MAKANI AABUUMI

Kumvwida Jehova Kwandiletela Zilongezyo Zinji

Akaluulwa aba Elisa Piccioli

Bataata bakaamba kuti: “Eelo kaka taciliboteli ncotwiiya kuzwa kuli Nowa!” Bakayungizya akwaamba kuti: “Nowa wakamvwida Jehova alimwi wakali kuuyanda mukwasyi wakwe, boonse bakafwutuka ciindi cazambangulwe akaambo kakuti mukwasyi woonse wakalinjide mubwato.”

EECI ncimwi cazyintu nzyondiyeeya kujatikizya bataata balo ibakali kulicesya alimwi akubeleka canguzu. Bakali kuyandisya kapati bululami, aboobo tiicakabakatazya kuutambula mulumbe wamu Bbaibbele mu 1953. Kuzwa waawo, bakasoleka canguzu kutuyiisya swebo tobana zyintu nzyobakali kwiiya. Bamaama bakali kuwayawaya kuleka kusyoma njiisyo zyaci Katolika. Pele mukuya kwaciindi, abalo bakatalika kubona njiisyo zyamu Bbaibbele kuti nzyamasimpe.

Tiicakali cuubauba kuti bazyali besu kabatuyiisya. Bamaama tiibakacizyi kubala alimwi Bataata bakali kutola ciindi cilamfwu kababeleka canguzu mumyuunda. Zimwi ziindi bakali kukatala cakuti bakali koona ciindi cakwiiya. Nokuba boobo, kusoleka kwabo kwakatugwasya. Ndime ndakali mwana mupati mumukwasyi, aboobo ndakali kugwasyilizya kuyiisya musyoonto wangu musimbi alimwi abasyoonto bangu basankwa bobilo. Eeci cakali kubikkilizya ancobakali kuvwula kwaamba Bataata—luyando Nowa ndwaakajisi kumukwasyi wakwe lwalo ndwaakatondezya kwiinda mukumvwida Leza. Eelo kaka ndakali kuciyanda cibalo eeci camu Bbaibbele! Kakutanainda ciindi cilamfwu, toonse twakatalika kuunka kumiswaangano ku Ŋanda ya Bwami iili mudolopo lya Roseto degli Abruzzi lili kunkomwe yalwizi lwa Adriatic ku Italy.

Ndakajisi buyo myaka yakuzyalwa iili 11 mu 1955 ciindi mebo abamaama notwakainda mumalundu kuya kumbo kumuswaangano wacooko ku Rome, ooyu ngowakali muswaangano wakusaanguna nkotwakajanika. Kuzwa waawo, miswaangano mipati mbuli yeeyi ndiibona kuba cintu cibotu kapati cabuumi bwesu bwa Bunakristo.

Mwaka iwakatobela, ndakabbapatizyigwa alimwi muciindi buyo cisyoonto kuzwa waawo ndakatalika mulimo waciindi coonse. Nondakajisi myaka yakuzyalwa iili 17, ndakaba painiya waalubazu mu Latina, Rome nkoili kumusanza alimwi kuzwa kuŋanda kwakali musinzo uulampa makkilomita aali 300. Lyakali dolopo lipya, aboobo bantu tiibakali kubikkila maano kujatikizya basimukobonyina ncobakali kucita. Mebo amupainiya ngotwakali kubeleka limwi twakalikkomene kumwaya mabbuku aapandulula Bbaibbele, pele akaambo kakuti ndakacili muniini, ndakali kukuyeeya kuŋanda. Nokuba boobo, ndakali kuyanda kutobela malailile ngondakapedwe.

