A Zeova yaa kõata, la wʋmda
“Zu-soabã maanda [nebã] fãa neere, la bãmb nimbãan-zoeerã tata bãmb tʋʋmã fãa.”—YƖƖL 145:9.
1, 2. Bõe la d na n tõog n maan wakat sẽn kõn sa yĩnga?
A MONIKA sẽn yaa saam-bi-poak sẽn kẽ kãadem na maan yʋʋm 35 wã yeela woto: “Maam ne m sɩdã mii taab sõma. La baa tõnd sẽn kaoos ne taabã, d ned kam fãa ket n bãngda bũmb kẽer a to wã zugu.” Yaa woto ne neb wʋsgo. Baa b sẽn kaoos ne b pagba, b sɩdb wall ne b zo-rãmbã, b ket n bãngda yɛl a taab b zutu.
2 D sã n nong neda, n paam n bãngd-a n paasdẽ, noom-d lame. La d sã n bãngd a Zeova n paasdẽ, noom-d lame n yɩɩda. Bala, yẽ zoodã n tar yõod ne-d n yɩɩda. D pa na n tol n bãng a Zeova tɩ sek ye. (Rom 11:33) D sã n wa paam n vɩ wakat sẽn kõn sa, d na n ket n bãngda bũmb wʋsg a Zeova zugu.—Koɛ. 3:11.
3. Bõe yell la d na n gom sõs-kãngã pʋgẽ?
3 Sõsg ning sẽn loogã sõng-d lame tɩ d bãng a Zeova zʋg-sõma a yiib sõma n paase. Yaa a pẽnegr sẽn yaa nana wã, la a sẽn pa bakd ned n sõngã. Sõs-kãngã na n goma a sẽn yaa kõatã, la a sẽn yaa wʋmdã yelle. Rẽ na n sõng-d lame tɩ d wʋm yɩɩl-gʋlsdã sẽn yeel bũmb ningã võor sõma. A yeela woto: “Zu-soabã maanda [nebã] fãa neere, la bãmb nimbãan-zoeerã tata bãmb tʋʋmã fãa.”—Yɩɩl 145:9.
A ZEOVA YAA KÕATA
4. B sã n yeel tɩ ned yaa kõata, rat n yeelame tɩ bõe?
4 B sã n yeel tɩ ned yaa kõata, rat n yeelame tɩ bõe? A Zezi goam nins sẽn be Tʋʋm 20:35 pʋgẽ wã leokda sok-kãngã. Sebr Sõng pʋgẽ, vɛrse kãng yeta woto: “Sẽn kõt-a sũ-noog yɩɩda sẽn deegd-a.” Rẽnd ned sẽn yaa kõat baooda weer n sõngd a taaba, la a teend-b ne a tarem. A maanda rẽ ne yamleoogo. La pa ned sẽn kõt wʋsg bal n yaa kõat ye. Yaa a sẽn na n kõt ne a sũurã fãa. (Karm-y 2 Korẽnt dãmb 9:7.) Ned kae n yaa kõat n ta d Ba a Zeova ye.
5. Wãn to la a Zeova wilgd t’a yaa kõata?
5 Wãn to la a Zeova wilgd t’a yaa kõata? A kõta nebã fãa bũmb nins sẽn yaa tɩlae ne-bã, baa neb nins sẽn nan pa tũud-a wã menga. Sɩd me, Biiblã yeelame tɩ ‘Zu-soabã maanda fãa neere,’ la a paas woto: “Bãmb kɩtdame tɩ bãmb wĩntoog zẽk nin-wẽns la nin-tɩrs yĩnga, la bãmb tʋmda saag nin-tɩrs la nin-wẽns yĩnga.” (Mat. 5:45) Yaa rẽ n kɩt tɩ tʋm-tʋmd a Poll yeel neb sẽn pa kiris-neb t’a Zeova ‘maana neere, n kõ-b saaga, la sẽoogo, la bõn-bɩʋʋng tɩ rɩɩb sek bãmba, tɩ b pid ne sũ-noogo.’ (Tʋʋ. 14:17) Vẽenega, a Zeova sẽn yaa kõatã nafda nebã fãa.—Luk 6:35.
