1, 2. Bagwera ba Jehofa ba bulegetšwe ke sebaka sefe?

MOKRISTE yo a bitšwago Monika o re: “Nna le monna wa ka re na le nywaga e ka bago e 35 re nyalane. Re tsebana gabotse. Eupša gaešita le ka morago ga nywaga yeo ka moka, re sa dutše re ithuta dilo tše difsa ka yo mongwe le yo mongwe wa rena!” Ga go pelaelo gore banyalani ba bantši le bagwera ba bantši ba ka bolela se se swanago.

² Re thabela go tsebana gakaone le bao re ba ratago. Lega go le bjalo, gare ga bagwera le ge e le bafe bao re ka bago le bona, ga go segwera se segolo seo re ka se hlagolelago go feta sa go gwerana le Jehofa. Re ka se tsoge re tsebile dilo ka moka ka yena. (Baroma 11:33) Nakong ka moka ya bophelo bja rena bjo bo sa felego, re tla ba le sebaka se sebotse sa go thabela go ithuta go tšeela godimo kudu dika tša Jehofa.—Mmo. 3:11.

3. Re tlo ithuta’ng sehlogong se?

³ Sehlogo se se fetilego se re thušitše gore re tšeele godimo seka sa Jehofa sa go batamelega le sa go se bebe sefahlego. Ga bjale anke re hlahlobeng dika tše dingwe tše pedi tše kgahlišago tša Jehofa—go ba ga gagwe le seatla se se bulegilego le go ba le tekatekano. Ka go dira bjalo, re tla kwešiša gakaone kudu gore “Jehofa ke yo a lokilego go bohle, kgaugelo ya gagwe e ukametše mediro ya gagwe ka moka.”—Ps. 145:9.

4. Go ba le seatla se se bulegilego ge e le gabotse go akaretša eng?

⁴ Go ba le seatla se se bulegilego go bolela’ng? Re hwetša karabo ya potšišo yeo mantšung a Jesu ao a begilwego go Ditiro 20:35 a rego: “Go na le lethabo le legolo go neeng go feta go amogeleng.” Ka mantšu ao a bonolo, Jesu o ile a hlalosa gabotse seo se bolelwago ke go ba le seatla se se bulegilego. Motho yo a nago le seatla se se bulegilego o diriša ka bolokologi nako ya gagwe, matla a gagwe le dilo tše a nago le tšona gore a hole ba bangwe—gomme o dira seo a thabile. Ge e le gabotse, go ba le seatla se se bulegilego ga go lekanyetšwe ka bogolo bja mpho, eupša go lekanyetšwa ka maikemišetšo  a motho yo a e neago. (Bala 2 Bakorinthe 9:7.) Ga go motho yo a nago le seatla se se bulegilego go feta ‘Modimo wa rena yo a thabilego,’ Jehofa.—1 Tim. 1:11.

5. Jehofa o bontšha ka ditsela dife gore o na le seatla se se bulegilego?

⁵ Jehofa o bontšha bjang gore o na le seatla se se bulegilego? O fa batho ka moka dinyakwa tša bona, go akaretša le bao ga bjale ba sa mo rapelego. Ee, “Jehofa ke yo a lokilego go bohle.” O “hlabišetša ba kgopo le baloki letšatši la gagwe gomme a nešetša ba ba lokilego le ba sa lokago pula.” (Mat. 5:45) Ke ka baka leo moapostola Paulo ge a be a bolela le bao ba sa dumelego a bego a ka re Jehofa ‘o dirile tše botse ka go ba nea dipula go tšwa legodimong le dihla tše di enywago, a khoriša dipelo tša bona ka mo go feletšego ka dijo le lethabo.’ (Dit. 14:17) Ka gona go molaleng gore Jehofa o nea batho ka moka dilo ka seatla se se bulegilego.—Luka 6:35.

6, 7. (a) Ke bomang ka mo go kgethegilego bao Jehofa a thabelago go ba nea dinyakwa tša bona? (b) Nea mohlala o bontšhago kamoo Modimo a neago barapedi ba gagwe ba botegago dinyakwa tša bona.

