1, 2. Ookuume kaJehova oye na ompito yashike?

OMUMWAMEME Monika okwa ti: “Otwa kala mondjokana uule woomvula tadhi ihilile po 35. Ngame nomusamane gwandje otu shaathane nawa lela. Ihe nonando opwa pita oomvula adhihe ndhoka, onkee ngaa natango tatu ilongathana!” Nopwaanomalimbililo, shoka osho shi li ngawo moondjokana odhindji nosho wo momakwatathano ogendji guukuume.

² Ohatu nyanyukilwa okutseyathana nawa naantu mboka tu hole. Kakele kuukuume awuhe mboka hatu vulu okupanga, mboka hatu panga naJehova owo wa simanenena. Katu na esiku tu ka tseye ashihe kombinga ye. (Rom. 11:33) Sigo aluhe otatu ka nyanyukilwa okwiilonga kombinga yuukwatya waJehova nokukala twe wu lenga noonkondo. — Omuuv. 3:11.

3. Oshike tatu ka konakona moshitopolwa shika?

³ Oshitopolwa sha zi ko oshe tu kwathela tu kale twa lenga noonkondo uukwatya waJehova wokupopiwa naye nuupu nowokwaanontondo. Ihe ngashingeyi natu ka tale kuukwatya uuwanawa wulwe uyali waJehova wokugandja nowokukala nondjele. Mokuninga ngaaka, otatu ka mona lela kutya ‘Jehova omwaanawa naantu ayehe, noku na ohenda naayihe mbyoka e yi shita.’ — Eps. 145:9, yelekanitha NW.

4. Okugandja kwashili okwa hala okutya shike?

⁴ Okukala ho gandja okwa hala okutya shike? Eyamukulo otatu li adha moohapu dhaJesus ndhoka dhi li mIilonga 20:35 tadhi ti: “Okugandja oku na elago ku vule okutaamba.” Jesus okwa li a popi oohapu ndhoka dhanathangwa u ulike kutya okugandja kwashili okuni. Omuntu ngoka ha gandja oha longitha ethimbo lye, oonkondo dhe nosho wo iiniwe ye a kwathele yalwe nohe shi ningi nenyanyu. Eeno, okugandja  kwashili inaku ikolelela kuunene womagano, ihe okwi ikolelela kwaashoka shi inyengitha omuntu a gandje. (Lesha 2 Aakorinto 9:7.) Kape na nando ogumwe ha gandja e vule Jehova, Kalunga ketu.

5. Jehova ohu ulike momikalo dhini kutya oha gandja?

⁵ Jehova ohu ulike kutya oha gandja momukalo guni? Oha sile oshimpwiyu aantu ayehe, mwa kwatelwa naamboka ihaaye mu longele. Dhoshili, ‘Jehova omwaanawa naantu ayehe.’ “Etango lye ohe li pitithile aawinayi naawanawa, nomvula ye ohe yi lokithile aayuuki naalunde.” (Mat. 5:45) Shoka osho molwaashoka omuyapostoli Paulus sho a li ta popi naamboka kaaye shi ooitaali, a ti kutya Jehova ‘okwe mú ningile uuwanawa, ohe mú pe omvula tayi zi kegulu niilya pethimbo lyo opala, ohe mú pe iikulya noha nyanyudha oomwenyo dheni.’ (Iil. 14:17, yelekanitha NW.) Osha yela kutya, Jehova oha gandja kaantu ayehe. — Luk. 6:35.

6, 7. (a) Jehova oha nyanyukilwa unene tuu okugwanitha po oompumbwe dhoolye? (b) Gandja oshiholelwa shankene Kalunga ha sile oshimpwiyu aalongeli ye aadhiginini.

⁶ Jehova oha nyanyukilwa unene tuu okugwanitha po oompumbwe dhaapiya ye aadhiginini. Omukwaniilwa David okwa ti: “Ngame ngashingeyi onda kulupa, onda kala muuyuni ethimbo ele, ihe inandi mona nando olumwe omuyuuki e ethiwa kOMUWA, nenge oyana taa hehela iikulya.” (Eps. 37:25) Aakriste oyendji aadhiginini oya mona uushili mboka kutya Jehova omusilishimpwiyu. Natu tale koshiholelwa shimwe.