6, 7. a) Ãnd dãmb la a Zeova sõngd ne sũ-noog n yɩɩda? b) Kiba-bʋg n wilg tɩ Wẽnnaam sõngda neb nins sẽn maand a raabã?
6 Yaa neb nins sẽn tũud a Zeova wã la a sõngd ne sũ-noog n yɩɩda. Rĩm a Davɩɩd yeela woto: “Mam da yaa bi-bɩɩga, la masã mam kʋʋlame, la mam nan ka yã tɩ b bas nin-tɩrg ye, la mam nan ka yã t’a yagens bõosd rɩɩb me ye.” (Yɩɩl 37:25) Kibay wʋsg n wilgd t’a Zeova sɩd geta d yelle.
7 Wala makre, so-pakd yʋʋr sẽn boond t’a Nancy ra segd n yaoa a roogã luaaze, n yaool n da pa tar ligd ye. Yaa tõnd ligdã tus a yoob la kobs-yoob la a ra segd n yao vẽkembeoogã. A yeela woto: “Mam pʋʋsa a Zeova n togs m zu-loɛɛgã, n yaool n loog tʋʋma. Mam da tʋmda rɩɩb koosg zĩigẽ.” Neb nins sẽn wat be wã nong n kõta tʋm-tʋmdbã ligdi, n wilgdẽ tɩ b sũur nooma ne b tʋʋmdã. A Nancy paasa woto: “Mam da pa tagsd tɩ baraare, m na n paama ligd wʋsg ye. Bala pa raar nebã sẽn nong n wat n dɩtẽ ye. La neb wʋsg n wa n dɩ tɩ ling-ma. Mam sẽn wa n tʋm n sa n sigã, m sõda nebã sẽn kõ-m ligd ningã, n mik tɩ yaa tus a yoob la kobs-yoobe.” A Nancy kɩsa sɩd tɩ yɩ a Zeova n sõng-a t’a paam bũmb ning a sẽn da ratã bal kɛpɩ.—Mat. 6:33.
8. Kũun ning a Zeova sẽn kõ tɩ yaa kãseng n yɩɩdã la bʋgo?
8 Kũun ning a Zeova sẽn kõ tɩ yaa kãseng n yɩɩdã tõe n nafa ãdem-biisã fãa. Yaa a sẽn kõ a Biigã tɩ yɩ maoongã. A Zezi yeela woto: “Wẽnnaam nonga dũniyã, hal tɩ b kõ b Biig sẽn ka to, tɩ ned ning fãa sẽn tẽed bãmb kõn sãam ye, la a na paam vɩɩm sẽn ka sɛta.” (Zã 3:16) Yaa ãdem-biisã fãa la a Zezi sẽn bool tɩ “dũniyã.” Rẽnd ned ning fãa sẽn dat tõe n dɩ a Zeova kũun ning sẽn yaa kãseng n yɩɩdã yõodo. Sɩd me, sẽn tẽed-a a Zezi fãa na n wa paama vɩɩm sẽn ka sɛta. (Zã 10:10) Woto fãa pa wilgd t’a Zeova yaa kõat sẽn ka to sɩda?
D RƖK A ZEOVA TOGS-N-TAAR N YƖ KÕATBA
A Zeova sagla Israyɛll nebã tɩ b yɩ kõatb wa yẽ (Ges-y sull a 9)
9. Wãn to la d tõe n dɩk a Zeova togs-n-taar n yɩ kõatba?
9 Wãn to la d tõe n dɩk a Zeova togs-n-taar n yɩ kõatba? A Zeova sẽn kõt tõnd bũmb fãa tɩ sekd tõnd tɩ d paamd sũ-noogã, tõnd me segd n yɩɩ neb sẽn kõt ne yamleoogo, tɩ d taabã paamd sũ-noogo. (1 Tɩm. 6:17-19) D kõta d zo-rãmb la d zagsã rãmb kũuni, la d sõngd naong rãmba. (Karm-y Tõod 15:7.) Bõe n tõe n sõng-d tɩ d tẽegd n kõt d taabã kũuni? Kẽer yãka yam tɩ ned sã n kõ-b kũun fãa bɩ bãmb me bao ned n kõ kũuni. D sẽn ne tɩ tigingã pida ne neb sẽn yaa kõatbã noom-d lame.
