Yehova Ta Generoso i Rasonabel
‘Yehova ta bon pa tur, i su miserikòrdianan ta riba tur su obranan.’—SAL. 145:9.
1, 2. Ki oportunidat nos tin komo amigu di Yehova?
MONIKA, un ruman muhé ku tin kasi 35 aña kasá, a bisa: “Ami ku mi esposo konosé otro masha bon mes. Tòg, despues di tur e añanan akí, ainda nos ta haña sa sierto kosnan di otro ku nunka nos tabata sa.” Sin duda, esei ta e kaso den hopi matrimonio i amistat.
2 Sí, nos ta sinti nos bon ora nos ta siña konosé nos sernan kerí mas i mas mihó. Pero, di tur e amistatnan ku nos por tin, esun di mas importante ta nos amistat ku Yehova. I nunka nos lo kaba di siña konosé Yehova. (Rom. 11:33) Pa tur eternidat, nos lo tin e oportunidat i goso di por sigui siña mas tokante Yehova su kualidatnan i asina apresiá esakinan mas i mas.—Ekl. 3:11.
3. Kiko nos lo trata den e artíkulo akí?
3 E artíkulo anterior a yuda nos haña mas apresio pa e echo ku Yehova ta aserkabel i imparsial. Den e artíkulo akí, nos lo trata dos kualidat mas di Yehova: e echo ku e ta generoso i rasonabel. E estudio akí lo konvensé nos mas ainda ku ‘Yehova ta bon pa tur, i ku su miserikòrdianan ta riba tur su obranan.’—Sal. 145:9.
YEHOVA TA GENEROSO
4. Kiko ta nifiká ser generoso?
4 Kiko ta nifiká ser generoso? Nos ta haña e kontesta den e palabranan di Hesus registrá na Echonan 20:35, ku ta bisa: “Tin mas felisidat den duna ku den risibí.” Ku e palabranan simpel ei, Hesus a deskribí e esensia di berdadero generosidat: Un persona generoso ta un persona ku ta gusta duna di su tempu, energia i rekursonan pa yuda otro hende. Ma no ta e kantidat ni loke e persona ta duna ta hasié un persona generoso, sino e echo ku e ta duna di su kurason. (Lesa 2 Korintionan 9:7.) No tin niun persona mas generoso ku nos “Dios felis,” Yehova.—1 Tim. 1:11.
5. Den ki maneranan Yehova ta mustra generosidat?
5 Kon Yehova ta mustra generosidat? Wèl, Yehova ta perkurá pa e nesesidatnan di tur hende, asta pa e nesesidatnan di esnan ku no ta ador’é ainda. Sí, ‘Yehova ta bon pa tur.’ E “ta laga su solo sali riba mal hende i bon hende i ta laga awa kai riba hende hustu i inhustu.” (Mat. 5:45) Ta p’esei apòstel Pablo por a bisa e personanan ku no tabata kristian ku Yehova “a hasi bon, dunando [nan] áwaseru for di shelu i tempu di bon kosecha, i asina a laga [nan] haña kuminda na abundansia i a yena [nan] kurason ku alegria.” (Echo. 14:17) Ta bisto anto ku Yehova ta generoso ku tur hende.—Luk. 6:35.
6, 7. (a) Pa ken spesialmente Yehova ta perkurá ku goso? (b) Duna un ehèmpel ku ta mustra ku Dios ta perkurá pa su fiel sirbidónan.
6 Pa Yehova ta un goso pa perkurá spesialmente pa e nesesidatnan di su fiel sirbidónan. Rei David a bisa: “Mi tabata yòn, i awor mi ta bieu; ma nunka mi no a mira e hustu desampará, ni su desendientenan ta pidi pan.” (Sal. 37:25) Hopi fiel sirbidó di Yehova a eksperensiá Yehova su kuido personalmente. At’akí un ehèmpel:
7 Algun aña pasá, un pionero regular ku yama Nancy a hañ’é den un situashon difísil. El a bisa: “Mi tabatin mester di $66 pa paga hür di kas e siguiente dia, pero mi no tabatin e sèn. P’esei, mi a hasi orashon tokante e asuntu i a bai mi trabou kaminda mi tabata traha komo waiter. Mi no a spera di haña masha tep e dia ei pasobra tabata un dia den siman ku normalmente no sa ta muchu drùk. Pero pa mi sorpresa, vários hende a bini e restorant e anochi ei. Despues di trabou, mi a konta loke mi a haña na tep i na tur e tabata presis $66.” Nancy ta konvensí ku ta Yehova a yud’é haña presis loke e tabatin mester.—Mat. 6:33.
