Apresyaron an Pagkabukas-palad Asin Pagigin Rasonable ni Jehova
‘Marahayon si Jehova sa gabos, asin an saiyang mga pagkahirak [yaon] sa gabos niyang mga ginibo.’—SAL. 145:9.
1, 2. Igwa nin anong oportunidad an mga katuod ni Jehova?
“HAROS 35 taon na kaming kasal,” an sabi nin sarong Kristiyana na si Monika. “Midbid ming marhay an kada saro. Pero, sa ibong kan dakul na taon na iyan, may mga naaaraman pa kami sa kada saro na dati dai mi aram!” Daing duda na totoo man iyan sa dakul na mag-agom asin magkakatuod.
2 Nauugma kita na urog pang mamidbid an mga namumutan ta. Pero, sa gabos na katuod na puwede tang mamidbid nin urog pa, mayo nang mas mahalaga pa kisa ki Jehova. Nungka niyatong maaaraman an gabos manungod sa saiya. (Roma 11:33) Sa panahon na daing katapusan, magkakaigwa kita kan oportunidad asin kagayagayahan na mapararom an satong pag-apresyar sa mga kuwalidad ni Jehova.—Par. 3:11.
3. Ano an pag-uulayan ta sa artikulong ini?
3 An sinundan na artikulo nakatabang sa sato na mapararom an satong pag-apresyar sa pagigin madaling dulukon asin mayong ipinapaurog ni Jehova. Pag-ulayan ta ngunyan an duwa pa sa nakakaakit na mga kuwalidad ni Jehova—an saiyang pagkabukas-palad asin pagigin rasonable. Sa paggibo kaini, urog tang masasabutan na ‘marahayon si Jehova sa gabos, asin an saiyang mga pagkahirak [yaon] sa gabos niyang mga ginibo.’—Sal. 145:9.
SI JEHOVA BUKAS-PALAD
4. Ano an buot sabihon kan tunay na pagigin bukas-palad?
4 Ano an buot sabihon kan pagigin bukas-palad? An simbag manunumpungan ta sa sinabi ni Jesus sa Guibo 20:35: ‘Urog pang mapalad [“igwang urog na kaugmahan,” NW] an nagtatao kisa nag-aako.’ Sa simpleng pananaram na iyan, itinao ni Jesus an kahulugan kan tunay na pagigin bukas-palad. An tawong bukas-palad gikan sa buot na itinatao an saiyang panahon, kusog, asin materyal na mga bagay para sa kapakinabangan kan iba—asin ginigibo niya iyan nin may kaugmahan. Iyo, an pagigin bukas-palad dai nasusukol sa kun gurano kadakula kan regalo, kundi sa motibo kan nagtatao. (Basahon an 2 Corinto 9:7.) Mayo na nin mas bukas-palad pa kisa ki Jehova, an satuyang “maugmang Diyos.”—1 Tim. 1:11, NW.
5. Sa anong mga paagi ipinapahiling ni Jehova an pagkabukas-palad?
5 Paano ipinapahiling ni Jehova an pagkabukas-palad? Itinatao niya an mga pangangaipo kan gabos na tawo, kaiba na an mga dai pa nagsasamba sa saiya. Tunay nanggad na ‘marahayon si Jehova sa gabos.’ ‘Pinapasirang niya an saiyang aldaw sa mga maraot asin sa mga marahay, asin pinapauranan an mga matanos asin bakong matanos.’ (Mat. 5:45) Iyan an dahilan kun taano ta kan si apostol Pablo nakikipag-ulay sa mga dai nagtutubod, nakapagsabi siya na si Jehova ‘naggibo nin marahay, asin nagtao sa saindo nin mga uran na hali sa langit asin mga panahon na tigbungahan, na pinapano an saindong mga puso nin kakanon asin nin kaugmahan.’ (Gui. 14:17) Malinaw nanggad na si Jehova bukas-palad sa gabos na tawo.—Luc. 6:35.
6, 7. (a) Kiisay na mga pangangaipo an nangurugnang ikinakaugma ni Jehova na itao? (b) Magtao nin halimbawa kun paano itinatao ni Jehova an mga pangangaipo kan saiyang maimbod na mga parasamba.
