1, 2. ¿Mbaʼe oportunidápa oreko Jehová amigokuéra?

PETEĨ ermána hérava Mónika heʼi: “Haimetéma treinta y cinco áño romenda hague. Che ména ha che rojokuaa porãiterei, upéicharõ jepe, ohasávo pe tiémpo roaprende gueteri ojuehegui heta mbaʼe ymave ndorohechakuaái vaʼekue”. Añetehápe, heta omendáva térã oñoamígova rehe oiko avei upéva.

² Katuete ningo jaikuaa porãseve umi jahayhúvape. Upévare javyʼaiterei jaikuaavévo Jehovápe. Haʼe hína ñane amígo iñimportantevéva. Péro añetehápe arakaʼeve ndaikatumoʼãi jaikuaa entéro mbaʼe chugui (Rom. 11:13). Opa árare ikatúta jaikuaave jahávo chupe ha umi mbaʼe porã haʼe ohechaukáva, ha upéva ñanembovyʼaitereíta (Ecl. 3:11).

3. ¿Mbaʼépa ñahesaʼỹijóta ko artíkulope?

³ Pe artíkulo ohasa vaʼekuépe jahecha kuri Jehová oĩha ñanerendu hag̃uáicha ha nomboykeiha avavépe, ha upéva ñanepytyvõ jahayhuve hag̃ua chupe. Ko artíkulope katu jahecháta mokõi mbaʼe: ipojeraha ha noñemohatãiha haʼe heʼívapente. Upéicha jaikuaáta Jehová ‘imbaʼeporãiteha maymáva ndive [...], ha oiporuha imborayhu opaite hembiapokuépe’ (Sal. 145:9).

4. ¿Mbaʼépa heʼise ñandepojeraha?

⁴ ¿Mbaʼépa heʼise ñandepojeraha? Ikatu ñambohovái ko porandu jahechávo Hechos 20:35, heʼihápe: “Javyʼaiteve ñameʼẽvo, ñandéve oñemeʼẽ rangue” (NM). Peteĩ ipojeráva oiporu itiémpo, imbaretekue ha opa mbaʼe orekóva oipytyvõ hag̃ua hapichápe. Ha ojapo upéva vyʼápe. Peteĩ persóna ipojera, ndahaʼéi omeʼẽgui  peteĩ mbaʼe tuicháva, síno omeʼẽgui ipyʼaite guive (elee 2 Corintios 9:7). Ndaipóri ipojeravéva Jehovágui, “Ñandejára ovyʼáva” (1 Tim. 1:11, NM).

5. ¿Mbaʼéichapa Jehová ohechauka ipojeraha?

⁵ ¿Mbaʼéichapa Ñandejára ohechauka ipojeraha? Omeʼẽvo opa yvypórape hemikotevẽ, umi ndoservírivape chupe jepe. Jehová “imbaʼeporãite maymáva ndive”. “Haʼe ningo oheja osẽ kuarahy iñaña ha hekoporãvape g̃uarã; ha omongy hekojoja ha hekojojaʼỹvape g̃uarã.” (Mat. 5:45, NM.) Upévare apóstol Pablo heʼi kuri umi hénte ndojeroviáivape Ñandejárare, Jehová imbaʼeporãitereiha hendivekuéra: ‘Ombou ama yvágagui ha omeʼẽ peẽme hetaiterei kóga. Haʼe hetaiterei tembiʼu omeʼẽ peẽme ha penembopyʼarory’ (Hech. 14:17, NM). Jahechaháicha, Jehová ipojera opavave yvypóra ndive (Luc. 6:35).

6, 7. a) ¿Mávarepa Ñandejára oñangareko porã? b) ¿Mbaʼe ehémplopa ohechauka Ñandejára oñangarekoha hembiguaikuérare?

⁶ Jehová ningo koʼýte omeʼẽse hemikotevẽ isiervokuéra iñeʼẽrendúvape. Rréi David heʼi vaʼekue: “Chemitã vaʼekue, koʼág̃a katu chetujáma, ha ndahecháiva hekopotĩva oikotevẽramo, térã taʼyrakuéra ojeruréramo upérupi rei hoʼu vaʼerã” (Sal. 37:25). Heta kristiáno ohechakuaa añeteha ko téxto heʼíva ha oñandu mbaʼéichapa Jehová oñangareko hesekuéra. Jahechamína peteĩ ehémplo.

