1, 2. Ania a gundaway ti agur-uray kadagiti gagayyem ni Jehova?

“GISTAY 35 a tawenmin nga agassawa ken lakayko,” kuna ti Kristiano nga agnagan Monika. “Am-ammomin ti maysa ken maysa. Ngem adda latta baro a banag a maammuanmi iti tunggal maysa!” Awan duadua a pudno met dayta iti adu a pagassawaan ken panaggayyem.

² Maragsakantayo a mangam-ammo a naimbag kadagiti ay-ayatentayo. Ngem iti amin a panaggayyem, awanen ti napatpateg pay no di ti pannakigayyemtayo ken Jehova. Ditayto pulos maammuan ti amin maipapan kenkuana. (Roma 11:33) Ngem addanto agnanayon a gundaway ken gagartayo a mangpauneg iti panangtagipategtayo kadagiti kualidad ni Jehova.—Ecl. 3:11.

3. Ania ti usigentayo iti daytoy nga artikulo?

³ Tinulongannatayo ti napalabas nga artikulo a mangpauneg iti panangtagipategtayo iti di panangidumduma ken kinalaka a maas-asitgan ni Jehova. Usigentay ita ti dua pay a nagpateg a kualidad ni Jehova—ti kinaparabur ken kinanainkalinteganna. Makatulong daytoy tapno naan-anay a mabigbigtayo a “ni Jehova naimbag iti isuamin, ket dagiti asina addada iti amin nga ar-aramidna.”—Sal. 145:9.

4. Ania ti kaipapanan ti pudno a kinaparabur?

⁴ Ania ti kayat a sawen ti panagbalin a naparabur? Kastoy ti kinuna ni Jesus iti Aramid 20:35: “Ad-adu ti kinaragsak iti panangted ngem iti panangawat.” Iti dayta a simple a sasao, nayebkas ni Jesus ti kaipapanan ti pudno a kinaparabur. Sibubulos nga ited ti naparabur a tao ti tiempo, pigsa, ken sanikuana tapno magunggonaan ti sabsabali—ket siraragsak nga aramidenna dayta. Wen, marukod ti kinaparabur, saan nga iti kadakkel ti sagut, no di  ket iti motibo daydiay mangted. (Basaen ti 2 Corinto 9:7.) Awanen ti naparparabur pay ngem iti “naragsak a Dios[tayo],” ni Jehova.—1 Tim. 1:11.

5. Kasano nga ipakpakita ni Jehova ti kinaparaburna?

⁵ Kasano nga ipakpakita ni Jehova ti kinaparaburna? Ipapaayna ti kasapulan ti amin a tattao, pakairamanan dagidiay saan pay nga agdaydayaw kenkuana. Pudno a “ni Jehova naimbag iti isuamin.” “Pagleggakenna ti initna kadagiti nadangkes a tattao ken kadagiti naimbag ket pagtuduenna kadagiti nalinteg a tattao ken kadagiti nakillo.” (Mat. 5:45) Dayta ti makagapu no apay nga idi kasarsarita ni apostol Pablo dagiti di manamati, imbagana a ni Jehova ket ‘agar-aramid iti naimbag, nga ik-ikkanna ida kadagiti tudo manipud langit ken kadagiti nabunga a panawen, a pumpunnuenna a naan-anay dagiti pusoda iti taraon ken ragsak.’ (Ara. 14:17) Nalawag a parparaburan ni Jehova ti amin a tao.—Luc. 6:35.

6, 7. (a) Siasino dagiti nangnangruna a pakaragsakan ni Jehova nga ipaayan iti kasapulanda? (b) Mangted iti pagarigan no kasano nga ipapaay ti Dios ti kasapulan dagiti matalek nga agdaydayaw kenkuana.

⁶ Nangnangruna a maragsakan ni Jehova a mangipaay iti kasapulan dagiti matalek nga agdaydayaw kenkuana. Napaliiw ni Ari David: “Maysaak idi nga agtutubo, kasta met a limmakayakon, ket kaskasdi a saanak a nakakita iti asinoman a nalinteg a naan-anay a nabaybay-an, wenno uray dagiti putotna nga agsapsapul iti tinapay.” (Sal. 37:25) Adun a matalek a Kristiano ti nakapadas iti kasta a pannakaseknan ni Jehova. Adtoy ti maysa a pagarigan.