6 Nangurugnang nauugma si Jehova na itao an mga pangangaipo kan saiyang maimbod na mga parasamba. Si Hading David nagsabi: “Aki pa ako kaidto, asin ngunyan gurang na; alagad dai ko pa nahiling na pinabayaan nin KAGURANGNAN an matanos na tawo o na an saiyang mga aki nakilimos nin tinapay.” (Sal. 37:25, BPV) * Dakul na maimbod na Kristiyano an nakaeksperyensiya kan siring na pag-ataman ni Jehova. Estudyari an sarong halimbawa.
7 Pirang taon na an nakaagi, si Nancy, na sarong bilog na panahon na ministro, napaatubang sa masakit na sitwasyon. “Kaipuhan ko nin $66 para sa arkila sa iniistaran ko, na dapat nang mabayadan kinaagahan,” an nagigirumduman ni Nancy. “Dai ko aram kun paano ako makakadisponer kaiyan. Ipinamibi ko an sakong problema, dangan naglaog ako sa trabaho ko bilang waitress. Dai ko linalauman na matatawan ako nin dakul na tip kan bangging idto ta sa parati bako man gayong matawo pag arog kaidtong aldaw kan semana. Nagngalas ako ta dakul na kostumer an nagkakan sa restawran kan bangging idto. Kan bilangon ko na an mga tip sako pakatapos kan trabaho ko, $66 iyan gabos.” Kumbinsido si Nancy na bukas-palad na itinao ni Jehova an eksaktong kaipuhan niya.—Mat. 6:33.
8. Ano an pinakabulaos na regalo ni Jehova?
8 An pinakabulaos na regalo ni Jehova itinao niya para sa gabos. Ano iyan? An atang na pantubos kan saiyang Aki. Si Jesus nagsabi: ‘An Diyos namuot na gayo sa kinaban, na itinao niya an saiyang Aking bugtong, tanganing an siisay man na minatubod sa saiya dai mapahamak, kundi magkaigwa nin buhay na dai nin katapusan.’ (Juan 3:16) Sa tekstong ini, an “kinaban” nanunungod sa katawuhan. Iyo, an pinakabulaos na regalo ni Jehova bukas sa gabos na nagdesisyon na akuon iyan. An mga nagtutubod ki Jesus maako nin abundang buhay—buhay na daing katapusan! (Juan 10:10) May maurog pa daw diyan na patunay na si Jehova bukas-palad?
ARUGON AN PAGKABUKAS-PALAD NI JEHOVA
Dinagka an mga Israelita na arugon an pagigin bukas-palad ni Jehova (Hilingon an parapo 9)
9. Paano ta maaarog an pagkabukas-palad ni Jehova?
9 Paano ta maaarog an pagkabukas-palad ni Jehova? Si Jehova ‘matinao sato kan gabos na bagay para sa satong kaugmahan’; kaya, maninigo man na mawuton ta na ‘magin matinao’ sa iba, sa siring nakakakontribwir sa saindang kaugmahan. (1 Tim. 6:17-19, BPV) Nauugma kitang gamiton an satong materyal na mga bagay tanganing magtao nin regalo sa satong mga namumutan asin matabangan an mga nangangaipo. (Basahon an Deuteronomio 15:7.) * Ano an makakatabang sa sato na mapagirumdom na magin bukas-palad? Ini an praktikal na ginigibo kan ibang mga Kristiyano: Pag tinawan sinda nin regalo, naghahanap sinda nin pagkakataon na magtao man nin regalo sa iba. Kadakul na tugang sa Kristiyanong kongregasyon an nagpapatalubo kan espiritu nin pagigin bukas-palad.
