1, 2. Ki oportunidad nos tin como amigo di Jehova?

 MONIKA, un ruman muher cu tin casi 35 aña casa, a bisa: “Ami cu mi esposo conoce otro masha bon mes. Toch, despues di tur e añanan aki, ainda nos ta haya sa cierto cosnan di otro cu nunca nos tabata sa.” Sin duda, esey ta e caso den hopi matrimonio y amistad.

² Si, nos ta sinti nos bon ora nos ta siña conoce nos sernan keri mas y mas mihor. Pero, di tur e amistadnan cu nos por tin, esun di mas importante ta nos amistad cu Jehova. Y nunca nos lo caba di siña conoce Jehova. (Rom. 11:33) Pa tur eternidad, nos lo tin e oportunidad y goso di por sigui siña mas tocante Jehova su cualidadnan y asina aprecia esakinan mas y mas.—Ecl. 3:11.

3. Kico nos lo trata den e articulo aki?

³ E articulo anterior a yuda nos haya mas aprecio pa e echo cu Jehova ta acercabel y imparcial. Den e articulo aki, nos lo trata dos cualidad mas di Jehova: e echo cu e ta generoso y rasonabel. E estudio aki lo convence nos mas ainda cu ‘Jehova ta bon pa tur, y cu su misericordianan ta riba tur su obranan.’—Sal. 145:9.

4. Kico ta nifica ser generoso?

⁴ Kico ta nifica ser generoso? Nos ta haya e contesta den e palabranan di Hesus registra na Echonan 20:35, cu ta bisa: “Tin mas felicidad den duna cu den ricibi.” Cu e palabranan simpel ey, Hesus a describi e esencia di berdadero generosidad: Un persona generoso ta un persona cu ta gusta duna di su tempo, energia y recursonan pa yuda otro hende. Ma no ta e cantidad ni loke e persona ta duna ta hacie un persona generoso, sino e echo cu e ta duna di su curason. (Lesa 2 Corintionan  9:7.) No tin niun persona mas generoso cu nos “Dios feliz”, Jehova.—1 Tim. 1:11.

5. Den ki maneranan Jehova ta mustra generosidad?

⁵ Con Jehova ta mustra generosidad? Wel, Jehova ta percura pa e necesidadnan di tur hende, hasta pa e necesidadnan di esnan cu no ta ador’e ainda. Si, ‘Jehova ta bon pa tur.’ E “ta laga su solo sali riba mal hende y bon hende y ta laga awa cay riba hende husto y inhusto.” (Mat. 5:45) Ta pesey apostel Pablo por a bisa e personanan cu no tabata cristian cu Jehova “a haci bon, dunando [nan] awasero for di cielo y tempo di bon cosecha, y asina a laga [nan] haya cuminda na abundancia y a yena [nan] curason cu alegria.” (Echo. 14:17) Ta bisto anto cu Jehova ta generoso cu tur hende.—Luc. 6:35.

6, 7. (a) Pa ken specialmente Jehova ta percura cu goso? (b) Duna un ehempel cu ta mustra cu Dios ta percura pa su fiel sirbidornan.

⁶ Pa Jehova ta un goso pa percura specialmente pa e necesidadnan di su fiel sirbidornan. Rey David a bisa: “Mi tabata jong, y awor mi ta bieu; ma nunca mi no a mira e husto desampara, ni su descendientenan ta pidi pan.” (Sal. 37:25) Hopi fiel sirbidor di Jehova a experencia Jehova su cuido personalmente. Ata aki un ehempel:

⁷ Algun aña pasa, un pionero regular cu yama Nancy a hay’e den un situacion dificil. El a bisa: “Mi tabatin mester di $66 pa paga huur di cas e siguiente dia, pero mi no tabatin e cen. Pesey, mi a haci oracion tocante e asunto y a bay mi trabou caminda mi tabata traha como waiter. Mi no a spera di haya hopi tip e dia ey pasobra tabata un dia den siman cu normalmente no ta mucho druk. Pero pa mi sorpresa, varios hende a bin e restaurant e anochi ey. Despues di trabou, mi a conta loke mi a haya na tip y hunto e tabata precies $66.” Nancy ta convenci cu ta Jehova a yud’e haya precies loke e tabatin mester.—Mat. 6:33.