10. Bõe la d tõe n maan n wilg tɩ d yaa kõatba?
10 Bõe la d tõe n maan n wilg tɩ d yaa kõatba? Bũmb a ye yaa d sẽn na n baood sẽk n sõngd d tãabã la d kengd b raoodo. (Gal. 6:10) Sẽn na yɩl n bãng y sã n maanda woto, y tõe n soka y meng sogs-kãensã: ‘Ned sã n dat n togs maam a zu-loɛɛga, m maagda m yĩng n kelg bɩ? A sã n kos maam tɩ m sõng-a n maan bũmb wall a sã n dat n tʋm-ma, m sakdame bɩ? Mam sẽn pẽg m zakã ned wall m tẽed-n-taag kaoosame bɩ?’ D sã n minim n kõt neb a taabã kũuni, tõnd ne a Zeova zoodã pãng na n paasdame. Tõnd ne d zo-rãmbã me nonglmã na n paasdame.—Luk 6:38; Yel. 19:17.
11. Bõe la d tõe n kõ a Zeova?
11 D tõe n kõ a Zeova kũun me. Wãn to? Biiblã sagend-d lame tɩ d “waoog Zu-soabã ne [d] paoongã.” (Yel. 3:9) Vɛrse kãngã pʋgẽ, “paoongã” yaa d sẽkã, d pãngã la d ligdã. Baa kambã tõe n kõ a Zeova kũuni. Saam-biig yʋʋr sẽn boond t’a Jason yeela woto: “Tõnd zakã rãmb sã n dat n ning ligd Rĩungã roog koglg pʋgẽ, d kõta d kambã tɩ b tɩ ningi. Woto noom-b lame. Bala, b miime tɩ b kõta a Zeova kũuni.” Kambã sã n bãng tɩ b sã n kõ a Zeova kũuni kõt-b-la sũ-noogo, b sã n wa bɩ, b na n kell n yɩɩ kõatba.—Yel. 22:6.
A ZEOVA YAA WƲMDA
12. B sã n yeel tɩ ned yaa wʋmda, rat n yeelame tɩ bõe?
12 Bũmb a to sẽn kɩt tɩ d nong a Zeova yaa a sẽn yaa wʋmdã. B sã n yeel tɩ ned yaa wʋmda, rat n yeelame tɩ bõe? (Tɩt 3:1, 2, MN) Ned sẽn yaa wʋmd pa baood tɩ nebã tũ noy dem-dem ye. A bʋkda a meng ne a taabã, n get ned fãa sẽn tõe la a sẽn pa tõe. A kelgda neb a taabã, tɩ sã n sakdẽ bɩ a tũ b raabã.
13, 14. a) Wãn to la a Zeova wilgd t’a yaa wʋmda? b) Wãn to la Wẽnnaam manesem sẽn yɩ to-to ne a Lotã wilgd t’a yaa wʋmda?
13 Wãn to la a Zeova wilgd t’a yaa wʋmda? A kelgda a nin-buiidã, n mi n sakd n tũud b raabo. Wala makre, tẽeg-y-yã a sẽn tall manesem ning ne a Lotã. A sẽn wa n yãk yam n na n sãam Sodom la Gomoorã, a yeela a Lot t’a zoe n kẽng tãensẽ wã. La a Lot kosa a Zeova n na n kẽng zĩig a to. D pa mi bũmb ning sẽn kɩt t’a kos woto wã ye. La yãmb we n gese! A Lot kosa a Zeova t’a toeem noor ning a sẽn da kõ-a wã.—Karm-y Sɩngr 19:17-20.
