1, 2. Ihi ia-nda di longa o makamba a Jihova ku hádia?

SAÍ phange ia muhatu a mu exana Monika, uambe: “Tua kazala kiá mu 35 a mivu. Eme ni muadi uami tua dijiia kiambote. Maji né kiki tua mu di longa hanji ídifua ki tu ijidile lua!” Sé phata, athu avulu a mu bhita ni maka enhá mu ukaza mba mu ukamba.

² Tua sanguluka kiavulu mu kuijiia kiambote o athu u tua zolo. Maji tu beta ku sanguluka kioso ki tuijiia kiambote Jihova, o dikamba dietu dia beta-o-kota. Ki tu tena kuijiia ima ioso ia lungu ni muéne. (Loma 11:33) Tua-nda di longa o ídifua ioso ia Jihova ku hádia ni ku i bhana dingi valolo.—Ndo. 3:11.

3. Ihi i tua-nda di longa mu milongi íii?

³ O milongi i tua di longo, ia tu kuatekesa ku bhana dingi valolo ku ídifua ia Jihova ia ku uabhela ku mu zukama ni ku kamba o katombo. Mu milongi íii, tua-nda di longa dingi ídifua iiadi ia Jihova ia ku uabhela o ku bhana, ni kulenduka. O ídifua íii, ia-nda tu kuatekesa kuijiia dingi kiambote kuila, “Jihova ene oso u a bhanga muene mbote, ikalakalu iê ioso u i tambula konda mu henda iê.”—Jisá. 145:9.

4. Ihi i lombolola o ku uabhela o ku bhana?

⁴ Ihi i lombolola ku uabhela o ku bhana? Tu sanga o kitambuijilu mu divulu dia Ikalakalu 20:35 diambe: “O kubhana kota mu kuzediuisa, o kutambula ndenge.” Ni izuelu íii, Jezú ua jimbulula ihi i lombolola ku uabhela o ku bhana. O muthu ua uabhela o ku bhana u bhana o kithangana kiê, ni nguzu iê, ni jimbongo jê phala ku kuatekesa akuâ—muéne u bhanga kiki mu vondadi iê. Mu kidi, o ku uabhela o ku bhana, ki ki lombolola ku bhana ima ia te kalu, maji, o ku bhana ni muxima uoso. (Tanga 2 Kolindo 9:7.) Sé-ku muthu ua beta  ku uabhela ku bhana kála Jihova, o ‘Nzambi ietu ia ku sanguluka.’—1 Tim. 1:11.

5. Kiebhi ki londekesa Jihova kuila muéne ua uabhela o ku bhana?

⁵ Kiebhi Jihova kia londekesa kuila ua uabhela o ku bhana? Muéne u langa o ibhindamu ia athu oso, katé muene ni ió kene mu ku mu bheza luua. Mu kidi, “Jihova ene oso u a bhanga muene mbote.” Muéne “mukua kubhangesa dikumbi diê di bandela athu abhukumuka ni athu ambote, u tumikisa mvula ni kua ia aiuka ni ku ísueia.” (Mat. 5:45) Mukonda dia kiki, kioso o poxolo Phaulu kia kexile mu zuela ni athu ka xikinine Nzambi, muéne ua zuela kuma Jihova, “ua bhana jinga mvula ku diulu, ni idima kuvula bhu thembu ja tokala, phala mu kale ni kúdia, o muxima uenu uizale ni kusanguluka.” (Ika. 14:17) Kala ki tua mono kiá, Jihova ene oso u a bhanga muene mbote.—Luka 6:35.

6, 7. (a) Jihova u sanguluka kioso kia langa o ibhindamu ia nanhi? (b) Jimbulula kiebhi Jihova kia langa o ibhindamu ia jiselevende jê ja fiiele.

⁶ Jihova u sanguluka kioso kia langa o ibhindamu ia jiselevende jê ja fiiele. O sobha Davidi uambe: “Tunde mu undenge, o kiki nga kuka; kiluua ngi mona mukua kidi a mu ehelela, mba mbutu iê ienda ni kubhinga jimola.” (Jisá. 37:25) Jikidistá javulu a mono ku mienhu iâ kiebhi Jihova kia langa o jiselevende jê. Xinganeka mu phangu íii.

