1, 2. Paradaiso ai dahaka do ita karaia?

 LAGANI 35 ia headava vadaeni taihu ta ladana, Monika ia gwau: “Lau bona egu adavana be ta ta emai kara ai diba namonamo. To, ena be lagani momo ai headava vadaeni, ta ta ai do dibaia noho!” Momokani headava taudia bona iseda turadia momo huanai unai ia vara danu.

² Eda lalokau taudia edia kara ita diba namonamo neganai, eda hetura karana idia ida ita moalelaia. To, Iehova Dirava tura henia karana ese unai ia hereaia. Momokani, iena aonega bona kara ibounai ita lalopararalaia diba lasi. (Roma 11:33) To, Paradaiso ai ita be mai moale ida Iehova ena kara namodia momo do ita dibaia.—Had. 3:11.

3. Hari, dahaka do ita stadilaia?

³ Wiki gunana ena stadi ai, Iehova ena kara namodia rua ita herevalaia. Ita itaia Iehova ita hereva henia diba, bona Ia ese taunimanima ibounai ia kara namo henidia. Hari, ita ese Iehova ena kara namodia ma rua—hariharibada bona laloa maoromaoro karana—do ita herevalaia. Unai ese ita do ia durua, ita laloparara “Lohiabada ena kara be namo, taunimanima ibounai dekenai. Ia karaia gaudia ibounai dekenai iena bogahisihisi ia henia.”—Sal. 145:9.

4. Hariharibada karana ena anina be dahaka?

⁴ Hariharibada karana ena anina be dahaka? Haere be Iesu ena hereva Kara 20:35 ai, ia gwau: “Henia kara ena moale be bada, to abia kara ena moale be maragi.” Iesu ena hereva ese hariharibada karana ena anina ia hahedinaraia. Hariharibada tauna be mai moale ida ena nega, goada, bona kohu ia gaukaralaia ma haida ia durua totona. Herevana tau ta ese ia henia harihari gauna be bada eiava maragi, to bema ia be mai ena ura ibounai ida unai ia henia, ita  gwau diba ia be hariharibada tauna. (2 Korinto 9:7 duahia.) Iehova, iseda “moale Diravana” be hariharibada tauna, bona ta be ia bamona lasi.—1 Tim. 1:11.

5. Edena dala ai Iehova ese hariharibada karana ia hahedinaraia?

⁵ Edena dala ai Iehova ese hariharibada karana ia hahedinaraia? Baibel ia gwau: “Lohiabada ena kara be namo, taunimanima ibounai dekenai.” Ia ese idia ibounai—ia idia do diba lasi taudia danu—edia dabu gaudia ia henia. Ia ese “kara dika taudia bona kara namo taudia latanai dina ena diari ia henia noho. Bona medu danu be kara maoromaoro bona kara maoromaoro lasi taudia latanai ia siaia diho.” (Mat. 5:45) Unai dainai, Paulo be Keristani lasi taudia ia hereva henia neganai, ia gwau Iehova be idia dekenai “gau namodia ia karaia.” Idia dekenai ‘medu bona aniani momo negadia ia henia, vadaeni aniani momo idia abia bona edia kudouna ia hamoalea.’ (Kara 14:17) Oibe, Iehova be taunimanima ibounai dekenai hariharibada karana ia hahedinaraia.—Luka 6:35.

6, 7. (a) Iehova ia ura daidia edia dabu gaudia ia henia? (b) Dirava ese ena hesiai taudia ia naria dalana ena ekspiriens ta oi gwauraia.

⁶ Iehova ia ura ena hesiai taudia edia dabu gaudia ia henia. King Davida ia gwau: “Gunaguna lau be mero, harihari lau be buruka, to nega ta kara maoromaoro tauna ta be Dirava ese ia rakatania, a? Lasi momokani, nega ta lau itaia lasi. Bona tau namona ena natuna be nega ta idia hitolo, a? O iena natuna ese aniani totona taunimanima idia noia, a? Lasi, nega ta lau itaia lasi. Lasi momokani.” (Sal. 37:25) Dirava ena hesiai taudia momo idia mamia edia mauri lalonai Iehova ese idia ia naria. Mani ekspiriens ta ita itaia.

