1, 2. Ashtaca ashtaca tiempota charishpaca ¿imatata Jehovapa amigocunaca rurapashun?

MONIKA shuti paniguca ninmi: “Ña casi 35 huatacunata cazarashca caimandaca ñuca cusaguhuanga ali alimi rijsirinchi. Shinapash, huaquin cosascunapica rijsirinajunchirami” nin. Tauca cusahuarmicunapash amigocunapashmi ashtaca huatacuna jipaca chaishuj imashina cashcata rijsinajunra.

² Pitapash ninanda alicachishpaca paita ashtahuan rijsingapami munanchi. Ñucanchipaca Jehová Diosmi ashtahuan ali amigo can. Shinapash Jehová Diostaca ima horapash na tucuipi rijsishunllu (Is. 40:28). Shamuj punllacunapica Jehovata ashtahuan rijsishpa juyangapajmi ashtaca ashtaca tiempota charishun (Ecl. 3:11).

3. ¿Imatata yachajupashun?

³ Ñaupa temaca yachachircami Jehová Diosca paipajman quimirichunmi munan, paica na ñavita ricushpallachu agllan nishpa. Cai temapica Jehová Dios na mitsa cashcata, gentecuna rurai ushashcatalla mañaj Dios cashcatami yachajushun. Shinami ‘Mandaj Diosca paipa rurashcacunata llaquishpa charij’ cashcata yachajushun (Sal. 145:9).

4. Na mitsajcunaca ¿imashinata can?

⁴ Na mitsajcunaca ¿imashinata can? Jesusca nircami, caradorcunami ‘carajpi japijcunatapash yali ninanda cushijun’ nishpa (Hech. 20:35). Jesús nishca shinaca, na mitsajcunaca cushijushpami shujcunataca paicunapa tiempohuan, fuerzahuan o ima charishcagucunahuanbash ayudan. Na mitsajcunaca valishca  cosascunata caranapipash na pensarinajunllu. Ashtahuangarin, imaguta carashpapash tucui shunguhuanmi caran (2 Corintios 9:​7, liingui). Jehová Diosllami imaguta cushpapash na mitsashpa cushca.

5. Jehová Diosca ¿imashinata ricuchishca na mitsashpa caraj Dios cashcata?

⁵ Jehová Diosca imagutapash na mitsashpa caraj Dios caimandami tucuicunahuan ali cashca. Paita na adorajcunamanbashmi carashca. Bibliapica ninmi, Taita Diosllatami indita, tamiataca alicunamanbash nalicunamanbash cun nishpa (Mat. 5:45). Chaimandami Jehová Diospi na crij gentecunataca apóstol Pabloca nirca, Taita Diosmi “tamiachishpa granocunatapash fucuchishpa, ñucanchiman ima aligutapash carashpa cushichijun” nishpa (Hech. 14:17). Imashinami ricupanchi, Jehová Diosca tucui gentecunamanmi imagutapash na mitsashpa cun (Luc. 6:35).

6, 7. a) Jehová Diosca ¿picunatata ashtahuanbachaca ayudan? b) Jehová Diosca ¿imashinata paita sirvijcunata ayudan? Shuj ejemplota nipai.

⁶ Jehová Diosca paita ali sirvijcunataca nimamanda na saquinllu. Chaimandami rey Davidca nirca: ‘Ñucapash huambrami carcani, ñami rucuyani. [Alita] ruraj runa jichui tucushcataca na ricushcanichu. Paipa huahuacuna micunata mañanajujtapash na ricushcanichu’ nishpa (Sal. 37:25). Cunan punllacunapi Jehovata sirvijcunapash shinallatami nishca. Shuj ejemplota ricupashun.

