1, 2. Sortu okasi den mati fu Yehovah abi?

„WI TROW sowan 35 yari kaba,” na so wan Kresten uma di nen Monika taki. „Mi nanga mi masra sabi makandra heri bun. Ma srefi baka ala den yari disi wi e kon sabi sani fu makandra di wi no ben sabi ete.” A no de fu taki dati na so a de tu nanga furu trowpaar èn sma di de mati fu makandra.

² Wi e prisiri te wi e kon sabi moro fu den sma di wi lobi. Ma a e gi wi moro prisiri te wi kon sabi Yehovah fu di en na a moro bun mati di wi kan abi. Noiti wi o kon sabi ala sani fu en (Rom. 11:33). Ma fu têgo wi o abi na okasi fu kon sabi moro fu den fasi fu Yehovah èn wi o kisi moro nanga moro warderi gi dati.—Preik. 3:11.

3. San wi o luku na ini na artikel disi?

³ Na ini a fosi artikel wi si taki a makriki fu taki nanga Yehovah èn taki a no lobi a wan sma moro a trawan. Disi yepi wi fu kisi moro warderi gi den fasi fu en. Now wi o go luku tu tra moi fasi fu Yehovah: A lobi fu gi sani èn a e fiti ensrefi. Na artikel disi o yepi wi fu frustan moro krin taki „Yehovah e du bun gi ala libisani èn a e sori sari-ati gi ala sani di a meki”.—Ps. 145:9.

4. O ten wi kan taki dati wan sma lobi fu gi sani?

⁴ O ten wi kan taki dati wan sma lobi fu gi sani? Wi kan feni a piki na ini Tori fu den apostel 20:35. Drape Yesus taki: „Wan sma sa de moro koloku te a e gi sani, leki te a e kisi sani.” Sobun, wan sma di lobi fu gi sani breiti fu gi en ten, en krakti nanga den sani di a abi fu yepi trawan. A no te wan sma e gi trawan bigi èn diri kado, dan a lobi fu gi sani, ma na te a e gi wan sani nanga en heri ati. (Leisi 2 Korentesma 9:7.) Nowan  sma de di lobi fu gi sani moro leki Yehovah, a „koloku Gado” fu wi.—1 Tim. 1:11.

5. Fa Yehovah e sori taki a lobi fu gi sma sani?

⁵ Fa Yehovah e sori taki a lobi fu gi sma sani? A e sorgu gi ala libisma, srefi den wan di no e dini en ete. Iya, „Yehovah e du bun gi ala libisani”. „A e meki a son fu en opo gi ogri sma èn gi bun sma. A e meki alen fadon gi sma di e du san reti èn gi sma di no e du san reti” (Mat. 5:45). Dati meki na apostel Paulus taigi den sma di no ben e bribi na ini Gado taki Yehovah ’du bun sani gi den. A gi den alen komoto fu hemel èn bun ten di e meki taki den abi bun furu nyanyan èn taki den e firi prisiri’ (Tori 14:17). A de krin taki Yehovah lobi fu gi sani na ala libisma.—Luk. 6:35.

6, 7. (a) Suma spesrutu Yehovah lobi sorgu? (b) Gi wan eksempre di e sori fa Gado e sorgu gi den futuboi fu en.

⁶ Yehovah breiti spesrutu fu sorgu gi den futuboi fu en. Kownu David ben taki: „Mi ben de wan yongu man, ma now mi kon owru. Toku mi no si noiti taki Gado libi wan reti-ati sma en wawan. Noiti mi no si taki den pikin fu en e waka e suku nyanyan” (Ps. 37:25). Furu Kresten si na ini den libi fa Yehovah sorgu gi den. Luku wan eksempre.

⁷ Wan tu yari pasa Nancy, wan furuten preikiman, ben abi wan problema. A taki: „Mi ben abi 66 dala fanowdu fu pai mi yuru-oso èn mi ben abi teleki a tra dei fu du dati. Mi no ben sabi pe mi ben o feni a moni. Dati meki mi begi Gado fu a tori, dan mi go na a restaurant pe mi ben e wroko. Drape sma gwenti gi a wrokoman di e tyari a nyanyan kon gi den, wan moni te den pai gi a nyanyan. A neti dati mi no ben fruwakti fu kisi furu moni fu di furu sma no gwenti kon na a restaurant na a ten dati. Ma toku furu sma kon a neti dati. Di mi kaba nanga mi wroko, mi teri a moni di mi kisi èn mi si taki a ben de 66 dala.” Nancy de seiker taki na Yehovah yepi en fu kisi soifri san a ben abi fanowdu.—Mat. 6:33.

