Yọ́n Pinpẹn Alọtútlú po Lẹnpọn Dagbenọ-Yinyin Jehovah Tọn Po
Yọ́n Pinpẹn Alọtútlú po Lẹnpọn Dagbenọ-Yinyin Jehovah Tọn Po
“OKLUNỌ yin yinyọ́n hlan mẹpopo; lẹblanu bibọ etọn lẹ sọ tin to azọ́n etọn lẹpo ji.”—PS. 145:9.
NAWẸ HIẸ NA NA GBLỌNDO GBỌN?
Jẹhẹnu Jehovah tọn awe tẹlẹ wẹ mí sọgan hẹn pinpẹn-nutọn- yinyọnẹn mítọn siso deji na?
Nawẹ mí sọgan hodo apajlẹ alọtútlú tọn Jehovah tọn gbọn?
Aliho tẹlẹ mẹ wẹ mí sọgan hodo apajlẹ lẹnpọn dagbenọ-yinyin tọn Jehovah tọn te?
1, 2. Etẹwẹ mí na penugo nado to wiwà kakadoi?
MẸMẸYỌNNU de he nọ yin Monika dọmọ: “E ko yì nudi owhe 35 todin he mí wlealọ. Yẹn po asu ṣie po yọ́n míde ganji. Ṣigba, mahopọnna owhe susu enẹlẹ, mí gbẹ́ nọ to onú delẹ plọn gando ode awetọ go, ehe mí ma yọnẹn dai.” Matin ayihaawe, nudopolọ wẹ nọ jọ to alọwle po haṣinṣan họntọnjiji tọn susu lẹ po mẹ.
2 Eyin mí yiwanna mẹde, homẹhunnu wẹ e nọ yin na mí nado jẹakọ hẹ mẹlọ dogọ. To họntọnjiji he mí sọgan wleawuna lẹpo mẹ, depope ma yin nujọnu sọ họntọnjiji mítọn hẹ Jehovah. Mí ma sọgan yọ́n nuhe gando ewọ go lẹpo gbede. (Lom. 11:33) Mí na to nuplọn gando jẹhẹnu Jehovah tọn lẹ go kakadoi, podọ pinpẹn-nutọn-yinyọnẹn mítọn na jẹhẹnu etọn lẹ na to jijideji zọnmii.—Yẹwh. 3:11.
3. Etẹwẹ mí na gbadopọnna to hosọ ehe mẹ?
3 Hosọ he wayi gọalọna mí nado hẹn pinpẹn-nutọn-yinyọnẹn mítọn siso deji na jẹhẹnu Jehovah tọn awe delẹ, enẹ wẹ yindọ ewọ yọ́n dọnsẹpọ bo ma nọ homẹnukuntapọn. Todin, mì gbọ mí ni gbadopọnna jẹhẹnu Jehovah tọn he dọnmẹdogo awe devo—yèdọ alọtútlú po lẹnpọn dagbenọ-yinyin etọn po. Dogbapọn ehe na gọalọna mí nado mọnukunnujẹemẹ dogọ dọ “OKLUNỌ yin yinyọ́n hlan mẹpopo; lẹblanu bibọ etọn lẹ sọ tin to azọ́n etọn lẹpo ji.”—Ps. 145:9.
JEHOVAH NỌ TLÚALỌ
4. Etẹwẹ alọtútlú nujọnu tọn zẹẹmẹdo?
4 Etẹwẹ e zẹẹmẹdo nado yin alọtlútọ? Gblọndo lọ sọawuhia to hogbe Jesu tọn he tin to Owalọ 20:35 mẹ lẹ mẹ dọmọ: “Ayajẹ sù to nunamẹ mẹ hú to mimọyi mẹ.” Po hogbe kleun ehelẹ po, Jesu do nuhe alọtútlú nujọnu tọn yin hia hezeheze. Mẹhe yin alọtlútọ nọ yí whenu, huhlọn po nutindo etọn lẹ po zan do mẹdevo lẹ tamẹ, podọ ayajẹnu wẹ e nọ yin na ẹn nado wàmọ. Na taun tọn, e ma yin lehe nunina de klo do sọ wẹ nọ do alọtútlú hia gba, ṣigba mẹwhinwhàn nunamẹtọ lọ tọn wẹ nọ do enẹ hia. (Hia 2 Kọlintinu lẹ 9:7.) Mẹdepope ma yin alọtlútọ sọ Jehovah, “Jiwheyẹwhe ayajẹnọ” mítọn.—1 Tim. 1:11.
