1, 2. Ki l’occasion bann camarade Jéhovah ena?

 ENN soeur ki appel Monika dire: “Sa faire preské 35 an ki nou marié. Mo mari ek moi konn nou camarade bien. Pourtant, mem apré tou sa bann l’année-la, nou ankor toujours pé aprann bann kitsoz lor nou camarade!” Pena doute ki nou kapav dire mem kitsoz lor beaucoup mariage ek lor bann l’amitié ki ena entre bann dimoune.

² Sa faire nou plaisir pou konn plis bann dimoune ki nou content. Mais, pli grand l’amitié ki nou kapav ena, c’est nou l’amitié avek Jéhovah. Jamais nou pa pou fini konn tou seki nou bizin koné lor Li. (Rom. 11:33) Pendant l’eternité, nou pou gagne l’occasion ek la joie pou ena enn pli grand l’appreciation pou bann qualité Jéhovah.​—Eccl. 3:11.

3. Ki nou pou examiné dan sa lartik-la?

³ Lartik avant ti aide nou pou ena enn pli grand l’appreciation pou deux qualité Jéhovah: Li abordable ek Li pa faire preference. Anou examine deux lezot qualité bien attirant ki Jéhovah ena​—Li genereux ek Li raisonnable. Sa pou aide nou pou comprend pli bien ki “Jéhovah bon ar tou dimoune, ek tou seki Li faire reflete so misericorde.”​—Ps. 145:9.

4. Ki sa vedir vrai generosité?

⁴ Couma enn dimoune montré ki li genereux? Nou gagne enn reponse dan seki Jésus ti dire dan Actes 20:35: “Ena plis bonheur kan donné ki kan recevoir.” Dan sa declaration simple-la, Jésus ti montré ki sa vedir vrai generosité. Enn dimoune genereux donne sans hesité so le temps, so la force ek seki li ena pou aide lezot​—ek li content pou faire sa. Oui, li montré-li genereux, pa parski li donne bann  gros cadeau, mais parski li ena bann bon mobile kan li donne enn kitsoz. (Lire 2 Corinthiens 9:7.) Pena personne ki pli genereux ki Jéhovah, nou “Bondié heureux.”​—1 Tim. 1:11.

5. Couma Jéhovah montré ki Li genereux?

⁵ Couma Jéhovah montré ki Li genereux? Li donne tou dimoune seki zot bizin, mem bann ki pankor commence adore Li. Oui, “Jéhovah bon ar tou dimoune.” Li “faire so soleil levé lor mauvais dimoune ek lor bon dimoune, ek Li faire la pluie tombé lor dimoune juste ek injuste.” (Mat. 5:45) C’est a cause sa ki, kan l’apotre Paul ti koz ar bann dimoune ki pa ti servi Jéhovah, li ti kapav dire ki Jéhovah ‘faire bann bon kitsoz, Li donne la pluie ek bann saison kot ena l’abondance; Li donne mangé en abondance ek Li rempli nou leker avek la joie.’ (Actes 14:17) Li clair ki Jéhovah Li genereux envers tou dimoune.​—Luc 6:35.

6, 7. (a) Kisannla surtout Jéhovah content pou aidé? (b) Donne enn l’exemple pou montré couma Jéhovah prend soin so bann adorateur.

⁶ Jéhovah surtout content pou donne so bann adorateur seki zot bizin. Le Roi David ti dire: “Mo ti enn jeune homme, mo finn mem vinn vié, ek pourtant mo pa finn trouve enn dimoune juste ki’nn abandonné net, ni so descendance ki pé rod di-pain.” (Ps. 37:25) Beaucoup serviteur Jéhovah finn trouvé couma Jéhovah finn prend zot soin. Anou prend enn l’exemple.