⁶ Jehofa o thabela ka mo go kgethegilego go nea barapedi ba gagwe ba botegago dinyakwa tša bona. Kgoši Dafida o boletše gore: “Nkile ka ba lesogana, e bile ke tšofetše, eupša ga se ka bona le ge e le mang yo a lokilego a tlogetšwe a le feela, goba bana ba gagwe ba kgopela dijo.” (Ps. 37:25) Bakriste ba bantši ba botegago ba bone ka noši gore Jehofa o kgona go phethagatša seo. Ela hloko mohlala o latelago.

⁷ Nywaga e mmalwa e fetilego, modiredi yo mongwe wa nako e tletšego yo a bitšwago Nancy o ile a ikhwetša a lebane le bothata. Nancy o gopola gore: “Ke be ke nyaka R570 ya go lefa rente, le gona e be e nyakega letšatšing le le latelago. Ke be ke sa tsebe gore tšhelete yeo ke tla e hwetša kae. Ke ile ka rapela ka bothata bjoo, gomme ka ya mošomong wa ka wa go tlišetša batho dijo lebenkeleng la go jela. Ke be ke sa letela gore batho ba bantši ba ka nnea tšhelete e ntši ya ditebogo ka ge e be e le nakong yeo e bego e se ya leemaema ya beke. Eupša ke ile ka makatšwa ke gore batho ba ile ba tla ka bontši lebenkeleng la go jela bošegong bjoo. Ge ke tšhaiša gomme ke bala tšhelete ya ditebogo yeo ba mphilego yona, ke ile ka hwetša e le R570.” Nancy o kgodišegile gore Jehofa o ile a bula seatla sa gagwe gomme a mo nea tlwaa seo a bego a se nyaka.—Mat. 6:33.

8. Mpho e kgolokgolo yeo Jehofa a e neilego ka seatla se se bulegilego ke efe?

⁸ Mpho e kgolokgolo yeo Jehofa a e neilego ka seatla se se bulegilego e ka hwetšwa ke motho yo mongwe le yo mongwe. Mpho yeo ke efe? Ke sehlabelo sa topollo sa Morwa wa gagwe. Jesu o itše: “Modimo o ratile lefase kudu mo a ilego a gafa Morwa wa gagwe yo a tswetšwego a nnoši gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.” (Joh. 3:16) Mo temaneng ye, “lefase” leo go bolelwago ka lona le šupa go batho ka kakaretšo. Ee, mpho e kgolokgolo ya Jehofa yeo a e neilego ka seatla se se bulegilego e ka hwetšwa ke bohle bao ba kgethago go e amogela. Bao ba nago le tumelo go Jesu ba tla hwetša bophelo ka boati—bophelo bjo bo sa felego! (Joh. 10:10) Na ruri bjo ga se bjona bohlatse bjo bogolo bja gore Jehofa o na le seatla se se bulegilego?

9. Re ka ekiša bjang seka sa Jehofa sa go ba le seatla se se bulegilego?

 ⁹ Re ka ekiša bjang Jehofa ka go ba le seatla se se bulegilego? Jehofa “[o re nea] ka mo go humilego dilo tšohle tšeo re di thabelago”; ka baka leo, re swanetše go dula re ‘ikemišeditše go abelana’ le ba bangwe, ka go re’alo ra dira gore ba thabe. (1 Tim. 6:17-19) Re diriša ka lethabo dilo tšeo re nago le tšona go nea baratiwa ba rena le badiidi dimpho. (Bala Doiteronomio 15:7.) Ke eng seo se ka re thušago gore re gopole go ba le seatla se se bulegilego? Bakriste ba bangwe ba diriša mokgwa wo o holago: Neng le neng ge ba amogela mpho, ba nyaka sebaka sa gore ba nee motho yo mongwe mpho e itšego. Phuthego ya Bokriste e šegofaditšwe ka bana babo rena le dikgaetšedi ba diketekete bao ba hlagolelago moya wa go ba le seatla se se bulegilego.

