Jiova kiuelita kitemakas teisa uan motemaka kipatas tein ixyetok
“Jiova yolkuali iniuan nochin, uan iteiknelilis moajsi itech nochi itachiualis.” (SAL. 145:9)
1, 2. ¿Toni uelis kisentokaskej kichiuaskej itasojikniuan Dios?
SE TOKNIUJ siuat akin itokay Monika kijtoj: “Ajsitokya 35 xiujmej keman timonamiktijkej, uan notakauj uan nejua kuali timoixmatij. Sayoj ke maski panokya nochi nejon xiujmej, tikajsijok seki taman tein tiknextiaj”. Tikyekmatij ke no ijkon kinpanoua miakej namikuanij uan tasojiknimej.
2 Tinochin tikuelitaj okachi tikinixmatiskej akin tikintasojtaj. Sayoj ke tokuali uikalis iuan Jiova, yejua tein okachi moneki tikpiaskej. Tein melauj, amo keman tikmatiskej nochi kemej tamati Dios uan kemej kichiua teisa (Rom. 11:33). Uelis nochipaya tiksentokaskej tikixmatiskej ikualneskayouan uan okachi tiktasojkamatiskej (Ecl. 3:11).
3. ¿Toni tikitatij itech nejin tamachtilis?
3 Itech tamachtilis tein achto tikitakej, techmelauilij ke Jiova kichiua maj amo teouijmaka se motokis iuan uan amo techikotasojta. Nejon techpaleuij maj okachi tiktasojkamatikan ikualneskayouan. Axkan tikitatij omeok tein techtokia iuan: timomachtitij ke Dios kiuelita kitemakas teisa uan motemaka kipatas tein ixyetok. Ijkon okachi kuali tikajsikamatiskej ke “Jiova yolkuali iniuan nochin, uan iteiknelilis moajsi itech nochi itachiualis” (Sal. 145:9).
KIUELITA KITEMAKAS TEISA
4. ¿Toni kijtosneki maj aksa kiuelita kitemakas teisa?
4 ¿Toni kijtosneki maj aksa kiuelita kitemakas teisa? Jesús kijtoj ke “kachi yolpaktok in tagat ten tapaleuijtinemi ika ten niaxka uan ke ne tagat ten sayo kiselia tapaleuilis” (Hech. 20:35). Nejin tanemilil tein amo ouij kinextia tein kijtosneki maj aksa yekmelauj kiuelita kitemakas teisa. Uan ika miak pakilis kitemaka itiempo, ichikaualis uan tein iaxka, uan ika kinpaleuia oksekin. Nejin amo kijtosneki ke kitemaka uejueyi taman, ta kichiua ika nochi iyolo (xikonixtajtolti 2 Corintios 9:7). Akin okachi kiuelita kitemakas teisa yejua Jiova, “Dios akin yolpaki” (1 Tim. 1:11, TNM).
5. ¿Keniuj kinextia Jiova ke kiuelita kitemakas teisa?
5 ¿Keniuj kinextia Jiova ke kiuelita kitemakas teisa? Yejuatsin kinmaka tein kinpoloua nochin taltikpakneminij hasta akin amo kiueyichiuaj. Kemej tikitakejya, “Jiova yolkuali iniuan nochin”. “Kichiua ma pankisa in tonaltsin para kinpaleuis nochi naken yolkualime uan naken amo yolkualime. Uan [...] no kualtitani in kioutsin para kinpaleuis naken yolchipauke uan naken amo yolchipauke.” (Mat. 5:45.) Yejua ika, tatitanil Pablo uelik kiniluij akin amo taneltokayaj, ke Dios “kinualtitaniliaya in kioutsin uan kinmaktiliaya kuajkuali takilome. Uan no [...] namechmaktiliaya uel miak in takualis para nanixuitoske uan para nanmoyolpaktijtoske” (Hech. 14:17). Kemej tikitaj, Jiova ika miak pakilis kinmaka tein kinpoloua nochin taltikpakneminij (Luc. 6:35).