8. Kua ta e regalo ku mas ta demostrá kon generoso Yehova ta?
8 E regalo ku mas ta demostrá Yehova su generosidat ta disponibel pa tur hende. Kua regalo esei ta? E sakrifisio di reskate di su Yu. Hesus a bisa: “Dios a stima mundu asina tantu ku el a duna su Yu unigénito, pa tur ku pone fe den dje no bai pèrdí, ma haña bida eterno.” (Huan 3:16) Den e teksto akí, e palabra “mundu” ta referí na humanidat. Sí, Yehova su regalo di mas generoso ta disponibel pa tur hende ku ke asept’é. Tur hende ku pone fe den Hesus lo risibí bida na abundansia, esta, bida eterno. (Huan 10:10) Por tin un prueba mas grandi ku ta demostrá ku Yehova ta un Dios generoso?
SEA GENEROSO, MESKOS KU YEHOVA
E israelitanan a haña animashon pa ta generoso meskos ku Yehova (Wak paragraf 9)
9. Kon nos por ta generoso, meskos ku Yehova?
9 Awor, kon nos por ta generoso, meskos ku Yehova? Wèl, Yehova a duna nos hopi kos pa nos por ta felis. P’esei, nos tambe mester ta “kla pa kompartí” loke nos tin ku otro hende i asina hasi nan tambe felis. (1 Tim. 6:17-19) Ta un plaser pa usa nos rekursonan pa duna nos famia- òf amigunan regalo i yuda hende den nesesidat. (Lesa Deuteronomio 15:7.) Kiko por yuda nos kòrda ku nos mester ta generoso? Algun kristian a disidí ku ki ora ku nan risibí un regalo, nan ta buska oportunidat pa duna un otro hende algu. Esei ta un kustumber ku hopi kristian ta sigui i esei ta un bendishon pa e kongregashon kristian.
10. Kon ta un ekselente manera pa mustra generosidat?
10 Un di e mihó maneranan pa mustra generosidat ta di usa nos tempu i energia pa yuda i animá otro hende. (Gal. 6:10) Anto pa nos por sa si di bèrdat nos ta generoso den e manera akí, nos mester puntra nos mes: ‘Otronan ta ripará ku mi ta dispuesto pa yuda i skucha nan? Si un hende puntra mi pa yud’é ku algu òf pa hasié un fabor, mi ta bisa sí ora esei ta posibel? Ki dia tabata e último biaha ku mi a elogiá un miembro di mi famia òf un persona den kongregashon?’ Si nos tin e ‘kustumber di duna,’ nos ta hala mas serka Yehova i nos amigunan.—Luk. 6:38; Pro. 19:17.
11. Menshoná algun manera ku nos por ta generoso ku Yehova.
11 Nos por ta generoso ku Yehova tambe. E Skritura ta bisa: “Onra SEÑOR ku bo rikesa.” (Pro. 3:9) Nos “rikesa” ta enserá nos tempu, energia i rekursonan, ku otro palabra, loke nos por usa na benefisio di nos sirbishi na Dios. Asta mucha por siña mustra generosidat na Yehova. Un tata ku yama Jason a bisa: “Ora di duna kontribushon na Salòn di Reino, nos ta laga nos yunan pone e sèn den e kaha di kontribushon. Nan ta gusta hasi esei, pasobra manera nan mes ta bisa, nan ta ‘dunando Yehova algu.’” Mucha ku eksperensiá e goso di mustra generosidat na Yehova muy probablemente lo sigui dun’é generosamente ora nan bira grandi.—Pro. 22:6.