8. San na a moro bigi kado di Yehovah gi wi?

⁸ Ala sma man kisi wini fu a moro bigi kado di Yehovah gi wi. San na a kado dati? Na a frulusu-ofrandi fu en Manpikin. Yesus ben taki: „Gado ben lobi grontapu so te, taki a gi en wan-enkri Manpikin, so taki ala sma di e bribi na ini en no sa dede, ma sa kisi têgo libi” (Yoh. 3:16). Dyaso a wortu „grontapu” abi fu du nanga libisma. Iya, ala sma abi na okasi fu kisi wini fu a moro bigi kado di Yehovah gi wi. Den sma di e sori bribi na ini Yesus o kisi têgo libi (Yoh. 10:10). Disi na a moro bigi buweisi taki Yehovah lobi fu gi sma sani.

9. Fa wi kan sori taki wi lobi fu gi sma sani neleki Yehovah?

 ⁹ Fa wi kan sori taki wi lobi fu gi sma sani neleki Yehovah? „Ala sani di e gi wi  prisiri, [Yehovah] e gi wi bogobogo.” Fu dati ede wi musu de ’klariklari fu prati san wi abi nanga trawan’ so taki den kan prisiri tu (1 Tim. 6:17-19). Wi breiti fu gi sani na wi mati nanga wi famiri èn wi breiti fu yepi den wan di de na nowtu. (Leisi Deuteronomium 15:7.) San kan yepi wi fu hori na prakseri taki wi musu de sma di lobi fu gi sani? Son Kresten e du disi: Ala leisi te den e kisi wan kado, den e suku wan okasi fu gi wan tra sma wan kado tu. Na ini a Kresten gemeente yu abi furu brada nanga sisa di abi a gwenti fu gi sma sani.

10. San na a moro bun fasi fa wi kan sori taki wi lobi fu gi sani?

¹⁰ Wan fu den moro bun fasi fa wi kan sori taki wi lobi fu gi sani, na te wi e gebroiki wi ten nanga wi krakti fu yepi trawan èn fu gi den deki-ati (Gal. 6:10). Fu man si efu wi e du disi trutru, wi kan aksi wisrefi: ’Trawan feni taki mi de klariklari fu arki den te den abi problema? Efu wan sma e aksi mi fu yepi en nanga wan sani, dan mi de klariklari fu yepi en te mi man? O ten ben de a lasti leisi di mi prèise wan sma na ini mi famiri noso wan brada noso sisa?’ Te wi „abi a gwenti fu gi sma sani”, dan wi o tron moro bun mati fu Yehovah èn wi o de moro bun nanga den mati fu wi.—Luk. 6:38; Odo 19:17.

11. Na sortu fasi wi kan sori taki wi lobi fu gi Yehovah sani?

 ¹¹ Wi kan kon abi a gwenti fu gi Yehovah sani. Bijbel e gi wi a rai disi: „Gi Yehovah grani nanga den gudu di yu abi” (Odo 3:9). „Den gudu” disi na wi ten, wi krakti, wi moni nanga tra sani di wi abi. Wi kan gebroiki den sani disi na ini a diniwroko fu Yehovah. Srefi yongu pikin kan leri fu gi sani na Yehovah. Wan papa di nen Jason e taki: „Te wi e gi bijdrage na ini a Kownukondre zaal, dan wi e meki den pikin fu wi  poti a moni. Den pikin e prisiri fu du dati èn den srefi e taki dati den e gi Yehovah wan sani.” Nofo tron a de so taki te pikin lobi fu gi Yehovah sani te den yongu ete, dan den o tan abi a gwenti disi te den kon bigi.—Odo 22:6.

