Jehovap tukkortuunera ingasaassinianngitsuuneralu pingaartikkit
“Tamanut ajunngisaartarpoq Naalagaq, pinngortitaminut tamanut naakkinnittuuvoq.” — TUSS 145:9.
1, 2. Jehovap ikinngutai sunissaminnut periarfissaqarpat?
QATANNGUT arnaq Monikamik atilik ukiut 35-t missiliorlugit katisimasimasoq ima oqarpoq: “Uigalu immitsinnut ilisarisimalluarpugut. Ukiorpassuarnili katisimanikuugaluarluta aapparput pillugu ilisimanikuunngisatsinnik ilikkagaqartarpugut!” Tamatta aapparput ikinnguterpulluunniit pillugu taama oqarsinnaagunarpugut.
2 Asasavut pillugit ilisimasaqarnerulertarnerput nuannaarutigisarparput. Jehovali, tamanit ikinngutaalluarnerpaasoq, pillugu ilisimasaqarnerulerneq nuannaarutiginerussavarput. Taanna pillugu ilisimaneqarsinnaasut tamaasa ilisimalersinnaanngilavut. (Rom 11:33) Jehovap pissusii naassaanngitsumut ilinniartuarsinnaallugillu pingaartinnerulersinnaavavut. — Oqal 3:11.
3. Allaaserisami matumani suut sammissavavut?
3 Allaaserisami kingullermi eqqartukkavut Jehovap saaffigiuminartuuneranik kinaassusersiortuunnginneranillu pingaartitsinerulissutigaavut. Allaaserisami matumani Jehova qanoq tukkortigalunilu ingasaassinianngitsiginersoq sammissavavut. Tamanna Jehovap ‘tamanut ajunngisaartuuneranik pinngortitaminullu tamanut naakkinnittuuneranik’ paasinnilluarnerulissutigissavarput. — Tuss 145:9.
JEHOVA TUKKORTUUVOQ
4. Tukkortuuneq qanoq paasisariaqarpa?
4 Tukkortuuneq qanoq paasisariaqarpa? Apeqqut Jiisusip oqaasiinit, Apustilit Suliaat 20:35-mi allassimasunit, ukunannga akissutissarsissavarput: “Tunisineq pilluarnarneruvoq tigusinermit.” Tassa inuup tukkortup piffissani, nukini pigisanilu allanik ikiuinermut nuannaarluni atortarpai. Inuk akisuunik tunissuteqartarnini pissutiginagu tunissuteqarnerminulli pissutiginiakkani pissutigalugit tukkortuusarpoq. (2 Korinthimiut 9:7 atuaruk). Jehova, ‘Guuterput pilluartoq’, tamanit tukkornerpaavoq. — 1 Tim 1:11.
5. Jehovap tukkortuunini qanoq ersersittarpaa?
5 Jehovap tukkortuunini qanoq ersersittarpaa? Biibilimi allassimavoq Jehova ‘tamanut ajunngisaartartoq’. Inuit tamaasa, allaat imminut pallorfiginninngitsut, pisariaqartitaannik tunisarpai. Taassuma “seqerni ajortunut ajunngitsunullu nueqqusarpaa siallersitsisarlunilu iluartunut iluaatsunullu”. (Matt 5:45) Taamaattumik Paulusip kristumiuunngitsut oqarfigai Jehovap ‘ajunngitsuliornermigut tunisarai qilammit sialummik ullunillu naalluarfiusunik, qaarsillartittarai uummataallu nuannaartittarai’. (ApS 14:17) Jehovap tamanut tukkortuunera erseqqippoq. — Luk 6:35.
6, 7. (a) Jehovap ingammik kikkut ikiussallugit nuannarisarpaa? (b) Guutip kiffami pisariaqartitaannik tunisisarneranik ersersitsisumik assersuuteqarit.