10. Ano an sarong marahayon na paagi na magin bukas-palad?
10 An saro sa pinakamarahay na mga paagi na magin bukas-palad iyo an pagtao paagi sa tataramon asin gibo. Paano ta magigibo iyan? Paagi sa paggamit kan satong panahon asin kusog tanganing tabangan asin parigunon an iba. (Gal. 6:10) Tanganing maaraman kun baga ginigibo ta iyan, puwede tang haputon an satong sadiri: ‘Ipinapahiling ko daw sa iba na andam akong tumabang asin magdangog sa mga ikinakahadit ninda? Kun may maghagad nin tabang o pabor, pinapaonrahan ko daw iyan kun posible? Kasuarin ako huring nagtao nin sinserong komendasyon sa sarong kapamilya o kapagtubod?’ Kun uugalion niyato na “magtao,” makakasiyerto kita na magigin mas harani kita ki Jehova asin sa satong mga katuod.—Luc. 6:38; Tal. 19:17.
11. Ano an pirang paagi na puwede kitang magin bukas-palad ki Jehova?
11 Puwede man kitang magin bukas-palad ki Jehova. “Tawan mo nin onra si Jehova paagi sa saimong mahahalagang bagay,” an sadol kan Kasuratan. (Tal. 3:9, NW) Kaiba sa “mahahalagang bagay” an satong panahon, kusog, asin materyal na mga bagay, na puwede tang gamiton nin lubos sa paglilingkod sa saiya. Dawa an saradit na aki puwedeng makanuod na magin bukas-palad ki Jehova. “Kun nagtatao nin donasyon sa Kingdom Hall an samong pamilya, an mga aki mi an pigpapahulog mi kan kuwarta sa donation box,” an sabi kan ama na si Jason. “Ugmahon sinda kaiyan huling, arog kan sabi ninda, sinda ‘nagtatao ki Jehova.’” An mga aki na nakakamati kan kaugmahan sa pagtao ki Jehova mantang mga aki pa posibleng marhay na padagos na magigin bukas-palad sa saiya pagdakula ninda.—Tal. 22:6.
SI JEHOVA RASONABLE
12. Ano an buot sabihon kan pagigin rasonable?
12 An saro pa sa nakakaakit na mga kuwalidad ni Jehova iyo an pagigin rasonable. Ano an buot sabihon kan pagigin rasonable? An termino sa orihinal na lengguwahe na parating tinatradusir na “rasonable” sa New World Translation literal na nangangahulugan na “mapagpahunod.” (Tito 3:1, 2, NW) An tawong rasonable dai pirming iniinsistir kun ano an letra por letrang sinasabi kan ley, asin siya bakong sobra kaistrikto, o karingis. Imbes, nagmamaigot siya na magin mabuot sa saiyang tratamiyento sa iba, na kinokonsiderar an saindang kamugtakan. Andam siyang magdangog sa iba asin, kun angay, magpahunod sa gusto ninda asin gumibo nin pagliliwat sa saiyang mga kahagadan.
13, 14. (a) Paano ipinapahiling ni Jehova an pagigin rasonable? (b) Sa paagi nin pagtratar nin Diyos ki Lot, ano an manunudan ta manungod sa pagigin rasonable?
13 Paano ipinapahiling ni Jehova an pagigin rasonable? Mabuot niyang kinokonsiderar an namamatian kan saiyang mga lingkod, asin sa parati pinapaonrahan niya an mga kahagadan ninda. Halimbawa, isip-isipon kun paano trinatar ni Jehova an matanos na si Lot. Kan magdesisyon si Jehova na laglagon an siyudad nin Sodoma asin Gomora, tinawan niya si Lot nin malinaw na instruksiyon na dumulag pasiring sa kabukidan. Pero, huli sa sarong dahilan, nakiulay si Lot na tugutan siyang dumulag sa ibang lugar. Isip-isipa na sana—hinagad talaga ni Lot ki Jehova na baguhon an instruksiyon Niya!—Basahon an Genesis 19:17-20.
14 Tibaad husgaran tulos nin saro na maluya an pagtubod ni Lot o na siya masinuway. Tutal, siguradong kaya ni Jehova na ingatan siyang buhay sain man na lugar, kaya mayo talaga siya nin dahilan na matakot. Minsan siring, takot pa man giraray si Lot—iyan talaga an namatian niya, asin kinonsiderar iyan ni Jehova. Tinugutan Niya si Lot na dumulag pasiring sa siyudad na lalaglagon Niya man kuta. (Basahon an Genesis 19:21, 22.) Malinaw nanggad na si Jehova bakong istrikto o maringis. Siya nagpapahunod asin rasonable.