10. E nngwe ya ditsela tše kaone ya gore o be le seatla se se bulegilego ke efe?

¹⁰ E nngwe ya ditsela tše kaonekaone ya gore re be le seatla se se bulegilego ke go ikgafela go thuša ba bangwe ka mantšu le ka ditiro. Re ka dira bjang seo? Ka go diriša nako ya rena le matla a rena go thuša ba bangwe le go ba kgothatša. (Bagal. 6:10) E le gore re itlhahlobe ge e ba re šoma gabotse tabeng ye, re ka ipotšiša gore: ‘Na batho ba bangwe ba kgona go bona gore ke ikemišeditše go ikgafa gomme ke theetše mathata a bona? Ge e ba motho yo mongwe a nkgopela gore ke mo thuše ka selo se itšego, na ke a dumela ge maemo a ka a ntumelela? Ke neng la mafelelo moo ke ilego ka tloga ke reta setho sa lapa goba modumedigotee le nna?’ Ge e ba re ‘tlwaetše go fa,’ ruri re tla batamela kgauswi kudu le Jehofa le bagwera ba rena.—Luka 6:38; Die. 19:17.

11. Ditsela tše dingwe tšeo re ka neago Jehofa ka seatla se se bulegilego ke dife?

 ¹¹ Le gona re ka nea Jehofa ka seatla se se bulegilego. Mangwalo a kgothaletša gore: “Godiša Jehofa ka dilo tša gago tše bohlokwa.” (Die. 3:9) “Dilo [tšeo] tše bohlokwa” di akaretša nako ya rena, matla le dilo tše re nago le tšona, tšeo re ka di dirišago ka bolokologi tirelong ya rena. Gaešita le bana ba banyenyane ba ka ithuta go  nea Jehofa ka seatla se se bulegilego. Tatago bana ba bangwe e lego Jason o re: “Ge lapa la ka le ntšha moneelo Holong ya Mmušo, re dira gore bana ba rena ba tšhele tšhelete ka lepokising la moneelo. Ba thabela go dira seo ka gobane ba re ‘ba nea Jehofa selo se itšego.’” Bana bao ba thabišwago ke go nea Jehofa ge e sa le ba banyenyane gantši ba tšwela pele ka moya woo wa go mo nea ka seatla se se bulegilego le mohlang ba gotše.—Die. 22:6.

12. Go ba yo a lekalekanego go bolela’ng?

¹² Seka se sengwe se se kgahlišago sa Jehofa ke go ba ga gagwe le tekatekano. Go bolela’ng go ba le tekatekano? Lentšu la mathomong leo gantši le fetolelwago e le “go lekalekana” ka go Phetolelo ya Lefase le Lefsa ka go lebanya le bolela go “fetofetoga le maemo.” (Tito 3:1, 2, mongwalo wa ka tlase wa Reference Bible.) Motho yo a lekalekanego ga a gapeletše gore ka mehla melao e latelwe tlwaa ka tsela yeo e ngwadilwego ka yona, e bile ga a gatelele ba bangwe, ga se yo bogale goba go swara batho ka tsela e sehlogo. Go e na le moo, o katanela go ba botho ge a dirišana le ba bangwe, ka go ela hloko maemo ao ba lego go ona. O ikemišeditše go theetša ba bangwe, e bile ge go nyakega, o fetofetoga le maemo gore a dumelelane le dikganyogo tša bona gomme a fetoša dinyakwa tša gagwe.

13, 14. (a) Jehofa o bonagatša bjang tekatekano? (b) Re ka ithuta eng ka tekatekano go tšwa tseleng yeo Modimo a ilego a dirišana le Lota?

¹³ Jehofa o bonagatša tekatekano ka tsela efe? O ela hloko ka botho maikwelo a bahlanka ba gagwe, gomme gantši o theetša dikgopelo tša bona. Ka mohlala, bona kamoo Jehofa a ilego a dirišana le monna wa moloki e lego Lota. Ge Jehofa a be a dirile phetho ya gore o tla fediša metse ya Sodoma le Gomora, o ile a nea Lota taelo e kwagalago ya gore a tšhabele dithabeng. Eupša, ka mabaka a itšego, Lota o ile a mo lopa gore a mo dumelele go tšhabela lefelong le lengwe. Anke o fo nagana—ge e le gabotse Lota o ile a kgopela Jehofa go fetoša ditaelo tša Gagwe!—Bala Genesi 19:17-20.

