Mu Itebuhe Tulemeno Twa Jehova Twa Bufani Ni Kutwisiso
Mu Itebuhe Tulemeno Twa Jehova Twa Bufani Ni Kutwisiso
“Muñaa Bupilo u na ni musa kwa batu kamukana, za lilato la hae li bonahala kwa misebezi ya hae kamukana.”—SAMU 145:9.
KANA MWA KONA KU TALUSA?
Ki tulemeno tufi to tubeli twa Jehova to lu nyakisisize mwa taba ye?
Ki mwa linzila lifi mo lu kona ku bonisa bufani sina Jehova?
Ki mwa linzila lifi mo lu kona ku bonisa kutwisiso sina Jehova?
1, 2. Ki nto mañi ye lu ka zwelapili ku eza?
KAIZELI wa libizo la Monika ya saa nyezwi ka lilimo ze fitelela 35 u bulela kuli: “Na ni bo muunaa ka lwa zibana hande. Kono, ku si na taba ni lilimo ze ñata ze se ni pilile ni bona, lu sa ituta lika ze ñwi ze ne lu sa zibi ku yo muñwi ni yo muñwi wa ku luna!” Taba yeo i bonisa kuli kaufelaa luna lwa kona ku ikutwa cwalo ka za bakuluna kamba balikani ba luna.
2 Lu ikutwanga hande ku ituta lika ze ñata ka za batu be lu lata. Kono nto ye lu fanga hahulu tabo ye tuna ki ku ituta ka za Jehova, ili Mulikanaa luna yo mutuna ka ku fitisisa. Ha lu koni ku ziba lika kaufela ka za Jehova. (Maro. 11:33) Lu ka zwelapili ku ituta tulemeno twa Jehova mi lu ka itebuha hahulu tona.—Muek. 3:11.
3. Ki lika mañi ze lu ka ituta mwa taba ye?
3 Mwa taba ye felile ne lu itutile mo lu kona ku itebuhela hahulu tulemeno twa Jehova to tu beli. Ne lu itutile kuli Jehova wa atumeleha mi ha na ketululo. Mwa taba ye, lu ka ituta mo Jehova a boniseza bufani ni kutwisiso. Ku ituta lika zeo ku ka lu tusa ku utwisisa hande kuli Jehova “u na ni musa kwa batu kamukana, za lilato la hae li bonahala kwa misebezi ya hae kamukana.”—Samu 145:9.
JEHOVA U NA NI BUFANI
4. Ku fana ku talusañi?
4 Ku fana ku talusañi? Manzwi a Jesu a ñozwi kwa liñolo la Likezo 20:35 a lu tusa ku fumana kalabo. Timana yeo ili: “Ku na ni tabo ye tuna mwa ku fana ye fita ye mwa ku fiwa.” Kamukwaocwalo, mutu ya fana u tabelanga ku itusisa nako ya hae, maata a hae, ni lika za na ni zona kuli a tuse ba bañwi. Mutu u kona ku i ngiwa kuli wa fana isiñi ka libaka la kuli u fanga batu limpo ze tula hahulu, kono ka libaka la kuli u fanga ku zwelela kwa pilu. (Mu bale 2 Makorinte 9:7.) Ha ku na mufani yo mutuna ya fita Jehova, ‘Mulimu wa luna ya tabile.’—1 Tim. 1:11.
5. Jehova u bonisa cwañi bufani bwa hae?
5 Jehova u bonisa cwañi kuli wa fana? Bibele ili: “Muñaa Bupilo u na ni musa kwa batu kamukana.” U fanga batu kaufela ze ba tokwa nihaiba ba ba si ka kalisa kale ku mu lapela. “U pazuliseza ba ba maswe ni ba bande lizazi la hae mi u neliseza pula ba ba lukile ni ba ba si ka luka.” (Mat. 5:45) Ki lona libaka Paulusi ha naa kona ku bulelela batu ba bañwi ba ne ba si Bakreste kuli Jehova “naa ezize bunde ka ku mi fa pula ye zwa kwa lihalimu ni linako za siselo, ku taza lipilu za mina ka lico ni tabo.” (Lik. 14:17) Kaniti luli Jehova u bonisa bufani bwa hae kwa batu kaufela.—Luka 6:35.