⁷ Oomvula dhontumba dha ka pita, omumwameme Nancy ngoka e li miilonga yethimbo lyu udha, okwa li e na uudhigu. Nancy okwa ti: “Onda li nda pumbwa R570 ndi ka fute ehala lyandje lyokukala, nesiku lya landula ko olyo lya li lya hugunina lyokufuta. Kanda li ndi shi kutya iimaliwa mbyoka otandi ke yi adha peni. Onda galikana kuJehova kombinga yuupyakadhi mboka, nonda yi kiilonga yandje mbyoka ya li yokugandja iikulya morestolanda. Kanda li nda tegelela okupewa ootepa odhindji uusiku mboka molwaashoka ethimbo ndyoka lyoshiwike kalya li naanaa lyi ipyakidhila. Ihe shoka sha li sha kumitha ndje, morestolanda omwa li mwe ya aalandi yomwaalu gwontumba uusiku mboka. Sho nda zimbuka esiku ndyoka, onda yalula ootepa ndhoka nda pewa nodha li dhi thike po R570.” Nancy oku shi shi kutya Jehova okwa li e mu pe naanaa shoka a li a pumbwa. — Mat. 6:33.

8. Omagano geni ga dhenga mbanda ngoka Jehova a gandja?

⁸ Kehe gumwe ota vulu okumona omagano ga dhenga mbanda ngoka Jehova a gandja. Omagano ngoka ogeni? Ekuliloyambo lyOmwana. Jesus okwa ti: “Osho ngeyi Kalunga a kala e hole uuyuni, oye a gandja Omwana awike, opo shaangoka te mu itaale, kaa kane, ihe a kale e na omwenyo gwaaluhe.” (Joh. 3:16) Oshitya “uuyuni” shoka sha longithwa moohapu ndhika, otashi ulike kaantu. Eeno, omagano gaJehova ga dhenga mbanda otaga vulu okumonika kaantu ayehe mboka ya hogolola oku ga taamba ko. Mboka ye na eitaalo muJesus otaya ka mona omwenyo gwaaluhe! (Joh. 10:10) Ihe mbela uunzapo wuni  ishewe wa kola tawu vulu okuulika kutya Jehova oha gandja kaawu shi owala mboka?

9. Ongiini tatu vulu okuholela Jehova mokukala hatu gandja?

 ⁹ Ongiini tatu vulu okuholela Jehova mokukala hatu gandja? Jehova ‘ohe tu pe iinima ayihe kee na uuluya’; onkee ano, otu na okukala ‘hatu topolelathana’ iinima yetu nayalwe, shoka tashi ka gwedha ko kenyanyu lyawo. (1 Tim. 6:17-19) Ohatu longitha nenyanyu iiniwe yetu tu pe mboka tu hole omagano nokukwathela yalwe mboka ye na ompumbwe. (Lesha Deuteronomium 15:7.) Oshike tashi ke tu kwathela tu dhimbulukwe okukala hatu gandja? Aakriste yamwe ohaya ningi kutya, uuna ya pewa omagano, ohaya kongo nayo ompito ya gandje kuyalwe omagano. Egongalo lyopaKriste olya lalekwa nuuyamba naamwatate naamwameme oyendji mboka ye na ombepo yokugandja.

10. Omomukalo gumwe guni gwa dhenga mbanda moka tatu vulu okugandja ?

¹⁰ Omukalo gumwe gwa dhenga mbanda moka tatu vulu okugandja ogwo okupitila moohapu nomiilonga yetu. Ongiini tatu vulu oku shi ninga? Omokulongitha ethimbo lyetu, noonkondo dhetu tu kwathele yalwe noku ya tsa omukumo. (Gal. 6:10) Opo tu tale kutya otatu shi enditha ngiini moshinima shika, otu na okwiipula kutya: ‘Mbela yalwe ohaye shi mono ngaa kutya ondi na ombepo yokwiiyamba nokupulakena komaipulo gawo? Ngele gumwe okwa pula ndje ndi mu kwathele moshinima nenge moshilonga shontumba, mbela ohandi itaale ngaa uuna tashi wapa? Uunake nda li nda pandula nomutima aguhe omuntu gwaandjetu nenge omwiitaali omukwetu?’ Ngele otwa kala ‘hatu gandja,’ otatu ka hedha popepyeelela naJehova nosho wo nookuume ketu. — Luk. 6:38; Omayel. 19:17.

11. Omomikalo dhimwe dhini tatu vulu okugandja kuJehova?

 ¹¹ Otatu vulu wo okugandja kuJehova. Omanyolo  otage tu ladhipike taga ti: “Simanekitha OMUWA miinima yoye . . . ayihe.” (Omayel. 3:9) ‘Iinima ayihe’ mbyoka oya kwatela mo ethimbo, oonkondo nosho wo iiniwe yetu mbyoka tatu vulu okulongitha miilonga ye. Nokuli naanona otaya vulu okwiilonga okukala haya gandja kuJehova. Omumwatate Jason ngoka e li omuvali okwa ti: “Ngele yaandjetu taya gandja omayambidhidho kuJehova, ohatu pe aanona yetu oyo ya tule oshimaliwa mokaketha komayambidhidho. Ohaye shi nyanyukilwa molwaashoka uuna taya gandja omayambidhidho, otaya ‘gandja sha kuJehova.’” Aanona mboka haya kala ya nyanyukilwa okugandja kuJehova manga aashona, olundji ohaya ka tsikila okugandja uuna ya koko. — Omayel. 22:6.