 Mukuya kwaciindi ndakatumwa ku Milan kutegwa ndikagwasyilizye mukulibambila Muswaangano Wamasi wamu 1963 iwakajisi mutwe wakuti “Everlasting Good News.” (Makani Mabotu Aatamani) Amuswaangano ooyu, mebo alimwi abamwi banji, kubikkilizya a Paolo Piccioli mukwesu mukubusi iwakazwide ku Florence, twakabeleka katuli basikulisungula. Buzuba bwabili bwamuswaangano, Paolo Piccioli wakapa makani aakkomanisya kujatikizya kutakwata naa kutakwatwa. Ndilayeeya kandilyaambauzya kuti, ‘Mukwesu ooyu talangilwi kuti uyakukwata.’ Nokuba boobo, twakatalika kulembelana magwalo alimwi cakalibonya kuti twakali kuyeeya akukanza zyintu zikozyenye—mbaakani zyesu, luyando lwesu kuli Jehova alimwi akuyandisisya kumumvwida. Mebo aba Paolo twakakwatana mu 1965.

MIBANDI ABASOLOLI BAZIKOMBELO

Ndakali painiya waciindi coonse mu Florence kwamyaka iili 10. Cakali kukkomanisya kubona mbungano mbozyakali kukomena, ikapati kubona bakubusi mbobakali kuyaambele. Mebo aba Paolo twakali kukkomana kuba ambabo mumibandi yakumuuya alimwi amukulikondelezya, calo icakali kupa kuti ba Paolo kabauma bbola. Ndakali kukkomana kuba abalumi bangu, pele ndakali kubona kuti bakubusi aabo alimwi amikwasyi mumbungano yakali kukuyanda kubikkila maano kwaba Paolo alimwi yakali kugwasyigwa kuba ambabo.

Ndilakkomana nondiyeeya ziiyo zya Bbaibbele zinji nzyotwakali kusololela. Ciiyo cimwi cakali kucitwa kuli ba Adriana, balo ibakaambila mikwasyi yobilo kujatikizya nzyobakali kwiiya. Bakabikka bubambe bwakuswaangana amusololi wacikombelo kutegwa babandike njiisyo zyacikombelo mbuli Butatu alimwi akutafwa kwabuumi. Basololi bazikombelo botatwe ibalemekwa kapati bakasika kumuswaangano ooyu. Bupanduluzi bwabo tiibwakali kumvwika alimwi tiibwakali kutobeleka, eeci bakacibona basikwiiya Bbaibbele besu ciindi nobakeezyanisya bupanduluzi oobo abupanduluzi butakatazyi bwamu Bbaibbele. Masimpe, muswaangano ooyo wakacinca zyintu. Mukuya kwaciindi, bantu basika ku 15 kuzwa mumikwasyi eeyo bakaba Bakamboni.

Masimpe kuti, mazuba aano nzila nzyotubelesya kukambauka ziliindene. Kuciindi eeco, ba Paolo bakaba “basyaazibwene” mukubandika abasololi bazikombelo—alimwi bakali kuba amibandi iili boobo ziindi zinji. Ndilayeeya mubandi umwi iwakacitwa akati kabantu batakali Bakamboni. Cakalibonya kuti kakucili ciindi basikukazya bakaambila baswiilizi bamwi kuti kababuzya mibuzyo yakali kubonwa kuti ilakatazya kapati. Nokuba boobo, zyintu tiizyakeenda mbobakali kuyeeya. Umwi wakabuzya naa cakali kweelela kuti cikombelo kacitola lubazu mutwaambo twacisi mbuli mbocakali kucita lyoonse. Aciindi eeci, cakalibonya kuti basololi bacikombelo aaba akabayumina makani. Cakutayeeyela malaiti akazima, mpoonya muswaangano wakamana. Mumyaka iyakatobela twakazikuzyiba kuti  kuli bantu ibakaambilwa abasololi bazikombelo kuzima malaiti ikuti mubandi tiiweenda mbuli mbobakali kuyanda basololi.

ZYOOLWE ZIMBI ZYAMULIMO

Nokwakainda myaka iili 10 kuzwa ciindi notwakakwatana aba Paolo, twakatambwa kuyakubelekela mubbazu. Ba Paolo bakali kubeleka mulimo waatala, aboobo tiicakali cuubauba kusala cakucita. Pele notwakaapailila makani aaya, twakalisungula kubweza coolwe eeci camulimo. Twakali kukkomana kuba amikwasyi iyakali kulisungula kuti tusikile mumaanda aabo. Kumangolezya, kanji-kanji twakali kwiiya mbuli kakamu, mpoonya ba Paolo bakali kugwasya bana homuweki yakucikolo kwaambisya namba. Kuyungizya waawo, ba Paolo bakali kuyandisya kubala alimwi bakali kukkomana kwaambila bamwi zyintu zikkomanisya alimwi ziyaka nzyobakabala. Mu Muhulo, kanji-kanji twakali kuunka kuyakukambaukila mumadolopo kwalo kwakanyina Bakamboni, kutamba bantu kuti baboole kuswiilila makani aakali kupegwa kumangolezya buzuba oobo.

