ITO an usa han akon nahinunumdoman kan Tatay han bata pa ako. Mapainubsanon ngan maduruto hiya, ngan importante gud ha iya an hustisya, salit naruyagan dayon niya an mensahe han Biblia han iya ito nabatian han 1953. Tikang hito nga panahon, ginhimo niya an ngatanan basi itutdo ha amon nga iya mga anak an iya nahibabaroan. Ha siyahan, hi Nanay nadiri pagbaya ha iya mga tradisyon sugad nga Katoliko. Pero inabot an panahon nga ginkarawat liwat niya an mga katutdoan han Biblia.

An amon mga kag-anak nakurian pagtutdo ha amon. Hi Nanay haros diri maaram magbasa, ngan hi Tatay damu ka oras nga nagtatrabaho ha uma kada adlaw. Usahay kapoy na gud hi Tatay salit nahingangaturog hiya durante han pag-aram. Pero maopay an resulta han iya mga pangalimbasog. Ako an suhag, salit nabulig ako pagtutdo ha akon tulo nga bugto—usa nga babaye ngan duha nga lalaki. Upod ha amon ginhihisgotan an agsob ig-istorya ni Tatay, an mahitungod han gugma ni Noe ha iya pamilya ngan han iya pagin masinugtanon ha Dios. Paborito ko gud ito nga istorya ha Biblia! Waray pag-iha, kami ngatanan natambong na ha mga katirok ha Kingdom Hall ha Roseto degli Abruzzi, usa nga syudad ha baybayon han Dagat Adriatiko ha Italy.

Han 1955, han 11 anyos ako, nagbiyahe kami ni Nanay ha kabukiran tipaweste ngadto ha Roma basi tumambong ha amon siyahan nga kombensyon. Tikang hadto, an mga kombensyon nagin makaruruyag gud nga okasyon ha akon kinabuhi sugad nga Kristiano.

Han 1956, nabawtismohan ako ngan waray pag-iha nagpayunir. Han 17 anyos ako, nagin espesyal payunir ako ha Latina, ha sur han Roma nga mga 300 ka kilometro tikang ha amon. Bag-o la ito nga syudad, ngan an mga tawo diri sobra nga nababaraka han bangin hunahunaon han iba kon ira karawaton an mensahe han Biblia. Salit kami han akon partner nalipay gud nga makapahamutang hin damu nga literatura ha Biblia. Pero tungod kay batan-on pa ako, namimingaw gud ako ha amon! Bisan pa hito, karuyag ko sugton hi Jehova.

Ha urhi, ginpakadto ako ha Milan basi bumulig pagpangandam para ha 1963 nga “Everlasting Good News” Internasyonal nga Asembleya. Hito nga kombensyon, damu kami nga nagboluntaryo, upod na hi Paolo Piccioli, usa nga batan-on nga brother  tikang ha Florence. Ha ikaduha nga adlaw han kombensyon, naghatag hiya hin makapaaghat nga pahayag mahitungod ha pagin solo. Nahinunumdoman ko pa nga naghunahuna ako, ‘Sigurado nga ito nga brother diri gud mag-aasawa.’ Pero katapos han kombensyon nagsuratay kami, ngan hinbaroan namon nga damu an amon kaparihoan—an amon mga tumong, gugma kan Jehova, ngan an amon daku nga hingyap nga sugton hiya. Nagpakasal kami ni Paolo han 1965.

Napulo ka tuig ako nga regular payunir ha Florence. Makalilipay gud makita an pag-uswag han mga kongregasyon, labi na an pag-uswag ha espirituwal han mga batan-on. Nalipay kami ni Paolo paggahin hin panahon kaupod nira ha pag-iristorya mahitungod ha espirituwal nga mga butang sugad man ha pagpahalibway, nga para kan Paolo agsob nga upod hito an pakig-uyag ha ira hin soccer. Syempre, karuyag ko makaupod an akon bana, pero nasabtan ko nga an mga batan-on ngan mga pamilya ha kongregasyon nagkinahanglan han iya panahon ngan atensyon ngan nagpahimulos hira hito.