¹⁴ Go ka ba bonolo gore motho yo mongwe a ahlole Lota ka gore o be a fokola goba a sa kwe. Le gona, ga go pelaelo gore Jehofa o be a ka phološa Lota go sa šetšwe gore o lefelong lefe, ka gona seo Lota a bego a se tšhoga se be se se na ntlha le thito. Lega go le bjalo, Lota o ile a tšhoga seo a bego a se tšhoga, gomme Jehofa o ile a fetofetoga le maemo gore a dumelelane le yena. O ile a dumelela Lota gore a tšhabele motseng woo A bego a nyaka go o fediša. (Bala Genesi 19:21, 22.) Go molaleng gore Jehofa ga se yo bogale le yo a thatafišago hlogo. O fetofetoga le maemo e bile o na le tekatekano.

15, 16. Molao wa Moshe o ile wa bonagatša bjang tekatekano ya Jehofa? (Bona seswantšho seo se lego mathomong a sehlogo se.)

¹⁵ Ela hloko mohlala o mongwe gape wa tekatekano ya Jehofa go tšwa Molaong wa Moshe. Ge e ba Moisiraele e be e le modiidi kudu moo a bego a ka se kgone go neela kwana goba pudi ya sehlabelo, o be a ka neela maebakgorwana a mabedi goba maebana a mabedi. Eupša go thwe’ng ge e ba Moisiraele a be a diila go fihla bokgoleng bja gore a se kgone go neela maebana a mabedi? Boemong bjoo, Jehofa o be a dumeletše gore Moisiraele yo a diilago a neele bupi bjo bonyenyane. Eupša ela hloko ntlha ye e bohlokwa: E be e sa swanela go fo ba bupi feela, eupša e be e swanetše go ba “bupi bja mathume,” e lego mohuta wa bupi bjoo bo bego bo dirišwa ge motho a be a na le baeng ba hlomphegago. (Gen. 18:6) Ke ka baka la’ng ntlha yeo e le bohlokwa?—Bala Lefitiko 5:7, 11.

¹⁶ A re re o Moisiraele e bile o hloka le pudi ya leleme le letala. Ge o dutše o tsena ka taberenakeleng o swere bupi bjo bonyenyane bjoo o yago go bo neela e le sehlabelo, o bona Baisiraele bao ba humilego le dinala ba tsena le diruiwa tša bona. Mohlomongwe o ka ikwa o lewa ke dihlong ka baka la sehlabelo sa gago seo se bonagalago se nyatšega sa bupi. Ke moka o gopola gore mahlong a Jehofa, sebego seo sa gago ke sa bohlokwa. Ka baka la’ng? Le lengwe la mabaka ke gore Jehofa o be a nyaka gore bupi bjoo e be bja maemo a godimo. Ge e le gabotse, Jehofa o be a botša Baisiraele bao ba diilago gore: ‘Ke a lemoga gore le ka se kgone go  neela kamoo ba bangwe ba kgonago ka gona, eupša ke a tseba gore seo le nneago sona ke se sekaonekaone seo le nago le sona.’ Ruri Jehofa o bonagatša tekatekano ka go naganela mafokodi a bahlanka ba gagwe le maemo ao ba lego go ona.—Ps. 103:14.

17. Ke tirelo ya mohuta ofe yeo o ka kgodišegago gore Jehofa o a e amogela?

 ¹⁷ Re ka homotšwa ke go tseba gore ka baka la tekatekano ya gagwe, Jehofa o amogela tirelo yeo re mo direlago yona ka moya ka moka. (Bakol. 3:23) Kgaetšedi yo mongwe yo a tšofetšego wa Motaliana yo a bitšwago Constance o itše: “Ga go modiro wo ke bego ke o rata kudu bophelong go swana le wa go botša batho ka Mmopi wa ka. Ke ka baka leo ke tšwelago pele ke dira boboledi e bile ke swara dithuto tša Beibele. Ka dinako tše dingwe ke nyamišwa ke gore ga ke kgone go dira mo gontši ka baka la boemo bja ka bja tša maphelo. Eupša ke a lemoga gore Jehofa o tseba mafokodi a ka le gore o a nthata e bile o tšeela godimo seo ke kgonago go se dira.”

