1, 2. Ka chansi hámabei lumadagu Heowá?

“BARÜHADINA kéiburi darandi-seingü irumu lúmagiñe namarieidun —tiña aban kristiána gíritu Mónika—. Subudi lumutina nani weiriei buidu ítara kei nuguya lun, gama lumoun lau sun sügühadiwa lan saragu irumu wámagua anahagua asubudira katei iseri luagu ítara kei ligía nuagu.” Chóuruti ligiaméme lan giñe asuseredubei houn saragu maríeitiña luma houn saragu umadagu.

² Hínsiñeti houn sun gürigia hasubudiruniña gürigia ha hínsiñebaña houn buidu. Ani lídangiñe umadaguaü le gayarabei wadügüni hama amu súdinitimati wamadagua luma Heowá. Gama lumoun, le linarün katei, masubudirun wabéi sun katei luagu Heowá (Rom. 11:33). Gachansinbadiwa lun súnwandan lun waganwoundagüdüni wínsiñehabu luagu ligaburi (Apur. 3:11).

3. Kaba wakutiha lidan arütíkulu le?

³ Íderagua lumutiwa arütíkulu le wakutihabei lubaragiñe le lun waganwoundagüdüni wínsiñehabu luagu ménrengun lan layarafadúniwa lun Heowá luma luagu ua lan himei lan aban gürigia luéi aban. Guentó, akutiha wamá biámaya lídangiñe lubuidun ligaburi Bungiu: gíchigaditi ani richati. Ítarati, furangutimabei warihini ‘buidu lan Heowá hama sun gürigia, ani góunigi lani sun le hadügübei lau areiduni” (Sal. 145:9).

4. Kátima mini lubéi gíchigadi le inarüniti?

⁴ Ka mini lubéi gíchigadi? Ariñagati Hesusu: “Fuleseiwatimati [o ‘gúndaatimati’, TNM] le íchugubei sügǘ lau le eresibirubei” (Adü. 20:35). Arufuda lumuti dimurei sensiyuti le kátima lan mini lubéi gíchigadi. Aban gürigia le gíchigaditi lau sun lugundan layusurei lidaani, lere, luma sun lúmati lun líderagun amu. Mama lidan liibe o lueirin idewesei le líchugubei aban gürigia lasubudirúa anhein gíchigadi lubéi, lébunaba líchuguni arufudei gíchigadi lan (aliiha huméi 2 Korintuna 9:7). Úati amu gíchigaditimati luéi Wabungiute, Heowá.

5. Ida liña larufuduni Heowá gíchigadi lan?

⁵ Ida liña larufuduni Heowá gíchigadi lan? Ru lumuti  le hemegeirubei sun gürigia houn, íbini ha máhuduragunbaña lun. Kei buga aubei waliirei, “buiti Aburemei hama sun gürigia”. Óunaha “lumuti weyu houn buítiña hama wuribatiña, óunahalei huya dandu houn múarantiña keisi houn úaratiña” (Mat. 5:45). Ligía lariñagunbei apostolu Pábulu houn gürigia mafiñetiña adüga lan Bungiu buiti woun ‘lau líchugun huya luma alubahani buiti, ru ligía éigini buídurügüti woun lun labuinchagüdünu wanigi lau ugundani’ (Adü. 14:17). Le linarün katei, gíchigaditi Heowá houn sun gürigia (Luk. 6:35).

6, 7. a) Kátima un línsiñeda lun Heowá líchuguni le hemegeirubei houn? b) Ka hénpulu arufudubalin óunigira lániña Heowá lubúeingu ha úaraguabaña?

⁶ Hóuntima lubúeingu Heowá ha úaraguabaña lun línsiñeda líchuguni le hemegeirubei houn. Ariñagati meha urúei Dawidi: “Nibureintina meha, guentó wéiyaadina, ani marihingidina láguruniña Bungiu gürigia ha buídubaña, marihin naña hasaanigu arihadiha” (Sal. 37:25). Gíbeeña kristiánugu úaraguatiña arihiti lagunfulirun dimurei le hawougua. Ariha wamá aban hénpulu.