⁷ Ena plusieurs l’année, Nancy, enn pionnier ti trouve-li-mem dan enn situation difisil. Li dire: “Mo ti bizin 66 dollar (apepré 2000 roupie) pou paye mo lakaz, ek mo ti ena zis enn jour pou faire sa. Mo pa ti koné ki pou faire pou gagne sa l’argent-la. Mo ti prié lor sa probleme-la, ek apré mo ti al travail; mo ti enn serveuse. Sa l’apré-midi-la, mo pa ti attann pou gagne beaucoup pourboire parski sa ti enn periode la semaine kot pa ti ena beaucoup dimoune. Mais mo ti etonné ki plusieurs client ti vinn dan restaurant sa soir-la. Kan mo ti fini mo travail, mo ti ajoute bann pourboire ki mo ti gagné, ti ena en tou 66 dollar.” Nancy sur ki c’est Jéhovah ki ti aide li pou gagne exactement seki li ti bizin.​—Mat. 6:33.

8. Ki pli grand cadeau Jéhovah inn donne nou?

⁸ Tou dimoune kapav gagne pli grand cadeau ki Jéhovah inn donné. Ki sa cadeau-la? Sacrifice so Garson. Jésus ti dire: “Bondié finn tellement content le monde ki Li finn donne so sel Garson ki Li finn crée direct, pou ki tou seki ena la foi en li pa detruire, mais gagne lavi eternel.” (Jean 3:16) Dan sa contexte-la “le monde” represente tou dimoune. Alors, Jéhovah donne sa pli grand cadeau-la tou dimoune ki choisir pou accepté sa. Bann dimoune ki ena la foi en Jésus pou gagne lavi eternel! (Jean 10:10) Pena pli grand preuve ki Jéhovah Li enn Bondié genereux, pa vrai?

9. Couma nou kapav montré-nou genereux pareil couma Jéhovah?

 ⁹ Couma nou kapav imite generosité Jéhovah? Jéhovah “donne nou tou kitsoz en abondance pou nou plaisir”; alors nou bizin ‘pré pou partage,’ avek lezot, coumsa nou faire zot heureux. (1 Tim. 6:17-19) Sa faire nou plaisir pou donne cadeau bann dimoune ki nou content ek pou aide bann dimoune ki bizin l’aide. (Lire Deutéronome 15:7.) Ki kapav aide nou pou rappel ki nou bizin genereux? Certain Chretien finn decidé ki, kan zot gagne enn cadeau, zot aussi zot pou rod enn l’occasion pou donne enn kikenn enn cadeau. Dan congregation ena beaucoup frere ek soeur ki montré-zot genereux.

10. Ki pli bon fason nou montré ki nou genereux?

¹⁰ Enn pli bon fason pou montré-nou genereux, c’est kan nou servi nou le temps ek nou la force pou aide ek pou encourage lezot. (Gal. 6:10) Pou koné si nou genereux, nou kapav demann-nou-mem: ‘Eski lezot trouvé ki mo disposé pou ecoute zot? Si enn kikenn demann moi pou aide li pou faire enn travail ou-soit pou rann li enn service, eski mo pou accepté kan li possible? Kan eski dernier fois mo’nn felicite enn membre mo famille ou-soit enn frere ou enn soeur dan congregation?’ Kan nou “prend l’habitude donné,” nou senti-nou pli proche ar Jéhovah ek ar nou bann camarade.​—Luc 6:38; Prov. 19:17.

11. Cite certain fason couma nou kapav montré-nou genereux envers Jéhovah.

 ¹¹ Nou kapav aussi genereux envers Jéhovah. La Bible donne nou sa l’encouragement-la: “Honore Jéhovah avek zot bann kitsoz ki ena valeur.” (Prov. 3:9) Sa “bann kitsoz ki ena valeur[-la]” c’est nou le temps, nou la force, ek seki nou ena, ki nou consacré pou servi Li. Mem  bann jeune zenfant kapav aprann pou montré-zot genereux envers Jéhovah. Enn papa ki appel Jason dire: “Kan nou famille faire enn donation dan la Salle du Royaume, nou laisse nou bann zenfant mette l’argent dan boite contribution. Zot bien content parski, kan zot pé faire sa, zot pé ‘donne enn kitsoz Jéhovah.’” Bann zenfant ki trouve la joie pou donne Jéhovah kan zot ankor tipti, pou surement contigne montré-zot genereux envers Li kan zot vinn grand.​—Prov. 22:6.