15, 16. Paano ipinahiling sa Ley ni Moises an pagigin rasonable ni Jehova? (Hilingon an ritrato sa kapinunan kan artikulo.)
15 Isip-isipa an saro pang halimbawa nin pagigin rasonable ni Jehova na ipinapahiling sa Ley ni Moises. Kun an sarong Israelita pobrehon kaya dai makapagdulot nin kordero o kanding bilang atang, puwede siyang magdulot nin duwang agbaan o salampati. Pero, paano kun an sarong Israelita grabe kapobre asin dai kayang magdulot nin dawa duwang salampati? Kun arog kaiyan, itinutugot ni Jehova na an pobreng Israelita magdulot nin dikit na harina. Pero, mangnuhon an importanteng detalyeng ini: Iyan dapat na bako sanang maski anong klaseng harina, kundi ‘pinong harina,’ idtong ginagamit para sa importanteng mga bisita. (Gen. 18:6) Taano ta mahalaga iyan?—Basahon an Levitico 5:7, 11. *
16 Imahinara na ika sarong Israelita na pobrehon. Mantang parani ka sa tabernakulo dara an dikit na harina tanganing idulot bilang atang, nahiling mo an mayayaman na Israelita na may darang mga hayop. Tibaad masupog ka huli sa saimong atang na harina na garo baga mayong halaga. Dangan nagirumduman mo na sa paghiling ni Jehova, an saimong dulot mahalaga. Taano? An sarong dahilan iyo na an hinahagad ni Jehova de-kalidad na harina. Garo man sana sinasabi ni Jehova Sal. 103:14.
sa mas pobreng mga Israelita: ‘Aram ko na dai nindo kayang magdulot nin arog sa kaya nin iba, pero aram ko man na an itinatao nindo sakuya iyo an saindong pinakamakakaya.’ Tunay nanggad na ipinapahiling ni Jehova an saiyang pagigin rasonable paagi sa pagkonsiderar sa mga limitasyon asin kamugtakan kan saiyang mga lingkod.—17. Anong klaseng paglilingkod an inaako ni Jehova?
17 Mararanga kita sa pakaaram na huling rasonable si Jehova, inaako niya an satuyang bilog na kalag na paglilingkod. (Col. 3:23) Si Constance, sarong may edad nang sister na Italiano, nagsabi: “An pinakagusto kong gibuhon pirmi iyo an ipakipag-ulay sa iba an manungod sa sakuyang Kaglalang. Iyan an dahilan kun kaya padagos akong naghuhulit asin nagkokondukta nin mga pag-adal sa Bibliya. Kun minsan, namumundo ako ta dai ako makagibo nin urog pa huli sa sakuyang salud. Pero nasasabutan ko na aram ni Jehova an sakuyang mga limitasyon asin na namumutan niya ako saka pinapahalagahan kun ano an kaya kong gibuhon.”
ARUGON AN PAGIGIN RASONABLE NI JEHOVA
18. Ano an sarong paagi na puwedeng arugon kan mga magurang si Jehova?
18 Paano niyato maaarog an pagigin rasonable ni Jehova? Isip-isipa giraray kun paano trinatar ni Jehova si Lot. Si Jehova an nasa awtoridad; alagad, may kabuutan siyang nagdangog kan ipinapahayag ni Lot an saiyang namamatian. Asin pinaonrahan nin Diyos an kahagadan ni Lot. Kun ika sarong magurang, puwede mo daw arugon an halimbawa ni Jehova? Puwede mo daw na dangugon an mga pakiulay kan saimong mga aki asin, kun angay, paonrahan sinda? Mapadapit digdi, sinabi kan An Torrengbantayan na Setyembre 1, 2007 na puwedeng iiba kan mga magurang an saindang mga aki sa pag-urulay manungod sa mga susundon sa harong. Halimbawa, nagdedesisyon an mga magurang na magkaigwa nin curfew, asin siguradong sinda an may deretso na pumili nin espesipikong oras na dapat nakauli na sa harong an mga aki. Pero, puwede man na dangugon kan Kristiyanong mga magurang kun ano an masasabi kan saindang mga aki manungod sa itinaong oras. Sa nagkapirang kamugtakan, puwedeng magdesisyon an mga magurang na baguhon an itinaong oras basta mayo nin nababalgang prinsipyo sa Bibliya. Puwedeng mahiling kan mga magurang na kun kinokonsiderar ninda an sabuot kan saindang mga aki manungod sa mga susundon sa harong, mas nasasabutan iyan kan mga aki asin mas andam sindang sumunod.