⁷ Lagani haida gunanai painia taihu ta ladana, Nancy, be hekwakwanai ta ia davaria. Ia gwau: “Lau rentaia ruma ena davana be K145.00, bona kerukeru lau henia be namo. To, lau diba lasi edena bamona unai moni do lau abia. Egu lalohekwarahi be Iehova dekenai lau gurigurilaia murinai, egu weita gaukara dekenai lau lao. Nega momo unai hanuaboi ai kastoma momo idia mai lasi. To, lau hoa badina kastoma momo idia mai, bona egu gaukara namona dainai lau dekenai moni sisina idia henia. Gaukara murinai, idia henia moni lau duahia neganai, ibounai be K145.00.” Nancy ia abia dae momokani, Iehova ena hariharibada dainai, ia ese ena dabu gauna ia davaria.—Mat. 6:33.

8. Iehova ena harihari gauna hereadaena be dahaka?

⁸ Iehova ena harihari gauna hereadaena be taunimanima ibounai ese idia abia diba. Unai be dahaka? Unai be ena Natuna ena mauri davalaia boubouna. Iesu ia gwau: “Dirava ese tanobada ia lalokau henia bada dainai, ena natuna korikorina ia henia, unai amo ia idia abidadama henia taudia ibounai be do idia mase lasi, to mauri hanaihanai do idia abia.” (Ioa. 3:16) Inai siri ai, “tanobada” be taunimanima ia herevalaia. Oibe, Iehova ese ia henia harihari gauna be idia ura taudia ibounai ese idia abia diba.  Iesu idia abidadama henia taudia ibounai be mauri hanaihanai do idia abia! (Ioa. 10:10) Unai ese ia hamomokania Iehova be hariharibada Diravana.

9. Edena dala ai Iehova ena hariharibada karana ita tohotohoa diba?

 ⁹ Edena dala ai Iehova ena hariharibada karana ita tohotohoa diba? Iehova ese “ita dekenai gau momo herea ia henia ita moalelaia totona.” Unai dainai, namona be ita dekenai idia noho gaudia be ma haida dekenai ita “haria,” unai amo idia danu idia moale diba. (1 Tim. 6:17-19) Hegeregere, iseda famili o turadia dekenai harihari gaudia ita henia bona idia dabu taudia ita durua. (Deuteronomi 15:7 duahia.) Dahaka ese ita do ia durua, hariharibada karana ita hahedinaraia noho totona? Keristani taudia haida be inai bamona idia karaia: Bema ta ese idia dekenai harihari gauna ta ia henia, idia danu be dala idia tahua ma ta dekenai harihari gauna ta idia henia totona. Keristani kongrigeisen lalonai, hariharibada karana idia hahedinaraia tadikaka taihu momo idia noho.

10. Edena dala ma ta ai hariharibada karana ita hahedinaraia diba?

¹⁰ Hariharibada karana ita hahedinaraia dalana ta be, eda nega bona goada ita gaukaralaia ma haida ita durua bona hagoadaia totona. (Gal. 6:10) Oi be unai bamona kara oi hahedinaraia, a? Namona be sibona oi nanadaia: ‘Lau hahedinaraia lau ura ma haida edia lalohekwarahi herevadia lau kamonai, a? Bema ta ia ura ia lau durua gau ta ai karaia totona o ia totona gau ta do lau abia, mai ura ida unai lau karaia, a? Egu famili eiava kongrigeisen ai ta ese gaukara namona ia karaia dainai, ia dekenai hanamoa herevana lau gwauraia, a?’ Bema ‘henia karana ita manadalaia,’ eda hetura karana Iehova bona eda turadia ida do ita moalelaia.—Luka 6:38; Aon. 19:17.

11. Edena dala ma haida ai Iehova dekenai hariharibada karana ita hahedinaraia diba?

  ¹¹ Ita ese Iehova dekenai hariharibada karana ita hahedinaraia diba danu. Baibel ia gwau: “Oiemu [“dava bada kohudia,” NW] be Lohiabada dekenai do oi henia.” (Aon. 3:9) Unai “dava bada kohudia” be iseda nega, goada, moni o kohu. Unai gaudia ita gaukaralaia diba Basileia ena gaukara idauidau ita durua totona. Natudia maragidia danu ita hadibaia diba Iehova dekenai hariharibada karana idia hahedinaraia totona. Tama ta ladana, Jason ia gwau: “Kingdom Hall ai emai famili be kontribusen moni ai ura atoa neganai, emai natudia ese unai moni be maua lalonai idia udaia. Unai idia moalelaia badina moni idia udaia neganai, unai be hegeregere idia be Iehova dekenai harihari gauna ta idia henia.” Bema natuna maragina be Iehova dekenai harihari gauna henia karana ia manadalaia, ia bada neganai do ia karaia noho.—Aon. 22:6.