Nokwakainda buyo myaka yobilo katuli mumulimo wamubbazu, twakatambwa kuyakubelekela ku Bbeteli mu Rome. Ba Paolo bakali kubelekela mudipatimenti iilanganya milawo, mebo ndakali kubelekela mu Dipatimenti Iilanganya Mamagazini. Kucinca ooku tiikwakali kuubauba, pele twakalikanzide kumvwida. Cakali kukkomanisya kubona mutabi mbowakali kukomena asyoonto-asyoonto alimwi akuyungizyika kwamweelwe wabakwesu abacizyi mu Italy. Ciindi eeco, Bakamboni ba Jehova mu Italy bakalembya kuti milimo yabo izumizyigwe amulawo. Twakalikkomene kapati mumulimo ooyu.

Katubelekela ku Bbeteli, nzyotusyoma mu Bbaibbele kujatikizya bulowa zyakazyibwa mu Italy. Kumatalikilo aamyaka yakuma 1980, kwakali kaambo kujatikizya makani aabulowa kalo ikakali kunyonganya. Banabukwetene Bakamboni bamwi bakabejekezyegwa kuti mbebakapa kuti mwanaabo musimbi afwe, nokuba kuti wakafwa akaambo kapenzi limwi lipati ndyobazyalwa andilyo banji mubusena bwa Mediterranean. Bakwesu abacizyi bamukwasyi wa Bbeteli bakagwasyilizya bamaloya ibakali kwiiminina bazyali Banakristo. Kapepa ikakajisi makani alimwi a Sinsimuka! yaalubazu yakagwasya bantu kuti bajane twaambo twamasimpe akumvwisya Jwi lya Leza ncolyaamba kujatikizya bulowa. Mumyezi eeyo, ba Paolo kanji-kanji bakali kubeleka mawoola aali 16 abuzuba. Ndakali kucita zyoonse nzyondakali kukonzya kutegwa ndibagwasyilizye mumilimo yabo iiyandika kapati.

AKUMBI KUCINCA MUBUUMI

Notwakali amyaka iili 20 mucikwati, kwakacitika cintu ncotwatakali kuyeeyela icakapa kuti zyintu zicince. Ndakajisi myaka yakuzyalwa iili 41 mpoonya ba Paolo bakajisi myaka iili 49 ciindi nondakabaambila kuti ndiyeeyela kuti ndilaada. Mubbuku lyabo mobakali kulemba nzyobakali kucita abuzuba, ndakajana majwi aakuti: “Mupailo: Kuti kacili camasimpe, kotugwasya  kuzumanana kuba mumulimo waciindi coonse, tutalengaani kumuuya, alimwi kotugwasya kuba bazyali babotu kwiinda mucikozyanyo ncotupa. Kwiinda zyoonse, kondigwasya kubelesya nokuceya zyintu zyoonse nzyondakali kuyiisya acibumbili mumyaka iili 30 yainda.” Kweelana acakacitika, Jehova weelede kuti wakawiingula mupailo wabo alimwi amupailo wangu.

Ikuzyalwa kwa Ilaria kwakaleta kucinca kupati mubuumi bwesu. Kwaamba masimpe, zimwi ziindi twakali kutyompwa mbubwenya mbokulembedwe mulugwalo lwa Tusimpi 24:10 kuti: “Na wawizuka mubuzuba bwamapenzi, inguzu zyako zyaceya.” Pele twakali kugwasyanya, akuyeeya mbociyandika kukulwaizyanya.