YEHOVA TA RASONABEL
12. Kiko ta nifiká ser rasonabel?
12 Un otro bunita karakterístika di Yehova ta e echo ku e ta un persona rasonabel. Kiko ta nifiká ser rasonabel? E palabra original ku e Tradukshon di Mundu Nobo ta tradusí generalmente komo “rasonabel” literalmente ta nifiká “sede.” (Tito 3:1, 2) Pues, un persona rasonabel no ta insistí pa pega semper estriktamente na lei òf regla. E no ta demasiado estrikto, òf strèn. E ta hasi esfuerso pa trata hende na un manera bondadoso i ta tene kuenta ku nan situashon. Un persona rasonabel ta semper kla pa skucha otronan, i ora ku por, e ta sede: E ta legumai su eksigensianan i ta duna prioridat na deseo di otronan.
13, 14. (a) Kon Yehova ta demostrá ku e ta rasonabel? (b) Kiko nos por siña enkuanto ser rasonabel for di e manera ku Dios a trata ku Lòt?
13 Kon Yehova ta demostrá ku e ta rasonabel? Wèl, e ta tene kuenta ku e sintimentunan di su sirbidónan, i hopi bes e ta permití nan kumpli ku nan deseo. Tuma komo ehèmpel e kaso di e hòmber hustu Lòt. Ora Yehova a disidí ku lo e bai destruí Sódoma i Gomora, el a bisa Lòt bon kla pa hui bai e serunan. Pero pa un motibu òf otro, Lòt a roga Yehova pa e bai un otro lugá. Imaginá bo: Básikamente, Lòt a pidi Yehova pa e kambia Su instrukshon.—Lesa Génesis 19:17-20.
14 Fásilmente nos lo por pensa ku Lòt no tabatin un fe fuerte i ku e tabata desobedesidu. Al fin i al kabo, Yehova lo por a proteh’é unda ku ta pa e no muri; pues Lòt lo no mester tabatin miedu. No opstante, Lòt tabatin miedu. I Yehova a respetá Lòt su sintimentunan. P’esei, el a sede na Lòt su petishon i a permitié hui bai un stat ku tambe E tabata bai destruí. (Lesa Génesis 19:21, 22.) Ta klaru anto ku Yehova no ta strèn ni rígido. E ta rasonabel i kla pa sede.
15, 16. Kon e Lei di Moises a mustra ku Yehova ta rasonabel? (Wak e plachi na kuminsamentu di e artíkulo akí.)
15 E Lei di Moises tambe a mustra ku Yehova ta un Dios rasonabel. Por ehèmpel, si un israelita tabata muchu pober i e no por a ofresé un lamchi òf un kabritu komo sakrifisio, e por a ofresé dos tòrteldùif òf dos pichon (yu di palomba). Pero kiko si un israelita tabata asina pober ku e no por a ofresé ni dos pichon? Den un kaso asina, Yehova a permití e israelita ofresé un tiki hariña. Pero, tuma nota di e detaye importante akí: E no tabatin mag di ofresé kualke hariña, ma “hariña fini,” e tipo ku lo el a usa pa sirbi un huéspet importante. (Gén. 18:6) Dikon e detaye akí ta importante?—Lesa Levítiko 5:7, 11.
16 Wèl, imaginá ku abo tabata un israelita masha pober. Segun ku bo ta yegando e tabernakel ku un tiki hariña pa ofresé komo sakrifisio, bo ta mira algun israelita riku ta bini ku nan bestianan pa ofresé. Kisas bo ta sinti bèrgwensa pasobra bo sakrifisio di hariña ta parse insignifikante. Pero bo ta kòrda ku pa Yehova sí e ta masha importante. Dikon? Wèl, pa di promé, e hariña ku bo tin ta di ekselente kalidat, manera Yehova ta rekerí. Bon mirá, ta komo si fuera Yehova tabata bisando e israelitanan pober: ‘Mi ta komprondé ku boso no por ofresé mi mes tantu ku e otronan, pero mi sa ku loke Sal. 103:14.
boso ta ofresiendo ta lo mihó ku boso por.’ No tin duda, e Lei di Moises a mustra bon kla ku Yehova ta un Dios rasonabel: E ta tene kuenta ku e limitashon- i sirkunstansianan di su sirbidónan.—17. Ki klase di adorashon Yehova ta aseptá?