6 Jehovap ingammik kiffami pisariaqartitaannik tunissallugit nuannarisarpaa. Kunngi Daavi ima allappoq: “Inuusuttuusimavunga utoqqalisimallungalu maanna, takusimanngisaannarpungali iluartumik qimagaasumik qitornaanilluunniit nerisassanik qinnuuloortunik.” (Tuss 37:25) Kristumiorpassuit aalajaatsut Jehovamit isumassorneqarneq namminneerlutik misiginikuuaat.
7 Assersuutigalugu ukiualuit matuma siorna pioneri Nancymik atilik ajornartorsiuteqalerpoq. Ineqarnerminut akiliinissaminut aqaguttoq 66 dollarinik amigaateqarpoq. Ima oqaluttuarpoq: “Ajornartorsiutiga pillugu qinuvunga, tamatumalu kingorna neriniartarfimmut saqisutut suliartorlunga. Ulloq taanna suliartorfigisara ulluummat ulapaarfiuneq ajortoq aningaasanik kajumissaatissiissutinik tunineqarnissara naatsorsuutiginngilara. Sunaaffali unnummi tamatumani inuit neriartukaarrannialersut. Soraareerlunga aningaasat kajumissaatissiissutitut uannut tunniunneqarsimasut kisikkakkit 66 dollarioqqissaarput.” Nancyp qularutiginngilluinnarpaa pisariaqartitarpiaminik Jehovamit tunineqarsimalluni. — Matt 6:33.
8. Jehovap tukkorluni tunissutaa annerpaaq suua?
8 Jehovap tukkorluni tunissutaa annerpaaq kikkunnit tamanit pissarsiarineqarsinnaavoq. Suna tunissutigigamiuk? Ernini utertitsissutitut pilliutitut tunissutigigamiuk. Jiisusi ima oqarpoq: “[Guutip] silarsuaq ima asatigaa ernituani tunniussimallugu taassumunnga uppertoq kinaluunniit tammaqqunagu naassaanngitsumilli inooqqullugu.” (Joh 3:16) Oqaatsimi “silarsuaq”-mi inuiaat tamarmik pineqarput. Taamaattumik Jehovap tukkorluni tunissutaanik annerpaamik akuersiniarlutik aalajangertunut tamanut tunissutaavoq. Jiisusimut uppertut kikkulluunniit naassaanngitsumik inuulersinnaapput! (Joh 10:10) Tamanna Jehovap tukkortuuneranut uppernarsaataavoq pingaaruteqarnerpaaq.
JEHOVATUT TUKKORTUUGIT
Jehovap Israelikkut namminermisut tukkortuunissaat kissaatigaa (Takuuk immikkoortoq 9)
9. Qanoq Jehovatut tukkortuusinnaavugut?
9 Qanoq Jehovatut tukkortuusinnaavugut? Uagut nuannaalissutigisatsinnik Jehovamit tunineqartaratta uaguttaaq allat nuannaalissutigisassaannik tunerusuttariaqarpavut. (1 Tim 6:17-19) Ikinngutitsinnut ilaquttatsinnullu tunissuteqartarnerput allanillu pisariaqartitsisunik ikiuisarnerput nuannaarutigaarput. (5 Mosesi 15:7 atuaruk). Tukkortuunissatsinnik eqqaamanninnissatsinnut suna iluaqutigisinnaavarput? Kristumiut ilaat aalajangersimapput tunissutisinerit tamaasa allanut tunissuteqarnissaminnut periarfissarsiortarniarlutik. Ullumikkut Jehovap innuttai amerlasoorpassuit tukkortuunermut tunngatillugu maligassaalluarput.
10. Qanoq tukkortuunerput pitsaanerpaamik ersersissinnaavarput?
10 Ilaatigut allanik ikiuinermut qiimmassaanermullu piffissatsinnik nukitsinnillu atuinitsigut tukkortuunerput pitsaanerpaamik ersersissinnaavarput. (Gal 6:10) Taama iliornikkut tukkortuuit? Imminut ima aperisinnaavutit: ‘Allat tusarnaarusullugit ersersittarpara? Ikioqqusoq aalliuteqqusorluunniit kajumillunga ikiorusuttarpara? Qanga kingullermik qanigisannik uppeqatinnilluunniit nersualaarinnippunga?’ ‘Tunisisarneq’ ileqquliukkutsigu Jehovamut ikinngutitsinnullu qaninnerusutut misigilissaagut. — Luk 6:38; Uss 19:17.