8. Cua ta e regalo cu mas ta demostra con generoso Jehova ta?

⁸ E regalo cu mas ta demostra Jehova su generosidad ta disponibel pa tur hende. Cua regalo esey ta? E sacrificio di rescate di su Yiu. Hesus a bisa: “Dios a stima mundo asina tanto cu el a duna su Yiu unigenito, pa tur cu pone fe den dje no bay perdi, ma haya bida eterno.” (Juan 3:16) Den e texto aki, e palabra “mundo” ta referi na humanidad. Si, Jehova su regalo di mas generoso ta disponibel pa tur hende cu kier acept’e. Tur hende cu pone fe den Hesus lo ricibi bida na abundancia, esta, bida eterno. (Juan 10:10) Por tin un prueba mas grandi cu ta demostra cu Jehova ta un Dios generoso?

9. Con nos por ta generoso mescos cu Jehova?

 ⁹ Awor, con nos por ta generoso mescos  cu Jehova? Wel, Jehova a duna nos hopi cos pa nos por ta feliz. Pesey, nos tambe mester ta “cla pa comparti” loke nos tin cu otro hende y asina haci nan tambe feliz. (1 Tim. 6:17-19) Ta un placer pa uza nos recursonan pa duna nos famia- of amigonan regalo y yuda hende den necesidad. (Lesa Deuteronomio 15:7.) Kico por yuda nos corda cu nos mester ta generoso? Algun cristian a dicidi cu ki ora cu nan ricibi un regalo, nan ta busca oportunidad pa duna un otro hende algo. Esey ta un custumber cu hopi cristian ta sigui y esey ta un bendicion pa e congregacion cristian.

10. Con ta un excelente manera pa mustra generosidad?

¹⁰ Un di e mihor maneranan pa mustra generosidad ta di uza nos tempo y energia pa yuda y anima otro hende. (Gal. 6:10) Anto pa nos por sa si di berdad nos ta generoso den e manera aki, nos mester puntra nos mes: ‘Otronan ta ripara cu mi ta dispuesto pa yuda y scucha nan? Si un hende puntra mi pa yud’e cu algo of pa hacie un fabor, mi ta bisa si ora esey ta posibel? Ki dia tabata e ultimo biaha cu mi a elogia un miembro di mi famia of un persona den congregacion?’ Si nos tin e ‘custumber di duna’, nos ta hala mas cerca di Jehova y nos amigonan.—Luc. 6:38; Prov. 19:17.

11. Menciona algun manera cu nos por ta generoso cu Jehova.

 ¹¹ Nos por ta generoso cu Jehova tambe. E Scritura ta bisa: “Honra SEÑOR cu bo rikesa.” (Prov. 3:9) Nos “rikesa” ta encera nos tempo, energia y recursonan, cu otro palabra, loke nos por uza na beneficio di nos sirbishi na Dios. Hasta mucha por siña mustra generosidad na Jehova. Un tata cu yama Jason a bisa: “Ora di duna contribucion na Salon di Reino,  nos ta laga nos yiunan pone e cen den e caha di contribucion. Nan ta gusta haci esey, pasobra manera nan mes ta bisa, nan ta ‘dunando Jehova algo.’” Mucha cu experencia e goso di mustra generosidad na Jehova muy probablemente lo sigui dun’e generosamente ora nan bira grandi.—Prov. 22:6.