17 Ta un konsuelo pa sa ku Yehova ta un Dios rasonabel i ku e ta aseptá e adorashon ku nos ta rindi na dje di henter nos alma. (Kol. 3:23) Constance, un ruman muhé italiano di edat avansá, a bisa: “E kos ku mas mi ta gusta hasi ta papia ku otro hende tokante mi Kreador. Ta p’esei mes mi ta sigui prediká i dirigí estudio di Beibel. Tin biaha, mi ta sinti mi malu ku mi salú no ta permití mi hasi mas. Pero mi ta konsiente ku Yehova sa di mi limitashonnan i ku e ta stima mi i ta apresiá loke mi por hasi.”
SEA RASONABEL, MESKOS KU YEHOVA
18. Kon ta un manera ku mayornan por imitá Yehova su ehèmpel?
18 Awor, kon nos por ta rasonabel, meskos ku Yehova? Pensa atrobe riba e manera ku Yehova a trata ku Lòt. Yehova tabata esun ku outoridat pa bisa Lòt unda e tabatin ku bai. Pero Yehova a skucha Lòt bondadosamente segun ku e tabata ekspresá su sintimentunan i a permitié bai kaminda e tabata ke. Si bo ta un mayor, kon bo por imitá e ehèmpel di Yehova? Bo ta skucha bo yunan i kumpli ku nan deseonan si esaki ta na su lugá? E Toren di Vigilansia di 1 di sèptèmber 2007 a mustra ku algun mayor ta laga nan yunan tambe duna nan opinion ora di pone sierto reglanan di kas. Ban bisa ku un mayor ke stipulá e ora ku su yunan mester ta na kas anochi. Aunke e mayor tin tur derecho di pone e ora ku e ta haña ta apropiá, algun mayor kristian ta skucha loke nan yunan tin di bisa. Den algun kaso, mayornan ta tene kuenta ku e deseo di nan yunan i ta ahustá e ora, basta ta un ora apropiá. Ora mayornan ta tene kuenta ku loke nan yunan ta pensa tokante sierto reglanan, e yunan lo komprondé e reglanan akí mihó i lo ta mas dispuesto pa obedesé nan.
19. Ki esfuerso ansianonan por hasi pa ta rasonabel meskos ku Yehova?
19 Ansianonan den kongregashon tambe ta hasi esfuerso pa nan ta rasonabel meskos ku Yehova. Nan ta tene kuenta ku e sirkunstansianan di nan rumannan den fe. Nan ta kòrda ku Yehova tabata apresiá asta e ofrendanan ku e israelitanan pober tabata ofresé. Awe tambe tin algun ruman den kongregashon ku no por hasi muchu den sirbishi kisas debí na nan salú òf edat avansá. Kiko si e rumannan stimá akí ta sinti nan desanimá pa motibu di nan limitashonnan? Wèl, na un manera bondadoso, ansianonan por sigurá nan ku Yehova ta stima nan pasobra nan ta duna lo mihó ku nan por.—Mar. 12:41-44.
20. Ser rasonabel ta nifiká ku nos ta hasi djis un tiki so den nos sirbishi na Dios? Splika.
20 Ta klaru ku ser rasonabel no ta nifiká ku nos ta hasi ménos den nos sirbishi na Dios djis pa nos ta ‘bondadoso ku nos mes.’ (Mat. 16:22) Pues, nos no ta hasi djis un tiki so miéntras ku nos por hasi mas i despues usa komo preteksto ku nos ta rasonabel. Al kontrario, nos tur tin ku “hasi esfuerso vigoroso” pa apoyá e Reino di Dios. (Luk. 13:24) Bon mirá, nos ta purba di tene dos prinsipio den balansa. Di un banda, nos ta hasi nos máksimo esfuerso pa duna tur loke nos por den e sirbishi di Dios, i, di otro banda, nos ta kòrda ku Yehova nunka ta pidi mas di loke nos por duna. Ora nos ta dun’é lo mihó, nos por ta sigur ku e ta keda kontentu. No ta dushi pa sirbi un Doño asina apresiativo i rasonabel? Den e siguiente artíkulo, nos lo trata dos otro bunita karakterístika di Yehova su personalidat.—Sal. 73:28.
“Onra SEÑOR ku bo rikesa.”—Pro. 3:9 (Wak paragraf 11)
“Kiko ku boso ta hasi, traha riba dje ku henter boso alma.”—Kol. 3:23 (Wak paragraf 17)