⁷ Caina huatacunapillami Nancy shuti precursora paniguca nirca: “Caya punlla arriendomanda pagangapami 66 dolarta ministijurcani. Maimanda japinataca na charircanichu. Chaimandami Jehová Diosman parlashca jipaca restaurantepi atindishpa trabajangapaj rircani. Chai punllacunaca na ashtaca gentecunachu restauranteman shamun carca. Shinapash, chai tutaca ashtaca gentecuna shamushpami ñucamanga atindishcamanda asha culquiguta saquihuarca. Ñucapa turnota tucushishca jipa culquita cuentajpica 66 dolarcunatami gentecunaca cuhuashcarca” nirca. Nancyca Jehová Diosmi ñuca minishtijushcatapacha cushpa ayudahuarca ninmi (Mat. 6:33).

8. Jehová Diosca ¿ima valishca regalotata carashca?

⁸ Jehová Diosca ñucanchita salvachun paipa Churita cai Alpaman cachamushpami shuj valishca regalotashna carashca. Jesusca nircami: “Taita Diosca, cai pachapi causajcunata ninanda juyashpami, paipaj shujlla Churita caramurca. Pipash paita crishpaca, na chingaita chingagringachu, ashtahuangarin causaitami causagringa” nishpa (Juan 3:16). Jesuspi feta charijcunaca shuj valishca regalota chasquijuj cuendami, unai unaicaman causana bendicionda chasquinga (Juan 10:10). Imashinami ricupanchi Jehová Diosca na mitsashpa caraj Diosmi can.

9. Na mitsashpa carangapaca ¿imashinata Jehovapa ejemplota catina capanchi?

⁹ ‘Ñucanchicuna cushijushpa causachunmi’, Taita Diosca ‘imagutapash ninanda caramujun’. Jehovapa ejemplota catishpami shujcunata cushichingapaca ‘imagutapash carana’ capanchi (1 Tim. 6:​17-19). Ñucanchi familiacunaman o imatapash minishtijujcunaman imagutapash carashpaca ninandami cushijushun (Deuteronomio 15:​7, liingui). Na mitsashpa carador cangapaca ¿imatata rurana canchi? Pipash imagutapash carajpica ñucanchipashmi shujcunaman imagutapash carana oportunidadta mascana canchi. Congregacionbica ashtaca huauquipanicunami na mitsashpa carangapaj esforzarin.

10. Na mitsashpa carador cangapaca ¿imatata rurana capanchi?

¹⁰ Shujcunata ayudangapaj, animangapaca ñucanchi tiempota, fuerzacunataca na mitsanachu canchi (Gál. 6:10). Chaimandami tapurina canchi: “¿Shujcunaca sintinllu paicunata uyangapaj munashpa tiempota llujchijta? Shuj trabajopi o imagutapash rurashpa ayudahuai nijpica ¿ari nishpa ayudanillachu? ¿Ima horallata ñucanchi familita o congregacionbi huauquipanicunataca alitami rurashcangui nishpa cushichishcani?” nishpa. Imagutapash na mitsashpa carador cashpaca, ashtahuanmi Jehová Diosmanga quimirishun. Ñucanchi familiacunahuanbash alimi llevarishun (Luc. 6:38; Prov. 19:17).

11. ¿Imashinata Jehová Diosmanga na mitsashpa carana capanchi?

¹¹ Jehová Diosmanbash na mitsashpami cuna canchi. Bibliapica ninmi: ‘Imalla alicunata carashpa Mandaj Diosta alicachingui’ nishpa (Prov. 3:9). Cai textopi ‘imalla alicuna’  nishpaca, Jehovata sirvingapaj ñucanchi tiempomanda, fuerzamanda o ñucanchi imalla charishcacunamandami parlajun. Jehovaman na mitsashpa caranataca huahuacunamanbashmi yachachinalla canchi. Juan shuti huauquiguca ninmi: “Tandanajui Huasipi contribuciongunataca ñucanchi huahuacuna churachunmi culquita cunchi. Jehová Diosman caranchi nishpami cushijushpa contribuciondaca churan”. Jehová Diosman uchilamandapacha caranata yachachijpica, viñashpapash Jehovaman caranataca na cungangachu (Prov. 22:6).