5. Aliho tẹlẹ mẹ wẹ Jehovah nọ do alọtútlú hia te?
5 Nawẹ Jehovah nọ do alọtútlú hia gbọn? E nọ hẹn pekọ wá na nuhudo gbẹtọvi lẹpo tọn, kakajẹ mẹhe ma tlẹ ko to sinsẹ̀n ẹn lẹ tọn ji. Na nugbo tọn, ‘Jehovah yin yinyọ́n hlan mẹpopo.’ E “nọ hẹn owhè etọn zẹ̀ do mẹylankan lẹ po mẹdagbe lẹ po ji bosọ nọ hẹn jikun ja do dodonọ lẹ po mawadodonọ lẹ po ji.” (Mat. 5:45) Abajọ, to whenue apọsteli Paulu to hodọna mayisenọ lẹ, e dohia yé dọ Jehovah ‘wà onú dagbe lẹ, bo nọ na yé jikun sọn olọn podọ ojlẹ sinsẹ́n susugege lẹ tọn, bosọ na núdùdù susugege yé bo yí ayajẹ do gọ́ ahun yetọn.’ (Owalọ 14:17) E họnwun dọ Jehovah yin alọtlútọ hlan gbẹtọvi lẹpo.—Luku 6:35.
6, 7. (a) Nuhudo mẹnu lẹ tọn wẹ homẹ Jehovah tọn nọ hùn nado hẹn pekọ wá na hugan? (b) Na apajlẹ de he do lehe Jiwheyẹwhe nọ penukundo nuhudo sinsẹ̀n-basitọ nugbonọ etọn lẹ tọn go do hia.
6 Na taun tọn, homẹ Jehovah tọn nọ hùn nado hẹn pekọ wá na nuhudo sinsẹ̀n-basitọ nugbonọ etọn lẹ tọn. Ahọlu Davidi dọmọ: “Yẹn ko tin to yọpọ, yẹn sọ whẹ́n; ganṣo yẹn ma ko mọ yè gbẹ́ dodonọ dai, kavi okún etọn ni to núdùdù biọ.” (Ps. 37:25) Klistiani nugbonọ susu wẹ ko tindo numimọ nukunpedomẹgo Jehovah tọn mọnkọtọn tọn. Mì gbọ mí ni lẹnnupọndo apajlẹ de ji.
7 To owhe delẹ die wayi, lizọnyizọnwatọ whenu-gigọ́ tọn de he nọ yin Nancy, mọ ede to ninọmẹ sinsinyẹn de mẹ. Nancy dọmọ: “N’do hudo nudi 33 500F CFA tọn nado sú họ̀-kuẹ ṣie to wunkẹngbe. N’ma yọ́n fie n’na mọ akuẹ mọnkọtọn te. N’hodẹ̀ gando nuhahun lọ go, podọ enẹgodo, n’dedo núdùdù-satẹn he n’nọ wazọ́n te. N’ma lẹn paali dọ ṣẹ́ngi he nuhọtọ lẹ na jodo na mi to ozán enẹ mẹ na sù, na nuhọtọ lẹ ma nọ saba sù to azán enẹ ji. Amọ́, e paṣa mi taun dọ mẹsusu wẹ wá họ̀nú to núdùdù-satẹn lọ to ozán enẹ mẹ. To whenue n’fó azọ́n bo hò akuẹ he yin nina mi lọ lẹpo pli, nudi 33 500F CFA lọ pẹẹ wẹ n’mọ.” Nancy kudeji dọ Jehovah wẹ gbọn alọtútlú dali wleawu nuhe sin hudo emi tindo lọ tọn pẹpẹ na emi.—Mat. 6:33.
