LIAFUAN neʼe mak buat neʼebé haʼu hanoin-hetan bainhira haʼu sei kiʼik. Haʼu-nia aman mak ema baibain no serbisu badinas. Nia gosta buat neʼebé loos, tan neʼe nia simu kedas mensajen husi Bíblia iha tinan 1953. Husi tempu neʼebá, nia hakaʼas an tebes atu hanorin ami oan sira kona-ba buat neʼebé nia aprende. Foufoun, haʼu-nia inan lakohi husik tradisaun katóliku nian, maibé ikusmai nia mós simu Bíblia nia hanorin.

Ba haʼu-nia inan-aman, susar tebes atu estuda Bíblia ho ami. Haʼu-nia inan ladún hatene lee, no haʼu-nia aman tenke serbisu oras barak iha toʼos. Dala ruma, haʼu-nia aman kole tebes toʼo sai matan-dukur durante estudu. Maibé, ninia hakaʼas-an la saugati deʼit. Tanba haʼu mak oan-boot, haʼu mós ajuda hanorin haʼu-nia alin-feto ida no alin-mane naʼin-rua, hodi konta istória kona-ba Noé, katak Noé hadomi ninia família no halo tuir Maromak. Haʼu gosta tebes istória neʼe! Lakleur, ami hotu komesa tuir reuniaun Testemuña nian iha sidade ida besik tasi Adriátiku iha rai-Itália, naran Roseto degli Abruzzi.

Iha tinan 1955, bainhira haʼu tinan 11, haʼu ho haʼu-nia inan halo viajen ba sidade Roma liuhusi foho aas sira atu tuir reuniaun boot ba dala primeiru. Husi tempu neʼebá, reuniaun boot sira sai buat neʼebé espesiál tebes ba haʼu-nia moris nuʼudar ema kristaun.

Iha tinan tuirmai, haʼu hetan batizmu no depois komesa serbí nuʼudar pioneiru. Bainhira haʼu tinan 17, haʼu hetan knaar atu serbí nuʼudar pioneiru tempu-tomak iha sidade Latina, parte súl husi Roma, neʼebé dook kilómetru 300 husi haʼu-nia moris-fatin. Tanba Latina mak sidade neʼebé foun, ema mós ladún mete ema seluk nia moris. Haʼu ho haʼu-nia maluk pioneiru konsege fahe ita-nia livru barak no ida-neʼe halo ami kontente, maibé tanba sei joven, haʼu hanoin tebes família! Maski nuneʼe, haʼu hakarak duni atu halo tuir matadalan husi Maromak nia organizasaun.

Liutiha tempu balu, haʼu simu knaar atu serbí iha sidade Milaun hodi ajuda prepara ba reuniaun boot internasionál iha tinan 1963 ho tema “Evanjellu Rohan-Laek”.  Durante iha reuniaun boot neʼe, haʼu halo serbisu voluntáriu ho irmaun-irmán barak, inklui mós irmaun klosan ida husi sidade Florensa, naran Paolo Piccioli. Iha loron segundu iha reuniaun boot neʼe, nia hatoʼo diskursu diʼak tebes kona-ba moris nuʼudar ema klosan. Haʼu hanoin: ‘Irmaun neʼe sei nunka kaben.’ Maibé, ami komesa haruka karta ba malu, no ami hatene katak ami naʼin-rua iha hakarak neʼebé hanesan, hadomi Jeová no hakarak atu halo tuir nia. Ikusmai, ami kaben iha tinan 1965.

Iha sidade Florensa, haʼu serbí nuʼudar pioneiru regulár ba tinan sanulu. Durante tempu neʼe, ami haksolok hodi haree ema iha kongregasaun sira aumenta ba beibeik, liuliu hodi haree joven sira laʼo ba oin iha lia-loos. Ami kontente atu koʼalia kona-ba lia-loos no halimar ho sira. Maibé ba Paolo, kuandu nia dehan nia atu halimar ho joven sira, neʼe katak nia sei joga bola ho sira. Maski dala ruma haʼu hakarak hamutuk ho Paolo deʼit, maibé haʼu mós haree oinsá mak joven no família sira iha kongregasaun hetan ajuda husi Paolo tanba nia hatudu interese no uza ninia tempu hamutuk ho sira.