⁷ Mivu ku dima o muboki ua thembu ioso a mu exana Nancy, ua kexile mu di bhana ni ibhidi. Nancy u lembalala: “Nga bhindamene 66 kia jidola, phala ku futa o lenda ia dibhata, kua kambele ngó kizuua kimoxi phala ku bhua o lenda i nga futile. Ki ngejidile kuebhi ku ngeji sanga o kitadi kiki. Nga sambe kua Jihova ia lungu ni maka enhá, anga ngi ia ku salu iami ia ku sidivila mu bale. Ki ngi banzele kuila ngeji tambula kitadi kiavulu mu kizuua kieniókio, mu ku ngi sakila ku athu a mudia mu bale, mukonda mu kizuua kieniókio kia semana ki kuene mu kuíza athu avulu mu bale. Maji nga tukumuka, mu usuku uenió kuejile athu avulu mu bale. Kioso ki nga zubha ku kalakala nga kondala o kitadi kia ngi bhana mu kisakilu kia tenesa 66 kia jidola.” Nancy ua divu muene kuila Jihova muene ua mu bhanene o kitadi kia bhindamene.—Mat. 6:33.

8. Uebhi o ujitu ua beta-o-kota ua Jihova?

⁸ O ujitu ua beta-o-kota u bhana Jihova, ua tokala ku athu oso. Ujitu uebhi? O sata ia kukula ia Mon’ê. Jezú uambe: “Nzambi ua zola o mundu, katé kia suku mu kubhana Mon’ê umoxi-èlele, phala uoso u mu xikana muène, káfue, maji a kale ni muenhu ki uábhua.” (Nzuá 3:16) Mu izuelu íii o kizuelu “mundu,” kilombolola o athu oso. Mu kidi, o ujitu u bhana Jihova, ua tokala ku athu oso a soka ku u xikina. O ió a dielela kua Jezú, a-nda tambula o muenhu ua kalelaku! (Nzuá 10:10) O kidi kiki, ki lombolola kuila Jihova mukua ku bhana.

9. Kiebhi ki tu tena ku kaiela o phangu ia Jihova ia ku bhana?

 ⁹ Kiebhi ki tu tena ku kaiela o phangu ia Jihova ia ku bhana? Jihova “ua tena ku tu bhana kumona kia nzungule o ima ioso ia kuzediua phala o mbote ietu.” Mu kiki, tua tokala ué ‘ku bhana’ akuetu oso kala ni kima, phala n’a zediue. (1 Tim. 6:17-19) Tu sanguluka mu ku bhana o ima ietu ku miji ietu ni makamba etu, ni ió kala ni kima. (Tanga Matendelelu 15:7.) Ihi ia-nda tu kuatekesa ku lembalala kuila tua tokala ku bhana? Saí Jikidistá a bhanga kiki: Kioso kia a bhana kima ene a sota ué kithangana phala ku bhana kima ku muthu ua mukuá. Athu avulu mu kilunga kia Jihova ala ni ukexilu ua ku bhana.

10. Kiebhi ki tu tena ku kala ni ukexilu ua ku bhana?

¹⁰ Tu tena ku kala ni ukexilu ua ku bhana se tu zuela mba tu bhanga ima iambote. Kiebhi ki tu tena ku bhanga kiki? Tu tena ku bhanga kiki, se tu sota kithangana ni ku bhanga nguzu phala ku kuatekesa ni ku suínisa akuetu. (Nga. 6:10) Phala kuijiia se tua mu di tunda kiambote mu maka enhá, tua tokala ku dibhudisa: ‘O kuila akuetu a tena ku mona se nga di bhakula kua ene mu ku a kuatekesa ni kua ívua kioso kia zuela? Se muthu u ngi bhinga phala ku mu kuatekesa mba ku takana kima, o kuila eme ngi xikina? Kizuua kuxi ki nga ximana muiji mba phange mu kilunga?’ Kioso ki tu ‘bhana kima ku akuetu,’ tu zukama dingi kua Jihova ni ku makamba mê.​—Luka 6:38; Jisa. 19:17.

11. Kiebhi ki tu tena ku bhana ima kua Jihova?

 ¹¹ Tu tena ué ku bhana ima kua Jihova. O Bibidia izuela: “Jihova mu jingise ni ima ioso i uala na-iu.” (Jisa. 3:9) O “ima ioso,” ilombolola o kithangana kietu, ni nguzu, ni jimbongo joso ji tu bhana mu sidivisu iê. Katé muene ni ana ndenge, a tena ku di longa ku bhana ima kua Jihova. O tat’â, Jason uambe: “Kioso o muiji uetu ki u mesena ku bhana kima mu Kilunga,  tu ehela o an’etu ku ta o kitadi mu kitutu. Ene a sanguluka mukonda kioso kia ta o kitadi mu kitutu ene ejiia kuila a mu ‘bhana kima kua Jihova.’” Se o ana ndenge a mona kuila o ku bhana kima kua Jihova ku sangulukisa, ene a-nda kolokota ku mu bhana ima né muene kioso kia kula.—Jisa. 22:6.