12. Laloa maoromaoro karana ena anina be dahaka?

¹² Iehova ena kara namona ma ta be, laloa maoromaoro karana. Laloa maoromaoro karana ena anina be dahaka? (Tito 3:1, 2) Ia laloa maoromaoro tauna be ma haida ia doria lasi taravatu maragimaragi ibounai idia badinaia totona, bona ia kara auka henidia lasi. To, mai hebogahisi ida ia kara henidia, bona edia noho dalana ia laloa. Danu, mai ena ura ida edia lalohadai ia kamonai, bona bema edia lalohadai be maoro, ia abia dae.

13, 14. (a) Edena dala ai Iehova ese laloa maoromaoro karana ia hahedinaraia? (b) Dirava ese Lota ia kara henia dalana amo dahaka ita dibaia?

¹³ Edena dala ai Iehova ese laloa maoromaoro karana ia hahedinaraia? Iehova be ena hesiai taudia edia hemami ia laloa bona nega momo edia noinoi gaudia ia henia. Hegeregere, Iehova ese kara maoromaoro tauna Lota ia kara henia dalana mani ita laloa. Iehova ia ura Sodoma bona Gomora do ia hadikaia neganai, ia ese Lota ia hamaoroa ororo dekenai do ia heau lao. To, badina haida dainai Lota ia noinoi hanua ma ta dekenai do ia heau lao. Mani oi laloa, Lota be Iehova ia noia ena lalohadai ia haidaua totona!—Genese 19:17-20 duahia.

¹⁴ Unai sivarai oi duahia neganai, reana oi laloa Lota be ia gwau-edeede eiava ena abidadama ia manoka. Herevana Lota be edeseniai ia noho, to Iehova ese ia hamauria diba, unai dainai Lota ia gari be anina lasi. To, Lota be ia gari bona Iehova ese ena hemami ia laloa bada. Unai dainai, gwaumaoro ia henia ia ura hanuana dekenai do ia heau lao, ena be guna Iehova ia ura unai hanua do ia hadikaia danu. (Genese 19:21, 22 duahia.) Oibe, Iehova be ia kara auka lasi bona ma haida ia doria lasi, to nega ibounai laloa maoromaoro karana ia hahedinaraia.

15, 16. Edena dala ai Mose ena Taravatu ese Iehova ena laloa maoromaoro karana ia hahedinaraia? (Laulau ginigunana itaia.)

¹⁵ Mose ena Taravatu ese Iehova ena laloa maoromaoro karana ia hahedinaraia danu. Hegeregere, bema Israela tauna ta be ia ogogami dainai mamoe o nanigosi ta ia bouboulaia diba lasi, vadaeni ia ese kerea rua o pune rua ia bouboulaia diba. To, bema ta be ia ogogami momokani dainai pune rua do ia bouboulaia diba lasi be edena bamona? Unai neganai, Iehova ese gwaumaoro ia henia paraoa sisina ia bouboulaia totona. To, namona be ia henia paraoa be “paraoa namona,” idia matauraia bada vadivadi taudia dekenai idia henia gauna. (Gen. 18:6) Edena dala ai unai sivarai ese Iehova ena laloa maoromaoro karana ia hahedinaraia?—Levitiko 5: 7, 11 duahia.

¹⁶ Mani oi laloa, oi be ogogami Israela tauna ta. Dubu helaga dekenai oi ginidae neganai, oi itaia taga Israela taudia haida be animal idia mailaia, to oi be paraoa sisina sibona oi mailaia. Reana oi be do oi hemarai bada. To namona be oi laloatao, Iehova ena matanai oi henia boubou gauna be mai anina bada. Dahaka dainai? Badina Taravatu henunai Iehova ia  ura “paraoa namona” do oi bouboulaia. Unai be hegeregere Iehova be ogogami Israela taudia ia hamaoroa: ‘Lau diba umui henia boubou gauna be ma haida edia bamona lasi, to danu lau diba umui be mai emui ura ida inai boubou gauna umui henia.’ Oibe, inai sivarai ese ia hahedinaraia Iehova be laloa maoromaoro tauna, badina ia laloparara ena hesiai taudia edia goada be mai ena hetoana bona edia noho daladia be idauidau.—Sal. 103:14.