14 Y sã n karemd kibarã, y tõe n tagsdame t’a Lot tẽebã ra paoodame, wall t’a yɩɩ kɩɩsda. Yaa vẽeneg tɩ sẽn yaa zĩig ning fãa, a Zeova ra tõe n kogl-a lame. Rẽnd a Lot ra pa segd n zoe rabeem ye. Baasgo, a zoee rabeem. La a Zeova pa yik a sũur ne-a ye. A sakame t’a Lot kẽng tẽng ning a sẽn kos n na n kẽngã, n pa sãam tẽn-kãng ye. (Karm-y Sɩngr 19:21, 22.) Vẽenega, a Zeova yaa wʋmda. A pa pẽdgd ninsaalbã n dat tɩ b tũ noy dem-dem ye. A bʋkda a meng ne-ba.
15, 16. Wãn to la a Moiiz tõogã wilgd t’a Zeova yaa wʋmda? (Ges-y sõsgã sɩngrẽ fotã.)
15 A Moiiz tõogã me wilgdame t’a Zeova yaa wʋmda. A Zeova wilga tõogã pʋgẽ tɩ Israyɛll ned sã n da rat n maan maoong n yaool n pa tõe n paam pesg wall bʋʋga, a tõe n kõo wal a yiib wall manewal a yiibu. La a sã n yaa naong soab n pa tõe n paam manewal a yiibu, a maanda wãna? A Zeova kõo sor tɩ ned a woto tõe n kõ zom bilfu. La a Zeova pa yeel tɩ b wa ne zom bal ye. Ra segd n yɩɩ zom-bãanega. Pĩnd wẽndẽ wã, ned sã n da reeg sãan t’a sũur noom ne-a, zom-bãaneg la a ra yãkd n segl rɩɩb n kõ-a. (Sɩng. 18:6, MN) Wãn to la a Zeova sẽn yeel woto wã wilgd t’a yaa wʋmda?—Karm-y Maankʋʋr 5:7, 11.
16 Mams-y wa yãmb sẽn na n yaa Israyɛll neda, n yaa naong soaba. Yãmb talla y zom n kẽng sẽk-roogẽ wã n na n tɩ kõ maoongo, tɩ Israyɛll neb a taab sẽn são yãmb wa ne rũmsi. Tõe tɩ y tags tɩ yãmb kũunã pa zem baa fʋɩ, tɩ y sũur sãame. La y na n tẽegame t’a Zeova nifẽ, y kũunã tara yõod wʋsgo. Bõe yĩnga? Bala, a Zeova wilgame tɩ zomã segd n yɩɩ sõma wʋsgo. Yaa wa a sẽn yeel Israyɛll naong rãmbã woto: ‘Mam miime tɩ yãmb pa tar kũun-kãseng n na n kõ wa y taabã ye. La m miime tɩ y maana y sẽn tõe tɛka.’ Woto pa wilgd t’a Zeova yaa wʋmd sɩda? A pa kot tõnd tɩ d maan n yɩɩg d pãng ye.—Yɩɩl 103:14.
17. Wãn-wãn la a Zeova rat tɩ d tʋm a tʋʋmdã?
17 D sẽn mi t’a Zeova yaa wʋmdã kengda d raoodo. Bala, d miime t’a sẽn dat yaa d sẽn na n maand a raabã ne d sũur fãa. (Kol. 3:23) A Constance sẽn yaa saam-bi-poak sẽn kʋʋl n be Itali wã yeela woto: “Bũmb sẽn noom maam n yɩɩd yaa m sẽn na n gomd m Naandã yell ne m taabã. Yaa rẽ yĩng la m sẽn ket n moond koɛɛgã la m zãmsd nebã Biiblã. Mam laafɩ wã sẽn pa le waoogã kɩtame tɩ m pa tõe n maan wa pĩndã ye. Woto mi n sãamda m sũuri. La m tẽegdame t’a Zeova mii mam sẽn tõe n maanã tɛka, t’a nonga maam la t’a sũur nooma ne bũmb ning mam sẽn maandã.”
