1, 2. Ano ang kahigayunan sang mga abyan ni Jehova?

“MGA 35 ka tuig na kami nga mag-asawa,” siling sang Cristiano nga si Monika. “Kilalahay gid kami sing maayo sang akon bana. Pero bisan subong, may bag-o nga mga butang gihapon kami nga mahibaluan sa kada isa!” Wala sing duhaduha nga amo man sini ang nagakatabo sa madamo nga pag-asawahay kag pag-abyanay.

² Nalipay kita sa pagkilala sing maayo sa aton mga hinigugma. Pero sa tanan nga pag-abyanay nga mahimo naton pabakuron, importante gid ang aton pagpakig-abyan kay Jehova. Indi gid naton mahibaluan ang tanan parte sa iya. (Roma 11:33) Gani may kahigayunan kita kag kalipay sa pagpabakod sang aton apresasyon sa mga kinaiya ni Jehova sa walay katubtuban.—Man. 3:11.

3. Ano ang binagbinagon naton sa sini nga artikulo?

³ Ginbuligan kita sang nagligad nga artikulo nga mapabakod ang aton apresasyon sa mga kinaiya ni Jehova nga madali palapitan kag wala sing pinasulabi. Binagbinagon naton karon ang duha pa ka hiligugmaon nga kinaiya ni Jehova—ang iya kaalwan kag pagkamakatarunganon. Paagi sini, mahibaluan naton sing bug-os nga “ang GINOO maayo sa tanan, kag ang iya mahinoklogon nga mga kalooy sa ibabaw sang iya tanan nga binuhatan.”—Sal. 145:9.

4. Ano ang kahulugan sang matuod nga kaalwan?

⁴ Ano ang kaalwan? Ang sabat makita sa ginsiling ni Jesus sa Binuhatan 20:35: “May kapin nga kalipay sa paghatag sangsa pagbaton.” Paagi sa sining simple nga pinamulong, ginpadaku ni Jesus ang kahulugan sang matuod nga kaalwan. Ang tawo nga maalwan handa maghatag sang iya tion, kusog, kag mga pagkabutang para sa kaayuhan sang iban—kag ginahimo niya ini sing malipayon. Huo, ang kaalwan ginatakus, indi sa kadakuon sang regalo, kundi sa motibo sang naghatag. (Basaha ang 2 Corinto 9:7.) Wala na sing mas maalwan pa sangsa aton “malipayon nga Dios,” si Jehova.—1 Tim. 1:11.

5. Paano ginpakita ni Jehova ang kaalwan?

 ⁵ Paano ginpakita ni Jehova ang kaalwan? Ginaaman niya ang mga kinahanglanon sang tanan nga tawo, lakip na ang mga wala pa nagasimba sa iya. Huo, “ang GINOO maayo sa tanan.” “Ginapabutlak niya ang iya adlaw sa mga tawo nga malaut kag sa mga maayo kag nagapaulan sa mga tawo nga matarong kag di-matarong.” (Mat. 5:45) Amo nga sang nakighambal si apostol Pablo sa mga di-tumuluo, nakasiling sia nga si Jehova “naghimo . . . sang maayo, nga nagahatag sa inyo sang ulan gikan sa langit kag sang mapatubason nga mga panag-on, nga nagahatag sang bugana nga kalan-on kag nagapuno sang inyo tagipusuon sang kasadya.” (Binu. 14:17) Maathag nga si Jehova maalwan sa tanan nga tawo.—Luc. 6:35.

6, 7. (a) Kay sin-o mga kinahanglanon ang labi nga nalipay si Jehova sa pag-aman? (b) Maghatag sing halimbawa kon paano ginaamanan ni Jehova ang iya matutom nga mga sumilimba.

⁶ Si Jehova labi nga nalipay sa pag-aman sang mga kinahanglanon sang iya matutom nga mga sumilimba. Si Hari David nagsiling: “Nanginpamatan-on ako, kag karon tigulang na; apang wala ako makakita nga ang matarung ginpabayaan ukon ang iya kaliwat nga nagapakilimos sing kalan-on.” (Sal. 37:25) Madamo nga matutom nga Cristiano ang nakaeksperiensia sini nga pag-atipan ni Jehova. Binagbinaga ang isa ka halimbawa.