12. Ihi ilombolola ku kala muthu ua lenduka?

¹² O kídifua kia mukua kia Jihova, o kulenduka. Ihi i lombolola ku kala muthu ua lenduka? (Tito 3:1, 2) O muthu ua lenduka, ka jijila ku bhanga o vondadi iê. Ka jijila o kitumu mu ithangana ioso. Mu veji dia kiki, muéne u talatala o athu ni henda, u bhanga nguzu phala ku tendela o maka a mu bhita nau. Muéne ua uabhela o kuívua akuâ, se ku bhinga, muéne uehela akuâ ku tambula mba ku bhanga o ima ia mesena.

13, 14. (a) Kiebhi Jihova kia londekesa kuila muthu ua lenduka? (b) Phangu iahi i tu tena ku katula ia lungu ni ku lenduka, kioso ki tu xinganeka kiebhi Nzambi kia talatala Lote?

¹³ Kiebhi Jihova kia londekesa kuila muene muthu ua lenduka? Muéne u xinganeka mu kiebhi kia mu divua o jiselevende jê, mu ithangana iavulu muéne u a ehela ku bhanga o ima ia mesena ene. Mu kifika, xinganeka kiebhi Jihova kia talatala Lote, uexile diiala dia iuka. Kioso kia mesenene ku buika o jimbanza ja Sodoma ni Ngomola, muéne ua tendelesa Lote ku lengela ku milundu. Ki tuejiia se mukonda diahi, maji Lote ua bhingile kua Jihova phala ku mu ehela ku lengela ku mbanza iéngi. Xinganeka ngó, Lote ua kexile mu bhinga kua Jihova phala ku lungulula o itendelesu Iê!—Tanga Dimatekenu 19:17-20.

¹⁴ Nange u banza kuila Lote ka dielele kua Jihova, ni kuila muéne uexile muthu ua bhukumuka. Mu kidi, Jihova ua kexile ni kutena phala ku bhulula o muenhu ua Lote, kididi kioso kioso kueji kuia, mu kiki, muéne ka tokalele ku kala ni uôma. Maji né kiki, Lote ua kexile hanji ni uôma, Jihova ua mu ehela. Jihova uehela Lote ku lengela mu mbanza ia mesenene, sumbala muéne ua kanene ku buika o mbanza ienioió. (Tanga Dimatekenu 19:21, 22.) Kála ki tua mono, Jihova ki muthu ua jiji. Mu ithangana ioso muéne muthu ua lenduka.

15, 16. Kiebhi ki londekesa o Kitumu kia Mozé kuila Jihova muthu ua lenduka? (Tala o foto ia dianga.)

¹⁵ Xinganeka o phangu ia mukuá i londekesa o kulenduka kua Jihova, mu Kitumu kia Mozé. Se muthu mukua Izalaiele uexile ngadiama, anga u kamba o mbudi mba hombo phala ku bhana o sata, muéne ua tokalele ku bhana membe aiiadi. Maji ihi i tuamba, se bhua kexile muthu mu Izalaiele ka kexile ni kutena kua ku sumba membe? Jihova ua xikinine kuila o muthu muenhó mukua Izalaiele, u bhana dibhubhu dia tiliku. Maji xinganeka mu izuelu íii. Ka tokalele ku bhana tiliku ioso, ioso, maji ua tokalele ku bhana ‘tiliku iambote,’ o tiliku ia kexile mu lambela o ajitu a betele-o-kota. (Dim. 18:6) Kiebhi kilondekesa o phangu íii kuila Jihova muthu ua lenduka?—Tanga Ijila 5:7, 11.

¹⁶ Xinganeka se eie uexile mukua Izalaiele, maji uexile ngadiama. Kioso ki u bhixila mu tembulu ni sata iê ia tiliku, u mona kuila akuenu o jimvuama, a bheka iama phala o sata. Nange u kala ni jisonhi mukonda dia dibhubhu diê dia tiliku di ua bheka. Maji u lembalala kuila bhu pholo ia Jihova o tiliku iê iala ni valolo. Mukonda diahi? Mukonda dia kima kimoxi, Jihova ua bhingi o tiliku iambote. Mu kidi kia difuangana kála Jihova ua kexile mu zuelela o akua Izalaiele, exile jingadiama: ‘Ngejiia kuma eie ku tena ku ngi bhana ima iavulu kála kia mu ngi bhana akuenu, maji ngejiia ué kuila ua mu ngi bhana o ima i ua tena.’ O kifika kiki, kilombolola  kuila Jihova muthu ua lenduka. Muéne ka bhingi ku jiselevende jê, o ima ka tena ku mu bhana na-iu.​—Jisá. 103:14.