12. Okukala nondjele otaku ti shike?

¹² Uukwatya waJehova wulwe uuwanawa owokukala e na ondjele. Okukala nondjele otaku ti shike? (Tit. 3:1, 2) Omuntu ngoka e na ondjele iha komangele aluhe ompango, nenge a kale e na onyanya nenge a thindile yalwe kongudhi. Pehala lyaashono, oha kambadhala okukala e na ondjele uuna tu ungaunga nayalwe, nokukala e na ko nasha noonkalo dhawo. Oha kala e na ehalo okupulakena kuyo, nuuna tashi opalele e ya ethe ya ninge shoka ya hala ye ta lundulula iitegelelwa ye mbyoka a tula po.

13, 14. (a) Jehova ohu ulike ngiini kutya oku na ondjele? (b) Otatu ilongo shike kombinga yankene Kalunga a li u ungaunga naLot nondjele?

¹³ Jehova ohu ulike ngiini kutya oku na ondjele? Oha kala e na ko nasha nomaiyuvo gaapiya ye nolundji ohe ya ningile shoka taya pula. Pashiholelwa, tala nkene Jehova a li ungaunga nomulumentu omuyuuki Lot. Sho Jehova a li a tokola okuhanagula po oshilando shaSodom naGomorra, okwa li a pe Lot elombwelo lya yela kutya na tondokele koondundu. Ihe omolwomatompelo gontumba, Lot okwa li i indile epitikilo a ye kehala lilwe. Dhiladhila owala Lot sho a pula Jehova a lundulule omalombwelo Ge! — Lesha Genesis 19:17-20.

¹⁴ Otashi vulika shi kale oshipu komuntu a tokole kutya Lot okwa li e na uunkundi nenge ihaa vulika. Nokuli Jehova okwa li ta vulu okukaleka Lot e na omwenyo kehe mpoka e li, onkee ano Lot ka li e na okukala e na uumbanda washa. Ihe nonando ongawo, Lot okwa li a tila, naangoka oga li omaiyuvo ge, naJehova okwa li a tifuka. Jehova okwa pitike Lot a tondokele koshilando shoka a li a lalakanena okuhanagula po. (Lesha Genesis 19:21, 22.) Odhoshili kutya Jehova ke na onyanya ye iha thindile aantu kongudhi. Ihe pehala lyaashono, oku na ondjele.

15, 16. Ongiini Ompango yaMoses ya li yu ulike kutya Jehova oku na ondjele? (Tala kethano ndyoka li li petameko)

¹⁵ Tala ishewe koshiholelwa shaJehova sha nkene a li u ulike ondjele ngaashi shu ulikwa mOmpango yaMoses. Ngele Omuisraeli okwa hepa noonkondo noka li ta vulu okugandja onzi nenge oshikombo shi li eyambo, okwa li ta vulu okugandja omatendeguti gaali nenge uungutyona uyali. Ihe ongiini mbela ngele Omuisraeli ka li ta vulu okugandja nokuli nando uungutyona uyali ? Moshinima shoka, Jehova okwa li a pitike opo Omuisraeli ngoka a hepa a gandje uusila uushona. Ihe natu tale kuuyelele mbuka wa simana: Uusila mboka kawa li owala uusila kehe, ihe owa li “uusila womunziya,” mboka wa li hawu telekelwa aayenda ya simana. (Gen. 18:6) Omolwashike shoka oshindhindhilikwedhi? — Lesha Levitikus 5:7, 11.

¹⁶ Dhiladhila nduno andola ngoye Omuisraeli nowa hepa noonkondo. Sho we ya petsalihangano nuusila uushona wu gandje eyambo lyoye, owu wete Aaisraeli aayamba taye e ta iimuna yawo. Otashi vulika wu kale wa sa ohoni eyambo lyoye lyuusila ndyoka tali monika lya fa kaali na ongushu. Ihe owa dhimbulukwa kutya momeho gaJehova, eyambo lyoye oli na ongushu. Omolwashike mbela? Omolwaashoka, Jehova okwa li ha pula uusila mboka wa nakwa. Kungawo, Jehova okwa fa a li ta lombwele Aaisraeli oohepele ta ti: ‘Ondi wete kutya itamu vulu okugandja omayambo ge thike pwaangoka yakweni yalwe  taya vulu okugandja, ihe ondi shi wo kutya shoka tamu pe ndje osha dhenga mbanda.’ Dhoshili, Jehova ohu ulike ondjele ye mokukaleka momadhiladhilo omangambeko noonkalo dhaapiya ye. — Eps. 103:14.