12. Ki sa vedir raisonnable?

¹² Jéhovah ena enn lot qualité attirant: Li raisonnable. Ki sa vedir raisonnable? Dan Traduction du monde nouveau, mot original ki habitué servi pou traduire “raisonnable” vedir “cedé.” (Tite 3:1, 2, note) Enn dimoune raisonnable pa touletan insisté lor tou ti detail dan la loi, li pa severe kan pa necessaire, ou-soit li pa dur. Au contraire, li faire tou pou montré-li gentil dan so rapport avek lezot, li prend en consideration zot situation. Li disposé pou ecoute lezot ek, kan necessaire, li cedé pou accepté seki zot envie ek pou change seki li ti pé attann.

13, 14. (a) Couma Jéhovah montré ki Li raisonnable? (b) Ki nou kapav aprann lor fason ki Bondié ti agir avek Lot?

¹³ Couma Jéhovah montré ki Li raisonnable? Avek bonté, Li prend en consideration sentiment so bann serviteur, ek souvent, Li disposé pou faire seki zot demandé. Par exemple, guetté couma Jéhovah ti agir avek Lot, enn dimoune ki ti juste. Kan Jéhovah ti decidé pou detruire Sodome ek Gomorrhe, Li ti donne Lot bann instruction bien clair pou sauvé ek al dan bann montagne. Mais, pou certain raison, Lot ti suppliye Jéhovah pou permette li al dan enn lot l’endroit. Mazinn enn coup​—en realité, Lot ti demann Jéhovah pou change So bann instruction!​—Lire Genèse 19:17-20.

¹⁴ Kitfois, li fasil pou juge Lot ek pensé ki li ti faible ek li ti desobeir. Apré tou, Lot pa ti ena okenn raison pou li peur, Jéhovah ti bien kapav garde li vivant n’importe ki coté. Kan-mem, Lot ti peur, ek Jéhovah ti respecté seki Lot ti ressenti ek Li ti cedé. Jéhovah ti laisse Lot al dan enn la ville ki Li ti ena l’intention pou detruire. (Lire Genèse 19:21, 22.) Li clair ki Jéhovah pa severe, ni dur. Li disposé pou cedé ek Li raisonnable.

15, 16. Couma la Loi Mosaïk ti montré ki Jéhovah Li raisonnable? (Guette zimage dan commencement lartik.)

¹⁵ La Loi Mosaïk aussi montré ki Jéhovah Li raisonnable. Par exemple, si enn Israélite ti misere ek li pa ti kapav offert enn mouton ou-soit enn cabri en sacrifice, li ti kapav offert deux tourterelle ou-soit deux pigeon. Mais si enn Israélite ti bien pauvre ek li pa ti kapav mem offert deux pigeon, ki li ti faire? Dan sa cas-la, Jéhovah ti permette li pou offert enn tipé la farine. Selman, remark sa detail important-la: Li ti bizin donne “pli bon la farine ki ena,” ki bann Israélite ti servi pou bann invité bien important, pa n’importe ki la farine. (Gen. 18:6) Kifer sa detail-la important?​—Lire Lévitique 5:7, 11.

¹⁶ Faire coumadir ou enn Israélite ek ou misere. Letan ou vinn dan tabernacle avek inpé la farine pou offert en sacrifice, ou trouve bann lezot Israélite ki pli riche, vinn avek zot bann zanimo. Kitfois ou pou senti-ou embarrassé parski ou pensé ki ou sacrifice pena enn grand valeur. Lerla, ou rappel ki pou Jéhovah, ou sacrifice ena valeur. Kifer? Parski dapré la Loi Jéhovah, sa la farine-la ti bizin pli bon qualité. Alors, coumadir Jéhovah ti pé dire ou: ‘Mo koné ki to pa kapav offert pareil couma lezot, mais mo koné aussi ki to pé donne moi seki to ena pli bon.’  Oui, Jéhovah montré-Li raisonnable kan Li prend en consideration limite ek situation so bann serviteur.​—Ps. 103:14.