8. Etẹwẹ yin nunina daho hugan he do alọtútlú Jehovah tọn hia?
8 Mẹlẹpo wẹ sọgan mọaleyi sọn nunina daho hugan Jehovah tọn mẹ. Etẹwẹ yin nunina enẹ? Avọ́sinsan ofligọ Visunnu etọn tọn wẹ. Jesu dọmọ: “Jiwheyẹwhe yiwanna aihọn lọ sọmọ bọ e namẹ Visunnu detọ́n dopo akàn etọn, na mẹdepope he do yise hia to ewọ mẹ ma nado yin vivasudo adavo nado tindo ogbẹ̀ madopodo.” (Joh. 3:16) To wefọ ehe mẹ, “aihọn lọ” to alọdlẹndo gbẹtọvi lẹ. Mọwẹ, mẹhe basi dide nado kẹalọyi nunina daho hugan Jehovah tọn lẹpo wẹ sọgan mọaleyi sọn e mẹ. Mẹhe do yise hia to Jesu mẹ lẹ na mọ ogbẹ̀ yí to gigọ́ mẹ—enẹ wẹ ogbẹ̀ madopodo. (Joh. 10:10) Na taun tọn, kunnudenu daho hugan he do alọtútlú Jehovah tọn hia wẹ Visunnu etọn he E na do gbẹtọvi lẹ tamẹ.
HODO APAJLẸ ALỌTÚTLÚ TỌN JEHOVAH TỌN
9. Nawẹ mí sọgan hodo apajlẹ alọtútlú tọn Jehovah tọn gbọn?
9 Nawẹ mí sọgan hodo apajlẹ alọtútlú tọn Jehovah tọn gbọn? To whenuena e yindọ Jehovah “nọ na mí onú lẹpo susugege na mí nido duvivi etọn,” mílọsu dona nọ “wleawu nado mánamẹ,” bo gbọnmọ dali yidogọna ayajẹ mẹdevo lẹ tọn. (1 Tim. 6:17-19) Ayajẹnu wẹ e nọ yin na mí nado nanú họntọn po hagbẹ whẹndo tọn mítọn lẹ po podọ nado nọ gọalọna mẹhe tin to nuhudo mẹ lẹ. (Hia Deutelonomi 15:7.) Etẹwẹ sọgan gọalọna mí nado nọ do gbigbọ alọtútlú tọn hia? Klistiani delẹ nọ ze afọdide yọ́n-na-yizan ehe: Whedepopenu he yé mọ nunina de yí, yelọsu nọ dín dotẹnmẹ hundote de nado nanú mẹdevo. To agun Klistiani tọn mẹ, mẹmẹsunnu po mẹmẹyọnnu susu po wẹ nọ do gbigbọ alọtútlú tọn hia.
10. Etẹwẹ yin dopo to aliho dagbe hugan he mẹ mí sọgan tlúalọ te lẹ mẹ?
10 Dopo to aliho dagbe hugan he mẹ mí sọgan tlúalọ te lẹ mẹ wẹ nado yí whenu po huhlọn mítọn po zan nado gọalọ podọ nado na tuli mẹdevo lẹ. (Gal. 6:10) Nado gbeje míde pọ́n to adà ehe mẹ, mí sọgan kanse míde dọ: ‘Be mẹdevo lẹ nọ mọdọ n’nọ tin to gbesisọ mẹ nado yí whenu ṣie zan nado dotoaina ahunmẹdunamẹnu yetọn lẹ ya? Eyin mẹde zọ́n nude mi kavi jlo dọ ma gọalọna emi nado wà nude, be n’nọ yigbe to whedepopenu he e yọnbasi ya? Whetẹnu wẹ n’pà hagbẹ whẹndo tọn kavi yisenọ hatọ ṣie de te gbọngodo?’ Eyin ‘mí nọ nanúmẹ,’ ayihaawe ma tin dọ haṣinṣan mítọn hẹ Jehovah po họntọn mítọn lẹ po na sinyẹn deji.—Luku 6:38; Howh. 19:17.