D RƖK A ZEOVA TOGS-N-TAAR N YƖ WƲMDBA
18. Wãn to la roagdbã tõe n dɩk a Zeova togs-n-taare?
18 Wãn to la d tõe n dɩk a Zeova togs-n-taar n yɩ wʋmdba? Tẽeg-y-yã a sẽn tall manesem ning ne a Lotã. A Zeova ra tõe n yeela a Lot t’a segd n kẽnga zĩig ning yẽ sẽn dat t’a kẽngã. La a maaga a yĩng n kelg-a, n bas t’a kẽng a sẽn kos n na n kẽngẽ wã. Yãmb sã n tara kamba, wãn to la y tõe n dɩk a Zeova togs-n-taare? Y tõe n mi n basame tɩ b togs b sẽn date, tɩ sã n pa wẽng bɩ y bas tɩ b maane. Yʋʋmd 2007 bõn-bɩʋʋng kiuugã pipi daar Gũusg Gasgã wilgame tɩ nand tɩ roagdb kẽer kõ b kambã noy b sẽn segd n tũ, b basdame tɩ kambã togs b tagsgo. Wala makre, roagdbã sã n dat n yãk lɛɛr takɩ kambã fãa sẽn tog n be yir yʋngo, b tara sor n na n maan dẽ. La b tõe n deng n sõsa ne kambã rẽ wɛɛngẽ. Wakat ninga, kambã sẽn datã sã n pa kɩɩsd Biiblã noyã, roagdbã tõe n sakame. Nand tɩ roagdbã gãneg noy kambã sẽn segd n tũ, b sã n dengd n sõsd ne-b rẽ zugu, na n yɩɩ nana tɩ b wʋm no-kãens võore, la b sak n tũ.
19. Wãn to la kãsem-dãmbã tõe n dɩk a Zeova togs-n-taar n yɩ wʋmdba?
19 Tigingã pʋgẽ, kãsem-dãmbã segd n yɩɩ wʋmdb wa a Zeova. B pa na n dat tɩ saam-biisã la saam-bi-pogsã maand sẽn yɩɩd b pãng ye. Tẽeg-y t’a Zeova ra nanda baa Israyɛll naong rãmbã maoongo. Rũndã-rũndã me, d tẽed-n-taas kẽer pa tõe n moon koɛɛgã wʋsg ye. Tõe tɩ yaa laafɩ kaalem wall b yʋʋm sẽn vẽsg yĩnga. Nin-kãens sũy sã n sãamd b sẽn pa tõe n tʋm wʋsg wa b sẽn datã, y maanda wãna? Y tõe n tẽeg-b lame tɩ b sẽn maand b sẽn tõe fãa wã nooma a Zeova.—Mark 12:41-44.
20. Wẽnnaam sẽn yaa wʋmdã kõt-d-la sor tɩ d maan laas-laas a tʋʋmdã pʋgẽ bɩ? Wilg-y y leoorã võore.
20 La d sẽn mi tɩ Wẽnnaam yaa wʋmdã pa segd n kɩt tɩ d bao padems n pa maan d sẽn tõe tɛk ye. D pa na n maand laas-laas a tʋʋmdã pʋgẽ ye. D na n tũ a Zezi saglgã, n mao ne d pãng tɛka. (Luk 13:24) Rẽnd d na n tʋmda a Zeova tʋʋmdã ne d sũur fãa. La d pa segd n yĩm t’a pa kot tɩ d maan sẽn yɩɩd d pãng ye. D sã n maanda d sẽn tõe tɛka, d tõe n kɩsa sɩd tɩ noom-a lame. A Zeova sẽn yaa wʋmd woto wã pa noom-y sɩda? Sõsg ning sẽn pʋgdã na n goma a zʋg-sõma a yiib yell me.—Yɩɩl 73:28.