18. Tsela e nngwe yeo batswadi ba ka ekišago mohlala wa Jehofa ka yona ke efe?

¹⁸ Re ka ekiša bjang tekatekano ya Jehofa? Nagana gape ka tsela yeo Jehofa a ilego a dirišana le Lota ka yona. Jehofa ke yena a bego a na le matla a bolaodi; eupša ka botho o ile a theetša ge Lota a be a ntšha sa mafahleng. Le gona Modimo o ile a dumelelana le kgopelo ya Lota. Ge e ba o le motswadi, na o ka ekiša mohlala wa Jehofa? Na o ka theetša dikgopelo tša bana ba gago, gomme moo go kgonegago gona wa dumelelana le tšona? Mabapi le yona taba ye, tokollo ya Morokami wa September 1, 2007, e boletše gore batswadi ba ka boledišana le bana ba bona ka melao ya ka lapeng. Ka mohlala, batswadi ke bona ba bolelago gore bana ba boa neng ka gae, le gona ge e le gabotse batswadi ba na le tshwanelo ya go kgetha nako e itšego ka go lebanya yeo ba nyakago bana ba bona ba boa gae ka yona. Gaešita le boemong bjoo, batswadi ba Bakriste ba ka theetša kamoo bana ba bona ba ikwago ka gona ka nako yeo ba e beilego. Maemong a mangwe, batswadi ba ka kgetha go dira diphetogo nakong yeo ba e beilego ge feela seo se sa dire gore go robje melao e itšego ya motheo ya Beibele. Batswadi ba ka feleletša ba lemoga gore ge ba naganela maikwelo a bana ba bona ka melao yeo ba e beago ka gae, seo se dira gore bana ba e kwešiše gabonolo e bile ba e latele.

19. Bagolo ba ka katanela bjang go ekiša tekatekano ya Jehofa?

¹⁹ Bagolo ba phuthego ba katanela go ekiša tekatekano ya Jehofa ka gore ba naganele maemo a badumedigotee le bona. Gopolang gore Jehofa o be a tšeela godimo gaešita le dihlabelo tšeo di bego di neelwa ke Baisiraele ba diilago. Ka mo go swanago, bana babo rena ba bangwe le dikgaetšedi ba ka dira mo gonyenyane kudu tirelong ya bona, mohlomongwe e le ka baka la malwetši goba botšofadi. Go thwe’ng ge e ba batho ba bjalo ba rategago ba ikwa ba nyamile ka baka la mafokodi ao a bona? Bagolo ba ka ba kgonthišetša ka botho gore Jehofa o a ba rata ka ge ba dira sohle seo ba se kgonago tirelong ya bona.—Mar. 12:41-44.

20. Na go ba le tekatekano go bolela gore re goge maoto ge re hlankela Modimo? Hlalosa.

²⁰ Go ba gona, ga se ra swanela go tšea taba ya go ba le tekatekano ra e gakantšha le go ipabalela tirelong ya Modimo, ra ikwela bohloko. (Mat. 16:22) Ga se ra swanela go goga maoto gomme ra itshwarelela ka gore re bontšha tekatekano. Go e na le moo, ka moka ga rena re swanetše go ‘katana ka matla’ tabeng ya go thekga dikgahlego tša Mmušo. (Luka 13:24) Ge e le gabotse, re katanela go hlankela ka pelo ka moka gotee le go bontšha tekatekano. Ka lehlakoreng le lengwe, re katana ka matla, ga re goge maoto tirelong ya rena. Ka nako e swanago, re gopola gore le ka mohla Jehofa a ka se re kgopele go dira dilo tšeo di tlago go re palela. Ge e ba re mo nea tše kaonekaone tšeo re nago le tšona, re ka kgodišega gore o a thaba. Na ga re thabele go hlankela Modimo yo bjalo yo a nago le tebogo le tekatekano? Sehlogong se se latelago, re tla ahlaahla dika tše dingwe gape tše pedi tša semelo se se kgahlišago sa Jehofa.—Ps. 73:28.