11. Etẹwẹ yin delẹ to aliho he mẹ mí sọgan nanú Jehovah te lẹ mẹ?
11 Aliho devo nado nọ tlúalọ wẹ nado nọ nanú Jehovah. Owe-wiwe lẹ dotuhomẹna mí nado ‘yí nuhọakuẹ mítọn lẹ do gbògbéna OKLUNỌ.’ (Howh. 3:9) ‘Nuhọakuẹ’ enẹlẹ bẹ whenu, huhlọn, po nutindo mítọn lẹ po hẹn, ehe mí sọgan desọn ojlo mẹ nado yizan to sinsẹ̀nzọn etọn mẹ. Yọpọvu lẹ lọsu sọgan plọn nado nọ nanú Jehovah. Jason he yin otọ́ de dọmọ: “Eyin whẹndo mítọn jlo na basi nunina to Plitẹnhọ Ahọluduta tọn mẹ, ovi mítọn lẹ wẹ mí nọ ze akuẹ lọ na nado zedo apotin nunina tọn lọ mẹ. Homẹ nọ hùn yé taun, na yé nọ dọ dọ, emi ‘to nunina basi na Jehovah.’” E yọnbasi dọ yọpọvu he nọ tindo ayajẹ nado nanú Jehovah lẹ na zindonukọn to mọwiwà mẹ to whenue yé na whẹ́n mẹho.—Howh. 22:6.
JEHOVAH YIN LẸNPỌN DAGBENỌ
12. Etẹwẹ e zẹẹmẹdo nado yin lẹnpọn dagbenọ?
12 Jẹhẹnu Jehovah tọn devo he nọ dọnmẹdogo wẹ lẹnpọn dagbenọ-yinyin. Etẹwẹ e zẹẹmẹdo nado yin lẹnpọn dagbenọ? Hogbe dowhenu tọn he nọ saba yin lilẹdo “lẹnpọn dagbenọ” to Lẹdogbedevomẹ Aihọn Yọyọ Tọn mẹ zẹẹmẹdo “awujonanutọ.” (Titu 3:1, 2) Mẹhe yin lẹnpọn dagbenọ ma nọ tẹkudo nuhe osẹ́n dọ lẹ ji to whelẹponu, mọjanwẹ e ma nọ yin hẹngogonọ bo ma nọ hẹnnu sinsinyẹn kavi yin fifiẹtọ do niyẹn. Kakatimọ, e nọ jọmẹ to nuyiwa etọn hẹ mẹdevo lẹ mẹ bo nọ hò ninọmẹ yetọn lẹ pọ́n. E nọ wleawufo nado dotoaina mẹdevo lẹ, bo nọ joawuna ojlo yetọn lẹ eyin e biọ domọ kakati nado tẹdo nujinọtedo etọn titi lẹ go.
13, 14. (a) Nawẹ Jehovah nọ do lẹnpọn dagbenọ-yinyin hia gbọn? (b) Etẹwẹ aliho he mẹ Jiwheyẹwhe yinuwa hẹ Lọti te plọn mí gando lẹnpọn dagbenọ-yinyin go?
13 Nawẹ Jehovah nọ do lẹnpọn dagbenọ-yinyin hia gbọn? E nọ gbọn homẹdagbe dali hò numọtolanmẹ devizọnwatọ etọn lẹ tọn pọ́n, podọ e nọ saba joawuna obiọ yetọn lẹ. Di apajlẹ, lẹnnupọndo lehe Jehovah yinuwa hẹ dawe nugbonọ lọ Lọti do ji. To whenue Jehovah basi dide nado và Sodọmi po Gomọla po sudo, e na nudọnamẹ he họnwun lẹ Lọti nado họnyi osó lẹ ji. Ṣigba na whẹwhinwhẹ́n delẹ wutu, Lọti biọgbè Jiwheyẹwhe nado sọgan họnyi lẹdo devo mẹ. Yí nukun homẹ tọn do pọ́n: Lọti to bibiọ to Jehovah si nado diọ anademẹ Etọn lẹ!—Hia Gẹnẹsisi 19:17-20.