Kuandu haʼu hanoin-hetan kona-ba estudante Bíblia sira neʼebé ami ajuda, ida-neʼe lori haksolok ba haʼu. Estudante ida mak naran Adriana, nia haklaken fali ba família rua tan. Sira halo arranju atu ami hasoru padre ida husi igreja hodi koʼalia kona-ba doutrina sira hanesan Trindade no mate-klamar. Maibé ikusmai, igreja nia ulun-naʼin naʼin-tolu mak mai. Nuʼudar ami koʼalia, ami-nia estudante sira haree katak padre sira la konsege esplika ho didiʼak sira-nia doutrina maski Bíblia hanorin ho klaru. Liutiha enkontru neʼe, ami-nia estudante sira sai laran-manas atu laʼo ba oin iha lia-loos, no ikusmai, husi família sira-neʼe, naʼin-15 mak sai Testemuña ba Jeová.

Uluk ami-nia haklaken la hanesan ho ohin loron. Iha tempu neʼebá, Paolo hetan dalan neʼebé matenek atu koʼalia ho ulun-naʼin igreja sira. Haʼu hanoin-hetan iha enkontru ida neʼebé ami deʼit mak Testemuña, lakleur ami hatene katak ema neʼebé kontra ami mak halo ona arranju atu husu pergunta oioin neʼebé susar hodi hamoe ami. Maibé liutiha minutu balu, situasaun neʼe troka. Ema ida husu se igreja bele hola parte iha polítiku ka lae. Pergunta neʼe halo padre sira laran taʼuk. Derrepente deʼit, ahi mate no fatin sai nakukun, tan neʼe enkontru ramata. Tinan balu liu tiha, ami rona katak padre sira-neʼe halo planu ona atu taka ahi bainhira enkontru neʼe la laʼo ho didiʼak tuir sira-nia hakarak.

Liutiha tinan sanulu depois ami kaben, Paolo hetan konvite atu serbí nuʼudar katuas área nian.  Tanba Paolo iha serbisu diʼak, la fasil ba ami atu simu kedas konvite neʼe. Maibé ami halo orasaun, hanoin didiʼak no halo desizaun atu fó ami-nia an ba serbisu neʼe. Ho knaar foun neʼe, ami haksolok hamutuk ho família sira neʼebé fó hela-fatin mai ami. Iha kalan, ami estuda Bíblia hamutuk, no depois, Paolo ajuda labarik sira atu halo serbisu eskola nian, liuliu matemátika. Liután neʼe, tanba Paolo gosta lee livru sira, nia laran-manas fahe esperiénsia no informasaun sira neʼebé nia lee. Iha loron-segunda, ami mós dala barak bá haklaken iha área neʼebé la iha Testemuña ba Jeová hodi konvida ema atu rona diskursu iha kalan.

Maibé liutiha tinan rua deʼit, ami hetan konvite atu serbí iha Betel iha Roma. Iha Betel, Paolo halo serbisu tau matan ba kazu tribunál nian no halo rejistu oioin hodi tuir estadu nia lei, no haʼu halo serbisu iha departamentu neʼebé haruka livru fulan-fulan. Ami sente susar atu halo mudansa boot, maibé ami hakaʼas an tebes atu halo tuir matadalan sira. Ami hetan haksolok hodi haree sukursál sai boot no irmaun-irmán sira aumenta ba beibeik iha rai-Itália. Durante tempu neʼe, Testemuña ba Jeová iha Itália hetan rejistu nuʼudar organizasaun legál. Ami kontente tebes tanba ami hola parte iha serbisu hanesan neʼe.

Maizumenus iha tinan 1980, bainhira ami serbisu iha Betel, Testemuña iha rai-Itália hasoru susar boot tanba halo tuir Bíblia nia matadalan kona-ba raan. Iha kazu ida, ema duun matak inan-aman Testemuña ida katak sira husik sira-nia oan-feto mate tanba la simu transfuzaun raan, maski tuir loloos, nia mate tanba moras kona-ba raan neʼebé ema Itália barak hetan husi inan-aman. Irmaun-irmán sira iha família Betel ajuda advogadu neʼebé reprezenta inan-aman Testemuña. Ami mós uza tratu no livru Matan-moris! edisaun espesiál hodi ajuda ema atu hatene buat neʼebé loloos akontese no matadalan husi Bíblia kona-ba raan. Durante tempu susar neʼe, dala barak Paolo halo serbisu oras 16 iha loron ida nia laran, no haʼu mós hakaʼas an atu apoia nia.