11. Ilaatigut qanoq Jehovamut tukkortuusinnaavugut?
11 Jehovamut aamma tukkortuusinnaavugut. ‘Pisuussutivut’ atorlugit Jehovamut ataqqinnittuliorfiginninnissatsinnut Biibilimi kajumissaarneqarpugut. (Uss 3:9) Piffissarput, nukivut aningaasaativullu taassumunnga kiffartornitsinnut atorsinnaasavut ‘pisuussutitsinnut’ ilaapput. Allaat meeqqat Jehovamut tukkortuuneq ilinniarsinnaavaat. Ataataasoq Jasonimik atilik ima oqarpoq: “Ilaqutariittut naalagaaffilersaarfimmut tunissuteqaraangatta meeqqavut aningaasanik nakkaatitsivimmut tunissuteqartittarpavut. Tunissuteqartarnertik nuannaarutigisarpaat nakkartitsinerit tamaasa ‘Jehovamut tunissuteqartaramik.’” Meeqqat ukiukitsuunerminniilli paasigunikku Jehovamut tunissuteqarneq nuannaalersitsisartoq inersimasunngorunik taassumunnga tukkortuunertik attatiinnassavaat. — Uss 22:6.
JEHOVA INGASAASSINIANNGITSUUVOQ
12. Ingasaassinianngitsuuneq qanoq paasisariaqarpa?
12 Jehovap ingasaassinianngitsuunera pissusiisa nuannersut ilagaat. Ingasaassinianngitsuuneq qanoq paasisariaqarpa? Inuk ingasaassinianngitsuusoq qanilaartuulluni inatsisit oqaasertaannik maleruaaqqissaarniartuunani aaqqiinissaminut piumassuseqartuuvoq. (Tit 3:1, 2) Sukannersuunngilaq peqqarniitsuunanilu. Inoqatiminut inussiarnersuullunilu inoqatimi atugaannik tamatigut paasinninniartarpoq. Allanut tusarnaarusuttuuvoq, naleqqukkaangallu, allat piumasaannik tunisarlugilluunniit piumasaattut iliuuseqartittarpai.
13, 14. (a) Jehovap ingasaassinianngitsuunini qanoq ersersittarpaa? (b) Guutip Lotimut periaaserisaanit ingasaassinianngitsuuneq pillugu qanoq ilinniarfigisinnaavarput?
13 Jehovap ingasaassinianngitsuunini qanoq ersersittarpaa? Kiffami misigissusii eqqarsaatigikulasarpai kajumerinerusamittullu iliuuseqarnissaat akuerisarlugu. Assersuutigalugu Jehova Lotimut, angummut naapertuilluartumut, qanoq periaaseqartoq eqqarsaatigiuk. Jehovap Sodoma Gomorralu suujunnaarsinniarlugit aalajangerami paatsuugassaanngitsumik Loti qaqqamut qimaaqquaa. Lotilli arlaannik pissuteqarluni allamut qimaarusulluni Jehova kimigiiserfigaa. Takorluulaariaruk! Lotip Jehova maleruaqqusaminik allanngueqquaa! — 1 Mosesi 19:17-20 atuakkit.
14 Oqaluttuaq atuarakku imaassinnaavoq eqqarsartutit Loti uppernikitsuusoq naalanngitsuusorluunniit. Soorunami Jehovap Loti sumiikkaluarpalluunniit uummaannartissinnaammagu Loti siooranissaminut pissutissaqanngilaq. Taamaakkaluartorli annilaangalerpoq. Jehovap Lotip misigissusii paasilluarpai illoqarfimmullu allamut, allaat illoqarfimmut suujunnaarsinniaraluakkaminut, qimaanissaa akueralugu. (1 Mosesi 19:21, 22 atuakkit). Ersarippoq Jehova sukannersuunanilu peqqarniitsuunngitsoq. Tamatigut ingasaassinianngitsuusarpoq.