6, 7. 1) ¿Akonimej Jiova okachi kinejneki kinmakas tein kinpoloua? 2) ¿Katiyejua neskayot kinextia ke Dios kinyekpia itekitikauan akin amo kikauaj?
6 Jiova okachi kinejneki kinmakas tein kinpoloua itekitikauan akin amo kikauaj. Tekiuaj David kiyekijtoj: “Nejua katka nitelpoch, no niueuentsintiakya, sayoj ke amo akin nikitani akin yolmelauak maj kisenkauakan, nion ikoneuan maj kitemojtokan tein kikuaskej” (Sal. 37:25). Miakej tokniuan akin amo kikauaj Jiova kiitanij ke mochiuani nejon tajtolmej itech ininnemilis. Maj tikitakan se neskayot.
7 Seki xiujmej achto, se tokniuj siuat itokay Nancy akin tekiti kemej precursor, kipiak se ouijkayot. Yejua kielnamiki: “Monekia nikpias 66 dólares tein ika nikixtauaskia renta mostika, uan amo nikmatia kani nikixtis. Niktapouij Jiova nokuejmol, uan nitekitito. Nejua nikinuikiliaya tein tajtaniaj kampa takualnamakaj uan amo nikchiaya nikselis miak propina nejon youak, porin nejon tonal itech semana, amo miakej yayaj. Yejua ika nikmoujkaitak maj tel miakej ajsinij. Keman tamik hora tein ixyetoya nitekitis, nikpouak tomin tein nechmakakej kemej propina: katka 66 dólares”. Nancy senkis kineltoka ke Jiova kipaleuij maj kipiani tein kipolouaya (Mat. 6:33).
8. ¿Katiyejua okachi ueyi netetayokolil tein Jiova kitemaka?
8 Nochin uelis kiseliskej netetayokolil tein okachi ueyi tein Dios kitemaka. ¿Toni nejon? Yejua inemilis tein kitemakak iKonetsin. Jesús kijtoj: “Dios semi kintasojtak in taltikpakuani. Ika ya nojon [...] kualtitanik Iyojtsin Ikonetsin [...] para ma nochi ne ten iuantsin takuautamatiske, [...] ma amo ixpoliuikan. Ta, ma kipiakan ne yek nemilis nachipa” (Juan 3:16). Kemej tikitaj, nejin netetayokolil kinmaka nochin akin kinekij kiseliskej. Akin takuaujtamatij iuan Jesús ‘kiueyipiaskej ne yek nemilis’ (Juan 10:10). Yejua nejon tein okachi kuali kinextia ke Jiova kiuelita kitemakas teisa.
MAJ NO TIKUELITAKAN TITEMAKASKEJ TEISA KEMEJ JIOVA
Israelitas kinyolchikauayaj maj kiuelitakan kitemakaskej teisa kemej Jiova kichiua (Xikonita párrafo 9)
9. ¿Keniuj no uelis titemakaskej teisa kemej Jiova kichiua?
9 ¿Keniuj no uelis tiktemakaskej teisa kemej kichiua Jiova? Ijkon kemej yejuatsin “technenkajtatiochiuilia san ika de miak tataman para ma ijkon timoyolpaktijtiyakan ika nojon tatiochiualisme”, tejuan no moneki ‘ma tikinpaleuikan’ oksekin uan ijkon tikchiuaskej maj yolpakikan (1 Tim. 6:17-19). Semi tiyolpakij keman tikintayokoliaj teisa akin tikintasojtaj uan tikinpaleuiaj akin amo kipiaj tein moneki (xikonixtajtolti Deuteronomio 15:7). ¿Toni techpaleuis maj amo tikelkauakan titemakaskej teisa? Sekin tokniuan kiixtaliaj kichiuaskej nejin taman tein semi kinpaleuia: nochipa keman kiseliaj se netetayokolil, kitemouaj no kitemakaskej okse. Itech nechikol tikpiaj tatiochiualis maj moajsikan tel miakej tokniuan akin momachtiaj kitemakaskej teisa.