⁷ Ndaʼaréi peteĩ prekursóra hérava Nancy, tesaparápe ojecha. Haʼe omombeʼu: “Aikotevẽ kuri 66 dólar apaga hag̃ua che alkilér, ha ndaikuaái moõguipa aguenohẽta. Hiʼarive apaga vaʼerã pe ótro díape. Amombeʼu Jehovápe che provléma ha upe rire aha ambaʼapo. Che ningo mósa peteĩ várpe ha aikuaa upe díape ndahetamoʼãiha kliénte ha noñemeʼẽmoʼãiha chéve heta propína. Upévare avyʼaiterei orehénte heta haguére upe pyharépe. Apoi rire aipapa pe pláta oñemeʼẽ vaʼekue chéve, ha atopami 66 dólar”. Nancy oikuaa porã Jehová imbaʼeporã hague hendive omeʼẽvo chupe pe oikotevẽva (Mat. 6:33).

8. ¿Mbaʼépa hína pe rregálo tuichavéva Jehová omeʼẽ vaʼekue?

⁸ Enterove yvypórape ikatu ideprovécho pe rregálo tuichaite Jehová omeʼẽ vaʼekue. ¿Mbaʼeichagua jopóipa upéva? Haʼe omeʼẽ Itaʼýra sakrifísioramo. Jesús voi heʼi vaʼekue: “Ñandejára ohayhuetereígui pe múndo omeʼẽ Itaʼýra peteĩete, ani hag̃ua oñehundi opaite umi hese ojeroviáva, ohupyty hag̃ua guei jeikove opaveʼỹva” (Juan 3:16, NM). Pe ñeʼẽ “múndo” ojeporúva koʼápe, heʼise opavave yvypóra. Upéicharõ, enterove oaseptáva ko rregálo ikatu oñevenefisia chugui. Opaite ojeroviáva Jesús rehe ikatúta “oikove [...] opa árare” (Juan 10:10, NM). ¡Ajépa imbaʼeporãite Jehová!

9. ¿Mbaʼéichapa ikatu ñandepojera Jehová ojapoháicha?

 ⁹ ¿Mbaʼéichapa ikatu ñandepojera Jehová ojapoháicha? Ñandejára ningo ‘omeʼẽrasapa ñandéve opa mbaʼe ñanembovyʼáva’, upévare ñande avei ‘ñanekyreʼỹ vaʼerã ñakomparti hag̃ua ótrondi umi mbaʼe jarekóva’. Upéicha ñaipytyvõta ñande rapichápe ovyʼa hag̃ua avei (1 Tim. 6:17-19, NM). Javyʼaiterei ñameʼẽvo rregálo umi jahayhúvape ha ñaipytyvõ jave umi oikotevẽvévape (elee Deuteronomio 15:7). ¿Mbaʼépa ñanepytyvõta ñanemanduʼa hag̃ua ñandepojera vaʼerãha? Por ehémplo, oĩ ermáno orresivíre peteĩ rregálo, ohekámava avei mávapepa omeʼẽta ótro jopói. Kongregasiónpe oĩ heta ñane ermáno péicha ipojeráva, ha upéva peteĩ vendisión.

10. ¿Mbaʼéichapa ikatu jahechauka ñanembaʼeporãha?

¹⁰ Ikatu ñanembaʼeporã umi mbaʼe jaʼéva ha jajapóva rupive, jaiporúvo ñane tiémpo ha ñane mbaretekue ñaipytyvõ ha ñamokyreʼỹ hag̃ua ñande rapichápe (Gál. 6:10). Jahecha hag̃ua oimépa ñanembaʼeporã, ñañeporandukuaa: “¿Ohechakuaápa che rapichakuéra aimeha ahendu hag̃uáicha chupekuéra iprovléma jave? Oĩramo chejokuaiséva térã ojeruréva chéve aipytyvõ hag̃ua chupe, ¿nacheprovlémaipa ajapo hag̃ua upéva, ijáma guive chéve? ¿Arakaʼépa aguerohory raʼe che pyʼaite guive peteĩ che rogayguápe térã peteĩ ermánope?”. Jajepokuaáramo ñanembaʼeporã, ñañemoag̃uivéta Jehováre ha umi jahayhúvare (Luc. 6:38; Prov. 19:17).

11. ¿Mbaʼéichapa ikatu ñandepojera Jehová ndive?

 ¹¹ Ikatu avei ñandepojera Jehová ndive. La Biblia heʼi: “Emombaʼe Ñandejárape  opa mbaʼe rerekóvape” (Prov. 3:9). Heʼívo ko téxtope “opa mbaʼe” oñeʼẽ hína entéro mbaʼe ikatúvare jaiporu Jehová servísiope, por ehémplo ñane tiémpo, ñane mbaretekue ha ñande pláta. Umi mitã jepe oaprendekuaa mbaʼéichapa ikatu ipojera Ñandejára ndive. Peteĩ túva hérava Jason omombeʼu: “Romeʼẽ jave ore kontrivusión Salón del Rréinope, roheja ore famíliape omoĩ pe pláta káha de kontrivusiónpe. Ojapóvo upéicha, haʼekuéra voi heʼi oñeñandu porãitereiha omeʼẽgui peteĩ mbaʼe Jehovápe”. Taʼyrakuéra imitãite guive omeʼẽrõ ikontrivusión, ndahasymoʼãi osegi hag̃ua ipojera Ñandejára ndive ág̃a okakuaapa vove (Prov. 22:6).