⁷ Sumagmamanon a tawen ti napalabas, naaddaan iti parikut ni Nancy a maysa nga amin-tiempo a ministro. “Kasapulak idi ti $66 para iti abang a masapul a bayadak iti sumaruno nga aldaw,” malagip ni Nancy. “Diak ammo no pangalaak iti kuarta. Inkararagko ti parikutko, sa napanak iti trabahok kas waitress. Diak ninamnama nga adu ti mangted kaniak iti tip iti dayta a rabii ta gagangay a bassit ti kostumer iti kasta nga aldaw. Nasdaawak idi adu ti immay iti restawran iti dayta a rabii. Idi nalpasen ti trabahok, pinagtitiponko ti naited kaniak a tip, ket apag-isu a $66.” Kombinsido ni Nancy a pinaraburan ni Jehova babaen ti panangtedna iti eksakto a kasapulanna.—Mat. 6:33.

8. Ania ti kadakkelan nga ebkas ti kinaparabur ni Jehova?

⁸ Ti kadakkelan nga ebkas ti kinaparabur ni Jehova ket ti subbot a daton ti Anakna. Impaayna daytoy para iti amin. Kinuna ni Jesus: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.” (Juan 3:16) Ti “lubong” a matuktukoy ditoy ket dagiti tattao. Wen, ti kasayaatan pay laeng nga ebkas ti kinaparabur ni Jehova ket para iti amin a mayat nga umawat iti dayta. Umawatto iti agnanayon a biag dagidiay mamati ken Jesus!  (Juan 10:10) Adda kadi pay dakdakkel a pammaneknek iti kinaparabur ni Jehova ngem iti dayta?

9. Kasanotayo a matulad ti kinaparabur ni Jehova?

 ⁹ Kasanotayo a matulad ti kinaparabur ni Jehova? Ni Jehova “sibabaknang a mangipapaay kadatayo ti amin a bambanag a pagragsakantayo.” Gapuna, ‘sisasaganatayo koma a mangiranud’ iti adda kadatayo tapno maparagsaktayo ti dadduma. (1 Tim. 6:17-19) Siraragsak nga aramatentayo ti sanikuatayo tapno makaipaaytayo iti sagut kadagiti patpatgentayo ken matulongantayo dagiti agkasapulan. (Basaen ti Deuteronomio 15:7.) Ania ti makatulong kadatayo nga agbalin a naparabur? Kastoy ti ar-aramiden ti dadduma a Kristiano: No makaawatda iti sagut, bumirokda iti gundaway a makaipaayda met iti sagut iti sabsabali. Iti kongregasion Kristiano, nakaad-adu a kakabsat a lallaki ken babbai ti naparabur.

10. Ania ti maysa a nagsayaat a pamay-an a maipakitatayo ti kinaparabur?

¹⁰ Ti maysa a kasayaatan a pamay-an a maipakitatayo ti kinaparabur ket ti panangusartayo iti tiempo ken pigsatayo a tumulong ken mangparegta iti sabsabali. (Gal. 6:10) Tapno makitatayo no naparaburtayo iti kastoy a pamay-an, isaludsodtayo iti bagitayo: ‘Makita kadi ti sabsabali a sidadaanak a dumngeg iti pakaseknanda? No adda agpatulong kaniak, pagustuak kadi agingga’t mabalin? Kaano ti naudi a panangipaayko iti naimpusuan a komendasion iti maysa a kapamiliak wenno kapammatiak?’ No “iyugali[tayo] ti mangted,” sumingedtayo ken Jehova ken iti gagayyemtayo.—Luc. 6:38; Prov. 19:17.

11. Ania ti sumagmamano a pamay-an nga agbalintayo a naparabur ken Jehova?

 ¹¹ Mabalin met nga agbalintayo a naparabur ken Jehova. “Padayawam ni Jehova iti napapateg a bambanagmo,” iparegta ti Kasuratan. (Prov. 3:9) Dagita a ‘napapateg a bambanag’ ramanenna ti tiempo, pigsa, ken  sanikuatayo, a mausartayo nga agserbi kenkuana. Uray dagiti ubbing masursuroda ti agbalin a naparabur ken Jehova. “No mangted ti pamiliami iti donasion idiay Kingdom Hall, bay-anmi a dagiti ubbingmi ti mangitinnag iti dayta iti donation box,” kuna ti amada a ni Jason. “Maay-ayatanda, ta kas kinunada, ‘mangipapaayda ken Jehova.’” No marikna dagiti ubbing ti rag-o iti panangted ken Jehova bayat a babassitda pay, posible nga itultuloyda ti agbalin a naparabur Kenkuana inton adultoda.—Prov. 22:6.