15, 16. Inatsisini Jehovap Israelikkunnut tunniussaanit taassuma ingasaassinianngitsuunera qanoq ersersinneqarpa? (Allaaserisap aallaqqaataani assiliaq takuuk)
15 Inatsisinit Jehovap Israelikkunnut tunniussaanit aamma taassuma ingasaassinianngitsuuneranik ersersitsipput. Assersuutigalugu Israelikkuusoq savamik savaasamilluunniit pilliuteqarnissaminut piitsuuallaaruni tuinik quluartartunik marlunnik tuinilluunniit piaqqanik marlunnik pilliuteqarsinnaavoq. Taavami Israelikkuusoq piitsuuallaarnini pissutigalugu allaat tuinik piaqqanik marlunnik pilliuteqarsinnaanngippat? Piitsoq qajuusanik Jehovamut pilliuteqarsinnaatitaavoq. Jehovali qajuusanut tunngatillugu piumasaqaateqarpoq. Inatsisini allassimavoq ‘qajuusat aseqqorissuusussaasut’, taakkulu Israelikkut inunnik nuimasunik pulaartoqaraangamik atortarpaat. (1 Mos 18:6) Sooq tamanna maluginiarnarpa? — 3 Mosesi 5:7, 11 atuakkit.
16 Takorlooruk Israelikkuullutit piitsuungaartoq. Tupermi naapeqatigiittarfimmi qajuusanik pilliuteqarnialerlutit nunaqqatitit ilinnit aningaasaateqarnersut uumasumik pilliuteqalersut takuatit. Immaqa pilliutivit nalikinnerungaarnera peqqusiileqissutigaat. Eqqaalerpalli pilliutit Jehovamit pingaartinneqangaartoq. Sooq? Jehovap inatsisaani piumasaqaatigineqarmat ‘qajuusanik aseqqorissunik’, qajuusanik pitsaalluinnartunik, pilliuteqassasutit. Jehovap ima oqarfigaatillusooq: ‘Nalunngilara allatulli pilliuteqartigisinnaanngitsutit, aammali nalunngilara pigisannik pitsaanerpaamik pilliuteqarfigigimma.’ Assersuummit tamatumannga Jehovap ingasaassinianngitsuunera ersersilluarneqarpoq. Kiffani artugaannik piumasaqarfiginngisaannarpai. — Tuss 103:14.
17. Pallorfiginninneq qanoq ittoq Jehovap iluaraa?
17 Tuppallernarpoq nalunagu Jehova ingasaassinianngitsuullunilu pigisatsinnik pitsaanerpaamik tunigaangatsigu taassuma pallorfiginninnerput iluarisaraa. (Kol 3:23) Qatanngut arnaq utoqqaq Italiamiu Constancemik atilik ima oqarpoq: “Pinngortitsisiga pillugu allanik oqaloqateqarnissara nuannarilluinnarpara. Taamaattumik oqaluussiuarlungalu Biibilimik atuaqqissaaqateqartuarpunga. Ilaannikkut peqqiilliornera pissutigalugu iliuuseqarnerusinnaannginnera aliasuutigisarpara. Eqqaamasarparali Jehovap pisinnaasamma killeqarnerat nalunngikkaa aamma asallungalu pisinnaasakka naapertorlugit iliuuseqartarnera pingaartikkaa.”
