1, 2. Antoy pankanawnawa na saray kaaro nen Jehova?

“TALOMPLO tan limay taon kami lan sanasawa,” so inkuan na agi tayon si Monika. “Kabkabat mi lay balang sakey. Balet, anggan abayag kami lan saniba, siansian wala ni ray balon naaamtaan mid sakey tan sakey!” Seguradon tua met iya ed dakel ya sanasawa tan sankakaaro.

² Labalabay tayon mas nakabat iramay aaroen tayo. Balet, say sankaimportantian ed amin et say pikakaaro tayod si Jehova. Agtayon balot naamtaan so amin a bengatla nipaakar ed sikato. (Roma 11:33) Ingen, walay pankanawnawa tayon mas naapresya iray kualidad nen Jehova diad andi-angga.—Ecl. 3:11.

3. Antoy aralen tayod sayan artikulo?

³ Diad apalabas ya artikulo, naaralan tayo no panon tayon mas naapresya so kualidad nen Jehova ya mainomay ya asinggeran tan agmanangidumaduma. Natan et pantongtongan tayoy duara nin makapasagyat a kualidad nen Jehova—say inkamabunlok tan inkamakatunongan. Diad ontan, mas napaneknekan tayon ‘si Jehova et maong ed amin, tan say panangasi to et wala ed saray amin a kimey to.’—Sal. 145:9.

4. Anto so tuan inkamabunlok?

⁴ Anto so inkamabunlok? Naamtaan tayoy ebat ed samay imbaga nen Jesus diad Gawa 20:35: “Mas makapaliket so mangiter nen say mangawat.” Diad sayan imbalikas to, impalinew nen Jesus so kabaliksan na tuan inkamabunlok. Say toon mabunlok et mabulos tan maliket ton iiter so panaon, biskeg tan kaykayarian to pian tulongay arum. On, say inkamabunlok et nasukat, aliwan diad kabaleg na regalo, noagta diad motibo na  angiter. (Basaen so 2 Corinto 9:7.) Anggapo lay arum ya mas mabunlok nen say “maliket a Dios” tayo, si Jehova.—1 Tim. 1:11.

5. Panon ya ipapanengneng nen Jehova so inkamabunlok?

⁵ Panon ya ipapanengneng nen Jehova so inkamabunlok? Itatarya toy pankaukolan na amin a totoo pati saray agni mandadayew ed sikato. Talagan ‘si Jehova et maong ed amin.’ Tan “papasinagen to so agew to ed saray mauges tan maong a totoo tan papepelagen to so uran ed saray matunong tan agmatunong.” (Mat. 5:45) Kanian sanen katongtong nen apostol Pablo iray agmananisia, oniay imbaga to nipaakar ed si Jehova: “Sikatoy nanggawa na maong, a mangiiter ed sikayo na uran manlapud tawen tan mabunga iran panaon, tan mamepenek a maong ed kapusoan yo diad panamegley na naakan tan maabig a panliliket.” (Gawa 14:17) Malinew, si Jehova et mabunlok ed amin a too.—Luc. 6:35.

6, 7. (a) Siopa ray maliket ya tataryaan nen Jehova na pankaukolan da? (b) Iyilustra no panon ya tataryaan na Dios iray matoor a lingkor to.

⁶ Nagkalalon maliket si Jehova ya mangitataryad pankaukolan na saray matoor a mandadayew ed sikato. Oniay imbaga nen Arin David: “Tobonbalo ak nensaman, et natan masiken ak la: agko nin balot anengneng a say matunong et apaulyan, nisay saray bini to mipabpayabol na naakan.” (Sal. 37:25) Apaneknekan itan na dakel a matoor ya Kristiano. Imanoen iyan alimbawa.