17. Ki qualité service nou kapav sur Jéhovah accepté?

 ¹⁷ Sa encourage nou pou koné ki Jéhovah Li raisonnable ek Li accepté kan nou servi Li avek tou nou nâme. (Col. 3:23) Constance, enn soeur Italien, ki agé, ti dire: “Koz ar lezot lor mo Createur, c’est seki mo ti toujours pli content faire. C’est a cause sa ki mo contigne preché ek conduire bann letid la Bible. Parfois, mo chagrin ki mo pa kapav faire plis a cause mo la santé. Mais mo realisé ki Jéhovah konn mo limite ek ki Li content moi ek apprecié seki mo kapav faire.”

18. Cite enn fason couma bann parent kapav imite Jéhovah.

¹⁸ Couma nou kapav imite Jéhovah ek montré-nou raisonnable? Reflechi ankor couma Jéhovah ti agir avek Lot. Jéhovah ti ena tou droit pou dire Lot ki coté li ti bizin allé. Pourtant, avek bonté, Li ti ecoute Lot exprime so bann sentiment, ek Li ti accepté seki Lot ti demann Li. Si ou enn parent, couma ou kapav imite l’exemple Jéhovah? Eski ou kapav ecouté kan ou bann zenfant demann ou enn kitsoz ek, kan li possible, faire zot plaisir? En rapport avek sa, La Tour de Garde 1^er Septembre 2007, ti expliké ki, kan bann parent etabli bann regle ki bizin respecté dan lakaz, zot kapav ecoute l’opinion zot zenfant. Par exemple, kan bann parent decidé ki ler zot zenfant bizin rente lakaz, zot gagne droit faire sa. Mais, kan-mem zot kapav ecoute seki zot zenfant pensé lor sa ler ki zot finn fixé-la. Dan certain cas, bann parent kapav choisir pou faire certain changement en rapport avek ler ki zot inn fixé, tant ki pena okenn principe la Bible ki impliké. Kan bann parent prend compte l’opinion zot zenfant avant ki zot etabli bann regle dan lakaz, zot pou trouvé ki bann zenfant pou comprend pli bien sa bann regle-la ek lerla, zot pou pli disposé pou obeir.

19. Couma bann ancien kapav faire zeffort pou imite Jéhovah ki raisonnable?

¹⁹ Bann ancien dan congregation faire zeffort pou imite Jéhovah ek montré-zot raisonnable kan zot prend en consideration situation zot bann frere ek soeur. Rappel ki Jéhovah ti accorde beaucoup valeur mem ar sacrifice bann Israélite ki ti pli pauvre. Dan mem fason, ena certain frere ek soeur ki bien limité ek zot pa kapav faire beaucoup dan zot service, kitfois a cause zot la santé ou-soit zot l’age. Ki bann ancien kapav faire si sa bann Chretien-la senti-zot decouragé a cause zot limite? Bann ancien kapav aide zot pou realisé ki Jéhovah content zot parski zot pé faire tou seki zot kapav dan so service.​—Marc 12:41-44.

20. Eski, pou montré-nou raisonnable, nou bizin faire moins dan service Bondié? Expliké.

²⁰ Bien sur, fodé jamais nou pensé ki nou kapav faire moins dan service Bondié zis pou nou ‘bon avek nou-mem,’ ek dire ki nou raisonnable. (Mat. 16:22) Nou pa envie faire nou minimum ek apré, pou defann nou l’attitude, nou dire ki nou pé montré-nou raisonnable. Au contraire, nou tou nou bizin “faire bann grand zeffort” pou soutenir Royaume Bondié. (Luc 13:24) En realité, nou bizin montré-nou equilibré. Nou faire tou seki nou kapav dan service Jéhovah, ek en mem temps, nou rappel ki Jéhovah jamais pa pou demann nou faire seki nou pa kapav. Kan nou faire nou maximum, nou kapav sur ki sa faire Jéhovah plaisir. Eski nou pa content pou servi enn Bondié ki raisonnable coumsa? Dan prochain lartik, nou pou guette deux lezot qualité bien attirant ki forme partie dan personnalité Jéhovah.​—Ps. 73:28.