12. Ania ti kayat a sawen ti panagbalin a nainkalintegan?

¹² Ti maysa pay a nagsayaat a kualidad ni Jehova ket ti kinanainkalinteganna. Ania ti kayat a sawen ti panagbalin a nainkalintegan? Ti orihinal a Griego a sao a masansan a naipatarus kas “nainkalintegan” iti Baro a Lubong a Patarus ket literal a kaipapananna ti “managpabus-oy.” (Tito 3:1, 2) Saan nga ipilit ti nainkalintegan a tao a kanayon a masurot ti letra-por-letra a naisurat iti linteg, ken saan met nga istrikto unay, nainget, wenno nauyong. Imbes ketdi, siaalumamay a makilangen, nga ikabilanganna ti kasasaad ti sabsabali. Sidadaan a dumngeg iti ibaga ti dadduma ket, no kasapulan, pagustuanna ti kiddawda sa baliwanna dagiti kalikagumanna.

13, 14. (a) Kasano nga ipakpakita ni Jehova ti kinanainkalinteganna? (b) Ania ti maadaltayo maipapan iti kinanainkalintegan iti pamay-an a pannakilangen ti Dios ken Lot?

¹³ Kasano nga ipakpakita ni Jehova ti kinanainkalinteganna? Siaayat nga ikabilanganna ti rikrikna dagiti adipenna, ket masansan a pagustuanna ti kiddawda. Kas pagarigan, kitaem no kasano ti pannakilangen ni Jehova iti nalinteg a tao a ni Lot. Idi inkeddeng ni Jehova a dadaelen dagiti siudad ti Sodoma ken Gomorra, silalawag nga imbilinna ken Lot nga agkamang iti bambantay. Ngem impakaasi ni Lot nga agkamang laengen iti sabali a lugar. Agasem, kidkiddawen ni Lot a baliwan ni Jehova ti imbilinna!—Basaen ti Genesis 19:17-20.

¹⁴ Nalabit ipapanmo a nakapuy wenno nasukir ni Lot. Gapu ta sigurado a salakniban ni Jehova ni Lot iti sadinoman a pagturonganna, awan koma ti panggapuanna nga agbuteng. Ngem talaga a madanagan ni Lot, isu a pinabus-oyan ni Jehova. Pinalubosanna nga agkamang ni Lot iti maysa a siudad nga inkeddengna a dadaelen. (Basaen ti Genesis 19:21, 22.) Nalawag a saan nga istrikto wenno nainget ni Jehova. Managpabus-oy ken nainkalintegan.

15, 16. Kasano nga impakita ti Mosaiko a Linteg ti kinanainkalintegan ni Jehova? (Kitaen ti ladawan iti rugi ti artikulo.)

¹⁵ Usigentayo ti sabali pay a pagarigan ti kinanainkalintegan ni Jehova a makita iti Mosaiko a Linteg. No napanglaw ti maysa nga Israelita ket dina kabaelan ti mangidaton iti karnero wenno kalding, mabalin a mangidaton iti dua a pagaw wenno dua nga atap a kalapati. Ngem kasanon no nakapangpanglaw a dina pay kabaelan nga idaton ti dua nga atap a kalapati? Iti dayta a kaso, ipalubos ni Jehova a mangidaton ti nakurapay nga Israelita iti bassit nga arina. Ngem paliiwem daytoy napateg a banag: Saan laeng a basta arina no di ket “nasayaat nga arina,” daydiay maar-aramat a para kadagiti natan-ok a bisita. (Gen. 18:6) Apay a masapul a nasayaat nga arina?—Basaen ti Levitico 5:7, 11.

¹⁶ Ipapanmo a maysaka a nakapangpanglaw nga Israelita. Sangsangpetmo iti tabernakulo nga awitmo ti idatonmo a bassit nga arina. Nakitam sadiay dagiti nabaknang nga Israelita a nangitugot kadagiti datonda nga animal. Mabalin a mabainka ta kasla awan pategna ti datonmo nga arina. Ngem nalagipmo a napateg ti datonmo iti imatang ni Jehova. Apay? Ti kalkalikaguman ni Jehova nga arina ket de-kalidad. Arigna ibagbagana kadagiti napanglaw nga Israelita: ‘Ammok a dimo kabaelan nga idaton ti kabaelan  ti dadduma, ngem ammok nga ipapaaymo ti kasayaatan nga adda kenka.’ Wen, ipakpakita ni Jehova ti kinanainkalinteganna ta ikabkabilanganna dagiti limitasion ken kasasaad dagiti adipenna.—Sal. 103:14.