14 To whenue mí hia otàn Lọti tọn, mí sọgan lẹndọ yise Lọti tọn ma lodo kavi dọ ewọ yin tolivẹtọ. To whenuena e yindọ Jehovah tindo nugopipe lọ nado whlẹn Lọti to fidepope, whẹwhinwhẹ́n depope ma tin dọ Lọti ni dibu. Etomọṣo, na Lọti to budi wutu, Jehovah hò numọtolanmẹ etọn lẹ pọ́n bo na ẹn dotẹnmẹ nado họnyi tòdaho devo mẹ, dile etlẹ yindọ Jehovah ko jlo nado và tòdaho enẹ lọsu sudo. (Hia Gẹnẹsisi 19:21, 22.) E họnwun dọ Jehovah ma yin hẹngogonọ kavi fifiẹtọ. E nọ joawunanu bosọ yin lẹnpọn-dagbenọ.
15, 16. Nawẹ Osẹ́n Mose tọn do lẹnpọn dagbenọ-yinyin Jehovah tọn hia gbọn? (Pọ́n yẹdide he tin to bẹjẹeji hosọ lọ tọn.)
15 Lẹnnupọndo apajlẹ lẹnpọn dagbenọ-yinyin tọn Jehovah tọn devo ji, ehe sọawuhia to Osẹ́n Mose tọn mẹ. Eyin Islaelivi de jẹhẹ́n sọmọ bọ e ma sọgan yí lẹngbọvu kavi gbọgbọẹ de do basi avọ́nunina, ewọ sọgan na owhlé kavi awhànnẹ awe. Ṣigba etẹwẹ lo, eyin Islaelivi de jẹhẹ́n sọmọ bọ e ma sọgan họ̀ awhànnẹ awe lọ lẹ? Jehovah na dotẹnmẹ Islaelivi he tin to ninọmẹ mọnkọtọn mẹ lẹ nado na linfin vude. Ṣigba, doayi nudọnamẹ titengbe ehe go: Linfin lọ ma dona yin linfin depope poun gba, ṣigba ‘linfin dagbedagbe,’ yèdọ dehe nọ yin yiyizan nado yí jonọ vivẹ́ lẹ. (Gẹn. 18:6) Nawẹ apajlẹ ehe dohia dọ Jehovah yin lẹnpọn dagbenọ gbọn?—Hia Levitiku 5:7, 11.
16 Mí ni dọ dọ hiẹ yin dopo to Islaelivi hẹntọnọ enẹlẹ mẹ. To whenue hiẹ wá gòhọtúntún lọ kọ̀n po linfin vude he a jlo na na taidi avọ́nunina lọ po, hiẹ doayi e go dọ lẹngbọvu kavi gbọgbọẹ wẹ Islaelivi he yin adọkunnọ de hẹnwa. Winyan sọgan hù we na a na mọdọ linfin emitọn ma sọ̀ nude. Ṣigba, a wá flindọ nunina he emi hẹnwa lọ họakuẹ taun to nukun Jehovah tọn mẹ. Etẹwutu? Na linfin dagbe hugan lọ wẹ Jehovah biọ. To aliho mayin tlọlọ tọn mẹ, nuhe Jehovah to didọna Islaelivi he yin hẹntọnọ klókló lẹ wẹ yindọ: ‘N’yọnẹn dọ mì ma sọgan nanú sọ̀ mẹhe pò lẹ, amọ́ n’yọnẹn dọ nuhe go huhlọn mìtọn pé hugan lọ wẹ mì to nina mi.’ Na nugbo tọn, Jehovah nọ do lẹnpọn dagbe hia gbọn dogbó po ninọmẹ devizọnwatọ etọn lẹ tọn po hihopọn dali.—Psalm 103:14.
