NGA nga tobi de cani rietenalaʼdxeʼ de bixhozeʼ, ti hombre nachaʼhuiʼ ne nabé runi dxiiñaʼ. Laabe nabé riuuláʼdxibe gúnibe ni jneza, ngue runi cásipeʼ binadiágabe ni rusiidiʼ Biblia, lu iza 1953, guyuuláʼdxibe ni. Dede dxi que bíʼnibe stipa pur gusiidibe ca xiiñibe ni caziidibe. Nabé guca nagana para jñaaʼ gusaana ca costumbre ni napa casi católica, peru chaahuiʼ chaahuiʼ biaaziʼ cani rusiidiʼ Biblia ndaaniʼ ladxidoʼbe.

Ne laaca guca nagana para bixhozeʼ ne jñaaʼ gusiidicaʼ laadu ni cá lu Biblia, purtiʼ qué gánnapeʼ jñaaʼ guʼndaʼ ne bixhozeʼ guidubi dxi maʼ cayuni dxiiñaʼ lu layú. Nuu tiru rásibe ora maʼ cayúʼndadu Biblia purtiʼ nabé maʼ bidxágabe. Peru bireendú ca stipa bíʼnibe. Cumu naa nga baʼduʼ lugola stícabe la? racaniáʼ laacabe ora rusiideʼ ti bendaʼ ne guiropaʼ bizanaʼ. Lade cani rinidu que nabé ruzéʼtedu ni rusietenalaʼdxiʼ bixhózedu laadu: nabé gunnaxhii Noé binnilidxi ne bisihuínnibe ni ora bizuubabe stiidxaʼ Dios. ¡Nabé riuuladxeʼ historia stiʼ Noé! Qué nindaa maʼ guiradu riuudu ra Yoo stiʼ Reinu ni nuu Roseto degli Abruzzi (Italia), ti guidxi ni nuu guriá nisadóʼ Adriático.

Naa ne jñaaʼ guyuudu primé guendaridagulisaa lu iza 1955, dxi napaʼ 11 iza. Guzadu lu ca dani ni nuu neza ra riaaziʼ gubidxa dede yendadu Roma, ra guca guendaridagulisaa que. Dede dxiqué ruuyaʼ cani casi tobi de ca cosa jma sicarú ni runi ca xpinni Cristu.

Guyuaanisaʼ sti iza que, ne qué nindaa gucaʼ precursora regular. Gucaʼ precursora especial dxi napaʼ 17 iza guidxi Latina, riaana ni ladu gueteʼ de Roma ne nuu ni biaʼ 300 kilómetru de ralidxeʼ. Nacubi guidxi que, ngue runi guirutiʼ qué riuu xizaa pur xi guiníʼ ique binni. Naa ne xcompañeraʼ nabé riuuláʼdxidu gusaanadu stale libru ne revista ra nuu ca binni que, peru nabé ribanaʼ ralidxeʼ purtiʼ nahuiineruaʼ. Neca zaqué, racalaʼdxeʼ guzuubaʼ diidxaʼ, purtiʼ zaqué nga bisiidicabe naa.

Despué biseendacabe naa Milán para gacaniáʼ ra chigaca ti guendaridagulisaa stiʼ stale guidxi, ni láʼ: «Buenas Nuevas Eternas», ni guca lu iza 1963. Raqué bineʼ dxiiñaʼ né stale  xpinni Cristu. Ládecabe nuu Paolo Piccioli, ti xpinni Cristu de Florencia. Lu guiropa gubidxa stiʼ guendaridagulisaa que bidiibe ti libana ni caníʼ de cani caʼruʼ guichaganáʼ ne nabé nayecheʼ modo bidiibe ni. Óraque guníʼ iqueʼ: «Qué ziuu dxi guichaganáʼ bizanaʼ riʼ». Peru bizulú bicáʼsaadu carta ra nuudu ne bidiʼdu cuenta tobi si ni racaláʼdxidu gúnidu, nadxiidu Jiobá ne rápadu gana guzúʼbadu stiidxabe. Bichaganadu lu iza 1965.

Chii iza gucaʼ precursora regular guidxi Florencia. Nabé sicarú bineʼ sentir ora biiyaʼ ziroobaʼ ca neza binni ridagulisaa que. Peru jma guyuʼdu nayecheʼ ora bidúʼyadu modo ziniisi cani nahuiiniʼ que lu stiidxaʼ Dios, purtiʼ ridagulisaanedu laacabe para guinidu de xiixa tema zeeda lu Biblia o para chuʼdu nayecheʼ ti ratu. Nabé riuulaʼdxiʼ Paolo quitené laacabe fútbol. Dxandíʼ, jma ñuuladxeʼ ñuuné xheelaʼ naa, peru laaca bidieeʼ cuenta caquiiñeʼ cani nahuiiniʼ ne ca familia stiʼ neza binni ridagulisaa que tiempu ne stipa stibe para gacanebe laacaʼ.