6, 7. (a) Jehova u tabela ku tusa sihulu bo mañi? (b) Ki mutala ufi o bonisa kuli Mulimu u fanga batanga ba hae ze ba tokwa?
6 Jehova u tabanga hahulu ku fa batanga ba hae ze ba tokwa. Mulena Davida naa ize: “Ni kile na ba mucaha, mi cwale se ni supezi; bo, ha ni si ka bona ya na ni niti a tuhelwa, a yumbwa, kamba bana ba hae ku pila ka ku ikupela buhobe.” (Samu 37:25) Bakreste ba bañata ba ba sepahala ba iponezi mwa ba babalelela Jehova.
7 Ka mutala, mwa lilimo za kwamulaho, paina wa libizo la Nancy naa bile mwa muinelo o taata. Na tokwa madola a 66 a kwa U.S.A. (kamba pene ye bato eza K349.80) kuli lizazi le li tatama a yo lifela ndu mwa naa ina. Kono naa sina masheleñi. Kaizeli yo u bulela kuli: “Ne ni lapezi ka za butata bo mi hasamulaho se ni ya kwa musebezi ko ne ni sebeza mwa licelo. Bakeñisa kuli mwa sunda yeo pisinisi ne i sa zamayi hande, ne ni si ka libelelela kuli batu ba ne ba leka lico ne ba ka ni fa masheleñi a buitumelo kwa musebezi o ne ni eza fa lizazi leo. Ne ni komokile ku bona batu ba bañata ha ba taha mwa licelo fa lizazi leo. Ha se ni kotokile, na kopanya masheleñi e ne ni filwe ao mi na fumana kuli masheleñi ao kaufela naa eza madola a 66 a kwa U.S.A.” Nancy u na ni buikolwiso bwa kuli Jehova ki yena ya naa mu tusize ku fumana za naa tokwa luli.—Mat. 6:33.
8. Ki mpo ifi ya lu file Jehova bakeñisa bufani bwa hae bo butuna?
8 Bakeñisa bufani bwa hae bo butuna, Jehova u file batu kaufela mpo ya butokwa. Ki ifi mpo yeo? Ki tiululo ya sitabelo sa Mwanaa hae. Jesu naa bulezi kuli: “Mulimu u latile hahulu lifasi kuli mane naa file Mwanaa hae wa libanda, kuli mutu kaufela ya bonisa tumelo ku yena a si ke a timezwa kono a be ni bupilo bo bu sa feli.” (Joa. 3:16) Pulelo ya kuli “lifasi,” ye itusisizwe mwa timana yeo, i talusa batu kaufela. Kamukwaocwalo, Jehova u fanga mpo yeo kwa batu kaufela ba ba tabela ku i amuhela. Batu kaufela ba ba lumela ku Jesu ba ka fumana bupilo bo bu sa feli! (Joa. 10:10) Taba yeo i bonisa kuli Jehova u sishemo luli.
MU BE NI BUFANI SINA JEHOVA
9. Lu kona ku ba cwañi ni bufani sina Jehova?
9 Lu kona ku ba cwañi ni bufani sina Jehova? Sina Jehova ha lu fanga lika ze ñata ze nde kuli lu be ni tabo, ni luna lu swanela ku fanga batu ba bañwi lika ze nde kuli ba be ni tabo. (1 Tim. 6:17-19) Lu banga ni tabo ha lu fanga limpo kwa balikani ba luna ni ba lubasi lwa luna ni ha lu tusanga ba ba mwa butokwi. (Mu bale Deuteronoma 15:7.) Ki nto mañi ye kona ku lu tusa ku ba ni bufani? Batu ba bañwi ba ikatulezi kuli nako kaufela ha ba amuhela mpo, ni bona ba ka bata kolo ya kuli ba fe mutu yo muñwi mpo. Batu ba Jehova ba bañata kacenu ba na ni bufani.