17. Sinsẹ̀n-bibasi wunmẹ tẹwẹ Jehovah nọ kẹalọyi?
17 Homẹmiọnnamẹnu wẹ e yin na mí nado yọnẹn dọ Jehovah nọ gbọn lẹnpọn dagbe dali kẹalọyi sinsẹ̀n-bibasi he mí yí alindọn lẹpo do basi hlan ẹn. (Kọl. 3:23) Mẹmẹyọnnu mẹhomẹ Italie-nu de he nọ yin Constance dọmọ: “Nado nọ dọhona mẹdevo lẹ gando Mẹdatọ ṣie go wẹ n’yiwanna hugan. Nuhewutu n’zindonukọn nado nọ dọyẹwheho podọ nado nọ deanana plọnmẹ Biblu lẹ niyẹn. Ṣigba to whedelẹnu, e nọ vẹna mi dọ agbasamalo ṣie ma nọ hẹn ẹn yọnbasi na mi nado wà hugan mọ. Amọ́, n’nọ flindọ Jehovah yọ́n nugopipe ṣie lẹ podọ ewọ yiwanna mi bo yọ́n pinpẹn nuhe n’penugo nado wà lẹ tọn.”
HODO APAJLẸ LẸNPỌN DAGBENỌ-YINYIN TỌN JEHOVAH TỌN
18. Etẹwẹ yin dopo to aliho he mẹ mẹjitọ lẹ sọgan hodo apajlẹ Jehovah tọn te lẹ mẹ?
18 Nawẹ mí sọgan hodo apajlẹ lẹnpọn dagbenọ-yinyin tọn Jehovah tọn gbọn? Mì gbọ mí ni vọ́ nulẹnpọn do lehe Jehovah yinuwa hẹ Lọti do ji. Jehovah wẹ tindo aṣẹpipa lẹpo; etomọṣo, e yí homẹdagbe do dotoaina Lọti dile ewọ to numọtolanmẹ etọn lẹ dọ. Humọ, Jiwheyẹwhe yinuwa sọgbe hẹ obiọ Lọti tọn. Eyin mẹjitọ de wẹ hiẹ yin, be a sọgan hodo apajlẹ Jehovah tọn ya? Vlavo, hiẹ sọgan nọ dotoaina obiọ ovi towe lẹ tọn, podọ enẹgodo, hiẹ sọgan yinuwa sọgbe hẹ ojlo yetọn eyin enẹ ma hẹn nude gble. Nawẹ a sọgan wà enẹ gbọn? Atọ̀họ̀-Nuhihọ́ lọ Tọn 1er septembre 2007 dohia dọ mẹjitọ lẹ sọgan nọ kàn pọndohlan ovi yetọn lẹ tọn biọ to whenue yé to osẹ́n he na yin hihodo to whẹndo lọ mẹ lẹ zedai. Di apajlẹ, mẹjitọ lẹ nọ basi dide gando ogàn he mẹ yé jlo dọ ovi yetọn lẹ ni nọ lẹkọwa whégbè te go, podọ e họnwun dọ mẹjitọ lẹ tindo jlọjẹ nado wàmọ. Etomọṣo, mẹjitọ Klistiani lẹ sọgan dotoai bo sè nuhe ovi yetọn lẹ lẹn gando gànmẹ he yin dide lọ go. To whẹho delẹ mẹ, mẹjitọ lẹ sọgan basi vọjlado gando gànmẹ he yé ko de lọ go eyin ehe ma tùnafọ nunọwhinnusẹ́n Biblu tọn lẹ ji. To whenue mẹjitọ lẹ hò nuhe ovi yetọn lẹ lẹn gando osẹ́n he yin zizedai to whẹndo lọ mẹ lẹ go pọ́n, ehe nọ gọalọna ovi lẹ nado mọnukunnujẹ whẹwhinwhẹ́n he wutu osẹ́n lọ lẹ do yin zizedai mẹ bo setonuna yé.