12. San a wani taki dati wan sma e fiti ensrefi makriki na trawan?

¹² Wan tra moi fasi fu Yehovah na taki a e fiti ensrefi makriki na trawan. San disi wani taki? (Tit. 3:1, 2) Wan sma di e fiti ensrefi, no de nomonomo fu hori ensrefi na wan wèt awansi san e pasa. A sma dati no muilek, a no strak tumusi èn a no grofu. Na presi fu dati, so wan sma e taki noso du sani gi trawan na wan switi fasi èn a e hori a situwâsi fu den na prakseri. A de klariklari fu arki trawan èn te a fiti a e du san den wani awansi a abi fu kenki san ensrefi ben abi na prakseri.

13, 14. (a) Fa Yehovah e sori taki a e fiti ensrefi? (b) San wi e leri fu a fasi fa Gado fiti ensrefi na Lot?

¹³ Fa Yehovah e sori taki a e fiti ensrefi? Na wan switi fasi, a e hori den firi fu den futuboi fu en na prakseri èn nofo tron a e gi den na okasi fu du wan sani soleki fa den wani. Fu eksempre, luku san Yehovah du di a reti-ati man Lot aksi en wan sani. Di Yehovah taki dati a ben o pori den foto Sodom nanga Gomora, dan a taigi Lot krin taki a musu lowe go na den bergi. Wi no sabi fu san ede, ma Lot begi Yehovah fu meki a lowe go na wan tra presi. Prakseri a sani disi: Lot aksi Yehovah fu du wan tra sani leki san Gado ben abi na prakseri.—Leisi Genesis 19:17-20.

¹⁴ Te yu e leisi a tori dati, dan kande yu o feni taki Lot en bribi ben swaki noso taki a ben trangayesi. A no de fu taki dati awansi pe Lot ben o go, Yehovah ben kan sorgu taki Lot tan na libi èn dati meki Lot no ben abi fu frede noti. Ma toku Lot ben frede èn dati meki Yehovah hori den firi fu en na prakseri. A meki Lot lowe go na wan foto di a ben abi na prakseri fu pori biginbigin. (Leisi Genesis 19:21, 22.) A de krin taki Yehovah no strak tumusi, ma a e fiti ensrefi makriki na trawan.

15, 16. Fa a Wèt fu Moses ben sori taki Yehovah e fiti ensrefi? (Luku a prenki na a bigin fu na artikel.)

¹⁵ Luku wan tra eksempre di e sori taki Yehovah e fiti ensrefi. A Wèt fu Moses ben taki dati efu wan Israelsma ben pôti tumusi fu tyari wan pikin skapu noso wan krabita leki ofrandi, dan a ben kan gi tu stondoifi noso tu osodoifi. Ma san ben musu pasa te wan Israelsma ben pôti so te taki a no ben man tyari tu doifi srefi? Efu dati ben de so, dan Yehovah ben gi so wan pôti sma primisi fu gi pikinso blon. Ma Yehovah no ben wani ala sortu blon. A Wèt ben taki dati a sma ben musu tyari „fini blon” leki ofrandi. Na a blon disi sma ben e gebroiki te den ben kisi spesrutu fisitiman (Gen. 18:6). Fu san ede disi ben de prenspari?—Leisi Lefitikus 5:7, 11.

¹⁶ Kon meki wi taki dati yu na wan pôti Israelsma. Now yu e doro na a tabernakel fu tyari pikinso blon leki ofrandi, ma yu e si taki tra gudu sma e tyari kaw nanga skapu kon. Kande yu e syen fu di yu e tyari blon nomo leki ofrandi. Ma dan yu e memre taki Yehovah e si na ofrandi fu yu leki wan prenspari sani tu. Fu san ede dati prenspari gi en? We, a Wèt fu Yehovah e taki dati yu musu tyari „fini blon”, a moro bun blon di de. A de neleki Yehovah e taigi yu: ’Mi e frustan taki yu no man gi so furu leki den tra sma, ma mi sabi tu taki yu e gi mi a moro bun sani di yu abi.’ Iya, Yehovah e sori taki a e fiti ensrefi fu di a e hori na prakseri san den futuboi fu en man du noso san den no man du èn na ini sortu situwâsi den de.—Ps. 103:14.