12. ¿Mbaʼeichaguápa peteĩ persóna noñemohatãiva haʼe heʼívapente?

¹² Jehová ohechauka noñemohatãiha haʼe heʼívapente. ¿Mbaʼépa heʼise upéva? (Tito 3:1, 2). Peteĩ persóna noñemohatãiva heʼívape nohaʼarõi ojejapo opa mbaʼe haʼe oipotahaichaite ni ndaipyʼahatãi. Upéva rangue hory opavavéndi, oñehaʼãmbaite ontende pe situasión, oĩ oporohendu hag̃uáicha, oheja hapichápe ojapo oipotáva oĩ porãma guive, ha ikatu okambia umi mbaʼe ohaʼarõva ótrogui.

13, 14. a) ¿Mbaʼéichapa Jehová ohechauka noñemohatãiha haʼe heʼívapente? b) ¿Mbaʼépa ñaaprende Jehovágui otrata lájare Lótpe?

¹³ ¿Mbaʼéichapa Jehová ohechauka noñemohatãiha heʼívapente? Haʼe ohechakuaa hembiguaikuéra oñandúva ha ndojopýi hendivekuéra. Por ehémplo, Jehová odesidírõ guare ohundi Sodoma ha Gomorra, omanda Lótpe okañy hag̃ua umi montáñare. Péro haʼe ojerure Ñandejárape oheja hag̃ua chupe oho ótro lugárpe. Ñapensamíntena, Lot ojerure Jehovápe okambia hag̃ua pe omandáva chupe (elee Génesis 19:17-20).

¹⁴ Ikatu ñapensa Lot ijerovia kangy hague térã naiñeʼẽrenduiha. Péro jaikuaaháicha Ñandejára osalvátante voi chupe, upéicharõ jepe haʼe okyhyje ha oñemondýi. Ha ojerure asýmarõ ohomínte hag̃ua okañy ambue távape, Jehová ohejánte chupe oho, hiʼarive upe táva haʼe ohundise avei (elee Génesis 19:21, 22). Péicha jahecha Jehová noñemohatãiha haʼe heʼívapente.

15, 16. ¿Mbaʼéichapa pe Léi oñemeʼẽ vaʼekue Moisés rupive ohechauka Jehová imbaʼerechakuaaha hembiguaikuéra ndive? (Ehecha pe taʼanga oĩva páhina 12-pe.)

¹⁵ Ñahesaʼỹijomína ótro ehémplo ohechaukáva Jehová noñemohatãiha haʼe heʼívapente. Upéva jatopa pe Léi oñemeʼẽ vaʼekuépe Moisés rupive. Peteĩ isrraelíta imboriahúramo ha ndaikatúi omeʼẽ sakrifisiorã peteĩ ovecha térã peteĩ kavara, Jehová oasepta mokõi tórtola térã mokõi palomaraʼy. Péro, ¿mbaʼépa oikóta ndaikatúirõ ni upéva oikuaveʼẽ imboriahueterei rupi? Upéicharõ, Jehová oheja oikuaveʼẽ michĩmi arína. Péro ndahaʼéi oimehaichagua arína, síno pe “iporãvéva”, umi ojeporúva oĩ jave mbohupa iñimportánteva (Gén. 18:6). ¿Mbaʼéichapa ko ehémplo ohechauka Jehová noñemohatãiha heʼívape? (Elee Levítico 5:7, 11.)

¹⁶ Ñapensamína ñande haʼeha peteĩ isrraelíta imboriahumíva. Ñag̃uahẽvo pe tavernákulope, ñaikuaveʼẽ michĩmi arína ha jahecha umi iplátava oikuaveʼẽtaha mymba. Ikatu ñatĩ jaguerahágui peteĩ mbaʼe michĩetereíva. Péro upéi ñanemanduʼa Jehová oguerohoryha ñameʼẽva chupe. ¿Mbaʼérepa jaʼe upéva? Ñepyrũrã, jaikuaa Jehová ojerure hague toñekuaveʼẽ pe arína iporãvéva. Haʼete ku heʼirõguáicha umi isrraelíta imboriahuvévape: “Antende  pene situasión, ndaikatuiha pemeʼẽ umi ótroicha. Péro aikuaa pejapoha ikatúva guive pemeʼẽ hag̃ua chéve pe iporãvéva”. Péicha Jehová ohechauka imbaʼerechakuaaha hembiguaikuéra ndive. Haʼe ontende isituasión ha oikuaa moõ pevépa haʼekuéra ikatu ojapo (Sal. 103:14).