10. Ki nzila ifi kwa linzila ze nde ka ku fitisisa ye lu kona ku bonisa ka yona kuli lu na ni bufani?
10 Nzila ye ñwi kwa linzila ze nde ka ku fitisisa ye lu kona ku bonisa ka yona kuli lu na ni bufani, ki ka ku itusisa nako ya luna ni maata a luna kwa ku tusa ni ku susueza ba bañwi. (Magal. 6:10) Kana mwa bonisanga bufani ka nzila yeo? Mu kana mwa ipuza kuli: ‘Kana batu ba bañwi baa lemuhanga kuli na tabela ku teeleza ku ba bañwi? Haiba mutu yo muñwi a ni kupa kuli ni mu ezeze nto ye ñwi kamba kuli ni mu shimbele nto ye ñwi, kana na tabelanga ku mu tusa? Ki lili fo ne ni babalelize mutu yo muñwi wa mwa lubasi kamba mutu yo muñwi mwa puteho?’ Haiba lu “fana,” lu ka ikutwa ku ba bukaufi ni Jehova ni kwa balikani ba luna.—Luka 6:38; Liprov. 19:17.
11. Ki lifi linzila ze ñwi ze lu kona ku bonisa ka zona bufani ku Jehova?
11 Hape lwa kona ku bonisa bufani bwa luna ku Jehova? Bibele i lu susueza ku kuteka Jehova ka “tutu” ya luna. (Liprov. 3:9) “Tutu” yeo i kopanyeleza nako, maata, ni masheleñi e lu kona ku itusisa ha lu nze lu sebeleza Mulimu. Nihaiba banana ba banyinyani ba kona ku ituta ku bonisa bufani ku Jehova. Ndate ya bizwa Jason u bulela kuli: “Lubasi lwa luna ha lu batanga ku fa nubu kwa Ndu ya Mubuso, lu tuhelelanga bana ba luna kuli ba beye masheleñi mwa kambokisi ka linubu. Bana ba luna ba tabelanga ku beya masheleñi mwa tumbokisi twa linubu kakuli ba ziba kuli ha ba eza cwalo ba fa nto ye ñwi ku Jehova.” Banana ha ba lemuha kuli ku fa Jehova nto ye ñwi ku tahisa tabo inze ba sa li banana, ba ka zwelapili ku ba ni bufani niha ba ka hula.—Liprov. 22:6.
JEHOVA U NA NI KUTWISISO
12. Ku ba ni kutwisiso ku talusañi?
12 Kalemeno ka kañwi ka ka nde ka na ni kona Jehova ki kutwisiso. Ku ba ni kutwisiso ku talusañi? (Tite 3:1, 2) Mutu ya na ni kutwisiso ha ñañeleli fa mihupulo ya hae. Hañata ha latelelangi taku ni taku ya mulao. Ha na buhali mi haki mutu ya taata. U ezanga batu ka musa mi u likanga luli ku utwisisa miinelo ya batu. Wa tabela ku teeleza ku ba bañwi mi ha ku swanela, u lumelezanga ba bañwi kuli ba eze ze ba lata.
13, 14. (a) Jehova u bonisa cwañi kuli u na ni kutwisiso? (b) Mu kona ku ba cwañi ni kutwisiso ha mu nyakisisa mo Mulimu naa sebelisanezi ni Lota?
13 Jehova u bonisa cwañi kuli u na ni kutwisiso? Wa utwisisa maikuto a batanga ba hae, mi hañata u ba lumelezanga ku eza lika ka nzila ye ba bata. Ka mutala, mu nyakisise mo Jehova naa sebelisanezi ni Lota, muuna ya lukile. Jehova ha naa atuzi kuli a sinye mileneñi ya Sodoma ni Gomora, naa bulelezi Lota kuli a sabele kwa malundu. Kono ka libaka le liñwi, Lota a ikupela ku Jehova kuli a sabele kwa sibaka si sili. Mu nahane feela taba yeo! Lota naa kupa kuli Jehova a cince litaelo za hae!—Mu bale Genese 19:17-20.