⁷ Fiú dan lubaragiñe le, aba tadariragun aban prekursora gíritu Nancy tungua lidan siñati. Ariñagatu: “Mégeitina meha 66 fiádürü merigein lubaragiñe larugadun lun nafayeiruni tebegi muna to náhayahaboun, gama lumoun ibidiñeti meha nun halíagiñeba lan nasagarei seinsu ligía. Aba nabahüdaguni nituróbulin lun Heowá ábati nidin nadagimein. Nawadigimariduña meha éheraagua houn gürigia tidan aban éigagülei ani magurabuntina meha ligirún saragu seinsu nubá luagu dábula guñoun ligía, ladüga lóuguaheitiñaha gürigia achülürütiña eiga ñein lidan aban weyu kei ligía lidan dimaasu. Ligía taweiridunbei nanigi dan le narihinbei hachülürün saragu gürigia. Dan le lásurunbei nawadigimaridun, aba nabahüdüni seinsu le hígirubei gürigia nubá luagu dábula: aba nabahüdün 66 fiádürü merigein”. Chouru tumuti Nancy Heowá lan adügübei lau gíchigadi lun tibihini létima temegeirubei (Mat. 6:33).

8. Ka idewesei wéirigutimabei lídangiñe sun idewesei le adüga láalibei Heowá?

⁸ Gayarati habihini sun gürigia idewesei le wéirigutimabei lídangiñe le adüga láalibei Heowá. Katei san idewesei le? Lebegi asalbaruni le lafayeirubei Bungiu lau lani Liráü sákürifisiu. Hesusu guánarügü ariñagubei: “Ladüga wéiriti hínsiñe gürigia ha ubouagubaña lun Bungiu darí lun lóunahani Liráü le ábanrügüti, lun lounwen luagu hafigoun, lun sun lan ha afiñerutiña luagu, meferidirun hamaamuga, gabagarirügü hamaamuga aban ibagari le magumuchaditi” (Huan 3:16). Ítara liña, lueirin idewesei le, hounbei sun gürigia ha ánharutiña lun. Sun ha afiñerutiña luagu Hesusu heresibirúba “ibagari [...] gibe”, ibagari le magumuchaditi (Huan 10:10). Anihán katei létima aubei larufudei Heowá gíchigadi lan!

9. Ida luba gayara lan wáyeihani líchigadi Heowá?

 ⁹ Ida luba wáyeihani líchigadi Heowá? Ítara kei ru lani “sun katei woun gibe lun wagundaarun”  mosu giñe ‘aranseñu wamá lun wafanreinhan lídangiñe wámati’ houn amu ídeha wamaamuga lun gunda hamá (1 Tim. 6:17-19). Gúndaatiwa wayusuruni wámati lun wíchugun idewesei houn waduheñu, houn wamadagu luma lun wíderaguniña ha mégeihabubaña (aliiha huméi 2 Lúrudu 15:7). Ka gayarabei wadügüni lun gíchigadi wamá? Añahein kristiánugu ha adügübalin katei sensiyuti le: sagü ledewehóun somu katei houn, aba háluahan chansi lun hedewehan somu katei lun amu gürigia. Lidan damuriguaü kristiánu biní lumutiwa Heowá hau saragu íbirigu gíchigaditiña.