17. ¿Mbaʼeichagua servísiopa Jehová oguerohory?

 ¹⁷ Javyʼaiterei jaikuaávo Jehová noñemohatãiha haʼe heʼívapente ha oguerohoryha opaite mbaʼe jajapóva ñande pyʼaite guive jaservi hag̃ua chupe (Col. 3:23). Peteĩ ermána ijedáva Italiagua hérava Constance heʼi: “Che ningo ymaite guive añeʼẽseterei voi umi héntendi che Apohare rehe. Upévare apredika meme ha ajapo estúdio vívliko. Koʼág̃a nacheresãivéima ha sapyʼánte ambyasy ndaikatúi haguére aservi Jehovápe yma guaréicha. Péro aikuaa porã haʼe cherayhuha ha oikuaaha moõ pevépa ikatu ajapo. Haʼe oguerohory che ikatúva ameʼẽ chupe”.

18. Emyesakã mbaʼéichapa tuvakuéra ikatu osegi Jehová ehémplo.

¹⁸ ¿Mbaʼéichapa ikatu ñahaʼanga Jehovápe ha jahechauka nañañemohatãiha ñande jaʼévapente? Ñapensami jeýna mbaʼéichapa otrata vaʼekue Lótpe. Jehová haʼéramo jepe pe Mburuvicha Tuichavéva, ohendu Lótpe ha oheja ojapo ojeruréva. Oiméramo ñanefamília, ¿ikatúpa jasegi Ñandejára ehémplo? ¿Ñahendúpa chupekuéra ha jaheja ojapo ojeruréva, oĩ porãma guive? Ñemañaha 1 de septiembre de 2007 omombeʼu vaʼekue oĩha túva ohejáva ifamiliakuéra heʼi mbaʼépa opensa umi rrégla osegi vaʼerãre hogapýpe. Por ehémplo, sy ha túva oreko derécho heʼi hag̃ua ifamíliape mbaʼe órapa oĩma vaʼerã hógape. Péro oporandukuaa avei mbaʼépa opensa hikuái upévare. Sapyʼánte ikatu omeʼẽve chupekuéra permíso, noñesẽima guive la Biblia heʼívagui. Heta vése tuvakuéra oñeʼẽ raẽ ifamíliandi omoĩ mboyve rrégla hogapýpe. Péicha haʼekuéra ontende porã mbaʼérepa oñemoĩ umíva ha ndahasymoʼãi iñeʼẽrendu hag̃ua.

19. ¿Mbaʼéichapa ansianokuéra ikatu osegi Jehová ehémplo?

¹⁹ Jehová oguerohory vaʼekue umi isrraelíta oikuaveʼẽva, tamichĩ jepe raʼe. Upéicha avei ansianokuéra kongregasiongua oñehaʼãmbaite ohaʼanga chupe. Upévare noñemohatãi heʼívapente ha ontende umi ermánope. Ñane tiémpope oĩ ermáno ndaikatúiva ojapo hetave mbaʼe Jehová servísiope nahesãivéi rupi térã ijedámagui. Oiméramo oñeñandu vai hikuái upévare, umi ansiáno ikatu heʼi koʼã ermánope Jehová ohayhuha chupekuéra oñehaʼã rupi ojapo ikatúva guive oservívo chupe (Mar. 12:41-44).

20. ¿Mbaʼéichapa jaservíta Jehovápe nañañemohatãiramo ñande jaʼévapente?

²⁰ Nañañemohatãiramo ñande jaʼévapente, jajapóta ikatúva guive jaservi porãve hag̃ua Jehovápe ha nañaneateʼỹmoʼãi (Mat. 16:22). Ani jaju ñañetrankilisa ha jaʼe guaʼu ovalemaha jajapóva Jehová servísiope. Upéva rangue, ‘ñañehaʼãmbaite’ vaʼerã ñambaʼapo meme Ñandejára Rréinope g̃uarã (Luc. 13:24, NM). Jahechakuaa vaʼerã mokõi mbaʼe iñimportánteva: ndovaléi ñañekontenta jajapomívarente, ha ñanemanduʼa vaʼerã Jehová ndojerureiha ñandéve peteĩ mbaʼe ndaikatumoʼãiva ñakumpli. Haʼe ovyʼaiterei ñameʼẽramo chupe pe iporãvéva. ¡Ajépa javyʼaite Ñandejára imbaʼerechakuaa haguére ñanendive! Pe artíkulo oúvape ñahesaʼỹijovéta mokõi mbaʼe porã Jehová ohechaukáva (Sal. 73:28).