Nabé nayecheʼ runeʼ sentir ora rietenalaʼdxeʼ guiráʼ ca binni ni bíʼndanedu Biblia ca iza que. Tobi de ca gunaa ni bíʼndanedu que láʼ Adriana, laa guniʼné xhupa familia de ni caziidiʼ. Ti dxi biʼniʼ invitar ca familia riʼ ti xaíque yuʼduʼ para gusiene xii nga Trinidad ne pa dxandíʼ napa binni ti alma ni qué rati. Ra bidagulisaacabe que guyé chonna xaíque yuʼduʼ ni jma risaca, peru nagueendaca bidii ca familia que cuenta cadi biaʼsi ni caníʼ ca xaíque yuʼduʼ que, jmaruʼ si ora gúʼyacabe ni cusiidiʼ Biblia de laani, nisi carenda ca hombre que raqué. Ngue runi biaʼ quince de ca binnilidxi guiropaʼ familia que guca testigu stiʼ Jiobá pur ni binadiágacabe raqué.

Yanna nabé maʼ bichaa modo rucheechenu diidxaʼ. Peru dxiqué nabé guniʼné Paolo ca xaíque yuʼduʼ, ne «guizáʼ biziidiʼ» modo guiniʼné laacabe. Rietenalaʼdxeʼ ti biaje dxi bíʼnibe ni nezalú stale binni ni cadi naca Testigu. Qué nindaa bidii binni cuenta maca biyubi ca xaíque yuʼduʼ que binni ni guinabadiidxaʼ xiixa ni gusituilú Paolo. Peru málasi bidxaa ni caníʼcabe ora gunabadiidxaʼ tobi de ca binni que pa jneza nga chuʼ ca binni de yuʼduʼ lu política, casi huayúnicaʼ maʼ raca stale siglu. Maʼ qué nidxela ca xaíque yuʼduʼ que xi niniʼcaʼ. Málasi zeʼ biaaniʼ que ne bireecabe guirácabe de raqué. Gudiʼdiʼ si chupa chonna iza gúnnadu maca gudixhe ca xaíque yuʼduʼ que gusuíʼcabe biaaniʼ que pa qué guireeni modo gudíxhecabe.

Dxi maʼ zinedu chii iza de bichaganadu, gunabadiidxacabe laadu pa ñuuláʼdxidu nigánnadu  ca neza binni ridagulisaa. Nagana huiiniʼ gúcani para laadu, purtiʼ galán dxiiñaʼ napa Paolo. Peru despué de biʼniʼ orardu ne guníʼ íquedu ni, gucuaadu invitación que. Nabé sicarú modo rininedu ca familia ra riaanadu. Ca huaxhinni ca gatigá ridúʼndanedu laacabe ne despué racané Paolo ca xcuidi que para gaca tariá sticaʼ, jmaruʼ si pa de matemática ni. Nabé riuulaʼdxiʼ Paolo guʼndaʼ ne riéchebe ora gábibe ca binni que de ca tema sicarú ni bíʼndabe. Jma nga biquiiñedu ca lunes ca para chigucheechedu diidxaʼ ca guidxi huiiniʼ ra gastiʼ Testigu ne runi invitardu binni para chigucaadiágacaʼ ti libana ni chigudiibe gueelaʼ que.

Despué de bisaʼdu chupa iza de canagánnadu ca neza binni ridagulisaa, biʼniʼ invitárcabe laadu chigúnidu dxiiñaʼ Betel ni nuu Roma. Biʼniʼ Paolo dxiiñaʼ ra Departamento de Asuntos Legales, ne naa bineʼ dxiiñaʼ ra reedandá Suscripción. Nagana guca para laadu guiaʼdu raqué, peru gudixhe íquedu guzúʼbadu diidxaʼ. Nabé sicarú biʼniʼ sentirdu ora bíʼyadu modo biroobaʼ Betel que ne modo bidale testigu stiʼ Jiobá guidxi Italia. Iza que binibiáʼ gobiernu ca Testigu casi religión ndaaniʼ guidxi que. Nabé nayecheʼ biʼniʼ sentirdu bínidu dxiiñaʼ Betel.

Ra bizulú ca iza stiʼ 1980, guca ti cosa ni gunna stale binni de Italia. Yenécabe ti guendaxheelaʼ de Testigu nezalú juez stiʼ guidxi que, purtiʼ nácabe nápacaʼ donda pur guti dxaapahuiiniʼ sticaʼ ora qué nudiicaʼ lugar nicabe rini. Peru cadi dxandíʼ ni caníʼ ca binni que, purtiʼ dxaapahuiiniʼ riʼ guti de ti guendahuará malu ni rapa stale binni lu rini guidxi Italia ne xcaadxi guidxi nuu gaxha de laani. Stale de ca betelita gucanecaʼ ca abogadu que para guniʼcaʼ pur guendaxheelaʼ que. Gúcapeʼ ti guiʼchiʼ ne ti revista ¡Despertad! ni bisiene binni xipeʼ nga guca ne xi riníʼ Biblia de rini. Ca beeu que runi Paolo dxiiñaʼ dieciséis hora ti dxi sin cuezadxí, ne naa runeʼ biaʼ ganda para gacaniáʼ laabe ti gúnibe dxiiñaʼ nabé risaca stibe.