Nalilipay gud ako kon nahinunumdoman ko an damu nga gindumarahan namon hin pag-aram ha Biblia hadto. Usa ha ira hi Adriana, nga nag-istorya ha duha nga pamilya mahitungod han iya nahibabaroan. Nagsarabot hira nga makigkita hin padi basi pag-istoryahan an mga doktrina han singbahan sugad han Trinidad ngan imortal nga kalag. Tulo nga lider han singbahan an nakigkita ha ira. Masamok ngan diri nagkakauruyon an ira mga pagsaysay, ngan nakita dayon han amon mga estudyante han Biblia nga an ira igintututdo diri uyon ha Biblia. Oo, tungod hito nga miting nahitabo an daku nga pagbag-o. Sugad nga resulta, mga 15 nga membro hiton duha nga pamilya an nagin mga Saksi.

Syempre, iba na an aton paagi han pagsangyaw yana. Hadto, hi Paolo nagin “eksperto” ha pakig-atubang ha mga padi—ngan damu ka beses nga nahitabo ito. Usa ka beses, damu nga diri Saksi an namati ha ira diskusyon. Hinbaroan ha urhi nga abanse nga ginsidngan han mga padi an pipira nga mamarati nga magpakiana kan Paolo basi pakaalohan hiya. Pero iba an nahitabo. May nagpakiana kon husto ba nga maghilabot an singbahan ha politika, sugad han maiha na nga ginbibinuhat hito. Waray hito makabaton an mga padi. Tigda la nga naparong an mga suga, salit gintapos na la an miting. Paglabay han mga tuig, hinbaroan namon nga ginplano han mga padi nga may magparong han suga kon an diskusyon diri na pabor ha ira.

Paglabay hin napulo ka tuig tikang nga ginkasal kami ni Paolo, gin-imbitar hiya nga magin paramangno han sirkito. May maopay nga trabaho hi Paolo, salit diri masayon an pagdesisyon. Pero katapos namon  mag-ampo ngan maghunahuna hin maopay, nagdesisyon kami nga karawaton iton bag-o nga toka. Nalipay gud kami pakig-upod ha mga pamilya nga amon gin-ukyan. Ha gab-i, agsob nga nag-aaram kami sugad nga grupo, katapos ginbubuligan ni Paolo an kabataan ha ira homework, labi na ha matematika. Mahilig liwat hi Paolo magbinasa ngan nalilipay hiya pag-istorya han makaruruyag ngan makaparig-on nga mga impormasyon nga iya nabasa. Kon Lunes, agsob nga nagsasangyaw kami ha mga bungto nga waray Saksi, ngan gin-iimbitar namon an mga tawo nga mamati ha pahayag hito nga gab-i.

Katapos hin duha la ka tuig nga pagmangno ha sirkito, gin-imbitar kami pagboluntaryo ha Bethel ha Roma. Igintoka hi Paolo ha Legal Department ngan ako ha Magazine Department. Ito nga pagbag-o diri masayon para ha amon, pero determinado kami sumugot. Makalilipay makita an padayon nga pag-uswag han sanga nga opisina ngan an daku gud nga pag-uswag ha kadamu han kabugtoan ha Italy. Hito nga panahon, legal nga ginkilala an mga Saksi ni Jehova ha Italy. Nalipay gud kami hito nga klase han pag-alagad.

Samtang nakadto kami ha Bethel, nagin isyu ha Italy an aton basado ha Biblia nga gintotoohan mahitungod ha dugo. Temprano han dekada han 1980, nagkaada kaso mahitungod hini nga nahibantog gud. May mag-asawa nga Saksi nga gin-akusaran nga hira an hinungdan han kamatay han ira anak nga babaye, bisan kon namatay hiya tungod han usa nga grabe nga sakit ha dugo nga kalyap ha Italy ngan ha iba nga kahigrani nga nasud. Ginbuligan han kabugtoan ha Bethel an mga abogado nga nagrepresentar han akusado nga mga kag-anak. May pampleta ngan espesyal nga edisyon han Awake! nga iginhatag ha mga tawo basi buligan hira nga masabtan an kamatuoran ngan an ginsisiring han Pulong han Dios mahitungod han dugo. Durante hito nga mga bulan, hi Paolo agsob nga nagtatrabaho hin durodiretso tubtob 16 ka oras kada adlaw. Ginbuhat ko an akon mahihimo basi suportahan hiya ha iya importante nga buruhaton.