Ilaria ulakkomana kuti wakazyalwa kubazyali Bakamboni ibakajisi bubi mumulimo waciindi coonse. Taakwe naakalimvwa kale kuti walekelezyegwa; wakakomenena mumukwasyi waluyando kuzwa kubazyali. Masyikati ndime ndakali kumulanganya. Kumazuba ba Paolo nobakali kusika kuŋanda, kanji-kanji bakacijisi mulimo wakucita; pele bakali kujana ciindi cakuba anguwe, akumugwasya zyakucikolo. Bakali kucita oobo nokuba kuti eeci cakali kubapa kubeleka kusika 02:00 hrs naa 03:00 hrs kutegwa bamanizye mulimo wabo. Kanji-kanji Ilaria wakali kwaamba kuti: “Bataata ngomweenzuma wiinda boonse.”

Mbuli mbomuzyi, kutegwa tumugwasye Ilaria kukomena kabotu, kwakali kuyandika kumugwasya lyoonse alimwi akutazungaana mukupa lulayo kutegwa tumugwasye kupona buumi bwa Bunakristo. Ndilayeeya ciindi cimwi naakali kusobana amweenzinyina, tanaakalilemeka kabotu. Twakamupandulwida kuzwa mu Bbaibbele ikaambo ncaatakeelede kulilemeka munzila eeyo. Alimwi twakamwaambila kuti alilekelele kumweenzinyina andiswe katumvwide.

Ilaria waamba kuti ulalumba luyando ndotwakatondezya tobazyali bakwe kumulimo wamumuunda. Lino akaambo kakuti ulikwetwe, ulamvwisya kapati ncociyandika kumvwida Jehova akutobela lulayo lwakwe.

KUMVWIDA NOMUBA MUCIINDI CAKUUSA

Mu 2008, ba Paolo bakaambilwa kuti bakajisi bulwazi bwakkansa. Kumatalikilo cakali kulibonya mbuli kuti balapona kubulwazi oobu aboobo bakali kundikulwaizya kapati. Kuyungizya aakuyandaula busilisi bugwasya kapati, mebo a Ilaria twakali kupaila kuli Jehova, kumulomba kuti atugwasye kuliyumya. Nokuba boobo, mwaalumi ooyu iwakali muyumu kapati mukuya kwaciindi nguzu zyakwe zyakamana. Lufwu lwakwe mumwaka wa 2010 lwakali kuusisya kapati. Nokuba boobo, ndilaumbulizyigwa kapati muzyintu nzyotwakacita antoomwe mumyaka iili 45. Twakacita nzyotwakali kukonzya mumulimo wa Jehova. Ndilizyi kuti mulimo wesu ulazumanana kuba ampindu. Ndilangila kumbele ciindi ba Paolo nobayakubusyigwa kweelana amajwi aa Jesu mulugwalo lwa Johane 5:28, 29.

Nokuba kuti ndakomena, ndicilimvwa mbuli kasimbi ikakali kuciyanda kapati cibalo ca Nowa. Makanze aangu taanacinca. Ndiyanda kumvwida Jehova kufwumbwa naa ncinzi ciyandika kucita. Ndilisinizyide kuti kufwumbwa mapenzi, kuliimya naa kusweekelwa kuli koonse ikwakacitika takukonzyi kweelana azilongezyo zitaliboteli Leza wesu nzyayakutupa.

[Cifwanikiso icili apeeji 4]

Buzuba mbotwakakwatana

[Cifwanikiso icili apeeji 4]

Twakali kukkomana kuba antoomwe abakubusi, calo icakali kupa kuti ba Paolo kabauma bbola

[Cifwanikiso icili apeeji 5]

Ba Paolo bakali kuuyanda mulimo wabo waa Bbeteli

[Cifwanikiso icili apeeji 5]

Kanji-kanji Ilaria wakali kwaamba kuti: “Bataata ngomweenzuma wiinda boonse”

[Majwi aakwelelezya sikubala aali apeeji 6]

“Nokuba kuti ndakomena, ndicilimvwa mbuli kasimbi ikakali kuciyanda kapati cibalo ca Nowa. Makanze aangu taanacinca”