JEHOVATUT INGASAASSINIANNGITSUUGIT
18. Angajoqqaat ilaatigut qanoq Jehovap maligassiuinera ilaarsinnaavaat?
18 Qanoq Jehovatut ingasaassinianngitsuusinnaavugut? Jehova Lotimut qanoq periaaseqartoq eqqarsaatigeqqiuk. Lotip sumiiffimmut aalajangersimasumukaqqunissaanut Jehova oqartussaassuseqarpoq. Jehovali inussiarnerluni Lotip qanoq misiginerluni oqaluttuummani tusarnaarpoq qimaaffigerusutaanullu qimaatillugu. Meeraqaruit Jehovap maligassiuinera ilaarsinnaaviuk? Meeqqavit oqaasiinut tusarnaaqqissaarsinnaavutit tamatumalu kingorna, naleqquppat, piumasaqaatitit allanngortissinnaavatit. Qanoq taamaaliorsinnaavit? Napasuliaq Alapernaarsuiffik 1. septembari 2007-imoortumi allassimavoq angajoqqaat angerlarsimaffimminni malittarisassiornialerunik meeqqamik kissaataannut tusarnaarsinnaasut. Assersuutigalugu imaassinnaavoq angajoqqaat meeqqat piffissami aalajangersimasumi angerlartarnissaat pillugu malittarisassiorusuttut. Angajoqqaat taamaaliornissaminnut oqartussaassuseqarput, qassinulli angerlartarnissaat aalajangiiffiginnginnerani meeqqatik oqaloqatigeqqaarsinnaavaat. Imaassinnaavoq najoqqutassiat Biibilimeersut unioqqutinneqanngippata angajoqqaat aalajangertut piffissaq meeqqat angerlarfissaat allanngortinneqarsinnaasoq. Angerlarsimaffimmi malittarisassiortoqannginnerani meeqqat oqaloqatigineqaqqaarunik malittarisassiat paasilluarnerusinnaallugillu maleruarusunnerulissavaat.
19. Qanoq utoqqaanertat Jehovatut ingasaassinianngitsuusinnaappat?
19 Ilagiinni utoqqaanertat Jehovatut ingasaassinianngitsuuniartariaqarput. Taamaaliorsinnaapput qatanngutiminnut ingasattumik piumasaqartannginnermikkut. Eqqaamajuk Jehovap allaat Israelikkut piitsut pilliutaat pingaartimmagit. Taamatuttaaq qatanngutit ilaat peqqiilliornertik utoqqalinertilluunniit pissutigalugu sivikitsuinnarmik oqaluusseqataasinnaapput. Taavami kissaatigisamittut iliuuseqartigisinnaannginnertik nikallungassutigilerpassuk? Kiffartornerminni sapinngisaminnik iliuuseqarnerannik Jehovap pingaartitsineranik paasinninnissaannut utoqqaanertat ikiorsinnaavaat. — Mark 12:41-44.
20. Guutimut kiffartornermi ingasaassinianngitsuuneq qanoq paasisariaqarpa?
20 Soorunami ingasaassinianngitsuuneq ‘imminut ajunngisaarfiginiaannarluni’ Guutimut kiffartornermi annikinnerusumik iliuuseqarnertut paasisariaqanngilaq. (Matt 16:22, NW) Iliuuseqarnerusinnaagaluarluta annikinnerusumik iliuuseqarnissarput kissaatiginngilarput. Akerlianilli Jiisusip ima oqarnera eqqaamasariaqarparput: “Ilungersoritsi.” (Luk 13:24) Taamaattumik oqimaaqatigiissaarisariaqarpugut. Guutimut kiffartornitsinni sapinngisatsinnik iliuuseqartarpugut, tamatumali saniatigut eqqaamasassavarput Jehovap artukkatsinnik piumasaqarfiginngisaannassagaatigut. Taamaaliorutta taassumannga iluarineqarnissarput qularutiginngilluinnarsinnaavarput. Guuti taama ingasaassinianngitsigisoq kiffartorfigalugu nuanningaarami! Allaaserisami tulliuttumi Jehovap pissusii ajunngitsut allat marluk sammissavavut. — Tuss 73:28.
Jehova “ataqqinaaseruk pisuussutigisannik”. — Uss 3:9 (Takuuk immikkoortoq 11)
“Qanorluunniit iliorussi taamaaliortaritsi uummammit pisumik.” — Kol 3:23 (Takuuk immikkoortoq 17)