Bainte ka tuig na kami nga mag-asawa han may nahitabo nga diri namon ginlalaoman. Hito nga tuig, 41 anyos ako ngan hi Paolo 49 han ginsumatan ko hiya nga ha paghunahuna ko burod ako. Ha iya dayari, ini an akon nabasa ha iya iginsurat hito nga adlaw: “Pag-ampo: Kon totoo ito, buligi kami nga makapadayon ha bug-os-panahon nga pag-alagad, diri magluya ha espirituwal, ngan buligi kami nga magin maopay nga mga kag-anak. Labaw ha ngatanan, buligi ako nga maiaplikar bisan 1 ka porsyento la han ngatanan nga akon ginyinakan ha entablado ha naglabay nga 30 ka tuig.” Kon nahuhunahuna ko ito yana, masisiring ko nga ginbaton gud ni Jehova an pag-ampo ni Paolo pati an akon pag-ampo.

Han natawo hi Ilaria, daku gud an nabag-o ha amon kinabuhi. Ha tinuod la, usahay nanluluya kami, sugad  han ginsisiring ha Proberbios 24:10: “Kon ikaw mahiraptay ha adlaw ha kakurian. An imo kusog gutiay.” Pero nagbuligay kami ngan ginhunahuna namon an kapulsanan han pagparig-onay.

Yana, hi Ilaria agsob magsiring nga malipayon hiya nga Saksi an iya mga kag-anak ngan aktibo ha bug-os-panahon nga pag-alagad. Waray gud hiya umabat nga ginpabay-an hiya; nagdaku hiya ha normal nga pamilya. Ha bug-os nga adlaw gin-aataman ko hiya. Ha gab-i pag-uli ni Paolo, agsob nga may trabaho pa hiya nga kinahanglan tapuson; pero may panahon hiya kan Ilaria, nakikig-uyag ha iya ngan ginbubuligan hiya ha iya homework. Ginbuhat ito ni Paolo bisan kon kinahanglan maabtan hiya hin alas-2 o alas-3 ha maagahon basi tapuson an iya trabaho. Hi Ilaria agsob magsiring, “Hi Papa an akon best friend.”

Syempre, basi mabuligan hi Ilaria nga buhaton an husto, kinahanglan disiplinahon namon hiya, nga may pagkaistrikto usahay. Usa ka beses, han nakikig-uyag hiya ha usa nga sangkay may ginbuhat hiya nga diri maopay. Iginsaysay namon ha iya gamit an Biblia kon kay ano nga diri niya ito angay buhaton. Amon liwat hiya ginpaaro hin pasaylo ha iya sangkay samtang namamati kami.

Nasiring hi Ilaria nga an gugma han iya mga kag-anak ha ministeryo nakabulig ha iya nga higugmaon liwat an ministeryo. Yana nga inasaw-an na hiya, mas nasasabtan niya nga importante gud an pagsugot kan Jehova ngan pagsunod ha iya giya.

Han 2008, nahibaro hi Paolo nga may kanser hiya. Ha siyahan, baga hin mag-oopay pa hiya ha iya sakit, ngan ginparig-on gud ako niya. Nangalimbasog kami pamiling hin pinakamaopay nga mga doktor nga magtatambal kan Paolo. Ha hilaba nga mga pag-ampo namon ni Ilaria, naghangyo kami kan Jehova nga buligan kami nga magin marig-on ngan makailob. Makuri gud an pagkinita ha usa nga tawo nga makusog ngan mahimsog hadto pero yana nagtitikaluya na. Nabido gud ako han namatay hiya han 2010. Pero naliliaw gud ako ha paghinumdom han amon nahimo ha 45 ka tuig nga pagkaupod namon. Ginbuhat namon an amon gimaopayi para kan Jehova, ngan maaram ako nga diri gud niya ito hingangalimtan. Ginpapamulat ko an panahon nga banhawon na hi Paolo, uyon ha ginsiring ni Jesus ha Juan 5:28, 29.

Ha akon pag-abat, ako pa gihapon an gutiay nga bata nga paborito gud an istorya mahitungod kan Noe. Waray mabag-o an akon determinasyon. Karuyag ko sugton hi Jehova, anoman an iya hangyoon. Sigurado ako nga an bisan ano nga problema, sakripisyo, o kawad-i gutiay gud la kon itanding ha makalilipay nga mga bendisyon nga iginhahatag han aton mahigugmaon nga Dios. Personal nga naeksperyensyahan ko ito—ngan ginsisiguro ko ha imo nga waray ka gud pagbabasolan.