10. Ka igaburi espechaliti ídanbei gayara lan gíchigadi wamá?

¹⁰ Gayarati gíchigadi wamá, lidan aban igaburi espechaliti, lau le wariñagubei luma le wadügübei lau wayusuruni wadaani luma were íderaguaña amu ru wagíame dǘgüdaguaü houn (Gal. 6:10). Lun wasubudiruni anhein wadügüñein lubéi katei le, álügüdagua wamá woungua: “Ariha hamuti san híbiri gürigia aranseñu niña lan lun násügürün dan hama luma lun naganbuniña dan le habahüdaguni hadiheri nun? Dan le gayara lan, ánhatina san nídehan dan le lamuriahan somu gürigia numa lun nadügün somu wadagimanu lun o lóunahanina adüga somu katei? Átiri san dan guentó lúmagiñe nariñagun lun somu iduhei o íbiri: ‘buiti badüga’?”. Chóuruti ánhawa lan gíchigadi yarafatimabei wasandiragun woungua lun Heowá luma houn gürigia ha hínsiñebaña woun (Luk. 6:38; Ari. 19:17).

11. Ka gayarabei wadügüni lun gíchigadi wamá lun Heowá?

 ¹¹ Gayarati giñe gíchigadi wamá lun Heowá. Ariñagatu Bíbülia woun: “Ruba inebesei lun Bungiu lau birisin” (Ari. 3:9). Lidan “irisini” le anihein wadaani, were luma wámati ani gayarati wayusuruni lidan weseriwidun lun. Íbini irahüñü hátima ñǘbürigiña gayarati hafurendeirun gíchigadi lun Heowá. Ariñagati aban úguchili gíriti Jason: “Dan le wíchugun somu budagia tidan Luban Wadamuridagun, aba wígirun lun irahüñü lan íchigei seinsu tidoun gafu to lagei budagia. Wéiriti  línsiñe houn ladüga, kei aubei hariñagei, ítara, sanditiña híchuguña lan somu katei lun Heowá”. Anhein hasandira isaanigu ugundani le lanügübei lichugúniwa budagia lun Heowá lúmagiñe hañüraü, másiñati gíchigadimemebaña lan lun danme le haweinamudun (Ari. 22:6).

12. Ka mini lubéi richá lan aban gürigia?

¹² Richá lan Heowá ligía aban lídangiñe lubuidun ligaburi. Ka mini lubéi igaburi le? Dimurei le ásügürawagüdübei lídangiñe güriegu kei “richati” tidoun Traducción del Nuevo Mundo, mini lan, “ígirati” (Tito 3:1, 2, abürüdǘni). Gürigia le richabei méredunti lun lagunfulirúniwa íbini dimurei létima ñǘraübei lidan lúrudu, móuserunti lau éregu, mafuudun ligía lun ladügǘn katei kei lariñaguni. Lubaragiñe lira, áfaaguati lun gamadoun lan hama amu ani gabaroun lumuti le gádanbaliña. Aranseñu liña lun laganbuniña, ani dan le mariban lan le habusenrubei, ígira lumutiña hadügüni sansiléi le lagurabubei hámagiñe.

13, 14. a) Ida liña larufudun Heowá luagu richá lan? b) Ka wafurendeirubei luagu igaburi le lidan ligaburi lóuserun Heowá luma Lotu?

¹³ Ida liña larufuduni Heowá igaburi le? Gabaroun lumuti le hasandirubei lubúeingu ani libe-agei dan aranseñu liña lun lasansiruni le lasaminarubei lun lígiruniña lun hadügüni le habusenrubei. Ariha wamá aban hénpulu. Dan meha le desidírü lubéi lagünrinchaguni uburugu Sodoma luma Gomora, aba líchugun adundehani furanguti lun Lotu, aban wügüri richati, lun lanurahan luagun wübü. Gama lumoun, ladüga somu katei, aba layumuragun Lotu lun Heowá lun lígiruni lanurahan lidoun amu fulasu. Samina wamá luagun le: le linarün katei, lamuriahaña meha Lotu lun Heowá lun lasansiruni gumadi le ru laalibei lun! (Aliiha huméi Agumesehani 19:17-20.)