⁷ Sang nagligad nga mga tinuig, si Nancy nga isa ka bug-os tion nga ministro, may daku nga problema. “Kinahanglan ko ang 66 ka dolyar para sa akon arkila, nga balayran na sa masunod nga adlaw,” siling ni Nancy. “Indi ko kabalo kon diin ko pangitaon ina nga kuarta. Ginpangamuyo ko ini nga problema, kag dayon nagkadto sa akon obra bilang waitress. Wala gid ako nag-ekspektar nga makabaton sing madamo nga tip sina nga gab-i, kay kinaandan na nga indi gawa masako sa sina nga mga tion. Pero madamo sing kostumer ang restawran sina nga gab-i. Pagkatapos sang akon obra, gin-isip ko kon pila tanan ang akon tip, kag nakalab-ot ini sa 66 ka dolyar.” Kumbinsido si Nancy nga maalwan nga gin-aman ni Jehova kon ano gid ang iya kinahanglanon.—Mat. 6:33.

8. Ano ang pinakamaayo nga regalo ang maalwan nga gin-aman ni Jehova?

⁸ Mahimo man matigayon sang bisan sin-o ang pinakamaayo nga regalo nga maalwan nga gin-aman ni Jehova. Ano ini? Amo ini ang halad nga gawad sang iya Anak. Si Jesus nagsiling: “Ginhigugma gid sang Dios ang kalibutan amo nga ginhatag niya ang iya bugtong nga Anak, agod ang tagsatagsa nga nagatuo sa iya indi malaglag kundi makatigayon sang kabuhi nga walay katapusan.” (Juan 3:16) Ang konteksto sini nagapahangop nga “ang kalibutan” nagapatuhoy sa mga tawo. Huo, ini nga regalo ni Jehova bukas sa tanan nga magabaton sini. Ang tanan nga nagatuo kay Jesus makatigayon sing kabuhi nga bug-os—ang kabuhi nga wala sing katapusan! (Juan 10:10) Amo ini ang pinakadaku nga pamatuod nga si Jehova maalwan.

9. Paano naton mailog ang kaalwan ni Jehova?

 ⁹ Paano naton mailog ang kaalwan ni  Jehova? Si Jehova “nagahatag sa aton sang tanan nga butang agod malipay kita”; gani dapat man kita mangin “handa sa pagpaambit” sa iban para malipay sila. (1 Tim. 6:17-19) Nalipay kita nga gamiton ang aton mga pagkabutang sa paghatag sing regalo sa aton mga hinigugma kag sa pagbulig sa mga nagakinahanglan. (Basaha ang Deuteronomio 15:7.) Ano ang makabulig sa aton nga mangin maalwan pirme? Ang pila ka Cristiano nagdesisyon nga kada makabaton sila sing regalo, nagapangita man sila sing kahigayunan sa paghatag sing regalo sa iban. Sa Cristianong kongregasyon karon, madamo sing maalwan nga kauturan.

10. Ano ang isa sa pinakamaayo nga paagi para mangin maalwan?

¹⁰ Ang isa sa pinakamaayo nga paagi para mangin maalwan amo ang paggamit sang aton tion kag kusog sa pagbulig kag pagpalig-on sa iban. (Gal. 6:10) Para mahibaluan kon ano ang aton ginahimo sa sini nga bahin, mahimo naton pamangkuton ang aton kaugalingon: ‘Nabatyagan bala sang iban nga handa ako magbulig kag magpamati sa ila? Kon ang isa magpangabay sa akon nga buligan sia, handa bala ako magbulig? San-o ko ulihi nga ginhatagan sing sinsero nga komendasyon ang akon kapamilya ukon masigkatumuluo?’ Kon ‘ugalion naton ang paghatag,’ magasuod pa gid kita kay Jehova kag sa aton mga abyan.—Luc. 6:38; Hulu. 19:17.

11. Ano ang pila ka pamaagi para mangin maalwan kita kay Jehova?

 ¹¹ Mahimo man kita mangin maalwan kay Jehova. “Padunggi ang GINOO sang imo mga pagkabutang,” laygay sang Kasulatan. (Hulu. 3:9) Ini nga “mga pagkabutang” nagalakip sang aton tion, kusog, kag mga ginapanag-iyahan, nga sarang gid naton magamit sa pag-alagad sa iya. Bisan ang mga kabataan makatuon nga mangin maalwan kay Jehova. “Kon ang amon pamilya may inughatag nga donasyon sa Kingdom Hall, ang amon kabataan ang ginapahulog namon sang kuarta sa donation box,” siling sang ila amay nga si Jason. “Nalipay gid sila, kay samtang ginahulog  nila ang donasyon, ‘nagahatag sila kay Jehova.’” Ang mga kabataan nga nakaeksperiensia sang kalipay sa paghatag kay Jehova masami nga nangin maalwan gihapon kay Jehova sang daku na sila.—Hulu. 22:6.