10. ¿Katiyejua se taman kemej okachi uelis tiktemakaskej teisa?
10 Ika tein tikijtouaj uan ika tein tikchiuaj yejua se taman kemej okachi kuali uelis titemakaskej. ¿Keniuj tikchiuaj nejon? Keman ika totiempo uan tochikaualis tikinpaleuiaj uan tikinyolchikauaj oksekin (Gál. 6:10). Tein techpaleuis maj tikitakan ox ijkon tikchiujtokej, uelis timotajtaniskej: “¿Kiitaj oksekin ke ika miak pakilis nikui notiempo uan nikaki tein kintekipachoua? Komo aksa nechtajtania maj nikpaleui itech se taman oso maj nikuiliti teisa, ¿nikijtoua nikchiuas nochipa keman niueli? ¿Kemanianya nikiluij ke kuali kichiuak teisa se nochankauj oso se tokniuj itech nechikol?”. Komo timomachtiaj tiktemakaskej teisa, techpaleuis maj timotokikan iuan Jiova uan iniuan akin tikintasojtaj (Prov. 19:17; Luc. 6:38).
11. ¿Keniuj uelis tikmakaskej teisa Jiova?
11 No uelis tiknejnekiskej tikmakaskej teisa Jiova. Biblia techiluia: “Xikueyitali Jiova ika tein tikpia” (Prov. 3:9). Nejon tein tikpiaj yejua totiempo, tochikaualis uan tein toaxka, tein uelis tikuiskej itech itekiyo Dios. Hasta konemej uelis kinejnekiskej kimakaskej teisa Jiova. Se tepopaj akin itokay Jason kijtoua: “Keman tikixtaliaj tiktemakaskej tomin itech Kali kampa tiMosentiliaj, tikauaj maj tokoneuan kitalikan itech kaxontsin. Kiuelitaj kichiuaskej nejon, porin yejuan kijtouaj ke kimachiliaj ke kimakatokej teisa Jiova”. Komo keman nojnelmejok peua kimachiliaj yolpakilis keman kimakaj teisa Jiova, okachi amo kinouijmakas ijkon kichiuaskej keman uejueyiaskej (Prov. 22:6).
JIOVA MOTEMAKA KIPATAS TEIN IXYETOK
12. ¿Toni kijtosneki maj aksa motemaka kipatas tein ixyetok?
12 Jiova no motemaka kipatas tein ixyetok. ¿Toni kijtosneki nejon kualneskayot tein iuan techtokia? (Tito 3:1, 2.) Akin motemaka kipatas tein ixyetok, amo nochipa senkis tajtani maj motojtoka tanauatil, amo tel tachikaujkauia nion kitelneki maj senkis mochiua kemej kijtoua. Ta mochikaua kinnextilis teiknelilis oksekin uan kiita tein kipanouaj. Ika miak pakilis kinkaki, uan keman kiita ke uelis, motemaka kichiuas kemej yejuan kinekij uan kipata tein kichia maj kichiuakan.
13, 14. 1) ¿Keniuj kinextia Jiova ke motemaka kipatas tein ixyetok? 2) Keman tikitaj tein Jiova kichiuak iuan Lot, ¿toni techmachtia tein kijtosneki se motemakas se kipatas tein ixyetok?
13 ¿Keniuj kinextia Jiova nejin kualneskayot? Kiita tein kimachiliaj itekitikauan, uan miakpa, motemaka kipatas tein kiixtalia uan ijkon kinkauilia maj kichiuakan tein tajtanij. Maj tikitakan se neskayot. Keman kiixtalij kiixpolos altepet Sodoma uan Gomorra, kinauatij Lot maj cholouani kampa moajsiaj tepemej. Sayoj ke amo tikmatij keyej, yejua kitataujtij Dios maj kikauani maj cholouani okseko. Maj tiknemilikan nejin: ¡tein melauj Lot kitajtanijtoya Dios maj kipatani tein kinauatij! (Xikonixtajtolti Génesis 19:17-20.)