12. Usharinalla cajpi ari nijcunaca ¿imashinata can?

¹² Jehová Diosca alipacha Dios caimandami usharina cajpica ari ninlla (Tito 3:​1, 2). Usharinalla cajpi ari nijcunaca na paicunapa nishcahuanlla yalinllu. Shinallata, shujcunapi pensarishpami paicuna cushilla cachun munashpa, paicuna rurai ushashcatalla mandan. Ashtahuangarin, shujcuna ima nijta uyashpami usharinalla cajpica shujcunapa munashcata ari ninlla.

13, 14. a) Jehová Diosca ¿imashinata usharinalla cajpica ari ninlla? b) Lotpa ejemplopica ¿imatata Jehová Diosmandaca yachajupanchi?

¹³ Jehová Diosca paita sirvijcuna cushilla cachun munashpami ari ninalla cajpica ari ninlla. Lotpa ejemplota yaripashun. Sodoma, Gomorra llactacunata ña tucuchigrijushpami Taita Diosca Lotta mandarca, uchami urcucunaman calpana cangui nishpa. Shinapash, Lotca shuj ladoman richun saquihuai nishpami rogarca. Shina nishpaca Taita Diostami Lotca nijurca, quiquinba mandashcata cambiapai nishpa (Génesis 19:​17-20, liingui).

¹⁴ Lotmanda liishpaca ¿nachu yashcanchi, Lotca na shinlli feta charishpami o Taita Diosta na cazungapaj munashpami shina nishcanga nishpa? Jehová Diosca Lot maiman rijpipash cuidanmanllami carca. Shinaca Lotca na manllajunachu carca. Shinapash, Lot manllajujpimi Jehová Diosca Lottaca nirca, shuj llactaman rilla, can rigrijuj llactataca tucuchina cashpapash na tucuchishachu nishpa (Génesis 19:​21, 22, liingui). Imashinami Lotpa ejemplopi ricupanchi, Jehová Diosca Lotpi pensashpami usharinalla cajpica Lot nishcata rurarca.

15, 16. Israelitacunaman Leyta cushpaca ¿imashinata Jehová Diosca gentecuna cui ushashcatalla mañarca? (Página 13pi dibujota ricupangui.)

¹⁵ Shuj ejemplotapash ricupashun. Jehová Diosca gentecuna cui ushashcatallami mañan. Chaimandami israelitacunaman Leyta cushpaca nirca, pobre pobre caimanda Jehová Diosman na shuj llamaguta o shuj chivuguta cui ushashpaca ishcai uchilla urpigucunata o huahua palomagucunatami cunalla can nishpa. Cutin yapa pobregucunapacha caimanda chai animalgucunatallapash na cui ushashpaca, importante gentecunaman carana ‘ashtahuan ali jacutami’ cuna carca (Gén. 18:6). ¿Imamandata ashtahuan ali jacuta cuna carca? (Levítico 5:​7, 11, liingui.)

¹⁶ Ashaguta pensaripashunchi. Pobre pobre israelitacuna caimanda Jehovapa huasiman jacuta apanajushcanchiman. Charij israelitacuna Jehovapa huasiman huagrata apashpa yaicunajujta ricushpaca, pinganayachinchimanmi carca. Shinapash Jehová mandashca shinami ashtahuan ali jacuta apamujuni yashpaca na pinganayachinchimanllu. Ashtahuan ali jacuta apamungui nishpaca cashna nijuj cuendami Jehová Diosca nijurca: “Ama pinganayachichu, shujcunashna na apamui ushashpapash canga ashtahuan ali jacutami apamujungui”  nishpa. Imashinami ricupanchi, Jehová Diosca paipa sirvijcuna imata cui ushashcatallami mañarca (Sal. 103:14).