⁷ Pigay taon lay apalabas, walay problema nen Nancy, a walad sigpot panaon a panaglingkor. Oniay nanonotan to: “Kaukolan koy $66 pian nabayaran koy rentak ya singilen da la kaimbuasan. Agko anta no iner so pangalaan koy pambayar ko. Nampikasi ak, insan ak linmoob ed trabahok bilang waitress. Agko inilaloan ya dakel so naawat kon tip ed saman a labi ta maslak et daiset so kostumer ed saman ya agew. Mankelaw ak ta dakel so kostumer ed restawran. Kayarik a nantrabaho, binilang koy naawat kon tip, $66 ya amin.” Kombinsido si Nancy ya mabunlok ya intarya nen Jehova so eksakton kaukolan to.—Mat. 6:33.

8. Anto so sankaabigan ya regalo nen Jehova?

⁸ Inter nen Jehova so sankaabigan ya regalo to parad amin. Anto itan? Say dondon bagat na Anak to. Inkuan nen Jesus: “Ontan lay panangaro na Dios ed mundo ya inter to so bogbogtong ya Anak to, ta pian balang sakey a mangipapanengneng na pananisia ed sikato et agnaderal noagta nawalaan na bilay ya andi-anggaan.” (Juan 3:16) Diad saya, say “mundo” et ontutukoy ed saray totoo. On, mabunlok ya iiter nen Jehova so sankaabigan ya regalo ed amin ya malabay a mangawat. Nawalaan na bilay ya andi-anggaan iramay mangipapanengneng na pananisia ed si Jesus. (Juan 10:10) Paneknek itan ya talagan mabunlok si Jehova!

9. Panon tayon naalig so inkamabunlok nen Jehova?

 ⁹ Panon tayon naalig so inkamabunlok nen Jehova? Si Jehova et “daakan a mangitatarya ed sikatayo na amin a bengatlan panliketan tayo”; kanian, kaukolan ya sikatayoy “akaparaan a manginabang” met ed arum pian sikaray napaliket tayo. (1 Tim. 6:17-19) Mabulos tayon uusaren iray materyal a kaykayarian tayo pian regaloan iray inaro tayod bilay tan tulongan iray mankaukolan. (Basaen so Deuteronomio 15:7.) Antoy makatulong pian niyugali tayoy inkamabunlok? Onia so gagawaen na arum ya agagi: No walay nanregalo ed sikara, mannonot ira no siopa met so regaloan da. On, amayamay ya agagid kongregasyon so mangipapatnag na inkamabunlok.

10. Anto so sakey ed saray sankaabigan ya paraan a nipanengneng tayoy inkamabunlok?

¹⁰ Say sakey ed saray sankaabigan ya paraan a nipanengneng tayoy inkamabunlok et diad pangusar tayoy panaon tan biskeg tayo pian tulongan tan pasesegen so arum. (Gal. 6:10) Pian nausisa tayo no kasin nagagawaan tayo iya, itepet tayod sarili tayo: ‘Kasin napatnagan na arum ya talagan mabulos ak ya ondengel tan ontulong ed sikara? No walay patulongan ed proyekto odino trabaho to, kasin akaparaan ak ya onla basta nayarian ko? Kapigan so sampot ya impangibalikas koy apresasyon kod kapamilya odino kaagian ko?’ No ‘iyuugali tayoy mangiter,’ seguradon mas onapit itayod si Jehova tan ed saray kakaaro tayo.—Luc. 6:38; Uli. 19:17.

11. Anto ni ray arum a paraan a nipanengneng tayoy inkamabunlok ed si Jehova?

 ¹¹ Sarag tayo met so magmaliw a mabunlok ed si Jehova. Oniay ipapaseseg na Kasulatan: “Pagalangan moy Jehova diad panamegley na mablin kaykayarian mo.” (Uli. 3:9, NW) Kaiba ed saray “mablin  kaykayarian” so oras, biskeg, tan materyal ya uusaren tayod panaglingkor. Anggan saray ugugaw et nayarin ipasal pian magmaliw a mabunlok ed si Jehova. Oniay inkuan nen Jason a sakey ya ama: “No mandonasyon so pamilya mi ed Kingdom Hall, saray ananak mi so pangipepelagen mi na kuarta ed contribution box. Manliket ira ta legan dan gagawaen itan, amta ran ‘mangiiter irad si Jehova.’” No nipasal iray ananak a mangiter ed si Jehova anggan ugugaw ni ra, mabunlok irad sikato anggad ibaleg da.—Uli. 22:6.