12. Kico ta nifica ser rasonabel?

¹² Un otro bunita caracteristica di Jehova ta e echo cu e ta un persona rasonabel. Kico ta nifica ser rasonabel? E palabra original cu e Traduccion di Mundo Nobo ta traduci generalmente como “rasonabel” literalmente ta nifica “sede.” (Tito 3:1, 2) Pues, un persona rasonabel no ta insisti pa pega semper estrictamente na ley of regla. E no ta demasiado estricto, of streng. E ta haci esfuerso pa trata hende na un manera bondadoso y ta tene cuenta cu nan situacion. Un persona rasonabel ta semper cla pa scucha otronan, y ora cu por, e ta sede: E ta pone su mes exigencianan un banda y ta duna prioridad na deseo di otronan.

13, 14. (a) Con Jehova ta demostra cu e ta rasonabel? (b) Kico nos por siña encuanto ser rasonabel for di e manera cu Dios a trata cu Lot?

¹³ Con Jehova ta demostra cu e ta rasonabel? Wel, e ta tene cuenta cu e sintimentonan di su sirbidornan, y hopi bes e ta permiti nan cumpli cu nan deseo. Tuma como ehempel e caso di e homber husto Lot. Ora Jehova a dicidi cu lo e bay destrui Sodoma y Gomora, el a bisa Lot bon cla pa huy bay na e seronan. Pero pa un motibo of otro, Lot a roga Jehova pa e bay un otro luga. Imagina bo: Basicamente, Lot a pidi Jehova pa e cambia Su instruccion.—Lesa Genesis 19:17-20.

¹⁴ Facilmente nos lo por pensa cu Lot no tabatin un fe fuerte y cu e tabata desobedecido. Al fin y al cabo, Jehova lo por a proteh’e unda cu ta pa e no muri; pues Lot lo no mester tabatin miedo. Asina mes, Lot tabatin miedo. Y Jehova a respeta Lot su sintimentonan. Pesey, el a sede na Lot su peticion y a permitie huy bay un stad cu tambe E tabata bay destrui. (Lesa Genesis 19:21, 22.) Ta claro anto cu Jehova no ta streng ni rigido. E ta rasonabel y cla pa sede.

15, 16. Con e Ley di Moises a mustra cu Jehova ta rasonabel? (Wak e plachi na cuminsamento di e articulo aki.)

¹⁵ E Ley di Moises tambe a mustra cu Jehova ta un Dios rasonabel. Por ehempel, si un Israelita tabata mucho pober y e no por a ofrece un lamchi of un cabrito como sacrificio, e por a ofrece dos tortelduif of dos pichon (yiu di paloma). Pero kico si un Israelita tabata asina pober cu e no por a ofrece ni dos pichon? Den un caso asina, Jehova a permiti e Israelita ofrece un tiki hariña. Pero, tuma nota di e detaye importante aki: E no tabatin mag di ofrece cualkier hariña, solamente “hariña fini”, e tipo cu lo el a uza pa sirbi un huesped importante. (Gen. 18:6) Dicon e detaye aki ta importante?—Lesa Levitico 5:7, 11.

¹⁶ Wel, imagina cu abo tabata un Israelita masha pober. Segun cu bo ta yegando e tabernakel cu un tiki hariña pa ofrece como sacrificio, bo ta mira algun Israelita rico ta bin cu nan bestianan pa ofrece. Kisas bo ta sinti berguensa pasobra bo sacrificio di hariña ta parce insignificante. Pero bo ta corda cu pa Jehova si e ta masha importante. Dicon? Wel, pa cuminsa, e hariña cu bo tin ta di excelente calidad, manera Jehova ta rekeri. De echo, ta comosifuera Jehova tabata bisando e Israelitanan pober: ‘Mi ta compronde cu boso no por ofrece mi mes hopi cu e otronan, pero mi sa cu loke boso ta ofreciendo ta lo mihor cu boso por.’ No tin duda, e Ley di  Moises a mustra bon cla cu Jehova ta un Dios rasonabel: E ta tene cuenta cu e limitacion- y circunstancianan di su sirbidornan.—Sal. 103:14.

