ma faatonuina o ia e faatoese i lana uō, a o matou iai faatasi.

Na taʻua e Ilaria, o le maelega o ona mātua i le faiva, na fesoasoani iā te ia e maelega ai foʻi i le talaʻiga. Ua faaipoipo nei o ia ma ua matuā malamalama i le tāua o le usitaʻi iā Ieova, ma mulimuli i lana taʻitaʻiga.

I le 2008, na maua ai Paolo i le maʻi o le kanesa. Muamua, e foliga mai e mafai ona togafitia le maʻi, ma sa ia matuā faamalosiau mai iā te aʻu. Na fai taumafaiga e saʻilia ni fomaʻi faapitoa e togafitia lona maʻi. Na ma tatalo ma Ilaria iā Ieova e fesoasoani iā i maʻua e tumau ma maua le malosi. Pagā le faigatā o le vaai atu i se tasi na matuā malosi, a o lea ua faasolo ina matuā vaivai. Na ou mafatia ina ua maliu Paolo i le 2010. Ae o se faalaeiauga le toe tomānatu i galuega lelei sa ma faia i le 45 tausaga o le ma faaipoipoga. Na ma ofo atu iā Ieova le mea sili, ma ou te iloa o le a ia lē faagaloina a ma galuega lelei. Ou te tulimataʻia le taimi e faataunuu ai le Ioane 5:28, 29, lea o le a toetū mai ai Paolo.

Ou te fiafia pea i le tala e uiga iā Noa. Ou te naunau e usitaʻi pea iā Ieova i so o se mea e finagalo i ai. Ua ou iloa po o ā lava faafitauli ma mea e tatou te onosaia, po o faataulaga e tatou te faia, e faatauvaa ia pe a faatusatusa i faamanuiaga matagofie o le a aumaia e le Atua. Ua ou tofo i le aogā o le usitaʻi iā Ieova.