¹⁴ Ménrengunbei hamuga wariñagun luagu débili lan Lotu odi maganbadi lan. Lau sun luwuyeri, gabafuti meha Heowá lun lakipuruni wínwanñu le ñeinhin lumuti lidin, ligía mébuna lubéi yebe lanufudedun. Gama lumoun, hanufudeti meha Lotu. Aba lígiruni Heowá lun lanurahan lidoun aban uburugu le yebe samina láalibei lagünrinchagun (aliiha huméi Agumesehani 19:21, 22). Ariha wamaali lubeiti ua lan héregu lan Heowá, lubaragiñe lira richati, ani mafuudunti lun ladügǘniwa le lariñagubei.

15, 16. Ida liña larufuduni lilurudun Moisesi richá lan Heowá? (Ariha huméi dibuhu le lídanbei páhina 13.)

¹⁵ Akutiha wamá amu hénpulu luáguti Lilurudun Moisesi, le arufudubalin richá lan Heowá. Anhein meha weiri lubéi lugudemen aban ísüraelina ani siñabei meha ladagaragüdün aban mudún o aban liraüraü gábara, ánhati meha Heowá lun ladagaragüdün bián wagugua o bián harahüñü unhun. Anhein méhati hanarime lubéi lugudemen darí lun siñá lan ladagaragüdün nírügü bián dunuru? Anhein meha ítara liña lubéi, ígirati meha Heowá lun hadagaragüdün murusun fulúaru. Gama lumoun, teni wamá lun aban katei: mámaba meha furumiñeguarügü fulúaru hadagaragüda lun, mosu meha hadagaragüdünu tótima “tubuidun-agei fulúaru”, tibe meha to eseriwidúboun houn idewenegu ha súdinitiña (Agu. 18:6). Ka uagu súdini lubéi katei le? (Aliiha huméi Fádirigu 5:7, 11.)

¹⁶ Samina wamá aban lan hádangiñe ísüraelina ha gudemetimabaña wagía. Dan wachülürün tidoun kianpu lánina óundaruni tau murusun fulúaru lun wadagaragüdünu, aba warihin amu ísüraelina rísitiña barüina animaalugu kéiburi bágasu o mudún lun hadagaragüdüniña. Másiñati aba lan wasandirun busiganu ladüga maweinrindigia lan lebegi wani sákürifisiu fulúaruauti. Gama lumoun, aba waritaguni gebegi lan widewese ligibugiñe Heowá. Ka uagu? Ladüga amuriahati Heowá wama lun tídangiñeba lan tubuidun-agei fulúaru wíchiga idewesei lun. Ítara liña lira, kéisigubeirügü hamuga lariñaguña lan Heowá houn ísüraelina ha gudemetimabaña: “Gunfuranda numuti siñá lan híchugun idewesei wéinamuti nun kei le hayarabei amu ísüraelina íchiga, gama lumoun subudi numuti giñe híchuguñein  lan le buídutimabei huma nun”. Le lúgubu arufuda lani Heowá richá lan lau gabaroun lani le gádanbaliña lubúeingu (Sal. 103:14).

17. Ka luwuyeri eseriwiduni wasubudirubei lau ichouruni luagu anha lan Heowá lun?

 ¹⁷ Ruti dǘgüdaguaü woun wasubudiruni luagu, seremei lan richá lan Heowá, anha lubéi lun sun le wadügübei tídangiñe sun wanigi lun weseriwidun lun (Kol. 3:23). Ariñagatu aban íbiri wéiyaaru italiana gíritu Constance: “Nayanuhan houn amu luagu Bungiu le adügübalina, ligíatima hínsiñetimabei nun lidan nibagari. Ligía anahagua lubéi apurichiha luma íchiga aturiahani tídangiñe Bíbülia. Anihein dan sarí nani siñaali lan nadügün saragu katei ladüga nisandi, gama lumoun subudi numuti hínsiñe nan lun Heowá, ani kei subudi lani le násiñarubei adüga, ariha lumuti le niyaraabei adüga kei katei gebegiti”.

18. Írida humá aban katei le ídanbei gayara lan háyeihani agübürigu lani Heowá hénpulu.