17. Ki clase di adoracion Jehova ta acepta?

 ¹⁷ Ta un consuelo pa sa cu Jehova ta un Dios rasonabel y cu e ta acepta e adoracion cu nos ta rindi na dje di henter nos alma. (Col. 3:23) Constance, un ruman muher Italiano di edad avansa, a bisa: “E cos cu mas mi ta gusta haci ta papia cu otro hende tocante mi Creador. Ta pesey mes mi ta sigui predica y dirigi estudio di Bijbel. Tin biaha, mi ta sinti mi malo cu mi salud no ta permiti mi haci mas. Pero mi ta consciente cu Jehova sa di mi limitacionnan y cu e ta stima mi y ta aprecia loke mi por haci.”

18. Den ki manera mayornan por imita Jehova su ehempel?

¹⁸ Awor, con nos por ta rasonabel mescos cu Jehova? Pensa atrobe riba e manera cu Jehova a trata cu Lot. Jehova tabata esun cu autoridad pa bisa Lot unda e tabatin cu bay. Pero Jehova a scucha Lot bondadosamente segun cu e tabata expresa su sintimentonan y a permitie bay caminda e tabata kier. Si bo ta un mayor, con bo por imita e ehempel di Jehova? Bo ta scucha bo yiunan y cumpli cu nan deseonan si esaki ta na su luga? E Toren di Vigilancia di 1 di september 2007 a mustra cu algun mayor ta laga nan yiunan tambe duna nan opinion ora di pone cierto reglanan di cas. Ban bisa cu un mayor kier stipula e ora cu su yiunan mester ta na cas anochi. Aunke e mayor tin tur derecho di pone e ora cu e ta haya ta apropia, algun mayor cristian ta scucha loke nan yiunan tin di bisa. Den algun caso, mayornan ta tene cuenta cu e deseo di nan yiunan y ta ahusta e ora, basta ta un ora apropia. Ora mayornan ta tene cuenta cu loke nan yiunan ta pensa tocante cierto reglanan, e yiunan lo compronde e reglanan aki mihor y lo ta mas dispuesto pa obedece nan.

19. Ki esfuerso ancianonan por haci pa ta rasonabel mescos cu Jehova?

¹⁹ Ancianonan den congregacion tambe ta haci esfuerso pa nan ta rasonabel mescos cu Jehova. Nan ta tene cuenta cu e circunstancianan di nan rumannan den fe. Nan ta corda cu Jehova tabata aprecia hasta e ofrendanan cu e Israelitanan pober tabata ofrece. Awe tambe tin algun ruman den congregacion cu no por haci mucho den sirbishi kisas debi na nan salud of edad avansa. Kico si e rumannan stima aki ta sinti nan desanima pa motibo di nan limitacionnan? Wel, na un manera bondadoso, ancianonan por sigura nan cu Jehova ta stima nan pasobra nan ta duna lo mihor cu nan por.—Mar. 12:41-44.

20. Ser rasonabel ta nifica cu nos ta haci djis un tiki so den nos sirbishi na Dios? Splica.

²⁰ Logicamente ser rasonabel no ta nifica cu nos ta haci menos den nos sirbishi na Dios djis pa nos ta ‘bondadoso cu nos mes.’ (Mat. 16:22) Pues, nos no ta haci djis un tiki so mientras cu nos por haci mas y despues uza como pretexto cu ta rasonabel nos ta. Al contrario, nos tur tin cu “haci esfuerso vigoroso” pa apoya e Reino di Dios. (Luc. 13:24) Si bo wak bon, nos ta purba di tene dos principio den balansa. Di un banda, nos ta haci nos maximo esfuerso pa duna tur loke nos por den e sirbishi di Dios, y, di otro banda, nos ta corda cu Jehova nunca ta pidi mas di loke nos por duna. Ora nos ta dun’e lo mihor, nos por ta sigur cu e ta keda contento. No ta dushi pa sirbi un Doño asina rasonabel y cu tanto aprecio pa loke nos ta haci? Den e siguiente articulo, nos lo trata dos otro bunita caracteristica di Jehova su personalidad.—Sal. 73:28.