19. Paano puwedeng pagmaigutan kan mga elder na arugon an pagigin rasonable ni Jehova?
19 Pinagmamaigutan kan mga elder sa kongregasyon na arugon an pagigin rasonable ni Jehova paagi sa pagkonsiderar sa kamugtakan kan saindang mga kapagtubod. Girumdumon na pinahalagahan ni Jehova dawa an mga atang na idinudulot kan mas pobreng mga Israelita. Kaagid kaiyan, may mga tugang na limitadong marhay an nagigibo sa ministeryo, posibleng huli sa mga problema sa salud o paggurang. Paano kun pinangluluyahan nin buot an namumutan na mga tugang na ini huli sa saindang mga limitasyon? Puwede sindang mabuot na aseguraron kan mga elder na sinda namumutan ni Jehova huling ginigibo ninda an saindang pinakamakakaya.—Mar. 12:41-44.
20. An pagigin rasonable daw nangangahulugan nin paggibo nin dikit sana sa paglilingkod sa Diyos? Ipaliwanag.
20 Siyempre, dai kita nuarin man maisip na an pagigin rasonable nangangahulugan nin paggibo nin dikit sana sa paglilingkod sa Diyos tangani sanang magin mabuot sa satuyang sadiri. (Mat. 16:22) Habo niyatong magparelaks-relaks sana dangan ipangatanusan iyan paagi sa pagsabi na kita rasonable sana. Imbes, gabos kita kaipuhan na ‘magpakaigot nin todo’ sa pagsuportar sa intereses kan Kahadian. (Luc. 13:24, An Banal na Biblia) An totoo, nagmamaigot kitang magin timbang sa duwang prinsipyo. Sa sarong lado, kita nagmamaigot sa satuyang paglilingkod, na bakong dikit sana an ginigibo. Sa ibong na lado, ginigirumdom niyato na si Jehova dai nuarin man naghahagad sa satuya nin labi sa kaya niyatong itao. Kun itinatao niyato sa saiya an satuyang pinakamakakaya, makakasigurado kita na siya nauugma. Bako daw na nauugma kitang maglingkod sa siring kamapag-apresyar asin siring karasonableng Kagurangnan? Sa sunod na artikulo, pag-uulayan niyato an duwa pang aspekto kan nakakaakit na personalidad ni Jehova.—Sal. 73:28.
[Mga Nota sa Ibaba]
^ par. 6 An Marahay na Bareta Biblia (Bikol Popular Version)
^ par. 9 Deuteronomio 15:7 (BPV): “Kun magkaigwa nin sarong dukhang Israelita sa arin man na banwa sa daga na itinatao saindo nin KAGURANGNAN na saindong Dios, hare kamo pagmaimot asin pagsayuma sa pagtabang saiya.”
^ par. 15 Levitico 5:7, 11 (NW): “Pero, kun dai maabot kan saiyang kaya an sarong karnero, kun siring dadarahon niya ki Jehova bilang saiyang dulot para sa pagkakasala huli sa kasalan na nagibo niya an duwang agbaan o duwang pitson, an saro para sa dulot manungod sa kasalan asin an saro para sa dulot na tinutong. Ngunyan kun mayo siya kan kakayahan para sa duwang agbaan o duwang pitson, kun siring dadarahon niya bilang saiyang dulot para sa kasalan na nagibo niya an ikasampulo kan sarong efa nin pinong harina bilang dulot manungod sa kasalan. Dai niya iyan bubugtakan nin lana asin dai niya iyan bubugtakan nin kamangyan, huli ta iyan dulot manungod sa kasalan.”