17. Uebhi o ubhezelu u xikina Jihova?

 ¹⁷ Tu sanguluka mu kuijiia kuila Jihova muthu ua lenduka ni kuila muene u xikina o ubhezelu uetu kioso ki tu mu bhana ioso i tu tena. (Kol. 3:23) O phange ua muadiakimi mukua Itália, a mu exana Constance uambe: “O kuzuela ni athu ia lungu ni Mubhangi uami, kiene o kima ki nga beta ku uabhela o ku bhanga mu ithangana ioso.” Mukonda dia kiki, eme ngi kolokota o ku boka ni ku longa o maxibulu a Bibidia. Saí ithangana ngi divua kia iibha mukonda ki ngi tena dingi kubhanga kiavulu mukonda dia uhaxi uami. Maji nga mono kuila Jihova uejiia o maka u nga mu di bhana na-u, ni kuila muéne ua ngi zolo, u bhana valolo ku kikalakalu kiami.”

18. Kiebhi o jitata kia tena o ku kaiela o phangu ia Jihova?

¹⁸ Kiebhi ki tu tena ku kaiela o phangu ia Jihova ia ku lenduka? Xinganeka dingi kiebhi Jihova kia talatala Lote. Jihova muéne ua kexile ni ungana, maji né kiki muéne uevu Lote kioso kia kexile mu zuela o ima ia mesenene. Nzambi uehela Lote ku bhanga o ima ia mesenene. Se eie u tata, o kuila u tena ku kaiela o phangu ia Jihova? O kuila u tena kuívua o tuana tuê kioso kia mu zuela ni ku a ehela ku bhanga o ima ia mesena, se ku bhinga? Kia lungu ni maka enhá, o Mulangidi ua 1 ua Katutu ua 2007 mu phutu, uambe kuila, o jitata a tokala kuehela o tuana tuâ kuzuela ia lungu ni kitumu kia dibhata. Mu kifika, o jitata nange a bhana kitumu kia lungu ni kithangana kia tokala ku bhixila o tuana ku bhata mu usuku. Né muene kiki, o jitata a tokala kuzuela ni tuana ande dia ku sola o kithangana kia tokala. Saí ithangana o jitata nange a banza kuila ki kima kia iibha ku lungulula o kithangana kia tokala ku bhixila o tuana ku bhata, se mu ku bhanga kiki, ene ka bhukumukina o itumu ia Bibidia. Se o jitata ji zuela ni tuana tua, ande dia ku soneka o itumu, o tuana a-nda tendela kiambote o kitumu, mu kiki, ene a-nda belesela o kitumu.

19. Kiebhi o tufunga kia tena ku bhanga nguzu phala ku kaiela o phangu ia Jihova ia ku lenduka?

¹⁹ O tufunga mu kilunga, a tokala ku bhanga nguzu phala ku kaiela o phangu ia Jihova. Phala ku bhanga kiki, ene ka tokala ku jijila o jiphange mu kilunga ku kalakala kiavulu. Lembalala kuila Jihova ua bhana valolo katé muene ku sata ia athu akua Izalaiele exile jingadiama. Lelu ué kiene kimoxi, saí jiphange ka tena ku kalakala kiavulu mu sidivisu ia ku boka mukonda dia uhaxi mba mukonda a kuka. Maji ihi i tuamba se ene a divua kia iibha mukonda ka tena ku kalakala dingi kála kia mesenene? O tufunga a tena ku a kuatekesa mu ku a lembalala kuila, Jihova u bhana valolo ku kikalakalu kiâ.​—Mar. 12:41-44.

20. O kuila o ku lenduka ku lombolola ku kalakala ngó kiofele mu sidivisu ia Nzambi? Jimbulula.

²⁰ Mu kidi, o ku lenduka ki ku lombolola ku kalakala bhofele mu sidivisu ia Nzambi, mukonda dia ku phopheka o mukutu uetu. (Mat. 16:22) Ki tu tokala ku kalakala ngó bhofele, se tuala hanji ni nguzu ia ku kalakala kiavulu. Mu veji dia kiki, etu enioso tua tokala ku ‘di suínisa,’ phala ku kuatekesa o kikalakalu kia Utuminu. (Luka 13:24) Mu kidi, tua tokala ku bhanga nguzu phala ku kala bhu kaxi, ku mbandu iéngi tu bhanga nguzu phala ku kalakala kiavulu, mu veji dia ku kalakala ngó kiofele. Se tu bhanga kiki, tu tena ku dielela kuila muéne ua-nda sanguluka. O kuila tu sanguluka, mukonda tu sidivila o Mesene ietu ua lenduka? Mu milongi ia-nda kaiela tua-nda di longa dingi ídifua iambote ia Jihova.—Jisá. 73:28.