12. Ano ang pagkamakatarunganon?

¹² Ang isa pa sa hiligugmaon nga mga kinaiya ni Jehova amo ang pagkamakatarunganon. Ano ang pagkamakatarunganon? Sa orihinal nga lenguahe, ang tinaga nga masami gina-translate “makatarunganon” sa Bag-ong Kalibutan nga Badbad literal nga nagakahulugan sing “pagpasugot.” (Tito 3:1, 2.) Ang makatarunganon nga tawo wala nagapamilit nga sundon pirme kon ano ang nasulat sa kasuguan. Indi man sia estrikto katama ukon maparas. Sa baylo, ginatinguhaan niya nga mangin mainayuhon sa iban, nga ginabinagbinag ang ila mga kahimtangan. Handa sia magpamati sa iban, kag kon nagakaigo, nagapasugot sa ila mga pangabay kag ginabag-o ang iya mga ginapatuman.

13, 14. (a) Paano ginapakita ni Jehova ang pagkamakatarunganon? (b) Ano ang matun-an naton parte sa pagkamakatarunganon sa pagpakig-angot sang Dios kay Lot?

¹³ Paano ginapakita ni Jehova ang pagkamakatarunganon? Mainayuhon niya nga ginahatagan sing konsiderasyon ang balatyagon sang iya mga alagad, kag ginabinagbinag pirme ang ila mga pangabay. Halimbawa, binagbinaga kon paano ginpakig-angutan ni Jehova ang matarong nga si Lot. Sang nagdesisyon si Jehova nga laglagon ang mga siudad sang Sodoma kag Gomorra, ginhatagan niya si Lot sing maathag nga instruksion nga magpalagyo sa kabukiran. Pero bangod sa pila ka rason, nangabay si Lot nga pasugtan sia nga malagyo sa iban nga lokasyon. Hunahunaa lamang—ginpangabay ni Lot si Jehova nga bag-uhon ang Iya instruksion!—Basaha ang Genesis 19:17-20.

¹⁴ Mahapos lang isiling sang iban nga si Lot maluya ukon indi matinumanon. Kay man, ngaa abi mahadlok sia kay luwason man sia ni Jehova sa bisan diin nga lugar nga kadtuan niya? Pero amo ini ang punto: Nahadlok si Lot—amo gid sini ang iya nabatyagan. Nahangpan ini ni Jehova, gani nagpasugot sia nga malagyo si Lot sa isa pa ka siudad nga gintuyo Niya kuntani nga laglagon. (Basaha ang Genesis 19:21, 22.) Maathag nga si Jehova indi tuman ka estrikto. Nagapasugot man sia kag makatarunganon.

15, 16. Paano ginpakita sang Mosaikong Kasuguan ang pagkamakatarunganon ni Jehova? (Tan-awa ang piktyur sa umpisa sang artikulo.)

¹⁵ Binagbinaga ang isa pa ka halimbawa sang pagkamakatarunganon ni Jehova nga makita sa Mosaikong Kasuguan. Kon indi masarangan sang isa ka Israelinhon ang paghalad sang kordero ukon kanding, mahimo sia maghalad sing duha ka tukmo ukon duha ka salampati. Pero paano kon ang isa ka Israelinhon imol katama, amo nga indi niya masarangan bisan ang duha ka salampati? Sa sini nga sitwasyon, ginatugutan ni Jehova ang Israelinhon sa paghalad sang diutay nga harina. Pero talupangda ining importante nga detalye: Indi lang ini basta harina, kundi isa ka “harina nga mapino,” nga ginagamit para sa dungganon nga mga bisita. (Gen. 18:6) Paano ginapakita sini nga halimbawa nga si Jehova makatarunganon?—Basaha ang Levitico 5:7, 11.

¹⁶ Bueno, hunahunaa nga isa ikaw ka Israelinhon kag imol katama. Pag-abot mo sa tabernakulo dala ang diutay nga harina subong halad, nakita mo ang manggaranon nga mga Israelinhon nga nagadala sing mga sapat. Mahimo nga mahuya ka sa imo daw indi salapakon nga halad nga harina. Dayon nadumduman mo nga para kay Jehova, importante ang imo halad. Ngaa? Bangod ginpatuman ni Jehova nga ang harina dapat nga mataas sing kalidad. Gani, daw pareho lang nga ginasilingan ni Jehova ang imol nga mga Israelinhon: ‘Nahangpan ko nga indi mo masarangan ang ginahalad sang iban, pero nahibaluan ko man nga ginahatag mo sa akon ang imo pinakamaayo.’ Huo, nagpakita si Jehova sing pagkamakatarunganon paagi sa pagpakita sing konsiderasyon  sa mga limitasyon kag kahimtangan sang iya mga alagad.—Sal. 103:14.