Depois ami kaben ba tinan  20 ona, buat ida neʼebé halo ami hakfodak akontese. Bainhira haʼu tinan 41 no Paolo tinan 49, haʼu hatete ba Paolo katak karik haʼu sai isin-rua. Kona-ba loron neʼe, iha Paolo nia diáriu hakerek: “Orasaun: Se ida-neʼe mak tebes, ajuda ami atu kontinua serbí Ita tempu-tomak, labele husik ami baruk iha dalan espirituál, no ajuda ami sai inan-aman neʼebé fó ezemplu diʼak. Liután neʼe, ajuda haʼu halo tuir . . . buat neʼebé haʼu hatete ona husi plataforma durante tinan 30 nia laran.” Rezultadu neʼe hatudu  katak Jeová simu duni ninia orasaun no mós haʼu-nia orasaun.

Depois ami-nia oan-feto Ilaria moris, ida-neʼe lori mudansa boot ba ami. Tuir loloos, dala ruma ami sai laran-tun, hanesan Provérbios 24:10 hatete: “Ó sente laran-tun iha tempu neʼebé susar ka lae? Ó-nia kbiit sei sai menus.” Maibé ami kontinua ajuda malu no fó laran-manas ba malu.

Ilaria hatete beibeik katak nia kontente tebes tanba ninia inan-aman halo serbisu tempu-tomak nuʼudar Testemuña. Nia nunka sente katak ami husik nia mesamesak. Durante loron, haʼu hamutuk ho Ilaria. No iha kalan, bainhira Paolo fila ba uma, nia halimar ho Ilaria no ajuda halo serbisu eskola nian. Paolo halo hanesan neʼe maski nia presiza halo ninia serbisu toʼo tuku rua ka tuku tolu iha kalan-boot. Dala barak Ilaria hatete: “Apá mak haʼu-nia belun neʼebé diʼak liu.”

Nuʼudar inan-aman, ami presiza fó treinu ba Ilaria atu laʼo ba oin nafatin iha dalan neʼebé loos, no dala ruma ami mós presiza fó dixiplina ba nia. Porezemplu, loron ida bainhira Ilaria halimar ho nia kolega ida, nia hatudu hahalok ladiʼak. Ami esplika husi Bíblia ba nia tansá mak nia labele hatudu hahalok hanesan neʼe. Depois, ami mós haruka nia atu husu deskulpa ba ninia kolega iha ami-nia oin.

Ilaria mós hatete katak ninia inan-aman nia ezemplu ajuda nia atu hafolin serbisu haklaken. Agora nia kaben ona, no nia komprende liután oinsá mak importante atu halo tuir Jeová no ninia matadalan sira.

Iha tinan 2008, Paolo hetan moras kankru. Foufoun, ami hanoin katak Paolo nia saúde sei sai diʼak, no nia mós fó laran-manas ba haʼu. Hamutuk ho Ilaria, ami hakaʼas an atu buka tratamentu neʼebé diʼak no halo orasaun kleur ba Jeová hodi husu ninia ajuda atu tahan hasoru susar neʼe. Maibé haʼu haree haʼu-nia laʼen neʼebé uluk saúde diʼak sai fraku ba beibeik, no ikusmai iha tinan 2010, Paolo mate. Ida-neʼe halo haʼu triste tebes, maibé kuandu haʼu hanoin fali kona-ba buat neʼebé ami halo hamutuk durante tinan 45 nia laran, haʼu sente kmaan. Ami hakaʼas an atu serbí Jeová no nia sei la haluha ami-nia serbisu. Haʼu hein namanas ba tempu neʼebé Paolo sei moris hiʼas fali, hanesan Jesus hatete iha Joao 5:28, 29.

Tuir loloos, haʼu nafatin hanesan labarik-feto kiʼik neʼebé gosta istória kona-ba Noé. Toʼo agora, haʼu kaer metin nafatin ba haʼu-nia desizaun atu halo tuir Jeová hodi halo buat naran deʼit neʼebé nia haruka. Haʼu mós fiar katak ita-nia susar, sakrifísiu, ka problema hotu mak buat kiʼik deʼit se kompara ho bensaun sira neʼebé ita simu. Liuhusi haʼu-nia esperiénsia rasik, haʼu hatene katak buat hotu neʼebé ita halo ba Jeová sei la saugati deʼit.