14 Ha mu bala likande leo, mu kana mwa nahana kuli Lota naa na ni tumelo ye fokola kamba naa sa utwi Mulimu. Niti kikuli Jehova naa ka kona ku sileleza Lota kwa sibaka sa naa ka ba ku sona kaufela. Kamukwaocwalo, Lota naa sa swaneli ku saba. Kono Lota naa ikalezwi luli. Jehova naa kutekile maikuto a Lota mi naa mu lumelelize ku sabela kwa muleneñi u sili ku si na taba kuli Jehova naa bata ku sinya muleneñi wo ni wona. (Mu bale Genese 19:21, 22.) Jehova ha na buhali bo bu sa swaneli mi haki Mulimu ya taata. Ki Mulimu ya utwisisanga kamita.
15, 16. Mulao wa naa file Jehova kwa Maisilaele u bonisa cwañi kuli Mulimu u na ni kutwisiso? (Mu bone siswaniso se si fa likepe 12.)
15 Mulao wa naa file Jehova kwa Maisilaele ni ona u bonisa kuli Jehova u na ni kutwisiso. Ka mutala, haiba kuli Muisilaele naa shebile hahulu kuli mane naa sa koni ku fa ngunyana kamba puli sina sitabelo, Muisilaele yo naa kona ku fa maiba a mabeli kamba tunkwilimba. Kono ku cwañi haiba Muisilaele naa shebile hahulu kuli mane naa sa koni ku fa nihaiba tunkwilimba to tubeli? Jehova naa lumelezanga Muisilaele yo ku fa bupi bo bu nekile mwa sibaka sa tunkwilimba to tubeli. Kono Jehova naa sa bati bupi-bupi feela. Mulao ne u bonisa kuli bupi bo, ne bu swanela ku ba “bupi bo bu nekile.” (Gen. 18:6) Mutala wo u bonisa cwañi kuli Jehova u na ni kutwisiso?—Mu bale Livitike 5:7, 11.
16 Mu nge kuli mu Muisilaele mi mu shebile hahulu. Ha mu nze mu tisa sitabelo sa mina sa bupi bo bu nekile kwa tabernakele, mu bona Maisilaele ba bañwi ba ba na ni masheleñi a mañata ku mi fita inze ba tisa lifolofolo za ku to fa sina matabelo. Mwendi mu ka ikutwa maswabi bakeñisa sitabelo sa mina se si nyinyani. Kono hamulaho mu hupula kuli sitabelo sa mina ki sa butokwa hahulu ku Jehova. Libaka? Kakuli Mulao wa Jehova ne u tokwa kuli mu tise “bupi bo bu nekile,” ili ku talusa bupi bo bunde luli. Ku swana feela inge kuli Jehova u mi bulelela kuli: ‘Na ziba kuli ha u koni ku fa ze swana ni ze ba fa ba bañwi, kono hape naa ziba kuli u ni fa zo kona kaufela.’ Mutala wo u bonisa kuli Jehova u na ni kutwisiso. Mulimu ha tokwi kuli batanga ba hae ba eze ze ba sa koni.—Samu 103:14.
17. Jehova u tabela kuli lu mu sebeleze cwañi?
17 Kwa tabisa ku ziba kuli Jehova u na ni kutwisiso ni kuli wa itebuha luna ha lu nze lu mu lapela mo lu konela kaufela. (Makolo. 3:23) Kaizeli wa musupali ya pila kwa Italy ili ya bizwa Constance naa bulezi kuli: “Ni tabela hahulu ku bulelela ba bañwi ka za Mubupi wa ka. Kona libaka ha ni zwelapili ku kutaza ni ku zamaisa lituto za Bibele. Fokuñwi ni ikutwanga kuli ha ni koni ku eza ze ñata bakeñisa makulanu a ka. Kono na ziba kuli Jehova wa ziba bufokoli bwa ka ni kuli wa ni lata mi wa itebuha ze ni kona ku eza.”