17. Ano nga sahi sang pag-alagad ang mapat-od naton nga ginabaton ni Jehova?

 ¹⁷ Malugpayan kita sa paghibalo nga bangod makatarunganon si Jehova, ginabaton niya ang aton bug-os kalag nga pag-alagad. (Col. 3:23) Ang may edad na nga sister sa Italya nga si Constance nagsiling: “Halin sang una nanamian gid ako makighambal sa iban tuhoy sa akon Manunuga. Amo nga nagabantala gihapon ako kag nagadumala sing mga pagtuon sa Biblia. Kon kaisa, naluyahan ako kay indi na ako makahimo sing dugang pa bangod sa akon panglawas. Pero nahangpan ko nga nahibaluan ni Jehova ang akon mga limitasyon, kag ginahigugma niya ako kag ginapabaloran ang akon masarangan.”

18. Ano ang isa ka paagi nga mailog sang mga ginikanan ang halimbawa ni Jehova?

¹⁸ Paano naton mailog ang pagkamakatarunganon ni Jehova? Hunahunaa liwat kon paano ginpakig-angutan ni Jehova si Lot. Si Jehova ang may awtoridad; pero mainayuhon sia nga namati sang ginpabutyag ni Lot ang iya balatyagon. Kag ginpamatian sang Dios ang pangabay ni Lot. Kon ikaw isa ka ginikanan, mailog mo bala ang halimbawa ni Jehova? Pamatian mo bala ang pangabay sang imo kabataan kag kon nagakaigo, pasugtan sila? Ang Septiembre 1, 2007, nga isyu sang Ang Lalantawan nagsiling nga mahimo istoryahon sang pila ka ginikanan ang ila kabataan parte sa mga pagsulundan sa balay. Halimbawa, mahimo magpatuman ang mga ginikanan sing curfew, kag may kinamatarong gid sila sa pagpatuman kon ano nga oras dapat magpauli ang ila kabataan. Bisan pa sini, mahimo pamatian sang Cristiano nga mga ginikanan ang opinyon sang ila kabataan parte sa sina nga curfew. Sa pila ka kahimtangan, mahimo magdesisyon ang mga ginikanan nga i-adjust ang curfew kon wala man lang sing may nalapas nga mga prinsipio sa Biblia. Mahimo makita sang mga ginikanan nga kon binagbinagon nila ang pagtamod sang ila kabataan parte sa mga pagsulundan sa balay, mas maintiendihan sang mga kabataan ang mga pagsulundan kag tumanon ini.

19. Paano mailog sang mga gulang ang pagkamakatarunganon ni Jehova?

¹⁹ Ginapanikasugan man sang mga gulang nga ilugon ang pagkamakatarunganon ni Jehova paagi sa paghatag sing konsiderasyon sa kahimtangan sang ila mga kauturan. Dumduma nga ginapabaloran ni Jehova bisan ang halad sang imol nga mga Israelinhon. Sa karon, limitado man ang mahimo sang pila ka kauturan sa pagministeryo, ayhan bangod sang balatian ukon katigulangon. Ano abi kon ini nga mga utod maluyahan bangod sang ila mga limitasyon? Mahimo mainayuhon sila nga pasaligon sang mga gulang nga ginahigugma sila ni Jehova bangod ginahatag nila ang ila pinakamaayo.—Mar. 12:41-44.

20. Ang pagkamakatarunganon bala nagakahulugan nga diutay lang ang aton himuon sa pag-alagad sa Dios? Ipaathag.

²⁰ Siempre, ang pagkamakatarunganon wala nagakahulugan nga diutay lang ang aton himuon sa pag-alagad sa Dios bangod naluoy kita sa aton kaugalingon. (Mat. 16:22) Indi naton luyag magpahapos kag dayon magsiling nga nangin makatarunganon lang kita. Sa baylo, tanan kita kinahanglan nga ‘magpanikasog sing lakas’ sa pagsuporta sa mga intereses sang Ginharian. (Luc. 13:24) Matuod, gusto gid naton nga mangin balanse sa sining duha ka prinsipio. Nagapanikasog kita kag wala nagapabuyanbuyan sa aton pag-alagad. Pero, ginadumdom man naton nga si Jehova wala nagapangabay sang indi naton masarangan. Kon ginahatag naton ang pinakamaayo sa iya, mapat-od naton nga malipay sia. Indi bala nalipay gid kita sa pag-alagad sa sining mainapresyahon kag makatarunganon nga Agalon? Sa masunod nga artikulo, binagbinagon naton ang duha pa ka hiligugmaon nga kinaiya ni Jehova.—Sal. 73:28.