14 Amo ouij se kijtos ke Lot amo chikauak katka itakuaujtamatilis oso ke amo tatakamatia, porin Jiova ueliskia kimakixtis kampa moajsiskia. Yejua ika amo onkaya keyej mouis. Sayoj ke Lot kimouiliaya kichiuas nejon. Jiova kiitak uan kikakilij tein kitataujtij uan kikauak maj cholouani itech se altepet tein kiixtalijka kiixpolos (xikonixtajtolti Génesis 19:21, 22). Kemej tikitaj, Jiova amo senkis tajtani maj mochiua kemej kijtoua, ta motemaka kipatas teisa.
15, 16. ¿Keniuj kinextij Tanauatil tein kiselij Moisés ke Jiova motemaka kipatas tein ixyetok? (Xikonita taixkopin itech ipeujyan tamachtilis.)
15 Maj tikitakan okse neskayot tein kinextia ke Jiova motemaka kipatas tein ixyetok. Nejin mokixtia itech Tanauatil tein kiselij Moisés. Komo se israelita kipanotoya tatasojtilis uan amo uelia kitemakas se ichkat oso se cabra kemej netetayokolil, Jiova kiseliaya ome tórtolas oso ome pichones. Sayoj ke ¿komo kitelpanotoyaj tatasojtilis uan nion nejon amo kipiayaj? Ueliskiaj kitemakaskej tepitsin harina. Sayoj ke maj tikitakan nejin taman tein motelneki: amo ueliskiaj kitemakaskej tein kinekiskiaj, ta monekia yeski “harina tein okachi kuali”, kemej tein ika kintamakayaj tayoleualmej akin tel kuali kinitayaj (Gén. 18:6). ¿Keyej tel kuali tein Jiova kijtoj? (Xikonixtajtolti Levítico 5:7, 11.)
16 Maj tiknemilikan ke tejuan tiisraelitas akin tiktelpanotokej tatasojtilis. Keman tiajsij tabernáculo ika tepitsin harina tein tiktemakaskej, tikitaj ke oksekin israelitas akin okachi tominpiaj kiuikaj tapialmej. Xa tepitsin uelis timopinaujmatiskej porin amo semi kipia ipatiuj harina tein yeski tonetetayokolil. Sayoj ke tikelnamikij ke Jiova semi kitasojkamati nejon. ¿Keyej? Porin Dios tajtania maj kitemakanij harina tein Sal. 103:14).
okachi kuali. Kemej yeskia kiniluiskia israelitas akin okachi kipanotoskiaj tatasojtilis: “Nikajsikamati ke namejuan amo ueli nankitemakaj kemej oksekin, sayoj ke no nikmati ke nanechmakatokej tein okachi kuali tein nanuelij”. Yekmelauj Jiova kinextia ke motemaka kipatas tein ixyetok keman kiita tein kipanouaj itekitikauan (17. ¿Toni taman taueyichiualis tikyekmatij ke Jiova kiselia?
17 Semi techyolchikaua tikmatiskej ke kemej Jiova motemaka kipatas tein ixyetok, kiselia tein tikchiuaj ijkuak tiktekitiliaj ika nochi toyolo (Col. 3:23). Constance se tokniuj siuat akin xiuejya uan kayot Italia kijtoj: “Okachi nikuelita ika nitajtos Dios akin tachijchiuak. Yejua ika niksentoka nitanojnotsa uan nitamachtia ika Biblia. Kemansa nimotayokoltia porin nokokolis kichiua maj amo semi ueli niktekitili Dios, sayoj ke nikmati ke Jiova nechtasojta. Uan kemej kimati tein amo ueli nikchiua, kitasojkamati tein kemaj ueli nikmaka”.
KEMEJ JIOVA MAJ TIMOTEMAKAKAN TIKPATASKEJ TEIN IXYETOK
18. ¿Xikonijto se taman kemej tetatmej uelis kichiuaskej kemej Jiova?