Dxi maʼ zinedu gande iza de bichaganadu bizaaca ti cosa ni cadi cabézadu. Napa Paolo 49 iza ne naa napaʼ 41 dxi gudxeʼ laabe ruluíʼ nacaxiiñeʼ. Dxi que bicaabe lu diariu stibe: «Sicaríʼ bineʼ orar: Pa dxandíʼ ni, gucané laadu cadi gusaana de gácadu precursor, guzuhuaʼdu dxiichiʼ lu stiidxaluʼ ne gácadu ti ejemplu galán para xiiñidu. Peru jma canabaʼ lii gacaneluʼ naa guneʼ neca tobi de guiráʼ cani maʼ guniéʼ lu plataforma lu treinta iza ni maʼ gudiʼdiʼ ca». Pur guiráʼ ni bizaaca despué, rudieeʼ cuenta dxandíʼ bicabi Jiobá oración stibe ne laaca bicabi oración stinneʼ.

Nabé bichaa xquendanabánidu dxi gule Ilaria. Guyuu biaje nabé bireʼdu gana ne biʼniʼ sentirdu  maʼ qué zanda gúnidu jma, casi ruzeeteʼ Proverbios 24:10: «Pa qué gapuʼ gana ora nuuluʼ ra nagana la? gastiʼ qué zanda guʼnuʼ». Peru gucanésaadu, purtiʼ nánnadu nabé risaca nga gacanebe naa ne gacaniáʼ laabe.

Nabé nayecheʼ runi sentir Ilaria purtiʼ bisiniisi chupa xpinni Cristu ni nabé runi xhiiñaʼ Jiobá laa. Qué ñuu dxi ñuni sentirbe nuube stúbibe ne bisiniisidu laabe casi riniisi guiráʼ baʼduhuiiniʼ. Naa rapaʼ laabe ridxíʼ ne Paolo racané laabe gaca tariá stibe huaxhinni ne riguitené laabe ora maʼ nuu yoo, ne runi Paolo ni neca guni dxiiñaʼ dede las dos o las tres de la mañana para guiluxe. Qué rusaana Ilaria de guiníʼ: «Binni ni jma xhamiguaʼ nga bixhozeʼ».

Dxandíʼ, para gunda gucanedu laabe guiaanabe lu neza stiʼ Dios, guyuu biaje nadipaʼ modo gulúʼ jnézadu laabe. Rietenalaʼdxeʼ ti dxi bíʼnibe ti cosa ni cadi jneza ora caguitenebe ti xhamígabe. Óraque biquiiñedu Biblia para gunínedu laabe cadi naquiiñeʼ gúnibe zaqué, de raqué gúdxibe xhamígabe que gutiidilaʼdxiʼ donda stibe nezaludu.

Ilaria guníʼ nuu nayecheʼ ne rudii xquixe purtiʼ guca bixhoze ne jñaa precursor ne nabé guyuuláʼdxicaʼ gúnicaʼ jma lu xhiiñaʼ Jiobá. Yanna maʼ bichaganabe, ne jma riénebe pabiáʼ risaca guzuubaʼ binni stiidxaʼ Jiobá ne guni ni na Dios.

Lu iza 2008, gúdxicabe Paolo napa cáncer. Nacubi que ruluíʼ zanda guiándabe. Ne cumu zaqué riníʼ íquebe la? riguube gana naa. Biyúbidu tu guni tender laabe jma galán. Naa, Paolo ne Ilaria nabé xadxí biʼniʼ orardu Jiobá para gacané laadu gudxíʼludu intiica guendanagana gueeda luguiadu. Neca zaqué, nabé naná gúcani para laadu lu iza 2010, dxi gútibe. Biiyaʼ laabe dxi nápabe stipa ne dxi randa rúnibe dxiiñaʼ nagueenda, ne laaca biiyaʼ ximodo zirá ca stipa stibe. Peru ridxátipa ladxiduáʼ ora rietenalaʼdxeʼ guirá ni bínidu lu cuarenta y cinco iza guyuʼdu juntu. Bidiʼdu Jiobá ni jma galán de laadu, ne nannaʼ qué ziuu dxi gusaana de guisaca guiráʼ ni bínidu. Ne guizáʼ rapaʼ gana guuyaʼ Paolo ora guiasa ca gueʼtuʼ ca ne gaca ni na Juan 5:28, 29.

Dede ndaaniʼ ladxiduáʼ runeʼ sentir nacaruáʼ dxaapahuiiniʼ ni nabé riuulaʼdxiʼ historia stiʼ Noé. Ne raparuáʼ gana guzuubaʼ stiidxaʼ Jiobá neca guinábabe naa intiica cosa. Nannaʼ dxicheʼ jma risaca ca ndaayaʼ ni chigudii Dios ni nadxii laanu naa, que intiica stipa guneʼ para guzuubaʼ diidxaʼ, intiica guendanagana gapaʼ o intiica ni guniteʼ. Nannaʼ ni purtiʼ maʼ bibaneʼ ni, ne zanda gabeʼ laatu: guzuubaʼ binni stiidxaʼ Jiobá la? nga nga ni jma risaca.