17. O ten Yehovah e feni na anbegi fu wi bun?

  ¹⁷ Wi e kisi deki-ati fu di wi sabi taki Yehovah e fiti ensrefi èn taki a feni na anbegi fu wi bun te wi e du dati nanga wi heri ati (Kol. 3:23). Wan owru sisa fu Italiakondre di nen Constance, ben taki: „Ala ten mi lobi fu taki nanga trawan fu mi Mekiman. Dati meki mi e tan preiki èn hori Bijbelstudie. Son leisi mi e sari taki mi no man du moro, fu di mi gosontu no de so bun. Ma mi e frustan taki Yehovah sabi san mi no man du, taki a lobi mi èn taki a breiti nanga san mi man du.”

18. Fa papa nanga mama kan teki na eksempre fu Yehovah?

¹⁸ Fa wi kan fiti wisrefi na trawan neleki Yehovah? Prakseri baka san Yehovah du di Lot aksi en wan sani. Yehovah ben abi a makti fu taigi Lot san a musu du, ma toku a arki Lot na wan switi fasi di Lot taigi en fa a e firi. Gado fiti ensrefi èn a du san Lot aksi en. Efu yu na wan papa noso mama, san yu kan du? Yu kan teki na eksempre fu Yehovah? Yu kan arki san yu pikin abi fu taki èn te a fiti yu kan du san den wani. Fa yu kan du dati? A Waktitoren fu 1 september 2007 e taki dati son papa nanga mama e gi den pikin fu den na okasi fu taki wan sani te den e bosroiti na sortu wèt den pikin musu hori densrefi na oso. Fu eksempre, papa nanga mama kan bosroiti taki den pikin fu den musu de na oso na wan spesrutu yuru. Ma den kan meki den pikin srefi taki o lati den wani kon na oso èn fu san ede den wani kon na oso na a ten dati. Baka dati, a papa nanga mama kan taigi den pikin o lati den wani taki den pikin musu kon na oso èn den musu taigi den tu fu san ede den feni a yuru dati moro bun. Son leisi papa nanga mama kan gi den pikin primisi fu kon na oso na a yuru di den wani, solanga den e hori densrefi na den gronprakseri fu Bijbel. Papa nanga mama kon si taki te den e hori na prakseri san den pikin e denki fu den wèt di den poti na ini na oso, dan a o de moro makriki gi den pikin fu frustan den wèt èn fu gi yesi na den.

19. Fa owruman kan du muiti fu fiti densrefi na trawan neleki Yehovah?

¹⁹ Gemeente owruman e du muiti tu fu fiti densrefi na trawan neleki Yehovah fu di den e hori a situwâsi fu den brada nanga sisa na prakseri. Memre taki Yehovah ben breiti nanga den ofrandi di den pôti Israelsma ben e tyari. Na so a de tu taki son brada nanga sisa no man du so furu na ini a preikiwroko, kande fu di den gosontu no de so bun noso fu di den kon owru. Ma fa a de te den lobi brada nanga sisa disi lasi-ati fu di den no man du so furu? Na wan switi fasi den owruman kan gi den deki-ati èn den kan taigi den taki Yehovah lobi den fu di den e du ala san den man.—Mark. 12:41-44.

20. Te wi e fiti wisrefi, dan a wani taki dati wi musu du en safrisafri na ini a diniwroko? Tyari disi kon na krin.

²⁰ Te wan sma e fiti ensrefi, dan a no wani taki dati a musu du en safrisafri na ini a diniwroko fu Yehovah, soso fu di a wani du ensrefi wan bun (Mat. 16:22). Wi no wani teki en safrisafri efu wi man du moro. Na presi fu dati wi alamala musu „du ala muiti” fu horibaka gi a Kownukondre (Luk. 13:24). Wi musu hori tu sani na prakseri: Na a wan sei wi e du ala san wi man na ini a preikiwroko, ma na a tra sei wi e hori na prakseri taki Yehovah noiti no e aksi wi fu du moro leki san wi man. Te wi e du ala san wi man, dan wi kan de seiker taki a o prisiri nanga dati. Gado abi warderi gi wi èn a de klariklari fu fiti ensrefi na wi. Wi breiti srefisrefi taki wi e dini so wan Gado, a no so? Na ini a tra artikel wi o luku tu tra moi fasi fu Yehovah.—Ps. 73:28.