¹⁸ Ida luba wáyeihani richá lan Heowá? Saminaya wamá luagu le ladügübei luagu Lotu. Heowá meha laubei sun ubafu; íbini ítara, lau areini aganba lumuti le lamuriahabei Lotu luma, ábati lígiruni lun ladügüni le lamuriahabei. Anhein agübürigu wabéi, gayarati san wáyeihani lani Heowá hénpulu lau waganbuni le hamuriahabei wasaanigu wama, ani danme le gayara lan, wígiruniña lun hadügüni le hamuriahabei? Ariñagatu Garüdia Atalaya to lánina 1 lidan nefu-hati, irumu 2007 luagu añahein lan agübürigu ha ígirutiña lun hariñaguni hasaanigu ka lan hasaminarubei luagu lúrudu le lunbei lafalarúniwa múnada. Aban hénpulu, agübürigu desidírübalin kaba lan oura hagiribuda isaanigu múnadoun ani garichatiña lun hadügüni. Gama lumoun, gayarati hamuga haganbuni agübürigu kristiánugu ka lan hasaminarubei hasaanigu luagu katei le. Ñeinbei dan gayarabei lan lasansirún oura ligía, anhein madüraawagunbei lubéi somu adundehani tídangiñeti Bíbülia. Háfuga híchugun agübürigu fe dan le lan gabaroun hamani le hasaminarubei hasaanigu lidan lóurate híchugun somu lúrudu le lunti lafalarún múnada, ménrenguntimabei lan houn hasaanigu gunfuranda hamani ka lan lébunabei lichugún burí lúrudu ligía ani ménrenguntimabei giñe gaganbadi hamá lun.

19. Ida luba gayara lan háyeihani wéiyaaña lidan afiñeni richá lan Heowá?

¹⁹ Áfaaguatiña wéiyaaña lidan afiñeni lun háyeihani richá lan Heowá lau gabaroun hamani le gádanbaliña hábirigu lidan afiñeni. Haritagua waméi gebegi lan meha íbini sákürifisiu le hadügübei ísüraelina ha gudemetimabaña lun. Uguñe weyu, añahein íbirigu ha lóuguati hadüga lidan ministeriu, háfuga ladüga hasandi o harumudiri. Anhein heferidira íbirigu ha haguraasun luagu katei le, gayarabei habihin dǘgüdaguaü anhein hachoururagüda wéiyaaña lidan afiñeni houn luagu hínsiñe hamá lun Heowá ladüga adüga hamani sun hayaraati lidan heseriwidun lun (Mar. 12:41-44).

20. Ligiaméme san richá lan aban gürigia luma lararamuni leseriwidun lun Bungiu? Afuranguagüda huméi hóunabagüle.

²⁰ Gama lumoun, mama ligiaméme richá wamá luma magúali wamá lidan weseriwidun lun Bungiu lun wíchugun ugundani wóuniwagua (Mat. 16:22). Mabusenruntiwa wanügüni katei lau lihamarun, lárigiñemeti wáluga waricharaguagüdüni ligaburi wóuserun lau wariñagun warufudarügüñein lan luagu richá wamá. Lubaragiñe lira, súngubei wagía, lunti wáfaagun lau sun were lun lawanserun luadigimari Larúeihan Bungiu (Luc. 13:24, TNM). Le linarün katei, lunti gabaroun wamá bián katei súdiniti. Furumiñe, moun lumuti wararamuni weseriwidun lun Bungiu. Libiaman, mabulieida waméi mamuriahan lan Heowá wamá lun wadügün lóugiñe le wayaraabei adüga. Chouru waméi: wéiriti lagundaarun Heowá dan le wíchuguni le buídutimabei lídangiñe sun wámati lun. Ma inarüni weiri lan wagundan lau weseriwidun lun aban Aburemei geteingiraditi ani richá ligía? Lidan le aban arütíkulu wakuhatiba biámaya lídangiñe lubuidun burí ligaburi Heowá (Sal. 73:28).