17. Iehova ia ura edena bamona ia do ita hesiai henia?

 ¹⁷ Ita moale badina Iehova be laloa maoromaoro tauna, bona ia ura mai eda kudouna bona goada ibounai ida ia do ita hesiai henia. (Kol. 3:23) Italy taihu burukana ta ladana Constance, ia gwau: “Lau ura bada ma haida dekenai egu Havaraia Tauna lau herevalaia. Unai dainai haroro gaukara bona Baibel stadi lau karadia noho. Nega haida lau lalohisihisi badina lau gorere dainai, egu haroro gaukara lau habadaia diba lasi. To lau laloparara, Iehova ia diba egu goada be mai ena hetoana, lau ia lalokau henia bona egu hesiai gaukara ia laloa bada.”

18. Edena dala ai tama sina ese Iehova ena haheitalai idia tohotohoa diba?

¹⁸ Edena dala ai Iehova ena laloa maoromaoro karana ita tohotohoa diba? Mani Iehova ese Lota ia kara henia dalana oi laloa lou. Iehova be mai ena maoro ia ese Lota do ia hamaoroa edeseni do ia heau lao. To, Iehova be mai manau ida Lota ena lalohadai ia kamonai bona ena noinoi ia abia dae. Tama sina e, Iehova umui tohotohoa diba, a? Hegeregere, bema emu natuna be oi dekenai noinoi ta ia karaia, iena lalohadai oi kamonai be namo, bona bema ia hegeregere, oi abia dae. Gima Kohorona, September 1, 2007 ia gwau, bema tama sina idia ura ruma ai taravatu haida idia atoa, namona be natudia edia lalohadai idia kamonai danu. Hegeregere, reana tama sina ese taravatu idia atoa natudia be edena hora ai ruma dekenai do idia giroa lou. Tama sina be mai edia maoro taravatu idia atoa totona, to namona be edia natudia ida unai idia herevalaia guna. Unai murinai hora maorona idia makaia diba. To nega haida, tama sina ese idia makaia horana idia halataia diba, bema natudia ese do idia karaia moale karana be Baibel ena hakaua herevana ta ia utua lasi. Tama sina be unai bamona idia karaia neganai, natudia be mai moale ida tama sina ese idia atoa taravatu do idia badinaia.

19. Edena dala ai elda taudia ese Iehova ena laloa maoromaoro karana idia tohotohoa diba?

¹⁹ Namona be kongrigeisen elda taudia idia gaukara goada, Iehova ena laloa maoromaoro karana idia tohotohoa bona tadikaka taihu edia noho dalana idia lalopararalaia. Laloatao, Iehova ese ogogami Israela taudia edia boubou gaudia ia abia dae. Unai hegeregerena, tadikaka taihu haida be idia gorere o buruka dainai idia haroro momo lasi bona idia lalometau. Edena dala ai elda taudia ese idia hagoadaia diba? Namona be elda ese idia hamaorodia, Iehova be idia ia lalokau henia bada, badina mai edia ura ida Ia idia hesiai henia noho.—Mar. 12:41-44.

20. Dirava ena hesiai gaukara lalonai laloa maoromaoro ita hahedinaraia ena anina be dahaka?

²⁰ Namo lasi ita ese laloa maoromaoro karana ita gaukaralaia kerere, bona ‘sibona ita hebogahisi henia’ dainai, Iehova ena hesiai gaukara ita goadalaia lasi. (Mat. 16:22) Ita ura lasi eda hesiai gaukara ita laloa maragi, to namona be ita hekwarahi eda hesiai gaukara ita goadalaia totona. Namona be ita ibounai “[ita] hekwarahi bada” Basileia ena gaukara idauidau ita karaia totona. (Luka 13:24) Namona be inai ita laloatao: Mai eda goada ibounai ida Iehova ita hesiai henia be namo. To danu, Iehova be ita ia doria lasi ita karaia diba lasi gauna ta ita karaia totona. Unai dainai, bema mai eda lalona ibounai ida iena hesiai gaukara ita karaia, do ia moale. Ita moale badina ita be laloa maoromaoro Diravana ita hesiai henia! Wiki vaira ena stadi ai, ita ese Iehova ena kara namodia ma rua do ita stadilaia.—Sal. 73:28.