17. Ania a kita ti panagserbi ti awaten ni Jehova?

 ¹⁷ Maliwliwatayo a makaammo nga awaten ni Jehova ti amin-kararua a panagserbitayo gapu ta isu ket nainkalintegan. (Col. 3:23) Kuna ni Constance, maysa a baketen nga Italiano a kabsat: “Kankanayon a kayatko nga iranud iti sabsabali ti maipapan iti Namarsua. Isu a kankanayon a mangasaba ken mangyadalak iti Biblia. Maladingitanak no dadduma iti bassit a maar-aramidak gapu iti nakapuy a salun-atko. Ngem maawatak nga ammo ni Jehova dagiti limitasionko ken ay-ayaten ken tagipatgenna ti kabaelak nga aramiden.”

18. Ania ti maysa a pamay-an a matulad dagiti nagannak ti ulidan ni Jehova?

¹⁸ Kasanotayo a matulad ti kinanainkalintegan ni Jehova? Subliantayo ti pannakilangenna ken Lot. Nupay adda autoridad ni Jehova a mangibaga iti papanan ni Lot, dimngeg ken Lot bayat nga ibagbagana ti rikriknana. Pinatgan met ti Dios ti kiddaw ni Lot. No maysaka a nagannak, mabalinmo kadi a tuladen ti ulidan ni Jehova? Mabalin kadi a denggem dagiti kiddaw ti anakmo ket, no mabalin, patgam dagita? Maipapan iti daytoy, dakamaten Ti Pagwanawanan a Septiembre 1, 2007 a dagiti nagannak mabalin nga iramanda dagiti annakda no mangaramidda kadagiti pagannurotan iti balay. Kas pagarigan, kayat dagiti nagannak ti mangikeddeng iti oras a panagawid dagiti annakda, ket siempre kalinteganda dayta. Ngem nasayaat no dumngeg dagiti Kristiano a nagannak iti makuna dagiti annakda maipapan iti naikeddeng nga oras. Iti dadduma a kasasaad, mabalin a baliwan dagiti nagannak ti naikeddeng nga oras no la ketdi awan ti masalungasing a prinsipio ti Biblia. No ikabilangan dagiti nagannak ti opinion dagiti annakda maipapan iti panagaramid iti pagannurotan iti balay, nalaklaka a maawatan ken pagtulnogan dagiti annak dagita a pagannurotan.

19. Kasano a matulad dagiti panglakayen ti kinanainkalintegan ni Jehova?

¹⁹ Ikagumaan dagiti panglakayen iti kongregasion a tuladen ti kinanainkalintegan ni Jehova babaen ti panangikabilanganda iti kasasaad dagiti kakabsat. Laglagipentayo a napateg ken Jehova uray ti daton dagiti napanglaw nga Israelita. Kasta met, adda dagiti kakabsat a limitado unay ti maaramidanda iti ministerio, nalabit gapu iti problema iti salun-at wenno panaglakay. Kasanon no maup-upayda gapu iti limitasionda? Siaayat nga ipasigurado kadakuada dagiti panglakayen nga ay-ayaten ida ni Jehova gapu ta ipapaayda ti kasayaatan.—Mar. 12:41-44.

20. Ti kadi panagbalin a nainkalintegan kaipapananna ti pananglimitar iti panagserbitayo iti Dios? Ilawlawagmo.

²⁰ Siempre, saan a kayat a sawen daytoy a limitarantayon ti panagserbitayo iti Dios gapu laeng ta ‘kaasiantayo ti bagitayo.’ (Mat. 16:22) Ditay kayat ti agpampamayan sa ibagatayo a nainkalintegantayo laeng. Imbes ketdi, kasapulantayo amin ti ‘umagawa a sipipinget’ kas panangsuporta kadagiti interes ti Pagarian. (Luc. 13:24) Ikagumaantayo koma ti maaddaan iti balanse a panangmatmat. Agbalintayo a naagawa, a ditay limlimitaran ti panagserbitayo. Ngem laglagipentayo met a saan a kidkiddawen ni Jehova ti labes ti kabaelantayo nga ipaay. No ipapaaytayo ti kasayaatan a maaramidantayo, manamnamatayo a maragsakan. Saan kadi a maragsakantayo nga agserbi iti kasta a manangtagipateg ken nainkalintegan nga Apo? Iti sumaruno nga artikulo, usigentayo ti dua pay a nagsayaat a kualidad ni Jehova.—Sal. 73:28.