17. Jehova oha hokwa okulongelwa momukalo gwa tya ngiini?

 ¹⁷ Otashi tu hekeleke okutseya kutya omolwondjele ye, Jehova oha taamba ko iilonga yetu mbyoka tatu yi longo nomwenyo aguhe. (Kol. 3:23) Omumwameme omukokele gwokoItali gwedhina Constance okwa ti: “Okupopya nayalwe kombinga yOmushiti gwandje osho oshinima nda kala ndi hole okuninga unene. Omolwaashoka otandi tsikile okuuvitha nokuninga omakonakonombiimbeli. Omathimbo gamwe ohandi kala ndu uvite nayi sho ihaandi vulu okuninga oshindji omolwuukolele. Ihe ondi shi kutya Jehova oku shi omangambeko gandje, oku hole ndje, nokwa lenga shoka handi vulu okuninga.”

18. Aavali otaya vulu okuholela ngiini Jehova?

¹⁸ Ongiini tatu vulu okuholela Jehova mokukala tu na ondjele? Dhiladhila ishewe kunkene Jehova a li ungaunga naLot. Jehova oye a li e na uuthemba wokulombwela Lot kutya naye peni, ihe okwa pulakene nolukeno sho Lot ta popi omaiyuvo ge. Kalunga okwa ningi shoka Lot a pula. Ngele ngoye omuvali mbela ito vulu okuholela Jehova? Mbela ito vulu okupulakena kaamwoye nongele tashi opalele wu ethe ya ninge shoka ya hala? Metsokumwe naashika, mOshungonangelo ye 1 Septemba 2007, omwa popiwa kutya aavali otaya vulu okukundathana noyana kombinga yoompango dhomegumbo. Pashiholelwa, aavali otaya vulu okutula po ethimbo, noye na uuthemba wokuhogolola ethimbo lyokondandalunde ndyoka oyana ye na okugalukila kegumbo. Ihe nonando oongawo, aavali Aakriste otaya vulu okupulakena kaanona yawo nkene yu uvite kombinga yethimbo ndyoka ya tula po. Omathimbo gamwe, aavali otaya vulu okulundulula ethimbo ndyoka ngele kashi li ompinge nomakotampango gOmbiimbeli. Aavali ohaya ka mona kutya ngele oya kaleke omaetopo goyana momadhiladhilo uuna taya tula po oompango dhomegumbo, ohashi kala oshipu koyana oku dhi uva ko nokuvulika kudho.

19. Ongiini aakuluntugongalo taya vulu okuholela Jehova mokukala ye na ondjele?

¹⁹ Aakuluntugongalo oye na okulonga nuudhiginini ya holele Jehova mokukala ye na ondjele nokukaleka momadhiladhilo oonkalo dhooitaali ooyakwawo. Dhimbulukwa kutya Jehova okwa li a lenga omayambo nokuli naangoka ga li haga gandjwa kAaisraeli mboka ya hepelela. Sha faathana, aamwatate yamwe naamwameme oya ngambekwa mwaashoka taya vulu okuninga muukalele, tashi vulika omolwokwaanuukolele nenge molwoomvula ndhoka dha ya. Ongiini nduno ngele aaholike mbaka oya teka omukumo molwaashoka ye na omangambeko? Aakuluntugongalo otaya vulu oku ya shilipaleka pahole kutya Jehova oku ya hole molwaashoka otaye mu longele nomutima aguhe. — Mark. 12:41-44.

20. Mbela okukala nondjele otashi ti kutya otu na okulongela Kalunga nonyalo? Shi yelitha.

²⁰ Dhoshili, okukala nondjele okwa yooloka ko kokulonga owala kashona miilonga yaKalunga, molwaashoka twi iyetela owala ohenda. (Mat. 16:22) Katu na okukala tatu longo owala shampa twa longa nokukala tatu ningi omaipopilo kutya otu na ondjele. Pehala lyaashono, atuheni otwa pumbwa ‘okukondja’ twa mana mo mokwaambidhidha iilonga yUukwaniilwa. (Luk. 13:24) Odhoshili kutya otu na okukala nondjele sho tatu longele Jehova nuudhiginini noita tu kala aananyalo. Oshikwawo, Jehova iha pula tu ninge shoka itaatu vulu okuninga. Uuna tatu mu longele nomutima aguhe, otatu ka kala nuushili kutya okwe tu nyanyukilwa. Mbela ihatu nyanyukilwa okulongela Omuwa ngoka e na olupandu nondjele? Moshitopolwa tashi landula ko, otatu ka tala kuukwatya uuwanawa wulwe uyali waJehova. — Eps. 73:28.