17. Jehová Diosca ¿imashina sirvichunda munan?

¹⁷ Jehová Diosca paita sirvijcuna rurai ushashcatalla chasquij Diosmi can. Chaita yachashpami ñucanchica ninanda cushijunchi (Col. 3:22). Italia llactamanda Constance shuti payalla paniguca nircami: “Ñucaca Jehová Diosmanda parlanatami ninanda alicachishcani. Chaimandami gentecunaman villachini, Bibliamanda yachachini. Huaquinbica ungushca caimanda Jehovata na ashtahuan sirvi ushani yashpami llaquirini. Shinapash, Jehová Diosca ñucata juyahuanmi, ashagutalla cujpipash Jehová Diosca cushijushpami chasquin yashpami ñucallata cushiyani” nishpa.

18. Taitamamacunaca ¿imashinata Jehovapa ejemplota catita ushapanguichi?

¹⁸ Imashinami yachajushcanchi, Jehová Diosca usharina cajpica ari nijlla o shujcuna imata rurai ushashcatalla mañaj Diosmi can. Shinaca ¿imashinata Jehovapa ejemplota catishun? Lotta yaripashun. Jehová Diosca Taita Dios cashpapash, Lot rogajujpica Lotta llaquishpami paita uyarca, pai imata rogashcatapash rurarca. Taitamamacunaca ¿imashinata Jehovapa ejemplota catishun? Huahuacuna imatapash mañajpica paicuna ima nijta uyashpa, usharijpica paicunapa munaita pactachinaca ¿nachu ali canman? La Atalaya del 1 de septiembre de 2007 revistapica nircami, huasipi imatapash mandagrijushpaca huaquin taitamamacunaca huahuacunapash parlachun saquinmi nishpa. Taitamamacuna caimandami huahuacunataca tutacuna ima horas huasiman chayana cashcata ninalla can. Shinapash, huahuacunahuan parlashpa, Bibliapi consejocunata na huashaman saquinajujpica, huasiman chayana horastaca usharijpica cambianallami can. Imatapash nara mandashpallata huahuacunahuan parlajpica huahuacunaca imamanda mandajushcata intindishpami cazun.

19. Ancianocunaca ¿imashinata Jehovapa ejemplota catita ushan?

¹⁹ Congregacionbi ancianocunapash Jehovapa ejemplota catishpami, huauquipanicuna rurai ushashcatalla ricushpa tratangapa esforzarin. Na cunganachu capanchi Jehová Diosca pobre pobre israelitacunapa cushcacunatapash cushijushpami chasquirca. Ñucanchi punllacunapipash, huaquin huauquipanigucunaca ungushcacuna o mayorllagucuna caimandami Diosta sirvinapica ashagutalla ruraita ushan. Ashagutallami rurani nishpa desanimarishca cajpica “Jehová Diosca juyanmi, quiquinguna ashagutalla rurai ushajpipash cushijushpami Jehová Diosca chasquin” nishpami ancianocunaca paicunata cushichina can (Mar. 12:​41-44).

20. Ñucanchi rurai ushashcatalla Jehová chasquijpipash ¿imatata na rurana capanchi?

²⁰ Ashagutallami rurai ushani nij tucushpaca na Jehová Diostaca quillanayachishpa sirvinachu canchi (Mat. 16:22). Ashtahuangarin Jehovata ashtahuan sirvingapami shinllita esforzarina canchi (Luc. 13:24). Jesusta catijcunaca Diosta ashtahuan sirvingapaj esforzarishpapash ñuchanchi rurai ushashcatalla Jehová Dios chasquijtaca na cunganachu canchi. Ñucanchi rurai ushashcatalla tucui shunguhuan rurajpica Jehová Diosca ninandami cushijun. Shinaca, agradicinata yachaj, ñuchanchi rurai ushashcatalla chasquij Diostaca ¿nachu cushijushpa sirvina capanchi? Shamuj temapica ishcai yuyaicunatapashmi Jehovamanda yachajupashun (Sal. 73:28).