19. Nawẹ mẹho lẹ sọgan dovivẹnu nado nọ hodo apajlẹ lẹnpọn dagbenọ-yinyin tọn Jehovah tọn gbọn?
19 Mẹho agun tọn lẹ nọ dovivẹnu nado hodo apajlẹ lẹnpọn dagbenọ-yinyin tọn Jehovah tọn gbọn ninọmẹ yisenọ hatọ yetọn lẹ tọn hihopọn dali. Flindọ, Jehovah nọ yí nukun nujọnu tọn do pọ́n avọ́sinsan Islaelivi he tlẹ yin hẹntọnọ klókló lẹ tọn. Mọdopolọ to egbehe, mẹmẹsunnu po mẹmẹyọnnu delẹ po ma sọgan wà nususu to lizọnyizọn lọ mẹ, vlavo na manọna kavi mẹhowhe wutu. Etẹwẹ sọgan yin wiwà eyin Klistiani hatọ vivẹ́ enẹlẹ jẹflumẹ na ninọmẹ enẹ wutu? Mẹho lẹ sọgan gbọn homẹdagbe dali vọ́ jide na yé dọ Jehovah yiwanna yé, na nuhe go yé pé lẹpo wẹ yé to wiwà.—Malku 12:41-44.
20. Be lẹnpọn dagbenọ-yinyin zẹẹmẹdo yonu dindọn do godo to sinsẹ̀nzọn Jiwheyẹwhe tọn mẹ wẹ ya? Basi zẹẹmẹ.
20 Na nugbo tọn, lẹnpọn dagbenọ-yinyin ma zẹẹmẹdo nado nọ wàlẹblanuna mídetiti gbọn yonu dindọn do godo to sinsẹ̀nzọn Jiwheyẹwhe tọn mẹ dali gba. (Mat. 16:22) Mí ma dona yí lẹnpọn dagbenọ-yinyin do dó whẹjijọ nado nọ yí gbigbọnu lẹ do gbẹ̀n asajikàn. Kakatimọ, mímẹpo wẹ dona nọ “vánkan vẹkuvẹku” nado nọgodona Ahọluduta lọ. (Luku 13:24) Na taun tọn, mí dona dovivẹnu nado hẹn jlẹkajininọ go gando nunọwhinnusẹ́n awe go. Tintan whẹ́, mí nọ vánkan to sinsẹ̀nzọn mítọn mẹ bo ma nọ dọ̀n yonu do godo. Ṣigba to alọ devo mẹ, mí nọ flindọ Jehovah ma nọ biọ mí nuhe zẹ̀ nugopipe mítọn go. Eyin mí na ẹn nuhe go mí pé lẹpo, mí sọgan deji dọ mí na hẹn homẹ etọn hùn. Be e ma yin ayajẹnu wẹ e yin nado sẹ̀n Klunọ mọnkọtọn he nọ yọ́n pinpẹn sinsẹ̀n-bibasi mítọn tọn bosọ yin lẹnpọn dagbenọ ya? To hosọ he bọdego mẹ, mí na gbadopọnna jẹhẹnu Jehovah tọn he dọnmẹdogo awe devo lẹ.—Ps. 73:28.
[Kanbiọ hukan lẹ tọn]
[Yẹdide to weda 13]
Islaelivi lẹ yin tulina nado hodo apajlẹ alọtútlú tọn Jehovah tọn (Pọ́n hukan 9tọ)
[Yẹdide to weda 14]
‘Yí nuhọakuẹ towe lẹ do gbògbéna OKLUNỌ.’—Howh. 3:9 (Pọ́n hukan 11tọ)
[Yẹdide to weda 14]
“Nudepope he mì to wiwà, mì nọ wà ẹ po alindọn lẹpo po.”—Kọl. 3:23 (Pọ́n hukan 17tọ)