12. Anto so inkamakatunongan?

¹² Say sakey nid saray makapasagyat ya kualidad nen Jehova et say inkamakatunongan. Anto so inkamakatunongan? Say orihinal a salitan kaslakan ya ipapatalos ed New World Translation ya “makatunongan” et literal a mankabaliksay “mapalugar.” (Tito 3:1, 2) Say makatunongan a too et aliwan panatiko ed panangunor ed ganggan, aliwan is-istrikto, alablabas, odino maruksa. Imbes, sikatoy mauyamo tan ikokonsidera toy sirkumstansya na arum. Sikatoy akaparaan ya ondengel tan no kaukolan, sikatoy manpalugar ed saray panlabayan da tan iyadapta toy inkasikato.

13, 14. (a) Panon ya ipapanengneng nen Jehova so inkamakatunongan? (b) Antoy naaralan tayod impideneng na Dios ed si Lot?

¹³ Panon ya ipapanengneng nen Jehova so inkamakatunongan? Maaro ton ikokonsideray liknaan na saray lingkor to tan dedengelen toy kerew da. Singa bilang, imanoen no panon ya akideneng si Jehova ed matunong a toon si Lot. Sanen nandesisyon si Jehova ya deraley syudad na Sodoma tan Gomorra, ingganggan toy Lot ya ombatik ed kapalandeyan. Balet, lapud pigaran rason, akikasi si Lot ya onlad sananey a pasen. Isipen pa—kinerew nen Lot ya umanen nen Jehova so ganggan To!—Basaen so Genesis 19:17-20.

¹⁴ Nayarin mainomay labat ya ibaga na siopaman ya si Lot et matakot odino agmatulok. Diad tua, sarasarag nen Jehova a protektaan si Lot anggan iner so laen to kanian agto kaukolan so ontakot. Anggaman ontan, inkonsidera toy nalilikna nen Lot—amta to ya natural labat so reaksion nen Lot kanian pinalugaran to. Inabuloyan toy Lot ya ombatik ed syudad a plano Ton deralen. (Basaen so Genesis 19:21, 22.) Malinew, si Jehova et aliwan is-istrikto. Sikatoy mapalugar tan makatunongan.

15, 16. Panon ya napatnagan ed Mosaikon Ganggan so inkamakatunongan nen Jehova? (Nengnengen so litrato ed pahina 12.)

¹⁵ Imanoen so sakey nin pakapatnagay inkamakatunongan nen Jehova. Diad Mosaikon Ganggan, no agnayarian na sakey ya Israelita so mangiyapay na karnero o kanding lapud mairap so bilay to, sarag toy mangiyapay na duaran palekpek o duaran malapati. Panon to balet no pobrin maong so sakey ya Israelita kanian agmakasaliw na duaran malapati? Inabuloyan nen Jehova iray mairap bilay ya Israelita a mangiyapay na daiset a tapong. Ingen, imanoen iyan importantin detalye: Say tapong ya iyapay et aliwan basta tapong, noagta “pino a tapong,” a singa uusaren parad saray respetadon bisita. (Gen. 18:6) Akin ya importante itan?—Basaen so Levitico 5:7, 11.

¹⁶ Isip mo pan sakey kan Israelita tan mairap so bilay mo. Kasabim ed tabernakulo pian mangiyapay na daiset a tapong, anengneng mo ray Israelitan mas maong so bilay da ya say iyapay da et ayep. Nayarin nababaingan ka ta singa anggapoy kana na iyapay mon tapong. Insan mo anonotan a papablien nen Jehova so apay mo. Akin? Lapud ingganggan nen Jehova ya say tapong et nepeg a marakep a klase. Singa  oniay ibabaga nen Jehova ed saray pobrin Israelita: ‘Amtak ya agkayo makapangiyapay na singa ed iyaapay na arum, balet amtak met ya say iiter yod siak et say sankaabigan yo.’ Talagan makatunongan si Jehova ta ikokonsidera toy limitasyon tan sirkumstansya na saray lingkor to.—Sal. 103:14.