18 ¿Keniuj uelis timotemakaskej tikpataskej tein ixyetok ijkon kemej Jiova? Maj oksepa tiknemilikan tein kichiuak iuan Lot. Jiova senkis kipiaya tanauatil kijtos toni mochiuas, maski ijkon, ika teiknelilis kikakilij tein tajtanik uan kikauilij maj kichiua. Komo tejuan titetatmej, ¿uelis tikinkakiliskej tein tajtanij tokoneuan, uan keman tikitaskej ke kuali yetok, tikpataskej tein tikixtalijkaj? La Atalaya 1 de septiembre de 2007, kijtoj ke sekin tetatmej kinkauaj ininkoneuan maj kijtokan keniuj kiitaj tanauatilmej tein kinyekanas kalijtik. Kemej neskayot, tetatmej kijtouaj toni hora moneki mokepaskej kalijtik, uan yejuan kipiaj tanauatil ijkon kichiuaskej. Sayoj ke achto uelis kikakiskej tein konemej kinekij kijtoskej ika nejon. Kemansa uelis mopatas hora komo amo kitapanauilia tein kijtoua Biblia. Xa tetatmej kiitaskej ke ijkuak kikakij tein kinemiliaj ininkoneuan achto ke kitaliskej tanauatilmej tein kinyekanas kalijtik, konemej okachi kiajsikamatij keyej moixtalia uan amo kinouijmaka kitakamatiskej.
19. ¿Keniuj tayekananij no ijkon uelis kichiuaskej kemej Jiova akin motemaka kipatas tein ixyetok?
19 Tayekananij itech nechikol mochikauaj kichiuaskej kemej Jiova akin motemaka kipatas tein ixyetok. Nejon kichiuaj keman kiitaj tein kipanotokej tokniuan itech nechikol. Maj tikelnamikikan ke yejuatsin kitasojkamatik hasta netetayokolilmej tein kitemakayaj israelitas akin okachi kipanotoyaj tatasojtilis. Axkan sekin tokniuan semi tepitsin uelij tanojnotsaj, xa porin mokokouaj oso xiuejkejya. Komo nejon kinuika maj kinekikan mosenkauaskej, kinyolchikauas keman tayekananij kinyekmatiltiaj ke Jiova kintasojta porin ika nochi ininyolo kitemakaj nochi tein uelij (Mar. 12:41-44).
20. ¿Toni kijtosneki se kitekitilis Dios ika taixejekolis? Xikonmelaua motanankilil.
20 Sayoj ke se motemakas se kipatas tein ixyetok, amo kijtosneki ke sayoj tepitsin tikchiuaskej itekiyo Dios uan tejuan timoyolpaktiskej (Mat. 16:22). Amo tiknekij sayoj tepitsin tikchiuaskej maski ueliskia okachi titekitiskej, uan satepan timotenpaleuiskej ika tein amo taixejekol. Ta tinochin moneki timochikauaskej tikpaleuiskej nochi tein mouika iuan iTekiuajyo Dios (Luc. 13:24). Tein melauj moneki taixejekolis. Moneki maj amo sayoj tepitsin tiktekitilikan Dios, sayoj ke no moneki maj tikelnamikikan ke Jiova amo keman techtajtania maj tikchiuakan tein amo tiueliskej. Tikyekmatij ke semi kiyolpaktia keman ika nochi toyolo tikmakaj tein tiuelij. ¿Melauj ke semi techyolpaktia tiktekitiliskej toTeko akin semi kitasojkamati tein tikchiuaj uan motemaka kipatas tein ixyetok? Itech okse tamachtilis tikitaskej omeok ikualneskayouan tein iuan techtokia (Sal. 73:28).
“Xikueyitali Jiova ika tein tikpia.” (Prov. 3:9) (Xikonita párrafo 11)
“Nochi ten yeski tekit nankichiuaske, [...] [xikchiuakan] ika yolpakilis.” (Col. 3:23) (Xikonita párrafo 17)