MU BE NI KUTWISISO SINA JEHOVA
18. Ki mwa nzila ifi mo bashemi ba kona ku likanyisa mutala wa Jehova?
18 Lu kona ku ba cwañi ni kutwisiso sina Jehova? Mu hupule mwa naa sebelisanezi Jehova ni Lota. Jehova naa na ni maata a ku bulelela Lota kwa naa swanela ku balehela. Kono Jehova naa bonisize musa ka ku teeleza ku Lota ha nze a mu taluseza mwa naa ikutwela, mi hape Jehova naa lumelelize Lota ku ya kwa naa bata ku ya. Haiba mu na ni bana, kana mwa kona ku likanyisa mutala wa Jehova? Mwendi mwa kona ku teeleza kwa bana ba mina ha ba nze ba mi taluseza ze ba bata, mi hasamulaho haiba kwa swanela, mwa kona ku cinca mubonelo wa mina ka za mo mu batela kuli lika li ezezwange. Mu kona ku eza cwañi cwalo? Tawala ya Mulibeleli ya September 1, 2007, i bonisa kuli bashemi ba bañwi ha ba tomanga milao mwa lubasi, baa teelezanga kwa maikuto a bana ba bona. Ka mutala, bashemi ba kona ku tomela bana ba bona nako ye ba swanela ku fitanga kwa ndu manzibwana. Bashemi ba na ni tukelo ya ku eza cwalo, kono mwendi ba ka tokwa ku ambola ni bana ba bona pili ba si ka toma kale nako ye ba swanela ku fitanga fa ndu bana ba bona. Mwa miinelo ye miñwi, bashemi ba kona ku atula kuli ha u bona feela milao ye ba toma ha i lwanisani ni ze i bulela Bibele, ku cinca nako ye ba swanela ku fitanga bana ba bona fa lapa ha ku si ka fosahala. Bashemi ha ba ambola ni bana ba bona pili ba si ka toma kale milao, bana ba ka utwisisa hande milao yeo mi ba ka tabela ku i latelela.
19. Baana-bahulu ba kona ku ba cwañi ni kutwisiso sina Jehova?
19 Baana-bahulu mwa puteho ba swanela ku lika ka taata kuli ba be ni kutwisiso sina Jehova. Ba kona ku eza cwalo ka ku sa libelela kuli mizwale ni likaizeli ba bona ba eze lika ze ba sa koni. Mu hupule kuli Jehova naa itebuhanga nihaiba matabelo a Maisilaele ba ne ba shebile hahulu. Ka nzila ye swana, mizwale ni likaizeli ba bañwi ba tandanga nako ye likani mwa bukombwa, mwendi ka libaka la kuli ba kula kamba kuli ba supezi. Ku cwañi haiba batu bao ba ikutwa ku zwafa kabakala kuli ha ba sa kona ku eza lika ka mo ba tokwela? Baana-bahulu ba kona ku tusa mizwale ni likaizeli bao ka ku ba tusa ku lemuha kuli Jehova wa ba lata bakeñisa ku mu sebeleza mo ba konela kaufela.—Mare. 12:41-44.
20. Ku ba ni kutwisiso ha lu nze lu sebeleza Mulimu ku talusañi?
20 Ku ba ni kutwisiso ha ku talusi kuli lu swanela ku eza ze nyinyani ha lu nze lu sebeleza Mulimu ka ku bata kuli lu “ikutwele butuku.” (Mat. 16:22) Ha lu swaneli ku eza ze nyinyani inze lu kona ku eza ze ñata mwa sebelezo ya luna ku Jehova. Kono kaufelaa luna lu tokwa ku hupulanga manzwi a Jesu a li: “Mu eze ka taata.” (Luka 13:24) Lu swanela ku ba ni mubonelo o swanela. Lu swanela ku sebeleza Mulimu ka mo lu konela kaufela, mi ha lu nze lu eza cwalo, lu swanela ku hupula kuli Jehova ha bati kuli lu eze ze lu sa koni. Haiba lu eza cwalo, Jehova u ka taba. Kwa tabisa luli ku sebeleza Mulimu ya na ni kutwisiso cwalo! Mwa taba ye tatama, lu ka nyakisisa tulemeno to tuñwi to tubeli kwa tulemeno twa Jehova to tunde.—Samu 73:28.
[Lipuzo za Tuto]
[Siswaniso se si fa likepe 13]
Jehova naa bata kuli Maisilaele ba be ni bufani sina yena (Mu bone paragilafu 9)
[Siswaniso se si fa likepe 14]
“Kuteka Muñaa Bupilo ka tutu ya hao.”—Liprov. 3:9 (Mu bone paragilafu 11)
“Se mu eza kaufela, mu si eze ka moyo kaufela.”—Makolo. 3:23 (Mu bone paragilafu 17)