17. Anton klase na panaglingkor so aawaten nen Jehova?

 ¹⁷ Makapaliket a naamtaan ya si Jehova et makatunongan kanian aawaten toy interon kamarerwan panaglingkor tayo. (Col. 3:23) Oniay imbaga na maedad lan sister ed Italy a si Constance: “Labalabay kon itongtong ed arum so nipaakar ed Amalsa. Kanian lanang ak ya manpupulong tan mangiyaaral. No maminsan et naeermenan ak ta dagdaiset so nagagawaan ko lapud sakit ko. Balet amtak ya natatalosan nen Jehova so limitasyon ko, inaro to ak, tan aapresyaen toy nagagawaan ko.”

18. Anto so sakey a paraan a naalig na atateng si Jehova?

¹⁸ Panon tayon naalig so inkamakatunongan nen Jehova? Nonoten lamet imay impideneng nen Jehova ed si Lot. Si Jehova so walaan na autoridad; balet, maaro ton dinengel so kerew nen Lot tan pinalugaran to. No sakey kan ateng, kasin naalig moy alimbawa nen Jehova? Kasin dengelen moy kerew na ananak mo tan iter itan no makatunongan? Nipaakar ed saya, imbaga na Say Panag-bantayan ya Setyembre 1, 2007 a nayarin itongtong na atateng ed ananak da iray gawaen dan totontonen ed abung. Singa bilang, no desidien na atateng so oras ya isempet na ananak da, sikaray mangibaga na oras a nepeg ya tumboken na ananak. Balet, nayarin ikonsidera na atateng so ibaga na ananak da. Diad arum a situasyon, nayarin umaney tongtongan ya oras daput no agnasumlang iray prinsipyo na Biblia. No ikonsidera na atateng so ibaga na ananak da ed saray totontonen ed abung, mas natalosan na ananak iratan tan ontulok ira.

19. Panon a naalig na saray elder so inkamakatunongan nen Jehova?

¹⁹ Kaukolan a panggunaetan na saray elder ya aligen so inkamakatunongan nen Jehova diad pangikonsiderad sirkumstansya na saray agagi. Tandaan ya mabmabli ed si Jehova so apay na anggan saray mairap bilay ya Israelita. Ontan met natan, wala ray agagi tayon limitado lay nagagawaan dad ministeryo, nayarin lapud sakit odino itatatken. Panon to no naeermenan irayan inad-aro tayon agagi lapud limitasyon da? Maabig no sikaray maaron paseguroan na saray elder ya inad-aro ira nen Jehova lapud iiter day sankaabigan da.—Mar. 12:41-44.

20. Kasin say pagmaliw a makatunongan et kabaliksan toy panlingkor a paspasaray? Ipaliwawa.

²⁰ Siempre, agtayo labay ya ibaraan so pagmaliw ya makatunongan pian makapaliis ed panaglingkor ed Dios, tan irason ya kakasian tayoy sarili tayo. (Mat. 16:22) Agtayo labay so manlingkor a paspasaray insan tayo ibagan makatunongan so gagawaen tayo. Imbes, “pampilitan [tayon] maong” a suportaay interes na Panarian. (Luc. 13:24) Kanian, panggunaetan tayon balansien so duaran prinsipyo. Kaukolan tayon pampilitan a maong so pangiter na sankaabigan ed panaglingkor tayo. Balet, nepeg tayon tandaan ya agbalot kekerewen nen Jehova so agtayo nayarian. No iter tayod sikatoy sankaabigan tayo, sikatoy napaliket tayo. Agta makapaliket so manlingkor ed maapresya tan makatunongan a Dios? Diad ontumbok ya artikulo, aralen tayoy duara nin aspekto na makapasagyat ya personalidad nen Jehova.—Sal. 73:28.